ພຣະອົງຊົງຟື້ນໂດຍອຳນາດແຫ່ງການປິ່ນປົວຂອງພຣະອົງ:

ພວກເຮົາກໍມີໄຊຊະນະຢ່າງເຫລືຶອລົ້ນ

ໂດຍ ແອວເດີ ແພທຣິກ ຄີໂຣນ

ຈາກຝ່າຍປະທານສາວົກເຈັດສິບ

ພຣະເຢຊູໄດ້ເອົາຊະນະການຂົ່ມເຫັງຂອງໂລກນີ້ເພື່ອຈະປະທານອຳນາດໃຫ້ແກ່ທ່ານ ບໍ່ພຽງແຕ່ຈະລອດຊີວິດເທົ່ານັ້ນ ແຕ່ໃນມື້ໜຶ່ງ, ຜ່ານທາງພຣະອົງ, ທ່ານຈະເອົາຊະນະ ແລະ ແມ່ນແຕ່ມີໄຊຊະນະ.

ມາຣິນ, ຂ້າພະເຈົ້າແມ່ນແອວເດີ ຮໍແລນ, ແລະ ເລື່ອງແຮ່ງຊິຮ້າຍໄປໜ້າຈາກນີ້.

ພວກເຮົາກໍມີໄຊຊະນະຢ່າງເຫລືຶອລົ້ນ

ເຮົາທຸກຄົນກໍສົນໃຈເລື່ອງລາວການລອດຊີວິດ. ເຮົາໄດ້ຍິນນິທານເລື່ອງນັກສຳຫລວດໃຈເດັດ ແລະ ຜູ້ຄົນທຳມະດານຳອີກ ຜູ້ທີ່ສາມາດຊ່ວຍຕົວເອງໃຫ້ລອດຊີວິດ ໃນເມື່ອທຸກສິ່ງເບິ່ງຄືວ່າຈະເປັນໄປບໍ່ໄດ້, ແລະ ເຮົາກໍຈະຖາມຕົວເອງວ່າ, “ເຮົາຈະເຮັດສິ່ງນັ້ນໄດ້ບໍ່?”

ຂ້າພະເຈົ້າກໍຄິດເຖິງນັກສຳຫລວດຊື່ ເອີແນສ໌ ແຊກໂກຕັນ ແລະ ລູກເຮືອ HMS Endurance, ຂອງເພິ່ນທັນທີ, ຊຶ່ງເຮືອຫລົ້ມຢູ່ຂົ້ວໂລກອານຕາຕິກທີ່ເຕັມດ້ວຍນ້ຳແຂງ ແລະ ແລ້ວໄດ້ຄ້າງຢູ່ເກາະຮ້າງເປັນເວລາສອງປີ. ຄວາມເປັນຜູ້ນຳຢ່າງບໍ່ທຳມະດາ ແລະ ການແກ້ໄຂບັນຫາທີ່ບໍ່ຍອມແພ້ຂອງທ່ານແຊກໂກຕັນໄດ້ຊ່ວຍຊີວິດຂອງລູກເຮືອຂອງເພິ່ນໄວ້, ເຖິງແມ່ນໃນສະພາບການທີ່ຮ້າຍແຮງທີ່ສຸດກໍຕາມ.

ແລ້ວຂ້າພະເຈົ້າໄດ້ຄິດເຖິງກຸ່ມນັກບິນອາວະກາດ ອາໂປໂລ 13 ທີ່ໄດ້ມຸ້ງໜ້າໄປສູ່ດວງຈັນ! ແຕ່ໄພພິບັດໄດ້ເກີດຂຶ້ນ ເມື່ອຖັງແອອົກຊີໄດ້ລະເບີດ, ແລະ ພາລະກິດນັ້ນຕ້ອງຖືກຢຸດຕິ. ໂດຍບໍ່ມີແອອົກຊີພຽງພໍ, ກຸ່ມນັກອາວະກາດ ແລະ ກຸ່ມຄວບຄຸມການບິນໄດ້ຈັດຫາທາງແກ້ໄຂຢ່າງຄ່ອງແຄ້ວກະທັນຫັນ ແລະ ໄດ້ນຳນັກອາວະກາດທັງສາມກັບລົງມາແຜ່ນດິນໂລກຢ່າງປອດໄພ.

