ເສັ້ນທາງແຫ່ງພັນທະສັນຍາ: ຫົນທາງສູ່ຊີວິດນິລັນດອນ

ໂດຍ ແອວເດີ ອາເດຢິນກາ ເອ ໂອເຮດີຣານ

ແຫ່ງສາວົກເຈັດສິບ

ເສັ້ນທາງໄປສູ່ຄວາມດີພ້ອມຄືເສັ້ນທາງແຫ່ງພັນທະສັນຍາ, ແລະ ພຣະເຢຊູຄຣິດຄືຈຸດສູນກາງຂອງພິທີການ ແລະ ພັນທະສັນຍາທັງໝົດ.

ກະສັດອົງໜຶ່ງຜູ້ເຕັມໄປດ້ວຍອຳນາດປາດຖະໜາໃຫ້ລູກຊາຍຂອງເພິ່ນປົກຄອງອານາຈັກແຫ່ງໜຶ່ງຂອງເພິ່ນ. ເຈົ້າຊາຍຕ້ອງໄດ້ຮຽນຮູ້ ແລະ ເຕີບໃຫຍ່ໃນສະຕິປັນຍາຈຶ່ງຈະໄດ້ນັ່ງຄອງບັນລັງ. ມື້ໜຶ່ງ, ກະສັດໄດ້ພົບກັບເຈົ້າຊາຍ ແລະ ໄດ້ບອກກ່ຽວກັບແຜນການຂອງເພິ່ນ. ພວກເພິ່ນໄດ້ເຫັນດີກັນວ່າເຈົ້າຊາຍຈະຕ້ອງໄປຕ່າງເມືອງ ແລະ ຮຽນຮູ້ປະສົບການ. ລາວຈະຕ້ອງໄດ້ປະເຊີນໜ້າກັບການທ້າທາຍພ້ອມທັງເພີດເພີນກັບສິ່ງດີໆທີ່ມີຢູ່ທີ່ນັ້ນ. ແລ້ວກະສັດໄດ້ສົ່ງລາວໄປເມືອງນັ້ນ, ບ່ອນທີ່ເຈົ້າຊາຍຖືກຄາດໝາຍໃຫ້ພິສູດຄວາມຊື່ສັດຂອງລາວຕໍ່ກະສັດ ແລະ ສະແດງໃຫ້ເຫັນວ່າລາວເໝາະສົມທີ່ຈະໄດ້ຮັບສິດທິພິເສດ ແລະ ໜ້າທີ່ຮັບຜິດຊອບທີ່ກະສັດມີໄວ້ສຳລັບລາວ. ເຈົ້າຊາຍເປັນອິດສະລະທີ່ຈະເລືອກຮັບເອົາ ຫລື ບໍ່ຮັບເອົາສິດທິພິເສດ ແລະ ໜ້າທີ່ຮັບຜິດຊອບນີ້, ມັນຂຶ້ນກັບຄວາມປາດຖະໜາ ແລະ ຄວາມຊື່ສັດຂອງລາວ. ຂ້າພະເຈົ້າແນ່ໃຈວ່າ ທ່ານຄົງຢາກຮູ້ວ່າມີຫຍັງເກີດຂຶ້ນກັບເຈົ້າຊາຍ. ລາວໄດ້ກັບໄປເພື່ອຮັບເອົາອານາຈັກບໍ?

