ການປ່ຽນໃຈເຫລື້ອມໃສຕໍ່ພຣະປະສົງຂອງພຣະເຈົ້າ

ໂດຍ ແອວເດີ ຄວິນຕິນ ແອວ ຄຸກ

ແຫ່ງກຸ່ມອັກຄະສາວົກສິບສອງ

ການປ່ຽນໃຈເຫລື້ອໃສຂອງເຮົາແມ່ນລວມທັງໜ້າທີ່ຮັບຜິດຊອບທີ່ຈະແບ່ງປັນພຣະກິດຕິຄຸນຂອງພຣະເຢຊູຄຣິດໃຫ້ກັບຊາວໂລກ.

ຂ້າພະເຈົ້າກະຕັນຍູຕໍ່ການເອີ້ນທີ່ມີພະລັງຈາກສາດສະດາ ປະທານຣະໂຊ ເອັມ ແນວສັນ ໃຫ້ຮັບໃຊ້ເຜີຍແຜ່ ແລະ ຕໍ່ຂ່າວສານທີ່ດົນໃຈເລື່ອງການເຜີຍແຜ່ຂອງປະທານເອັມ ຣະໂຊ ບາເລີດ ແລະ ແອວເດີ ມາໂກສ໌ ເອ ເອດູຄາອີທິສ໌ ໃນມື້ນີ້.

ວຽກງານມອບໝາຍເລື່ອງການເຜີຍແຜ່ທີ່ໃຫ້ໄປຍັງປະເທດອັງກິດໃນທ້າຍປີແລ້ວນີ້ ຊ່ວຍໃຫ້ຂ້າພະເຈົ້າໄຕ່ຕອງເຖິງເຫດການທາງວິນຍານອັນລ້ຳຄ່າ ຊຶ່ງເປັນຮາກຖານໃຫ້ກັບການຕັດສິນໃຈໄປຮັບໃຊ້ເປັນຜູ້ສອນສາດສະໜາຂອງຂ້າພະເຈົ້າ.¹ ຕອນຂ້າພະເຈົ້າມີອາຍຸໄດ້ 15 ປີ, ອ້າຍສຸດທີ່ຮັກຂອງຂ້າພະເຈົ້າຊື່ ໂຈ ມີອາຍຸໄດ້ 20 ປີ—ຊຶ່ງເຖິງກະສຽນທີ່ສາມາດໄປຮັບໃຊ້ເຜີຍແຜ່ໄດ້. ໃນສະຫະລັດ, ເນື່ອງຈາກການຂັດແຍ້ງໃນເກົາຫລີ, ໜ້ອຍຄົນທີ່ຈະຖືກອະນຸຍາດໃຫ້ຮັບໃຊ້. ພຽງແຕ່ໜຶ່ງຄົນເທົ່ານັ້ນທີ່ສາມາດຖືກເອີ້ນຈາກແຕ່ລະຫວອດຕໍ່ປີ.² ມັນເປັນເລື່ອງໜ້າປະຫລາດໃຈເມື່ອອະທິການໄດ້ຂໍໃຫ້ອ້າຍໂຈສຳຫລວດເບິ່ງຄວາມເປັນໄປໄດ້ນີ້ກັບພໍ່ຂອງພວກເຮົາ. ໃນເວລານັ້ນອ້າຍໂຈກຳລັງຕຽມໃບສະໝັກເຂົ້າໂຮງຮຽນການແພດ. ພໍ່ຂອງພວກເຮົາ, ຜູ້ຊຶ່ງບໍ່ເຂັ້ມແຂງໃນສາດສະໜາຈັກ, ໄດ້ຕຽມເງິນເພື່ອຊ່ວຍລາວ ແລະ ບໍ່ເຫັນດ້ວຍກັບອ້າຍໂຈທີ່ຈະໄປເຜີຍແຜ່. ພໍ່ໄດ້ແນະນຳໃຫ້ອ້າຍໂຈໄປຮຽນແພດດີກວ່າ. ສິ່ງນີ້ເປັນບັນຫາໃຫຍ່ໃນຄອບຄົວຂອງພວກເຮົາ.