ຂ້າພະເຈົ້າກໍພິສະຫວົງກັບການລອດຊີວິດທີ່ໜ້າອັດສະຈັນຂອງບຸກຄົນ ແລະ ຄອບຄົວທີ່ໄດ້ເປັນຜູ້ເຄາະຮ້າຍໂດຍສົງຄາມ, ຖືກຄຸມຂັງຢູ່ໃນສູນ, ຫລື ຜູ້ທີ່ເປັນຊາວອົບພະຍົບ, ຜູ້ທີ່ລອດຊີວິດໄດ້ຢ່າງກ້າຫານທີ່ຮັກສາຄວາມຫວັງເອົາໄວ້ສຳລັບເພື່ອນຜູ້ທົນທຸກດ້ວຍກັນ, ຜູ້ທີ່ໄດ້ແບ່ງປັນຄວາມດີງາມຢູ່ຕໍ່ໜ້າຄວາມໂຫດຮ້າຍ, ແລະ ຜູ້ທີ່ສາມາດຊ່ວຍຄົນອື່ນໃຫ້ອົດທົນຕໍ່ໄປໄດ້ອີກມື້ໜຶ່ງ.

ທ່ານ ຫລື ຂ້າພະເຈົ້າຈະລອດຊີວິດໄດ້ ໃນສະຖານະການສາຫັດເຫລົ່ານີ້ບໍ່?

ບາງທີທ່ານບາງຄົນຈະລອດ, ແຕ່ເມື່ອກ່າວເຖິງເລື່ອງຂອງຜູ້ລອດຊີວິດ ແລະ ຈິດວິນຍານຂອງທ່ານກໍຮ້ອງອອກມາວ່າ ທ່ານກຳລັງ ມີຊີວິດຕາມເລື່ອງລາວການລອດຊີວິດຢູ່ ດຽວນີ້ ໃນຖານະຜູ້ເຄາະຮ້າຍຂອງການຂົ່ມເຫັງ, ການລະເລີຍ, ການກັ່ນແກ້ງ, ຄວາມຮຸນແຮງໃນຄອບຄົວ, ຫລື ການທົນທຸກທໍລະມານໃດໆ. ທ່ານກໍຢູ່ໃນທ່າມກາງຄວາມພະຍາຍາມຈະໃຫ້ລອດຊີວິດຂອງທ່ານເອງ ໃນສະພາບການທີ່ຮູ້ສຶກເໝືອນກັບເຮືອຫລົ້ມ ຫລື ພາລະກິດທີ່ຖືກຢຸດຕິທັນທີທັນໃດ. ທ່ານຈະໄດ້ຮັບການກູ້ຊີວິດບໍ; ທ່ານຈະຜ່ານຜ່າເລື່ອງລາວການລອດຊີວິດຂອງທ່ານເອງບໍ່?

ຄຳຕອບນັ້ນກໍວ່າ ແມ່ນແລ້ວ. ທ່ານຈະລອດຊີວິດໄດ້. ແທ້ຈິງແລ້ວ ທ່ານຖືກຊ່ວຍກູ້ຊີວິດແລ້ວ; ທ່ານຖືກຊ່ວຍໃຫ້ລອດແລ້ວ—ໂດຍພຣະອົງຜູ້ທີ່ໄດ້ທົນທຸກທໍລະມານອັນດຽວກັນກັບທີ່ທ່ານກຳລັງທົນທຸກຢູ່ ແລະ ໄດ້ອົດທົນກັບຄວາມເຈັບປວດທີ່ທ່ານອົດທົນຢູ່.¹ ພຣະເຢຊູໄດ້ເອົາຊະນະການຂົ່ມເຫັງຂອງໂລກນີ້² ເພື່ອຈະປະທານອຳນາດໃຫ້ແກ່ທ່ານ ບໍ່ພຽງແຕ່ຈະ ລອດຊີວິດ ເທົ່ານັ້ນ ແຕ່ໃນມື້ໜຶ່ງ, ຜ່ານທາງພຣະອົງ, ທ່ານຈະເອົາຊະນະ ແລະ ແມ່ນແຕ່ ມີໄຊຊະນະ—ເໜືອຄວາມເຈັບປວດ, ຄວາມທຸກ, ຄວາມກັງວົນ, ແລະ ເຫັນຄວາມສະຫງົບສຸກເຂົ້າມາແທນ.