ອ້າຍເອື້ອຍນ້ອງທີ່ຮັກແພງ, ເຮົາແຕ່ລະຄົນເປັນເຈົ້າຊາຍ ຫລື ເຈົ້າຍິງ. ເຮົາຖືກສົ່ງມາສູ່ຄວາມເປັນມະຕະໂດຍພຣະບິດາເທິງສະຫວັນທີ່ຊົງຮັກ ເພື່ອມີຄວາມສຸກກັບພອນຂອງຮ່າງກາຍ ທີ່ຈະກາຍເປັນອະມະຕະໂດຍຜ່ານທາງການຊົດໃຊ້ ແລະ ການຟື້ນຄືນພຣະຊົນຂອງພຣະເຢຊູຄຣິດ. ເຮົາຖືກຄາດຫວັງໃຫ້ກຽມຕົວເພື່ອກັບຄືນໄປຫາທີ່ປະທັບຂອງພຣະເຈົ້າໂດຍການພິສູດວ່າ ເຮົາຈະ “ເຮັດທຸກສິ່ງທັງປວງສິ່ງໃດກໍຕາມທີ່ພຣະຜູ້ເປັນເຈົ້າອົງເປັນພຣະເຈົ້າ [ຂອງເຮົາ] ຈະບັນຊາ [ເຮົາ] ຫລືບໍ່” (ອັບຣາຮາມ 3:25).

ເພື່ອຊ່ວຍເຫລືອເຮົາ, ພຣະຜູ້ຊ່ວຍໃຫ້ລອດໄດ້ສະເດັດມາເພື່ອໄຖ່ເຮົາ ແລະ ສະແດງໃຫ້ເຮົາເຫັນຫົນທາງທີ່ຈະກັບຄືນໄປຫາພຣະເຈົ້າ. ລູກໆຂອງພຣະເຈົ້າໄດ້ຖືກເຊື້ອເຊີນໃຫ້ມາຫາພຣະຜູ້ຊ່ວຍໃຫ້ລອດ ແລະ ດີພ້ອມໃນພຣະອົງ. ໃນພຣະຄຳພີ, ເຮົາເຫັນຄຳເຊື້ອເຊີນໃຫ້ເຮົາມາຫາພຣະຜູ້ເປັນເຈົ້າຊ້ຳແລ້ວຊ້ຳອີກຫລາຍກວ່າ 90 ຄັ້ງ, ແລະ ຫລາຍກວ່າເຄິ່ງໜຶ່ງເປັນຄຳເຊື້ອເຊີນສ່ວນຕົວຈາກພຣະຜູ້ເປັນເຈົ້າພຣະອົງເອງ. ການຍອມຮັບຄຳເຊື້ອເຊີນຂອງພຣະຜູ້ຊ່ວຍໃຫ້ລອດໝາຍເຖິງການຮັບເອົາພິທີການຕ່າງໆຂອງພຣະອົງ ແລະ ຮັກສາພັນທະສັນຍາຂອງເຮົາກັບພຣະອົງ. ພຣະເຢຊູຄຣິດ “ເປັນທາງນັ້ນ, ເປັນຄວາມຈິງ, ແລະ ເປັນຊີວິດ” (ໂຢຮັນ 14:6), ແລະ ພຣະອົງໄດ້ເຊື້ອເຊີນເຮົາ “ທັງໝົດໃຫ້ເຂົ້າມາຫາພຣະອົງ ແລະ ຮັບສ່ວນພຣະກະລຸນາທິຄຸນຂອງພຣະອົງ; ແລະ ພຣະອົງບໍ່ປະຕິເສດຜູ້ໃດທີ່ມາຫາພຣະອົງເລີຍ” (2 ນີໄຟ 26:33).

ການຮຽນຮູ້ ແລະ ການສິດສອນພຣະກິດຕິຄຸນຂອງເຮົາ ເຮັດໃຫ້ການປ່ຽນໃຈເຫລື້ອມໃສຂອງເຮົາເລິກເຊິ່ງຕໍ່ພຣະບິດາເທິງສະຫວັນ ແລະ ພຣະເຢຊູຄຣິດ ແລະ ຊ່ວຍໃຫ້ເຮົາກາຍເປັນເໝືອນດັ່ງພວກພຣະອົງຫລາຍຂຶ້ນ. ເຖິງແມ່ນວ່າທຸກຢ່າງບໍ່ໄດ້ຖືກເປີດເຜີຍກ່ຽວກັບ “ເວລາ ແລະ ວິທີທີ່ຊັດເຈນ ທີ່ພອນແຫ່ງຄວາມສູງສົ່ງ [ຈະຖືກ] ມອບໃຫ້,” ແຕ່ເຖິງຢ່າງໃດກໍຕາມ ເຮົາກໍໝັ້ນໃຈໃນພອນເຫລົ່ານັ້ນ (M. Russell Ballard, “Hope in Christ,” Liahona, May 2021, 55).