ໃນການສົນທະນາທີ່ໜ້າປະຫລາດໃຈກັບອ້າຍທີ່ສະຫລາດ ແລະ ເປັນຕົວຢ່າງຂອງຂ້າພະເຈົ້າ, ພວກເຮົາໄດ້ສະຫລຸບວ່າ ການຕັດສິນໃຈຂອງລາວທີ່ຈະຮັບໃຊ້ວຽກງານເຜີຍແຜ່ຫລືບໍ່ ແລະ ໂຈະການສຶກສາຂອງລາວໄວ້ ແມ່ນຂຶ້ນຢູ່ກັບຄຳຖາມສາມຂໍ້: (1) ພຣະເຢຊູຄຣິດເປັນພຣະເຈົ້າແທ້ບໍ? (2) ພຣະຄຳພີມໍມອນເປັນພຣະຄຳຂອງພຣະເຈົ້າຫລືບໍ່? ແລະ (3) ໂຈເຊັບ ສະມິດ ເປັນສາດສະດາຂອງການຟື້ນຟູຫລືບໍ່? ຖ້າຫາກຄຳຕອບຕໍ່ຄຳຖາມເຫລົ່ານີ້ຄື ແມ່ນແລ້ວ, ກໍແຈ້ງຊັດວ່າ ການທີ່ອ້າຍໂຈຈະນຳຂ່າວປະເສີດແຫ່ງພຣະກິດຕິຄຸນຂອງພຣະເຢຊູຄຣິດໄປໃຫ້ຊາວໂລກ ຈະດີກວ່າການໄດ້ເປັນໝໍໄວຕາມເວລາ.³

ຄືນນັ້ນຂ້າພະເຈົ້າໄດ້ອະທິຖານຢ່າງແຮງກ້າ ແລະ ດ້ວຍເຈດຕະນາອັນແທ້ຈິງ. ພຣະວິນຍານ, ດ້ວຍວິທີການທີ່ມີພະລັງຢ່າງປະຕິເສດບໍ່ໄດ້, ໄດ້ຢືນຢັນກັບຂ້າພະເຈົ້າວ່າ ຄຳຕອບຂອງຄຳຖາມທັງສາມຂໍ້ນັ້ນຄື ແມ່ນແລ້ວ. ນີ້ເປັນເຫດການທີ່ສຳຄັນສຳລັບຂ້າພະເຈົ້າ. ຂ້າພະເຈົ້າຮັບຮູ້ວ່າ ການຕັດສິນໃຈໃນທຸກເລື່ອງທີ່ຂ້າພະເຈົ້າໄດ້ເຮັດໄປຕະຫລອດຊີວິດ ຈະໄດ້ຮັບອິດທິພົນຈາກຄວາມຈິງເຫລົ່ານີ້. ຂ້າພະເຈົ້າກໍຮູ້ອີກວ່າ ຂ້າພະເຈົ້າຈະຮັບໃຊ້ເຜີຍແຜ່ຖ້າຫາກໄດ້ຮັບໂອກາດ. ຕະຫລອດຊີວິດຂອງການຮັບໃຊ້ ແລະ ປະສົບການທາງວິນຍານຂອງຂ້າພະເຈົ້າ, ຂ້າພະເຈົ້າເຂົ້າໃຈວ່າ ການປ່ຽນໃຈເຫລື້ອມໃສທີ່ແທ້ຈິງ ເປັນຜົນມາຈາກການຍອມຮັບພຣະປະສົງຂອງພຣະເຈົ້າຢ່າງມີສະຕິ ແລະ ວ່າເຮົາສາມາດຖືກນຳພາໃນທຸກການກະທຳຂອງເຮົາໂດຍພຣະວິນຍານບໍລິສຸດ.

ຂ້າພະເຈົ້າມີປະຈັກພະຍານເຖິງຄວາມເປັນພຣະເຈົ້າຂອງພຣະເຢຊູຄຣິດ ໃນຖານະພຣະຜູ້ຊ່ວຍໃຫ້ລອດຂອງໂລກ. ຄືນນັ້ນຂ້າພະເຈົ້າໄດ້ຮັບປະຈັກພະຍານທາງວິນຍານກ່ຽວກັບພຣະຄຳພີມໍມອນ⁴ ແລະ ສາດສະດາໂຈເຊັບ ສະມິດ.