ອັກຄະສາວົກໂປໂລ ໄດ້ຖາມວ່າ:

“ຜູ້ໃດຈະແຍກພວກເຮົາຈາກຄວາມຮັກຂອງພຣະຄຣິດໄດ້? ຄວາມທຸກລຳບາກ, ຫລື ຄວາມທໍລະມານຈິດໃຈ, ຫລື ການຂົ່ມເຫັງ, ຫລື ການອຶດຢາກ, ຫລື ການເປືອຍກາຍ, ຫລື ການອັນຕະລາຍ, ຫລື ການຖືກຄົມດາບ? …

“ແຕ່ໃນເຫດການ ທັງປວງ ເຫລົ່ານີ້ ພວກເຮົາ ກໍມີໄຊຊະນະຢ່າງເຫລືອລົ້ນ ໂດຍທາງພຣະອົງຜູ້ຊົງຮັກພວກເຮົາທັງຫລາຍນັ້ນ.”³

ຄຳສັນຍາຕໍ່ອິດສະຣາເອນແຫ່ງພັນທະສັນຍາ

ທ່ານຄົງຈື່ຕອນປະທານຣະໂຊ ເອັມ ແນວສັນ ໄດ້ປະກາດຄຳເຊື້ອເຊີນດັ່ງຕໍ່ໄປນີ້ໃນກອງປະຊຸມໃຫຍ່ສາມັນ. ເພິ່ນໄດ້ກ່າວວ່າ: “ຂະນະທີ່ທ່ານສຶກສາພຣະຄຳພີຂອງທ່ານ … , ຂ້າພະເຈົ້າຂໍຊຸກຍູ້ທ່ານໃຫ້ຂຽນຄຳສັນຍາທັງໝົດຂອງພຣະຜູ້ເປັນເຈົ້າລົງໄວ້ ອັນທີ່ພຣະອົງຈະກະທຳເພື່ອອິດສະຣາເອນແຫ່ງພັນທະສັນຍາ. ຂ້າພະເຈົ້າຄິດວ່າທ່ານຈະປະຫລາດໃຈ!”⁴

ຕໍ່ໄປນີ້ຄືຄຳສັນຍາທີ່ມີພະລັງ ແລະ ໃຫ້ການປອບໂຍນສອງສາມຢ່າງທີ່ຄອບຄົວຂອງພວກເຮົາໄດ້ພົບເຫັນ. ໃຫ້ວາດພາບເຫັນວ່າພຣະຜູ້ເປັນເຈົ້າກຳລັງກ່າວຖ້ອຍຄຳເຫລົ່ານີ້ຕໍ່ທ່ານ—ຕໍ່ ທ່ານ ຜູ້ທີ່ກຳລັງລອດຊີວິດຢູ່—ເພາະວ່າຖ້ອຍຄຳເຫລົ່ານີ້ ແມ່ນ ສຳລັບທ່ານ:

ຢ່າສູ່ຢ້ານກົວ.⁵

ເຮົາຮູ້ເຫັນຄວາມທົນທຸກຂອງພວກເຈົ້າທຸກຢ່າງ, ແລະ ເຮົາຈຶ່ງລົງມາຊ່ວຍກູ້ພວກເຈົ້າໃຫ້ພົ້ນ.⁶