ແອວມາຜູ້ເປັນມະຫາປະໂລຫິດ, ຂະນະທີ່ສິດສອນຢູ່ໃນແຜ່ນດິນເຊຣາເຮັມລາ, ໄດ້ເລົ່າເຖິງຄຳເຊື້ອເຊີນຂອງພຣະເຢຊູຄຣິດ:

“ຈົ່ງເບິ່ງ, ພຣະອົງໄດ້ສົ່ງຄຳເຊີນມາຫາມະນຸດທັງປວງ, ເພາະພຣະພາຫາແຫ່ງຄວາມເມດຕາຂອງພຣະອົງໄດ້ເດ່ອອກມາຫາພວກເຂົາ, ແລະ ພຣະອົງໄດ້ກ່າວວ່າ: ຈົ່ງກັບໃຈເຖີດ, ແລະ ເຮົາຈະຮັບເຈົ້າໄວ້.

“ແທ້ຈິງແລ້ວ, ພຣະອົງໄດ້ກ່າວວ່າ: ຈົ່ງມາຫາເຮົາ ແລະ ເຈົ້າຈະຮັບໝາກໄມ້ຈາກຕົ້ນໄມ້ແຫ່ງຊີວິດ” (ແອວມາ 5:33–34).

ພຣະຜູ້ຊ່ວຍໃຫ້ລອດພຣະອົງເອງເຊື້ອເຊີນເຮົາໃຫ້ມາຫາພຣະອົງ ແລະ ຮັບເອົາແອກຂອງພຣະອົງ ເພື່ອເຮົາຈະໄດ້ພັກຜ່ອນຢູ່ໃນໂລກທີ່ວຸ້ນວາຍນີ້ (ເບິ່ງ ມັດທາຍ 11:28–29). ເຮົາມາຫາພຣະຄຣິດໂດຍ “ການໃຊ້ສັດທາໃນພຣະອົງ, ກັບໃຈທຸກວັນ, ເຮັດພັນທະສັນຍາກັບພຣະເຈົ້າຂະນະທີ່ເຮົາຮັບພິທີການແຫ່ງຄວາມລອດ ແລະ ຄວາມສູງສົ່ງ, ແລະ ອົດທົນຈົນເຖິງທີ່ສຸດໂດຍການຮັກສາພັນທະສັນຍາເຫລົ່ານັ້ນ” (General Handbook: Serving in The Church of Jesus Christ of Latter-day Saints, 1.2.1, ChurchofJesusChrist.org). ເສັ້ນທາງໄປສູ່ຄວາມດີພ້ອມຄືເສັ້ນທາງແຫ່ງພັນທະສັນຍາ, ແລະ ພຣະເຢຊູຄຣິດຄືຈຸດສູນກາງຂອງພິທີການ ແລະ ພັນທະສັນຍາທັງໝົດ.