ໂຈເຊັບ ສະມິດ ໄດ້ເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າ

ປະຈັກພະຍານຂອງທ່ານຈະເຂັ້ມແຂງຂຶ້ນເມື່ອທ່ານຮູ້ຢູ່ໃນໃຈຜ່ານທາງການອະທິຖານຂອງທ່ານ ວ່າສາດສະດາໂຈເຊັບ ສະມິດ ເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າ. ໃນຊ່ວງໄລຍະແປດປີຜ່ານມານີ້ ວຽກງານມອບໝາຍຢ່າງໜຶ່ງຂອງຂ້າພະເຈົ້າໃນກຸ່ມອັກຄະສາວົກສິບສອງຄື ທົບທວນ ແລະ ອ່ານການຂຽນ ແລະ ເອກະສານທີ່ໜ້າອັດສະຈັນໃຈທັງໝົດຂອງໂຈເຊັບ ສະມິດ ແລະ ການຄົ້ນຄວ້າທີ່ນຳໄປສູ່ການພິມໜັງສື Saints.⁵ ປະຈັກພະຍານ ແລະ ການຍົກຍ້ອງຂອງຂ້າພະເຈົ້າໃນຕົວສາດສະດາ ໂຈເຊັບ ສະມິດ ໄດ້ເຂັ້ມແຂງ ແລະ ເພີ່ມພູນຫລາຍຂຶ້ນ ຫລັງຈາກທີ່ໄດ້ອ່ານເລື່ອງລາວດົນໃຈກ່ຽວກັບຊີວິດຂອງເພິ່ນ ແລະ ການປະຕິບັດສາດສະໜາກິດໃນຖານະສາດສະດາ ທີ່ໄດ້ຖືກແຕ່ງຕັ້ງລ່ວງໜ້າ.

ການແປພຣະຄຳພີມໍມອນຂອງໂຈເຊັບ ໂດຍຂອງປະທານ ແລະ ອຳນາດຂອງພຣະເຈົ້າ ເປັນຮາກຖານຂອງການຟື້ນຟູ.⁶ ພຣະຄຳພີມໍມອນມີຄວາມສອດຄ່ອງພາຍໃນ, ເປັນການຂຽນຢ່າງສວຍງາມ, ແລະ ບັນຈຸຄຳຕອບສຳລັບຄຳຖາມທີ່ສຳຄັນຂອງຊີວິດ. ມັນເປັນປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ. ຂ້າພະເຈົ້າເປັນພະຍານວ່າ ໂຈເຊັບ ສະມິດ ເປັນຄົນຊອບທຳ, ເຕັມປ່ຽມດ້ວຍສັດທາ, ແລະ ເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າ ໃນການນຳພຣະຄຳພີມໍມອນອອກມາ.

ການເປີດເຜີຍ ແລະ ເຫດການທີ່ບັນທຶກໃນ ຄຳສອນ ແລະ ພັນທະສັນຍາ ລະບຸຂໍກະແຈ, ພິທີການ, ແລະ ພັນທະສັນຍາທີ່ຈຳເປັນສຳລັບຄວາມລອດ ແລະ ຄວາມສູງສົ່ງ. ມັນບໍ່ພຽງແຕ່ກຳນົດຄວາມຈຳເປັນທີ່ຕ້ອງສະຖາປະນາສາດສະໜາຈັກເທົ່ານັ້ນ ແຕ່ຍັງມີຄຳສອນທີ່ເລິກເຊິ່ງ ທີ່ຊ່ວຍໃຫ້ເຮົາເຂົ້າໃຈຈຸດປະສົງຂອງຊີວິດ ແລະ ໃຫ້ມຸມມອງນິລັນດອນແກ່ເຮົານຳອີກ.