ເຮົາຈະບໍ່ປະຖິ້ມພວກເຈົ້າ.⁷

ນາມຂອງເຮົາຢູ່ກັບພວກເຈົ້າ, ແລະ ເຫລົ່າທູດຂອງເຮົາຈະຮັບຜິດຊອບດູແລພວກເຈົ້າ.⁸

ເຮົາຈະເຮັດການອັດສະຈັນໃນທ່າມກາງພວກເຈົ້າ.⁹

ຍ່າງໄປກັບເຮົາ; ຮຽນຮູ້ຈາກເຮົາ; ເຮົາຈະໃຫ້ພວກເຈົ້າໄດ້ຮັບຄວາມເຊົາເມື່ອຍ.¹⁰

ເຮົາຢູ່ໃນທ່າມກາງພວກເຈົ້າ.¹¹

ພວກເຈົ້າເປັນຂອງເຮົາ.¹²

ຕໍ່ຜູ້ທີ່ກຳລັງຢູ່ລອດຊີວິດ

ດ້ວຍຄວາມຮັບຮອງເຫລົ່ານັ້ນຢູ່ໃນໃຈ, ຂ້າພະເຈົ້າຢາກກ່າວໂດຍກົງຕໍ່ຜູ້ທີ່ຮູ້ສຶກຄືກັນກັບວ່າ ບໍ່ມີທາງອອກເລີຍໃນເລື່ອງລາວການລອດຊີວິດຂອງເຂົາເຈົ້າເອງ ເນື່ອງຈາກຄວາມເຈັບປວດທີ່ເກີດຈາກການກະທຳທີ່ໂຫດຫ້ຽມຂອງຄົນອື່ນ. ຖ້າຫາກນີ້ແມ່ນເລື່ອງລາວການລອດຊີວິດຂອງທ່ານ, ພວກເຮົາກໍຮ້ອງໄຫ້ນຳພວກທ່ານ. ພວກເຮົາປາດຖະໜາໃຫ້ທ່ານເອົາຊະນະຄວາມສັບສົນ, ຄວາມອັບອາຍ, ຄວາມຢ້ານກົວ, ແລະ ພວກເຮົາຫວັງໃຫ້ທ່ານ ມີໄຊຊະນະ ຜ່ານທາງພຣະເຢຊູຄຣິດ.

ຈາກຜູ້ເຄາະຮ້າຍ ເຖິງຜູ້ລອດຊີວິດ ເຖິງຜູ້ມີໄຊຊະນະ

ຖ້າຫາກທ່ານໄດ້ປະສົບກັບການຂົ່ມເຫັງ, ຄວາມຮຸນແຮງ, ຫລື ການກົດຂີ່ຂົ່ມເຫັງໃດໆ, ທ່ານອາດຄິດວ່າ ເຫດການເຫລົ່ານີ້ແມ່ນເປັນຄວາມຜິດຂອງທ່ານ ແລະ ວ່າທ່ານສົມຄວນຈະອົດທົນກັບຄວາມອັບອາຍ ແລະ ຄວາມຮູ້ສຶກຜິດທີ່ທ່ານຮູ້ສຶກຢູ່. ທ່ານອາດເຄີຍມີຄວາມຄິດດັ່ງຕໍ່ໄປນີ້:

ເຮົາອາດປ້ອງກັນມັນໄດ້.
ພຣະເຈົ້າບໍ່ຮັກເຮົາອີກແລ້ວ.
ບໍ່ມີໃຜຈະຮັກເຮົາອີກ.
ເຮົາຖືກທຳລາຍເກີນທີ່ຈະສ້ອມແປງ.
ການຊົດໃຊ້ຂອງພຣະຜູ້ຊ່ວຍໃຫ້ລອດກໍນຳໃຊ້ໄດ້ກັບຄົນອື່ນ ແຕ່ບໍ່ແມ່ນສຳລັບເຮົາ.

ຄວາມຄິດ ແລະ ຄວາມຮູ້ສຶກຜິດໆເຫລົ່ານີ້ອາດໄດ້ເປັນສິ່ງທີ່ກີດກັນການສະແຫວງຫາຄວາມຊ່ວຍເຫລືອຈາກຄອບຄົວ, ໝູ່ເພື່ອນ, ຜູ້ນຳ, ຫລື ຜູ້ຊ່ຽວຊານ, ແລະ ສະນັ້ນ ທ່ານຈຶ່ງໄດ້ດີ້ນລົນຢູ່ຄົນດຽວ. ຖ້າຫາກທ່ານໄດ້ຊອກຫາຄວາມຊ່ວຍເຫລືອຈາກຜູ້ຄົນທີ່ທ່ານໄວ້ວາງໃຈ, ທ່ານອາດຍັງຕໍ່ສູ້ຢູ່ກັບຄວາມຄິດອັບອາຍ ແລະ ແມ່ນແຕ່ການລັງກຽດຕົວເອງ. ຜົນກະທົບຂອງເຫດການເຫລົ່ານີ້ ສາມາດຄົງຢູ່ຕໍ່ໄປເປັນເວລາຫລາຍປີ. ທ່ານຫວັງວ່າມື້ໜຶ່ງ ທ່ານຈະຮູ້ສຶກດີຂຶ້ນ, ແຕ່ມື້ນັ້ນຍັງບໍ່ທັນມາເຖິງເທື່ອ.