ກະສັດເບັນຢາມິນໄດ້ສິດສອນວ່າ ຍ້ອນພັນທະສັນຍາທີ່ເຮົາໄດ້ເຮັດ, ເຮົາກາຍເປັນບຸດ ແລະ ທິດາຂອງພຣະຄຣິດ, ຜູ້ທີ່ໃຫ້ກຳເນີດເຮົາທາງວິນຍານ, ແລະ ພາຍໃຕ້ຫົວໜ້າອົງນີ້ເຮົາໄດ້ຖືກເຮັດໃຫ້ເປັນອິດສະລະ, “ບໍ່ມີນາມອື່ນໃດໃຫ້ໄວ້ ຊຶ່ງໂດຍນາມນັ້ນຄວາມລອດຈະມາເຖິງໄດ້” (ເບິ່ງ ໂມໄຊຢາ 5:7–8). ເຮົາໄດ້ຮັບຄວາມລອດເມື່ອເຮົາອົດທົນຈົນເຖິງທີ່ສຸດໂດຍ “ການທຳຕາມຕົວຢ່າງຂອງພຣະບຸດຂອງພຣະເຈົ້າຜູ້ຊົງພຣະຊົນຢູ່”(2 ນີໄຟ 31:16). ນີໄຟໄດ້ແນະນຳວ່າທຸກສິ່ງທຸກຢ່າງບໍ່ໄດ້ຖືກເຮັດໂດຍພຽງແຕ່ການເຂົ້າໄປໃນທາງຄັບ ແລະ ແຄບເທົ່ານັ້ນ; ເຮົາຕ້ອງ “ມຸ້ງໜ້າດ້ວຍຄວາມໝັ້ນຄົງໃນພຣະຄຣິດ, ໂດຍມີຄວາມສະຫວ່າງຢ່າງບໍລິບູນຂອງຄວາມຫວັງ, ແລະ ຄວາມຮັກຂອງພຣະເຈົ້າ ແລະ ຂອງມະນຸດທັງປວງ” (ເບິ່ງ 2 ນີໄຟ 31:19–20).

ຄຳສອນຂອງພຣະຄຣິດຊ່ວຍໃຫ້ເຮົາພົບເຫັນ ແລະ ຢູ່ໃນເສັ້ນທາງແຫ່ງພັນທະສັນຍາ, ແລະ ພຣະກິດຕິຄຸນໄດ້ຖືກຈັດແຈງໄວ້ເພື່ອວ່າພອນແຫ່ງຄຳສັນຍາຂອງພຣະຜູ້ເປັນເຈົ້າຈະໄດ້ຮັບໂດຍຜ່ານທາງພິທີການ ແລະ ພັນທະສັນຍາອັນສັກສິດ. ສາດສະດາຂອງພຣະເຈົ້າ, ປະທານຣະໂຊ ເອັມ ແນວສັນ ໄດ້ຕັກເຕືອນເຮົາໃນການຖ່າຍທອດສົດຄັ້ງວັນທີ 16 ເດືອນມັງກອນ, 2018 ຂອງເພິ່ນວ່າ “ຈົ່ງຢູ່ໃນເສັ້ນທາງແຫ່ງພັນທະສັນຍາ. ຄວາມຕັ້ງໃຈຂອງທ່ານ ທີ່ຈະເຮັດຕາມພຣະຜູ້ຊ່ວຍໃຫ້ລອດ ໂດຍການເຮັດພັນທະສັນຍານຳພຣະອົງ ແລະ ແລ້ວຮັກສາພັນທະສັນຍາເຫລົ່ານັ້ນ ຈະເປີດປະຕູຮັບເອົາພອນທຸກປະການທາງວິນຍານ ແລະ ຮັບເອົາສິດທິພິເສດ ທີ່ມີໃຫ້ຊາຍ, ຍິງ, ແລະ ເດັກນ້ອຍ ໃນທຸກແຫ່ງຫົນ. … ທີ່ສຸດສຳລັບເຮົາແຕ່ລະຄົນພະຍາຍາມໄປເຖິງ ແມ່ນການຮັບເອົາພະລັງ ຢູ່ໃນບ້ານຂອງພຣະຜູ້ເປັນເຈົ້າ, ໄດ້ຜະນຶກເຂົ້າກັບຄອບຄົວ, ຊື່ສັດຕໍ່ພັນທະສັນຍາ ທີ່ໄດ້ເຮັດຢູ່ໃນພຣະວິຫານ ຊຶ່ງເຮັດໃຫ້ເຮົາເໝາະສົມຕໍ່ຂອງປະທານທີ່ຍິ່ງໃຫຍ່ທີ່ສຸດຂອງພຣະເຈົ້າ, ນັ້ນຄື ຊີວິດນິລັນດອນ” (“As We Go Forward Together,” Liahona, Apr. 2018, 7).

