ການສັ່ງສອນພຣະກິດຕິຄຸນແຫ່ງສັນຕິສຸກ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ເຮົາມີໜ້າທີ່ຮັບຜິດຊອບທີ່ສັກສິດ ທີ່ຈະແບ່ງປັນອຳນາດ ແລະ ສັນຕິສຸກຂອງພຣະເຢຊູຄຣິດໃຫ້ກັບທຸກຄົນ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍຕ້ອນຮັບທ່ານສູ່ກອງປະຊຸມໃຫຍ່ສາມັນ! ຂ້າພະເຈົ້າໄດ້ລໍຖ້າວັນນີ້ດ້ວຍຄວາມກະຕືລືລົ້ນທີ່ສຸດ. ຂ້າພະເຈົ້າອະທິຖານເພື່ອທ່ານ ທຸກວັນ. ຂ້າພະເຈົ້າຍັງໄດ້ອະທິຖານວ່າ ກອງປະຊຸມນີ້ຈະເປັນເວລາແຫ່ງການຟື້ນຟູທາງວິນຍານສຳລັບທ່ານແຕ່ລະຄົນ.

ນັບຕັ້ງແຕ່ກອງປະຊຸມເທື່ອແລ້ວນີ້, ຄວາມຫຍຸ້ງຍາກໃນໂລກກໍຍັງມີຢູ່ຢ່າງຕໍ່ເນື່ອງ. ການລະບາດທົ່ວໂລກກໍຍັງກະທົບກະເທືອນຊີວິດຂອງເຮົາຢູ່. ບັດນີ້ໂລກສັ່ນສະເທືອນດ້ວຍການຂັດແຍ້ງ ທີ່ສ້າງຄວາມຢ້ານກົວໃຫ້ກັບຊາຍ, ຍິງ, ແລະ ເດັກນ້ອຍຜູ້ບໍລິສຸດຫລາຍລ້ານຄົນ.

ບັນດາສາດສະດາໄດ້ເຫັນລ່ວງໜ້າເຖິງວັນເວລາຂອງເຮົາ, ວ່າມັນຈະມີສົງຄາມ ແລະ ຂ່າວເລົ່າລືເລື່ອງສົງຄາມ ແລະ ເມື່ອທັງແຜ່ນດິນໂລກຈະສັບສົນວຸ້ນວາຍ ແລະ ໃຈຂອງມະນຸດຈະທໍ້ແທ້.¹ ໃນຖານະຜູ້ຕິດຕາມພຣະເຢຊູຄຣິດ, ພວກເຮົາອ້ອນວອນຜູ້ນຳຂອງປະເທດຕ່າງໆໃຫ້ຫາທາງແກ້ໄຂຄວາມແຕກຕ່າງຂອງພວກເພິ່ນຢ່າງສັນຕິ. ພວກເຮົາຂໍໃຫ້ຜູ້ຄົນໃນທຸກແຫ່ງຫົນອະທິຖານເພື່ອຄົນຂັດສົນ, ເຮັດຈົນສຸດຄວາມສາມາດທີ່ເຂົາເຈົ້າເຮັດໄດ້ເພື່ອຊ່ວຍຄົນຕົກທຸກໄດ້ຍາກ, ແລະ ສະແຫວງຫາຄວາມຊ່ວຍເຫລືອຂອງພຣະຜູ້ເປັນເຈົ້າ ໃນການຢຸດຕິການຂັດແຍ້ງທີ່ຮ້າຍແຮງໃດໆ.

ອ້າຍເອື້ອຍນ້ອງທັງຫລາຍ, ບໍ່ມີເວລາໃດທີ່ຕ້ອງການພຣະກິດຕິຄຸນຂອງພຣະເຢຊູຄຣິດຫລາຍກວ່າໃນເວລານີ້. ການຂັດແຍ້ງລະເມີດທຸກສິ່ງທີ່ພຣະຜູ້ຊ່ວຍໃຫ້ລອດຍຶດຖື ແລະ ສິດສອນ. ຂ້າພະເຈົ້າຮັກອົງພຣະເຢຊູຄຣິດເຈົ້າ ແລະ ເປັນພະຍານວ່າພຣະກິດຕິຄຸນຂອງພຣະອົງເປັນການແກ້ໄຂວິທີດຽວ ເທົ່ານັ້ນ ສຳລັບສັນຕິສຸກ. ພຣະກິດຕິຄຸນຂອງພຣະອົງເປັນພຣະກິດຕິຄຸນແຫ່ງສັນຕິສຸກ.²