ການຂົ່ມເຫັງນັ້ນບໍ່ໄດ້ເປັນ, ບໍ່ເປັນ, ແລະ ຈະບໍ່ເປັນຄວາມຜິດຂອງທ່ານ, ບໍ່ວ່າຜູ້ທີ່ຂົ່ມເຫັງ ຫລື ຄົນອື່ນອາດໄດ້ບອກທ່ານໃນທາງກົງກັນຂ້າມກໍຕາມ. ເມື່ອທ່ານໄດ້ເປັນຜູ້ເຄາະຮ້າຍຂອງຄວາມໂຫດຫ້ຽມ, ການຮ່ວມເພດກັບຄົນໃນຄອບຄົວດຽວກັນ, ຫລື ການບິດເບືອນອື່ນໆ, ທ່ານບໍ່ໄດ້ເປັນຜູ້ທີ່ຈຳເປັນຕ້ອງກັບໃຈ; ທ່ານບໍ່ໄດ້ເປັນຜູ້ຮັບຜິດຊອບ.

ທ່ານບໍ່ໄດ້ມີຄ່າຄວນໜ້ອຍລົງ ຫລື ມີຄຸນຄ່າໜ້ອຍລົງ ຫລື ຖືກຮັກໜ້ອຍລົງໃນຖານະມະນຸດຊາດ, ຫລື ໃນຖານະທິດາ ຫລື ບຸດຂອງພຣະເຈົ້າ, ເພາະສິ່ງທີ່ຄົນອື່ນໄດ້ເຮັດຕໍ່ທ່ານ.

ພຣະເຈົ້າບໍ່ເຫັນວ່າທ່ານເປັນຄົນທີ່ໜ້າລັງກຽດໃນເວລານີ້, ທັງພຣະອົງບໍ່ເຄີຍເຫັນທ່ານແບບນັ້ນ. ບໍ່ວ່າແມ່ນຫຍັງໄດ້ເກີດຂຶ້ນກັບທ່ານ, ພຣະອົງ ບໍ່ໄດ້ ອັບອາຍໃນຕົວທ່ານ ຫລື ຜິດຫວັງໃນຕົວທ່ານ. ພຣະອົງຮັກທ່ານໃນວິທີທາງທີ່ທ່ານຍັງບໍ່ທັນຄົ້ນພົບເທື່ອ. ແລະ ທ່ານ ຈະ ຄົ້ນພົບມັນເມື່ອທ່ານໄວ້ວາງໃຈໃນຄຳສັນຍາຂອງພຣະອົງ ແລະ ຂະນະທີ່ທ່ານຮຽນຮູ້ທີ່ຈະເຊື່ອພຣະອົງ ເມື່ອພຣະອົງກ່າວວ່າ ທ່ານ “ມີຄ່າຫລາຍ ສຳລັບ [ພຣະອົງ].”¹³

ຄຸນຄ່າຂອງທ່ານບໍ່ໄດ້ຖືກກຳນົດໂດຍສິ່ງໂຫດຮ້າຍ ທີ່ຖືກກະທຳຕໍ່ທ່ານ. ໃນຄວາມຈິງທີ່ຮຸ່ງໂລດ, ທ່ານຖືກກຳນົດໂດຍເອກະລັກທີ່ເປັນຢູ່ຊົ່ວນິລັນດອນຂອງທ່ານ ໃນຖານະບຸດ ຫລື ທິດາຂອງພຣະເຈົ້າ, ແລະ ໂດຍຄວາມຮັກທີ່ສົມບູນແບບ ແລະ ເປັນນິດຂອງພຣະຜູ້ສ້າງຂອງທ່ານ ແລະ ຄຳເຊື້ອເຊີນໃຫ້ຫາຍດີຢ່າງສົມບູນຄົບຖ້ວນ.