ພຣະເຈົ້າຈະບໍ່ປະຖິ້ມຄວາມສຳພັນຂອງພຣະອົງກັບ, ຫລື ກັກພອນທີ່ສັນຍາໄວ້ແຫ່ງຊີວິດນິລັນດອນຈາກ, ຜູ້ທີ່ຮັກສາພັນທະສັນຍາຢ່າງຊື່ສັດທຸກຄົນ. ແລະ ເມື່ອເຮົາໃຫ້ກຽດແກ່ພັນທະສັນຍາ, ເຮົາຈະເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ. ແອວເດີ ເດວິດ ເອ ແບ໊ດນາ ໄດ້ສິດສອນເຮົາມື້ວານນີ້ວ່າ ພັນທະສັນຍາ ແລະ ພິທີການຂອງພຣະກິດຕິຄຸນທຳງານໃນຊີວິດຂອງເຮົາຄືກັນກັບເຂັມທິດ ເພື່ອບອກທິດທາງທີ່ສຳຄັນໃຫ້ມາຫາພຣະຄຣິດ ແລະ ກາຍເປັນເໝືອນດັ່ງພຣະອົງຫລາຍຂຶ້ນ.

ພັນທະສັນຍາໝາຍເສັ້ນທາງທີ່ຈະກັບໄປຫາພຣະເຈົ້າ. ພິທີການຕ່າງໆຂອງການບັບຕິສະມາ ແລະ ການຮັບເອົາຂອງປະທານແຫ່ງພຣະວິນຍານບໍລິສຸດ, ການແຕ່ງຕັ້ງຖານະປະໂລຫິດ, ແລະ ສິນລະລຶກນຳພາເຮົາໄປສູ່ພຣະວິຫານຂອງພຣະຜູ້ເປັນເຈົ້າເພື່ອຮັບພິທີການແຫ່ງຄວາມສູງສົ່ງຂອງພຣະອົງ.

ຂ້າພະເຈົ້າຂໍກ່າວເຖິງສອງຢ່າງທີ່ພຣະຜູ້ຊ່ວຍໃຫ້ລອດຂອງເຮົາໄດ້ເນັ້ນໜັກ ເພື່ອຊ່ວຍໃຫ້ເຮົາຮັກສາພັນທະສັນຍາຢ່າງຊື່ສັດວ່າ:

ພຣະວິນຍານບໍລິສຸດສາມາດສິດສອນເຮົາ, ເຕືອນເຮົາເຖິງຄຳສອນຂອງພຣະຜູ້ຊ່ວຍໃຫ້ລອດ, ແລະ ສະຖິດຢູ່ກັບເຮົາຕະຫລອດໄປ. (ເບິ່ງ ໂຢຮັນ 14:16, 26). ພຣະອົງສາມາດເປັນເພື່ອນຂອງເຮົາຕະຫລອດເວລາເພື່ອນຳທາງເຮົາໃນເສັ້ນທາງແຫ່ງພັນທະສັນຍາ. ປະທານຣະໂຊ ເອັມ ແນວສັນ ໄດ້ສິດສອນວ່າ “ໃນອະນາຄົດ, ມັນເປັນໄປບໍ່ໄດ້ ທີ່ເຮົາຈະປອດໄພທາງວິນຍານ ຖ້າປາດສະຈາກການນຳພາ, ການຊີ້ນຳ, ການປອບໂຍນ, ແລະ ອິດທິພົນທີ່ບໍ່ເຄີຍຂາດຂອງພຣະວິນຍານບໍລິສຸດ” (“Revelation for the Church, Revelation for Our Lives,” Liahona, May 2018, 96).
ພຣະຜູ້ຊ່ວຍໃຫ້ລອດໄດ້ສ້າງຕັ້ງພິທີສິນລະລຶກ ເພື່ອເຮົາຈະລະນຶກເຖິງພຣະອົງ ແລະ ມີພຣະວິນຍານຂອງພຣະອົງຢູ່ກັບເຮົາຕະຫລອດເວລາ. ການຮັບບັບຕິສະມາໄດ້ເປີດຮົ້ວກັ້ນສູ່ຊີວິດນິລັນດອນ, ແລະ ສິນລະລຶກຊ່ວຍໃຫ້ເຮົາມຸ້ງໜ້າໄປຕາມເສັ້ນທາງແຫ່ງພັນທະສັນຍາຢ່າງໝັ້ນຄົງ. ເມື່ອເຮົາຮັບສິນລະລຶກນັ້ນ, ກໍຈະເປັນປະຈັກພະຍານຕໍ່ພຣະບິດາວ່າ ເຮົາລະນຶກເຖິງພຣະບຸດຂອງພຣະອົງຕະຫລອດເວລາ. ແລະ ເມື່ອເຮົາລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ, ເຮົາຈະມີພຣະວິນຍານຂອງພຣະອົງຢູ່ກັບເຮົາຕະຫລອດເວລາ. ຕື່ມໃສ່ກັບຄຳສັນຍານີ້, ພຣະຜູ້ເປັນເຈົ້າຈະຕໍ່ສັນຍາການປົດບາບເມື່ອເຮົາກັບໃຈຢ່າງຖ່ອມຕົວຈາກບາບຂອງເຮົາ.