ໜຶ່ງໃນຫລາຍໆຕົວຢ່າງເຖິງບົດບາດການເປັນສາດສະດາຂອງໂຈເຊັບ ສະມິດ ມີຢູ່ໃນ ພາກທີ 76 ຂອງຄຳສອນ ແລະ ພັນທະສັນຍາ. ມັນເປັນບັນທຶກທີ່ແຈ່ມແຈ້ງກ່ຽວກັບພາບນິມິດເຖິງສະຫວັນ, ລວມທັງອານາຈັກແຫ່ງລັດສະໝີພາບຕ່າງໆ, ຊຶ່ງເປັນພອນຢ່າງຫລວງຫລາຍ ທີ່ສາດສະດາໂຈເຊັບ ສະມິດ ແລະ ຊິດນີ ຣິກດອນ ໄດ້ຮັບໃນວັນທີ 16 ເດືອນກຸມພາ, 1832. ໃນເວລານັ້ນ, ສາດສະໜາຈັກສ່ວນໃຫຍ່ກຳລັງສິດສອນວ່າ ການຊົດໃຊ້ຂອງພຣະຜູ້ຊ່ວຍໃຫ້ລອດ ຈະບໍ່ຊ່ວຍຄົນສ່ວນຫລາຍໃຫ້ລອດ. ຜູ້ຄົນເຊື່ອກັນວ່າໜ້ອຍຄົນຈະລອດ, ແລະ ຄົນສ່ວນຫລາຍຈະຕ້ອງຕົກນະລົກ ແລະ ອັບປະໂຫຍດ, ລວມທັງການຖືກທໍລະມານທີ່ບໍ່ມີສິ້ນສຸດທີ່ໜ້າຢ້ານກົວທີ່ສຸດ ແລະ ເກີນກວ່າຈະພັນລະນາໄດ້.⁷

ການເປີດເຜີຍໃນພາກທີ 76 ໃຫ້ພາບນິມິດເຖິງລະດັບຂອງລັດສະໝີພາບ ບ່ອນທີ່ລູກໆຂອງພຣະບິດາເທິງສະຫວັນສ່ວນຫລາຍທີ່ກ້າຫານໃນສະພາວະກ່ອນເກີດຂອງເຂົາເຈົ້າໄດ້ຮັບພອນຢ່າງຫລວງຫລາຍ ຫລັງຈາກການພິພາກສາຄັ້ງສຸດທ້າຍ.⁸ ພາບນິມິດກ່ຽວກັບລະດັບຂອງລັດສະໝີພາບສາມແຫ່ງ, ບ່ອນທີ່ຕ່ຳສຸດ ຊຶ່ງ “ເກີນກວ່າຄວາມເຂົ້າໃຈທັງໝົດ,”⁹ ໄດ້ພິສູດວ່າ ຄຳສອນເກົ່າເຖິງແມ່ນມີຜູ້ຄົນຢ່າງຫລວງຫລາຍຮັບຮູ້ ແຕ່ມັນບໍ່ຈິງ ທີ່ວ່າຄົນສ່ວນຫລາຍຈະຕົກນະລົກ ແລະ ອັບປະໂຫຍດ.

ເມື່ອທ່ານຮູ້ວ່າໂຈເຊັບ ສະມິດ ມີອາຍຸພຽງແຕ່ 26 ປີ, ມີການສຶກສາທີ່ຈຳກັດ, ແລະ ຮູ້ຈັກພາສາເກົ່າແກ່ພຽງເລັກນ້ອຍ ຫລື ບໍ່ຮູ້ເລີຍ ທີ່ໃຊ້ແປພຣະຄຣິສຕະທຳຄຳພີ, ເພິ່ນໄດ້ເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າແທ້ໆ. ໃນ ຂໍ້ທີ 17 ຂອງພາກທີ 76, ເພິ່ນໄດ້ຮັບການດົນໃຈໃຫ້ໃຊ້ຄຳວ່າ ຄົນທີ່ບໍ່ທ່ຽງທຳ ແທນຄຳວ່າ ບັນດາຄົນທີ່ເຮັດການຊົ່ວ ທີ່ຖືກໃຊ້ຢູ່ໃນພຣະທຳໂຢຮັນ.¹⁰

ມັນເປັນເລື່ອງທີ່ໜ້າສົນໃຈທີ່ 45 ປີຕໍ່ມາ ທ່ານເຟຣເດີຣິກ ດັບເບິນຢູ ຟາຣາ ຜູ້ນຳໂບດແອງກະລິກັນ ແລະ ເປັນນັກປາດອາຈານດ້ານໜັງສືເກົ່າແກ່ທີ່ຮັບຮູ້ກັນ,¹¹ ໄດ້ຂຽນປຶ້ມຊື່ວ່າ The Life of Christ,¹² ໄດ້ຢືນຢັນວ່າ ຄຳນິຍາມຂອງ ອັບປະໂຫຍດ ໃນພຣະຄຣິສຕະທຳຄຳພີ ຄິງ ເຈມສ໌ ເປັນຜົນມາຈາກຄວາມຜິດພາດໃນການແປຈາກພາສາເຮັບເຣີ ແລະ ພາສາກຣີກ ເປັນພາສາອັງກິດ.¹³