ເຖິງແມ່ນວ່າມັນອາດເບິ່ງຄືວ່າເປັນໄປບໍ່ໄດ້, ຮູ້ສຶກວ່າຈະເປັນໄປບໍ່ໄດ້, ການປິ່ນປົວ ສາມາດ ມີມາຜ່ານທາງການອັດສະຈັນຂອງອານຸພາບທີ່ໄຖ່ຂອງການຊົດໃຊ້ຂອງພຣະເຢຊູຄຣິດ, ທີ່ຊົງຟື້ນ “[ໂດຍອຳນາດແຫ່ງການປິ່ນປົວຂອງພຣະອົງ].”¹⁴

ພຣະຜູ້ຊ່ວຍໃຫ້ລອດທີ່ມີເມດຕາ, ທີ່ມີໄຊຊະນະເໜືອຄວາມມືດມົນ ແລະ ຄວາມຊົ່ວຮ້າຍ, ມີອຳນາດທີ່ຈະແກ້ໄຂຄວາມຜິດ ທຸກ ຢ່າງ, ຊຶ່ງເປັນຄວາມຈິງທີ່ໃຫ້ຊີວິດສຳລັບຜູ້ທີ່ຖືກກະທຳຜິດໂດຍຄົນອື່ນ.¹⁵

ຂໍໃຫ້ຮູ້ໄວ້ວ່າ ພຣະຜູ້ຊ່ວຍໃຫ້ລອດໄດ້ສະເດັດລົງຕ່ຳກວ່າ ທຸກ ສິ່ງ, ແມ່ນແຕ່ສິ່ງທີ່ໄດ້ເກີດຂຶ້ນກັບທ່ານ. ເປັນເພາະສິ່ງນັ້ນ, ພຣະອົງຈຶ່ງຮູ້ວ່າຄວາມສະທ້ານຢ້ານກົວ ແລະ ຄວາມອັບອາຍນັ້ນຮູ້ສຶກແບບໃດກັນແນ່.¹⁶ ຈາກສ່ວນເລິກຂອງການເສຍສະລະຊົດໃຊ້ຂອງພຣະອົງ, ພຣະຜູ້ຊ່ວຍໃຫ້ລອດໄດ້ປະທານຄວາມຫວັງທີ່ທ່ານຄິດວ່າສູນເສຍໄປຕະຫລອດການ, ຄວາມເຂັ້ມແຂງທີ່ທ່ານເຊື່ອວ່າທ່ານບໍ່ມີວັນຄອບຄອງໄດ້, ແລະ ການປິ່ນປົວທີ່ທ່ານຄິດບໍ່ເຖິງວ່າຈະເປັນໄປໄດ້.

ພຶດຕິກຳທີ່ຂົ່ມເຫັງແມ່ນຖືກປະນາມຢ່າງຈະແຈ້ງໂດຍພຣະຜູ້ເປັນເຈົ້າ ແລະ ສາດສະດາຂອງພຣະອົງ

ບໍ່ມີທີ່ເລີຍສຳລັບການຂົ່ມເຫັງໃດໆ ບໍ່ວ່າຈະເປັນທາງ—ຮ່າງກາຍ, ເພດ, ອາລົມ, ຫລື ວາຈາ—ຢູ່ໃນບ້ານເຮືອນ, ປະເທດ, ຫລື ວັດທະນະທຳໃດໆທັງນັ້ນ. ບໍ່ມີສິ່ງໃດທີ່ພັນລະຍາ, ລູກ, ຫລື ສາມີ ເຮັດ ຫລື ເວົ້າ ທີ່ຈະເຮັດໃຫ້ເຂົາເຈົ້າ “ສົມຄວນ” ຈະຖືກທຸບຕີ. ບໍ່ມີຜູ້ໃດ, ໃນປະເທດ ຫລື ວັດທະນະທຳໃດໆ, ເຄີຍ “ຮ້ອງຂໍ” ການຮຸກຮານ ຫລື ຄວາມຮຸນແຮງຈາກຄົນອື່ນທີ່ມີສິດອຳນາດ ຫລື ຄົນທີ່ໃຫຍ່ກວ່າ ແລະ ແຂງແຮງກວ່າ.