ໃນການຊື່ສັດຕໍ່ພັນທະສັນຍາຂອງເຮົາ, ເຮົາຄວນພະຍາຍາມໃຫ້ມີພຣະວິນຍານຕະຫລອດເວລາເພື່ອກຽມເຮົາໃຫ້ຮັບສ່ວນສິນລະລຶກຢ່າງມີຄ່າຄວນ, ແລະ ເຊັ່ນດຽວກັນ, ເຮົາຮັບສ່ວນສິນລະລຶກເປັນປະຈຳເພື່ອໃຫ້ມີພຣະວິນຍານຢູ່ກັບເຮົາຕະຫລອດເວລາ.

ຕອນທີ່ລູກສາວຂອງພວກເຮົາອາຍຸຫ້າປີ, ລາວໄດ້ມີລົດເກງນ້ອຍທີ່ໃຊ້ໝໍ້ໄຟ ແລະ ມັກຂັບມັນໄປມາອ້ອມເຮືອນ. ຕອນແລງມື້ໜຶ່ງ, ລາວໄດ້ມາຫາຂ້າພະເຈົ້າ ແລະ ເວົ້າວ່າ, “ພໍ່ເອີຍ, ລົດລູກຂັບໄປບໍ່ໄດ້ແລ້ວ. ໃຫ້ພວກເຮົາເອົານ້ຳມັນຈາກລົດຂອງພໍ່ໄປໃສ່ໃຫ້ມັນ ເພື່ອມັນຈະແລ່ນຕໍ່ໄປອີກໄດ້ບໍ? ບາງທີມັນຕ້ອງການນ້ຳມັນຄືກັນກັບລົດຂອງພໍ່ໃດ໋.”

ຕໍ່ມາຂ້າພະເຈົ້າສັງເກດໄດ້ວ່າໝໍ້ໄຟໃກ້ຊິໝົດ, ສະນັ້ນຂ້າພະເຈົ້າກໍເລີຍເວົ້າໄປວ່າ ເຮົາຊິຂັບມັນໄດ້ອີກຫລັງຈາກໜຶ່ງຊົ່ວໂມງ. ດ້ວຍຄວາມຕື່ນເຕັ້ນຫລາຍ, ລາວໄດ້ເວົ້າວ່າ, “ໂດຍ! ພວກເຮົາຊິເອົາມັນໄປປ້ຳນ້ຳມັນເນາະ.” ຂ້າພະເຈົ້າພຽງແຕ່ສຽບໝໍ້ໄຟໃສ່ບ່ອນປັກສຽບໄຟຟ້າເທົ່ານັ້ນ, ແລະ ຫລັງຈາກໜຶ່ງຊົ່ວໂມງ ລາວກໍສາມາດຂັບລົດ, ໂດຍໃຊ້ໝໍ້ໄຟທີ່ສາກແລ້ວ. ຫລັງຈາກນັ້ນລາວກໍໄດ້ຮຽນຮູ້ວ່າ ມັນສຳຄັນທີ່ຈະຕ້ອງສາກໝໍ້ໄຟສະເໝີ ໂດຍການປັກສຽບມັນໃສ່ກັບແຫລ່ງໄຟຟ້າ.