ພຣະກິດຕິຄຸນຂອງພຣະອົງເປັນຄຳຕອບດຽວ ເທົ່ານັ້ນ ເມື່ອຫລາຍຄົນໃນໂລກຕົກຕະລຶງດ້ວຍຄວາມຢ້ານກົວ.³ ສິ່ງນີ້ເນັ້ນເຖິງຄວາມຈຳເປັນຮີບດ່ວນສຳລັບເຮົາທີ່ຈະເຮັດຕາມຄຳແນະນຳຂອງພຣະຜູ້ເປັນເຈົ້າຕໍ່ສານຸສິດຂອງພຣະອົງໃຫ້ “ໄປ ທົ່ວ ໂລກ ປະກາດຂ່າວປະເສີດແກ່ມະນຸດສະໂລກ ທັງຫລາຍ.”⁴ ເຮົາມີໜ້າທີ່ຮັບຜິດຊອບທີ່ສັກສິດ ທີ່ຈະແບ່ງປັນອຳນາດ ແລະ ສັນຕິສຸກຂອງພຣະເຢຊູຄຣິດໃຫ້ກັບທຸກຄົນທີ່ຈະຮັບຟັງ ແລະ ທຸກຄົນທີ່ຈະໃຫ້ພຣະເຈົ້າໄຊຊະນະໃນຊີວິດຂອງເຂົາ.

ທຸກຄົນທີ່ໄດ້ເຮັດພັນທະສັນຍາກັບພຣະເຈົ້າ ໄດ້ສັນຍາວ່າຈະດູແລຄົນອື່ນ ແລະ ຮັບໃຊ້ຄົນຂັດສົນ. ເຮົາສາມາດສະແດງສັດທາໃນພຣະເຈົ້າ ແລະ ພ້ອມສະເໝີທີ່ຈະຕອບຄົນທີ່ຖາມວ່າ “[ເຮົາ] ມີເຫດຜົນປະການໃດຈຶ່ງມີຄວາມຫວັງຢ່າງນັ້ນ.”⁵ ເຮົາແຕ່ລະຄົນມີບົດບາດໃນການເຕົ້າໂຮມອິດສະຣາເອນ.

ມື້ນີ້ຂ້າພະເຈົ້າຂໍຢືນຢັນຢ່າງໜັກແໜ້ນອີກຄັ້ງວ່າ ພຣະຜູ້ເປັນເຈົ້າໄດ້ຂໍໃຫ້ຊາຍໜຸ່ມທີ່ມີຄ່າຄວນ ແລະ ສາມາດ ທຸກຄົນ ກຽມພ້ອມ ແລະ ຮັບໃຊ້ເຜີຍແຜ່. ສຳລັບຊາຍໜຸ່ມໄພ່ພົນຍຸກສຸດທ້າຍ, ການຮັບໃຊ້ເຜີຍແຜ່ເປັນໜ້າທີ່ຮັບຜິດຊອບຂອງຖານະປະໂລຫິດ. ພວກເຈົ້າຊາຍໜຸ່ມທັງຫລາຍໄດ້ຖືກສະຫງວນໄວ້ສຳລັບເວລານີ້ ເມື່ອການເຕົ້າໂຮມອິດສະຣາເອນກຳລັງເກີດຂຶ້ນ. ຂະນະທີ່ພວກເຈົ້າຮັບໃຊ້ເຜີຍແຜ່, ພວກເຈົ້າຈະມີບົດບາດອັນສຳຄັນ ໃນເຫດການທີ່ບໍ່ເຄີຍມີມາກ່ອນນີ້!