ໃນສະໄໝຂອງເຮົາ, ຫລາຍຄົນໄດ້ເລືອກຮັບເອົາແນວຄິດທີ່ວ່າ ບໍ່ຄວນມີຜົນສະທ້ອນສຳລັບຄວາມຜິດບາບ. ເຂົາເຈົ້າສະໜັບສະໜູນການໃຫ້ອະໄພບາບໂດຍບໍ່ມີເງື່ອນໄຂ ປາດສະຈາກການກັບໃຈ. ຄຳສອນທີ່ຖືກເປີດເຜີຍຂອງພວກເຮົາ ບໍ່ພຽງແຕ່ພິສູດແນວຄິດບໍ່ຈິງທີ່ວ່າ ຄົນສ່ວນຫລາຍຈະຕົກນະລົກ ແລະ ອັບປະໂຫຍດຊົ່ວນິລັນດອນເທົ່ານັ້ນ ແຕ່ຍັງສະຖາປະນາວ່າ ການກັບໃຈສ່ວນຕົວເປັນພຣະບັນຍັດທີ່ຮຽກຮ້ອງໃຫ້ຮັບເອົາການຊົດໃຊ້ຂອງພຣະຜູ້ຊ່ວຍໃຫ້ລອດ ແລະ ຮັບເອົາອານາຈັກຊັ້ນສູງເປັນມູນມໍລະດົກນຳອີກ.¹⁴ ຂ້າພະເຈົ້າເປັນພະຍານວ່າ ໂຈເຊັບ ສະມິດ ເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າແທ້ໆ ໃນການນຳການຟື້ນຟູພຣະກິດຕິຄຸນຂອງພຣະອົງອອກມາ!

ເພາະການຟື້ນຟູພຣະກິດຕິຄຸນຂອງພຣະເຢຊູຄຣິດ, ເຮົາຈຶ່ງເຂົ້າໃຈເຖິງຄວາມສຳຄັນຂອງທັງການກັບໃຈ ແລະ “ວຽກງານແຫ່ງຄວາມຊອບທຳ.”¹⁵ ເຮົາເຂົ້າໃຈເຖິງຄວາມສຳຄັນທີ່ສຸດຂອງການຊົດໃຊ້ຂອງພຣະຜູ້ຊ່ວຍໃຫ້ລອດ ແລະ ພິທີການຊ່ວຍໃຫ້ລອດ ແລະ ພັນທະສັນຍາຂອງພຣະອົງ, ລວມທັງການປະຕິບັດໃນພຣະວິຫານ.

“ວຽກງານແຫ່ງຄວາມຊອບທຳ” ອອກມາຈາກ ແລະ ເປັນຜົນຂອງການປ່ຽນໃຈເຫລື້ອມໃສ. ການປ່ຽນໃຈເຫລື້ອມໃສທີ່ແທ້ຈິງເກີດຂຶ້ນຈາກການຮັບເອົາຢ່າງມີສະຕິ ແລະ ການເຮັດຄຳໝັ້ນສັນຍາທີ່ຈະເຮັດຕາມພຣະປະສົງຂອງພຣະເຈົ້າ.¹⁶ ຜົນສະທ້ອນ ແລະ ພອນຢ່າງຫລວງຫລາຍທີ່ຫລັ່ງໄຫລມາ ຈາກການປ່ຽນໃຈເຫລື້ອມໃສ ເປັນຄວາມສະຫງົບສຸກທີ່ແທ້ຈິງ ແລະ ຖາວອນ ແລະ ເປັນຄວາມໝັ້ນໃຈສ່ວນຕົວຂອງຄວາມສຸກທີ່ສູງສຸດ¹⁷—ເຖິງແມ່ນຈະມີພະຍຸຂອງຊີວິດນີ້ກໍຕາມ.

