ດຽວນີ້ຄືເວລານັ້ນ
ດຽວນີ້ຄືເວລາທີ່ເຮົາສາມາດຮຽນຮູ້. ດຽວນີ້ຄືເວລາທີ່ເຮົາສາມາດກັບໃຈ. ດຽວນີ້ຄືເວລາທີ່ເຮົາສາມາດເປັນພອນໃຫ້ແກ່ຄົນອື່ນ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ກອງປະຊຸມໃຫຍ່ນີ້ໄດ້ເປັນປະຫວັດສາດໃນຫລາຍວິທີທາງ. ເຮົາໄດ້ຮັບພອນໂດຍຄຳອະທິຖານ, ຂ່າວສານ, ແລະ ສຽງເພງ. ເຮົາໄດ້ຮັບການດົນໃຈຈາກຜູ້ຮັບໃຊ້ຂອງພຣະຜູ້ເປັນເຈົ້າ.
ເຮົາໄດ້ຮັບການຊີ້ນຳທີ່ສຳຄັນສຳລັບອະນາຄົດ. ຄຳອະທິຖານຂອງຂ້າພະເຈົ້າແມ່ນວ່າ ພຣະວິນຍານຈະກ່າວກັບທ່ານໂດຍກົງກ່ຽວກັບສິ່ງທີ່ພຣະຜູ້ເປັນເຈົ້າຈະໃຫ້ ທ່ານ ເຮັດ.
ອະນາຄົດແມ່ນບໍ່ແນ່ນອນ. ອາກາດຈະປ່ຽນແປງ. ວົງຈອນເສດຖະກິດກໍຄາດເດົາບໍ່ໄດ້. ໄພພິບັດ, ອຸບັດຕິເຫດ, ແລະ ການເຈັບປ່ວຍ ສາມາດປ່ຽນແປງຊີວິດຢ່າງໄວວາ. ເຫດການເຫລົ່ານີ້ສ່ວນໃຫຍ່ແມ່ນເກີນກວ່າທີ່ເຮົາຈະຄວບຄຸມໄດ້. ແຕ່ກໍມີບາງສິ່ງທີ່ເຮົາ ສາມາດ ຄວບຄຸມ, ລວມທັງວິທີທີ່ເຮົາໃຊ້ເວລາຂອງເຮົາໃນແຕ່ລະວັນ.
ຂ້າພະເຈົ້າມັກບົດກະວີນີ້ ໂດຍເຮັນຣີ ແວນ ໄດ້, ຕິດຢູ່ທີ່ນາລິກາຫີນ ຢູ່ມະຫາວິທະຍາໄລ ແວວສ໌ ໃນລັດນິວຢອກ. ມັນອ່ານວ່າ:
ເງົາໃນມືຂອງຂ້ອຍສາຍແສງ
ແບ່ງອະນາຄົດອອກຈາກອະດີດ:
ກ່ອນໜ້ານັ້ນ, ຊົ່ວໂມງຍັງບໍ່ເກີດ
ໃນຄວາມມືດ, ເໜືອອຳນາດທັງປວງ:
ຂ້າງຫລັງເສັ້ນມັນບໍ່ຫວນກັບ,
ຊົ່ວໂມງທີ່ລັບຫາຍ, ບໍ່ແມ່ນຂອງໃຜອີກແລ້ວ:
ໜຶ່ງຊົ່ວໂມງຢູ່ໃນມືຂອງເຈົ້າ,—
ດຽວນີ້ເທົ່ານັ້ນທີ່ເງົາຈະຢືນຢູ່.1
ແມ່ນແລ້ວ, ເຮົາຄວນຮຽນຮູ້ຈາກອະດີດ, ແລະ ແມ່ນແລ້ວ, ເຮົາຄວນກະກຽມສຳລັບອະນາຄົດ. ພຽງແຕ່ ດຽວນີ້ ເທົ່ານັ້ນ ທີ່ເຮົາສາມາດເຮັດ. ດຽວນີ້ ຄືເວລາທີ່ເຮົາສາມາດຮຽນຮູ້. ດຽວນີ້ ຄືເວລາທີ່ເຮົາສາມາດກັບໃຈ. ດຽວນີ້ ຄືເວລາທີ່ເຮົາສາມາດເປັນພອນໃຫ້ແກ່ຄົນອື່ນ ແລະ “ຍົກມືທີ່ອ່ອນເພຍເປ້ຍລ່ອຍ.”2 ດັ່ງທີ່ມໍມອນໄດ້ແນະນຳໂມໂຣໄນລູກຊາຍຂອງເພິ່ນ, “ເພາະພວກເຮົາມີວຽກງານທີ່ຈະເຮັດເວລາພວກເຮົາຢູ່ໃນຮ່າງກາຍທີ່ເຮັດດ້ວຍດິນໜຽວນີ້, ເພື່ອພວກເຮົາຈະເອົາຊະນະສັດຕູຂອງຄວາມຊອບທຳທັງມວນ, ແລະ ພັກຜ່ອນຈິດວິນຍານຂອງພວກເຮົາໃນອານາຈັກຂອງພຣະເຈົ້າ.”3
ຜູ້ປໍລະປັກບໍ່ເຄີຍນອນ. ຈະມີການຕໍ່ຕ້ານຄວາມຈິງຢູ່ສະເໝີ. ຂ້າພະເຈົ້າຂໍກ່າວຊ້ຳຄຳຮຽກຮ້ອງຂອງຂ້າພະເຈົ້າຈາກມື້ເຊົ້ານີ້ ໃຫ້ເຮັດສິ່ງທີ່ຈະເພີ່ມແຮງຜັກດັນທາງວິນຍານໃນທາງບວກ, ການຍົກນັ້ນທີ່ແອວເດີ ດີເດີ ແອັບ ອຸກດອບ ໄດ້ກ່າວເຖິງ, ຈະຊ່ວຍໃຫ້ທ່ານກ້າວໄປໜ້າຜ່ານການທ້າທາຍ ແລະ ໂອກາດໃດໆກໍຕາມທີ່ເຂົ້າມາ.