ສຳລັບເອື້ອຍນ້ອງຄົນໜຸ່ມ ແລະ ສາມາດ, ການເຜີຍແຜ່ກໍເປັນໂອກາດທີ່ມີພະລັງຄືກັນ, ແຕ່ ເລືອກເຮັດໄດ້. ພວກເຮົາ ຮັກ ບັນດາເອື້ອຍນ້ອງຜູ້ສອນສາດສະໜາ ແລະ ຕ້ອນຮັບເຂົາເຈົ້າຢ່າງສຸດໃຈ. ສິ່ງທີ່ພວກເຈົ້າມີສ່ວນຮ່ວມໃນວຽກງານນີ້ແມ່ນສະຫງ່າງາມຫລາຍ! ຈົ່ງອະທິຖານເພື່ອຈະໄດ້ຮູ້ວ່າພຣະຜູ້ເປັນເຈົ້າຢາກໃຫ້ພວກເຈົ້າຮັບໃຊ້ເຜີຍແຜ່ຫລືບໍ່, ແລະ ພຣະວິນຍານບໍລິສຸດຈະຕອບຈິດໃຈ ແລະ ຄວາມຄິດຂອງພວກເຈົ້າ.

ເພື່ອນໜຸ່ມທີ່ຮັກແພງທັງຫລາຍ, ພວກເຈົ້າແຕ່ລະຄົນມີຄວາມສຳຄັນທີ່ສຸດຕໍ່ພຣະຜູ້ເປັນເຈົ້າ. ພຣະອົງໄດ້ເກັບ ແລະ ສະຫງວນພວກເຈົ້າໄວ້ເພື່ອຊ່ວຍເຕົ້າໂຮມອິດສະຣາເອນ. ການຕັດສິນໃຈຂອງພວກເຈົ້າທີ່ຈະຮັບໃຊ້ເຜີຍແຜ່, ບໍ່ວ່າຈະເປັນການເລາະເຜີຍແຜ່ ຫລື ການຮັບໃຊ້ບໍລິການ, ຈະເປັນພອນໃຫ້ແກ່ພວກເຈົ້າ ແລະ ຄົນອື່ນໆຢ່າງຫລວງຫລາຍ. ພວກເຮົາກໍຕ້ອນຮັບຄູ່ສາມີພັນລະຍາອາວຸໂສນຳອີກ ເພື່ອຮັບໃຊ້ເມື່ອສະຖານະການຂອງເຂົາເຈົ້າເອື້ອອຳນວຍ. ການຮັບໃຊ້ຂອງເຂົາເຈົ້າມີຄ່າຢ່າງທົດແທນບໍ່ໄດ້.

ຜູ້ສອນສາດສະໜາ ທຸກຄົນ ສິດສອນ ແລະ ເປັນພະຍານເຖິງພຣະຜູ້ຊ່ວຍໃຫ້ລອດ. ຄວາມມືດທາງວິນຍານຢູ່ໃນໂລກເຮັດໃຫ້ຄວາມສະຫວ່າງຂອງພຣະເຢຊູຄຣິດຈຳເປັນຕ້ອງຮຸ່ງແຈ້ງຫລາຍກວ່າທີ່ຜ່ານມາ. ທຸກຄົນສົມຄວນທີ່ຈະໄດ້ຮັບໂອກາດໃຫ້ຮູ້ກ່ຽວກັບພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ. ທຸກຄົນສົມຄວນທີ່ຈະຮູ້ວ່າ ເຂົາສາມາດພົບຄວາມຫວັງ ແລະ ສັນຕິສຸກທີ່ “ເກີນຄວາມເຂົ້າໃຈທັງໝົດ.”⁶

ຂໍໃຫ້ກອງປະຊຸມນີ້ເປັນເວລາແຫ່ງສັນຕິສຸກ ແລະ ເປັນງານລ້ຽງທາງວິນຍານສຳລັບທ່ານ. ຂໍໃຫ້ທ່ານຈົ່ງສະແຫວງຫາ ແລະ ໄດ້ຮັບການເປີດເຜີຍສ່ວນຕົວລະຫວ່າງກອງປະຊຸມພາກຕ່າງໆເຫລົ່ານີ້, ຂ້າພະເຈົ້າອະທິຖານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.