ການປ່ຽນໃຈເຫລື້ອມໃສໃນພຣະຜູ້ຊ່ວຍໃຫ້ລອດຈະປ່ຽນແປງມະນຸດທີ່ມີຈິດໃຈທຳມະດາ ໃຫ້ກາຍເປັນຄົນບໍລິສຸດ—ເປັນສິ່ງທີ່ເກີດໃໝ່ໃນພຣະເຢຊູຄຣິດ.¹⁸

ຫລາຍຄົນໄດ້ຖືກກີດກັນຈາກຄວາມຈິງ ເພາະພວກເຂົາບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ

ພັນທະທີ່ຫລັ່ງໄຫລມາຈາກການປ່ຽນໃຈເຫລື້ອໃສແມ່ນຫຍັງແດ່? ໃນຄຸກລີເບີຕີ, ສາດສະດາໂຈເຊັບໄດ້ສັງເກດວ່າ “ຫລາຍຄົນໄດ້ຖືກກີດກັນຈາກຄວາມຈິງ ເພາະພວກເຂົາບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ.”¹⁹

ໃນຄຳນຳຂອງພຣະຜູ້ເປັນເຈົ້າຕໍ່ຄຳສອນ ແລະ ພັນທະສັນຍາ, ພາບລວມຂອງການປະກາດຈຸດປະສົງຂອງພຣະຜູ້ເປັນເຈົ້າສຳລັບເຮົາ ໄດ້ຖືກລະບຸໄວ້. ພຣະອົງໄດ້ປະກາດວ່າ, “ດັ່ງນັ້ນ, ເຮົາພຣະຜູ້ເປັນເຈົ້າ, ໂດຍທີ່ຮູ້ເຖິງຄວາມເສຍຫາຍທີ່ຈະມາສູ່ຜູ້ອາໄສຂອງແຜ່ນດິນໂລກ, ຈຶ່ງໄດ້ເອີ້ນຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ໄດ້ກ່າວກັບລາວຈາກສະຫວັນ, ແລະ ມອບບັນຍັດໃຫ້ລາວ.” ພຣະອົງໄດ້ແນະນຳຕື່ມວ່າ, “ເພື່ອຄວາມສົມບູນແຫ່ງພຣະກິດຕິຄຸນຂອງເຮົາຈະຖືກປ່າວປະກາດ ໂດຍຄົນທີ່ອ່ອນແອ ແລະ ຄົນທີ່ຕ່ຳຕ້ອຍຈົນເຖິງທີ່ສຸດຂອງໂລກ.”²⁰ ນັ້ນແມ່ນລວມທັງຜູ້ສອນສາດສະໜາເຕັມເວລາ. ນັ້ນແມ່ນລວມທັງເຮົາແຕ່ລະຄົນ. ນັ້ນຄວນເປັນສິ່ງທີ່ສຸມໃຈໃສ່ສຳລັບທຸກຄົນທີ່ໄດ້ຮັບພອນດ້ວຍການປ່ຽນໃຈເຫລື້ອມໃສຕໍ່ພຣະປະສົງຂອງພຣະເຈົ້າ. ພຣະຜູ້ຊ່ວຍໃຫ້ລອດໄດ້ເຊື້ອເຊີນເຮົາດ້ວຍຄວາມກະລຸນາ ໃຫ້ເປັນສຽງ ແລະ ພຣະຫັດຂອງພຣະອົງ.²¹ ຄວາມຮັກຂອງພຣະຜູ້ຊ່ວຍໃຫ້ລອດຈະເປັນໂຄມໄຟເຍືອງທາງໃຫ້ເຮົາ. ພຣະຜູ້ຊ່ວຍໃຫ້ລອດໄດ້ສິດສອນສານຸສິດຂອງພຣະອົງວ່າ, “ພວກເຈົ້າຈົ່ງອອກໄປ, ຈົ່ງເຮັດໃຫ້ທຸກຊົນຊາດເປັນລູກສິດ.”²² ແລະ ຕໍ່ໂຈເຊັບ ສະມິດ, ພຣະອົງໄດ້ປະກາດວ່າ, “ຈົ່ງສັ່ງສອນພຣະກິດຕິຄຸນຂອງເຮົາແກ່ມະນຸດສະໂລກທັງໝົດຜູ້ທີ່ຍັງບໍ່ໄດ້ຮັບມັນເທື່ອ.”²³