ແຮງຜັກດັນທາງວິນຍານໃນທາງບວກຈະເພີ່ມຂຶ້ນ ຂະນະທີ່ເຮົານະມັດສະການໃນພຣະວິຫານ ແລະ ເຕີບໂຕໃນຄວາມເຂົ້າໃຈເຖິງຄວາມກວ້າງ ແລະ ຄວາມເລິກຂອງພອນທີ່ເຮົາໄດ້ຮັບໃນນັ້ນ. ຂ້າພະເຈົ້າອ້ອນວອນໃຫ້ທ່ານຕໍ່ຕ້ານກັບວິທີທາງຂອງໂລກ ໂດຍການຈົດຈໍ່ຢູ່ທີ່ພອນນິລັນດອນຂອງພຣະວິຫານ. ເວລາຂອງທ່ານໃນນັ້ນຈະນຳພອນສຳລັບນິລັນດອນມາໃຫ້.
ຂະນະທີ່ສາດສະໜາຈັກເຕີບໂຕຂຶ້ນ, ພວກເຮົາກໍພະຍາຍາມເດີນຕາມໃຫ້ທັນ ໂດຍການສ້າງພຣະວິຫານຕື່ມອີກ. ພຣະວິຫານສີ່ສິບສີ່ແຫ່ງກຳລັງຢູ່ໃນໄລຍະການກໍ່ສ້າງໃນປະຈຸບັນ. ຫລາຍແຫ່ງກໍກຳລັງຖືກສ້ອມແປງໃໝ່. ຂ້າພະເຈົ້າອະທິຖານສໍາລັບຜູ້ມີຄວາມຊໍານານໃນໂຄງການເຫລົ່ານັ້ນຕະຫລອດທົ່ວໂລກ.
ດ້ວຍຄວາມຮູ້ສຶກທີ່ກະຕັນຍູ, ຂ້າພະເຈົ້າຍິນດີທີ່ຈະປະກາດແຜນການຂອງພວກເຮົາ ທີ່ຈະກໍ່ສ້າງພຣະວິຫານຕື່ມອີກໃນສະຖານທີ່ດັ່ງຕໍ່ໄປນີ້: ແວວລິງຕັນ, ນູແວນເຊລັງ; ບຣາຊາວຽວ, ສາທາລະນະລັດປະຊາທິປະໄຕຄອງໂກ; ບາເຊໂລນາ, ສະເປນ; ເບີມິງແຮມ, ສະຫະຣາຊອານາຈັກ; ຄູຊະໂກ, ເປຣູ; ມາເຊໂອ, ບຣາຊິນ; ຊານໂຕສ໌, ບຣາຊິນ; ຊານ ລູອິສ ໂປໂຕຊີ, ແມັກຊິໂກ; ແມັກຊິໂກ ຊີທີ ເບເນເມຣິໂຕ, ແມັກຊິໂກ; ແທມປາ, ຟລໍຣິດາ; ນ໊ອກສະວຽວ, ເທັນນະຊີ; ຄະລີບແລນ, ໂອໄຮໂອ; ວິດຈະທາ, ແຄນຊັສ; ອໍສະຕິນ, ເທັກຊັສ; ມະຊູລາ, ມອນທານາ; ໝ້ອນພີລິເອີ, ໄອດາໂຮ; ແລະ ໂມເດັດສະໂຕ, ຄາລິຟໍເນຍ.
ພຣະວິຫານ 17 ແຫ່ງເຫລົ່ານີ້ ຈະເປັນພອນໃຫ້ແກ່ຜູ້ຄົນຈົນນັບບໍ່ຖ້ວນ ຢູ່ທັງສອງຟາກມ່ານ. ຂ້າພະເຈົ້າຮັກທ່ານ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ. ສຳຄັນກວ່ານັ້ນ, ພຣະຜູ້ເປັນເຈົ້າຮັກທ່ານ. ພຣະອົງເປັນພຣະຜູ້ຊ່ວຍໃຫ້ລອດຂອງທ່ານ ແລະ ພຣະຜູ້ໄຖ່ຂອງທ່ານ. ພຣະອົງນຳພາ ແລະ ຊີ້ນຳສາດສະໜາຈັກຂອງພຣະອົງ. ຂໍໃຫ້ເຮົາເປັນຜູ້ຄົນທີ່ມີຄ່າຄວນຂອງພຣະຜູ້ເປັນເຈົ້າ, ຜູ້ໄດ້ກ່າວວ່າ, “ພວກເຈົ້າຈະເປັນປະຊາຊົນຂອງເຮົາ, ແລະ ເຮົາຈະເປັນພຣະເຈົ້າຂອງພວກເຈົ້າ.”4
ຂ້າພະເຈົ້າອະທິຖານສຳລັບສິ່ງນີ້, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.