ຜູ້ຄົນທີ່ຂົ່ມເຫັງ ແລະ ສະແຫວງຫາທີ່ຈະເຊື່ອງຊ້ອນບາບທີ່ຮ້າຍແຮງຂອງພວກເຂົາອາດໜີພົ້ນໄດ້ເປັນເວລາຊົ່ວຄາວ. ແຕ່ພຣະຜູ້ເປັນເຈົ້າ, ຜູ້ທີ່ເຫັນທຸກສິ່ງຮູ້ຈັກການກະທຳ ແລະ ຄວາມນຶກຄິດ ແລະ ເຈດຕະນາຂອງໃຈ.¹⁷ ພຣະອົງເປັນພຣະເຈົ້າແຫ່ງຄວາມຍຸດຕິທຳ, ແລະ ດ້ວຍຄວາມຍຸດຕິທຳແຫ່ງສະຫວັນຂອງພຣະອົງ ພຣະອົງຈະລົງໂທດຢ່າງສົມຄວນ.¹⁸

ໜ້າອັດສະຈັນແທ້ໆແມ່ນ, ພຣະຜູ້ເປັນເຈົ້າກໍຍັງເປັນພຣະເຈົ້າແຫ່ງຄວາມເມດຕານຳອີກ ຕໍ່ຜູ້ທີ່ກັບໃຈຢ່າງແທ້ຈິງ. ຜູ້ຂົ່ມເຫັງ—ລວມທັງຜູ້ທີ່ຕົນເອງກໍຖືກຂົ່ມເຫັງມາກ່ອນ—ຜູ້ທີ່ສາລະພາບ, ປະຖິ້ມບາບຂອງເຂົາເຈົ້າ, ແລະ ເຮັດ ທຸກສິ່ງ ທີ່ເຂົາເຈົ້າສາມາດເຮັດໄດ້ເພື່ອຊົດເຊີຍ ແລະ ທົດແທນ, ກໍເຂົ້າເຖິງການໃຫ້ອະໄພ ຜ່ານທາງການອັດສະຈັນຂອງການຊົດໃຊ້ຂອງພຣະຄຣິດ.

ສຳລັບຜູ້ທີ່ຖືກກ່າວຫາຜິດ, ຂໍ້ກ່າວຫາຜິດໆເຫລົ່ານີ້ກໍນຳຄວາມທຸກທໍລະມານ ແລະ ໂທດທີ່ຮ້າຍແຮງຂອງມັນມານຳ. ແຕ່ເຂົາເຈົ້າກໍໄດ້ຮັບພອນຄືກັນ ໂດຍການທົນທຸກທໍລະມານຂອງພຣະຜູ້ຊ່ວຍໃຫ້ລອດແທນເຂົາເຈົ້າ ແລະ ຄວາມຮູ້ທີ່ວ່າ ໃນທີ່ສຸດຄວາມຈິງນັ້ນກໍຈະໄຊຊະນະ.

ແຕ່ຜູ້ຂົ່ມເຫັງທີ່ບໍ່ກັບໃຈຈະຢືນຢູ່ຕໍ່ພຣະພັກຂອງພຣະຜູ້ເປັນເຈົ້າ ເພື່ອຮັບຜິດຊອບອາດຊະຍາກຳທີ່ຊົ່ວຮ້າຍຂອງພວກເຂົາ.

ພຣະຜູ້ເປັນເຈົ້າເອງກໍຊັດເຈນແທ້ໆ ໃນການປະນາມຂອງພຣະອົງເຖິງການຂົ່ມເຫັງໃນທຸກຮູບແບບວ່າ: “ຖ້າຜູໃດເປັນຕົ້ນເຫດ ພາໃຫ້ເດັກນ້ອຍຄົນໜຶ່ງໃນບັນດາເດັກນ້ອຍເຫລົ່ານີ້ຕົກໃນບາບ … , ແມ່ນຈະເອົາຫີນໂມ້ແປ້ງກ້ອນໃຫຍ່ຜູກຄໍຜູ້ນັ້ນ ແລະ ຖິ້ມລົງໃນທະເລເລິກເສຍກໍດີກວ່າ.”¹⁹