ເຊັ່ນດຽວກັນກັບທີ່ລູກສາວຂອງພວກເຮົາໄດ້ຮຽນຮູ້ກ່ຽວກັບຄວາມສຳພັນຂອງໝໍ້ໄຟ ແລະ ພະລັງງານເພື່ອໃຫ້ລົດນ້ອຍຂອງລາວຂັບໄປໄດ້, ເຮົາກໍຮຽນຮູ້ກ່ຽວກັບພຣະເຢຊູຄຣິດ, ສິນລະລຶກ, ແລະ ພຣະວິນຍານຄືກັນນັ້ນ. ເຮົາຕ້ອງການພຣະວິນຍານເພື່ອຊ່ວຍນຳທາງເຮົາຜ່ານຜ່າຄວາມເປັນມະຕະ ຂະນະທີ່ເຮົາຮັກສາພັນທະສັນຍາຢ່າງຊື່ສັດ, ແລະ ເຮົາຕ້ອງການສິນລະລຶກເພື່ອເຕີມພະລັງໃຫ້ກັບການເປັນຢູ່ທາງວິນຍານຂອງເຮົາ. ການຕໍ່ພັນທະສັນຍາແຫ່ງການບັບຕິສະມາຂອງເຮົາ ແລະ ການຮັບສ່ວນສິນລະລຶກ ນຳພາຄວາມຊື່ສັດໄປຫາທຸກພັນທະສັນຍາອື່ນໆ. ຮັບຮອງວ່າຈະມີຄວາມສຸກໃນທີ່ສຸດ ເມື່ອເຮົາສຶກສາດ້ວຍການອະທິຖານ ແລະ ໃຫ້ກຽດແກ່ຄຳເຊື້ອເຊີນຂອງພຣະຜູ້ຊ່ວຍໃຫ້ລອດຂອງເຮົາ ແລະ ຊື່ນຊົມກັບພອນທີ່ສັນຍາໄວ້ຂອງພຣະອົງ. ພຣະອົງໄດ້ກ່າວວ່າ, “ແລະ ເພື່ອວ່າເຈົ້າຈະສາມາດຮັກສາຕົນເອງໃຫ້ປາດສະຈາກມົນທິນຂອງໂລກໄດ້ຫລາຍກວ່າເກົ່າ, ຈົ່ງໄປຍັງບ້ານແຫ່ງການອະທິຖານ ແລະ ຖວາຍສິນລະລຶກຂອງເຈົ້າໃນວັນສັກສິດຂອງເຮົາ” (ຄຳສອນ ແລະ ພັນທະສັນຍາ 59:9).

ຂ້າພະເຈົ້າໃຫ້ຖ້ອຍຄຳວ່າ ຜູ້ຮັກສາພັນທະສັນຍາໄດ້ຮັບຄຳສັນຍາວ່າ “ຈະມີສັນຕິສຸກຢູ່ໃນໂລກນີ້ ແລະ ຊີວິດນິລັນດອນຢູ່ໃນໂລກທີ່ຈະມາເຖິງ” (ຄຳສອນ ແລະ ພັນທະສັນຍາ 59:23). ຂ້າພະເຈົ້າເປັນພະຍານວ່າ ເມື່ອທ່ານຮັບສ່ວນສັນຍາລັກຂອງພຣະຜູ້ຊ່ວຍໃຫ້ລອດຜ່ານທາງສິນລະລຶກເປັນປະຈຳ, ທ່ານຈະມີພຣະວິນຍານຂອງພຣະອົງນຳພາທ່ານໃນເສັ້ນທາງແຫ່ງພັນທະສັນຍາ ແລະ ຊື່ສັດຕໍ່ພັນທະສັນຍາຂອງທ່ານ. ໃນພຣະນາມຂອງພຣະເຢຊູຄຣິດ, ອາແມນ.