ສະຫລຸບ

ເພື່ອນທີ່ຮັກແພງທັງຫລາຍ ຜູ້ທີ່ໄດ້ເຈັບປວດຢ່າງສາຫັດ—ແລະ ສໍາລັບເລື່ອງນັ້ນ, ໃຜກໍຕາມທີ່ໄດ້ແບກຫາບຄວາມບໍ່ຍຸດຕິທໍາຂອງຊີວິດ—ທ່ານກໍສາມາດມີການເລີ່ມຕົ້ນໃໝ່ ແລະ ຊື່ນຊົມໄດ້. ໃນສວນເຄັດເຊມາເນ ແລະ ຢູ່ທີ່ພູຫົວກະໂຫລກ, ພຣະເຢຊູ, “ໄດ້ຮັບເອົາ … ຄວາມທຸກໃຈ ແລະ ຄວາມທຸກທໍລະມານ ທັງປວງ ທີ່ທ່ານ ແລະ ຂ້າພະເຈົ້າ ເຄີຍ ປະສົບ,”²⁰ ແລະ ພຣະອົງໄດ້ເອົາຊະນະມັນທັງໝົດ! ດ້ວຍອ້ອມແຂນຍື່ນອອກໄປ, ພຣະຜູ້ຊ່ວຍໃຫ້ລອດສະເໜີມອບຂອງປະທານແຫ່ງການປິ່ນປົວໃຫ້ແກ່ທ່ານ. ດ້ວຍຄວາມກ້າຫານ, ດ້ວຍຄວາມອົດທົນ, ແລະ ດ້ວຍຈຸດສຸມທີ່ຊື່ສັດຢູ່ທີ່ພຣະອົງ, ອີກບໍ່ດົນທ່ານຈະສາມາດຍອມຮັບເອົາຂອງປະທານນີ້ຢ່າງເຕັມທີ່. ທ່ານສາມາດປ່ອຍວາງຄວາມເຈັບປວດຂອງທ່ານ ແລະ ປະມັນໄວ້ຢູ່ທີ່ພຣະບາດຂອງພຣະອົງ.

ພຣະຜູ້ຊ່ວຍໃຫ້ລອດທີ່ອ່ອນໂຍນຂອງທ່ານໄດ້ປະກາດວ່າ, “ຂະໂມຍມາກໍພຽງແຕ່ຈະລັກ ຈະຂ້າ ແລະ ທຳລາຍເທົ່ານັ້ນ: ຝ່າຍເຮົາໄດ້ມາເພື່ອ [ທ່ານ] ຈະໄດ້ຊີວິດ ແລະ [ທ່ານ] ຈະໄດ້ຊີວິດຢ່າງຄົບບໍລິບູນ.”²¹ ທ່ານເປັນຜູ້ລອດຊີວິດ, ທ່ານສາມາດຫາຍດີ, ແລະ ທ່ານສາມາດໄວ້ວາງໃຈວ່າ ດ້ວຍອຳນາດ ແລະ ພຣະຄຸນຂອງພຣະເຢຊູຄຣິດ, ທ່ານຈະເອົາຊະນະ ແລະ ມີໄຊຊະນະ.

ພຣະເຢຊູຊ່ຽວຊານເປັນພິເສດ ໃນສິ່ງທີ່ເບິ່ງຄືວ່າຈະສຳເລັດບໍ່ໄດ້. ພຣະອົງໄດ້ສະເດັດມາທີ່ນີ້ເພື່ອເຮັດໃຫ້ສິ່ງທີ່ເປັນໄປບໍ່ໄດ້ ເປັນໄດ້, ປະກາດອິດສະລະພາບແກ່ຄົນທັງຫລາຍທີ່ຖືກຈຳຈອງ, ຄົນຕາບອດຈະເຫັນຮຸ່ງອີກ, ແລະ ປົດປ່ອຍຜູ້ຖືກກົດຂີ່ໃຫ້ເປັນອິດສະລະ.²² ແລະ ພຣະອົງກະທຳສິ່ງເຫລົ່ານີ້ໄດ້ດີຫລາຍ. ແທ້ຈິງແລ້ວ, ພຣະອົງກະທຳໄດ້ຢ່າງສົມບູນແບບທີ່ສຸດ. ໃນພຣະນາມຂອງພຣະເຢຊູຄຣິດ, ພຣະຜູ້ປິ່ນປົວຂອງເຮົາ, ອາແມນ.

ສຳລັບລາຍລະອຽດເພີ່ມເຕີມ ແລະ ແຫລ່ງຂໍ້ມູນຕ່າງໆ, ໃຫ້ເບິ່ງ “Abuse” ໃນພາກ Life Help ທີ່ ChurchofJesusChrist.org ແລະ ໃນແອັບຫ້ອງສະໝຸດພຣະກິດຕິຄຸນ.