ໜຶ່ງອາທິດຫລັງຈາກການອຸທິດພຣະວິຫານເຄີດແລນ ໃນວັນທີ 3 ເດືອນເມສາ, 1836, ຊຶ່ງເປັນວັນອາທິດອີດສະເຕີ ແລະ ເປັນງານປັດສະຄາດ້ວຍ, ພຣະຜູ້ເປັນເຈົ້າໄດ້ປະກົດໃນພາບນິມິດທີ່ສວຍງາມຕໍ່ໂຈເຊັບ ແລະ ອໍລີເວີ ຄາວເດີຣີ. ພຣະຜູ້ເປັນເຈົ້າໄດ້ຮັບເອົາພຣະວິຫານ ແລະ ປະກາດວ່າ, “ນີ້ເປັນການເລີ່ມຕົ້ນພອນຊຶ່ງຈະຖອກເທລົງມາເທິງຫົວຂອງຜູ້ຄົນຂອງເຮົາ.”²⁴

ຫລັງຈາກພາບນິມິດນີ້ສິ້ນສຸດລົງ, ໂມເຊໄດ້ມາປະກົດຕົວ “ແລະ ໄດ້ມອບໝາຍ … ຂໍກະແຈແຫ່ງການເຕົ້າໂຮມຂອງຊາວອິດສະຣາເອນຈາກສີ່ທິດຂອງແຜ່ນດິນໂລກ, ແລະ ການນຳພາສິບເຜົ່າມາຈາກແຜ່ນດິນທາງເໜືອ.”²⁵

ປະທານຣະໂຊ ເອັມ ແນວສັນ, ສາດສະດາທີ່ຮັກແພງຂອງພວກເຮົາໃນທຸກວັນນີ້ ຜູ້ທີ່ດຳລົງຂໍກະແຈຢ່າງດຽວກັນນີ້, ໄດ້ສິດສອນໃນເຊົ້າມື້ນີ້ວ່າ: “ພວກເຈົ້າຊາຍໜຸ່ມທັງຫລາຍໄດ້ຖືກສະຫງວນໄວ້ສຳລັບເວລານີ້ ເມື່ອການເຕົ້າໂຮມອິດສະຣາເອນກຳລັງເກີດຂຶ້ນ. ຂະນະທີ່ພວກເຈົ້າຮັບໃຊ້ເຜີຍແຜ່, ພວກເຈົ້າຈະມີບົດບາດອັນສຳຄັນ ໃນເຫດການທີ່ບໍ່ເຄີຍມີມາກ່ອນນີ້!”²⁶

ສຳລັບການມອບໝາຍຂອງພຣະຜູ້ຊ່ວຍໃຫ້ລອດທີ່ຈະແບ່ງປັນພຣະກິດຕິຄຸນ ເພື່ອກາຍເປັນພາກສ່ວນຂອງເຮົາ, ເຮົາຕ້ອງ ປ່ຽນໃຈເຫລື້ອມໃສ ຕໍ່ພຣະປະສົງຂອງພຣະເຈົ້າເສຍກ່ອນ; ເຮົາຕ້ອງ ຮັກ ເພື່ອນບ້ານຂອງເຮົາ, ແບ່ງປັນ ພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ, ແລະ ເຊື້ອເຊີນ ທຸກຄົນໃຫ້ມາເບິ່ງເອົາ. ໃນຖານະສະມາຊິກຂອງສາດສະໜາຈັກ, ເຮົາທະນຸຖະໜອມຄຳຕອບຂອງສາດສະດາໂຈເຊັບ ສະມິດ ຕໍ່ຈອນ ເວັນເວິທ໌, ບັນນາທິການຂອງ Chicago Democrat, ໃນປີ 1842. ລາວໄດ້ຂໍເອົາຂໍ້ມູນກ່ຽວກັບສາດສະໜາຈັກ. ໂຈເຊັບໄດ້ສະຫລຸບການຕອບສະໜອງໂດຍການໃຊ້ມາດຕະຖານຂອງຄວາມຈິງ ຊຶ່ງເປັນຄຳນຳຕໍ່ຫລັກແຫ່ງຄວາມເຊື່ອສິບສາມຂໍ້. ມາດຕະຖານບົ່ງບອກ, ໃນທາງທີ່ກະທັດລັດ, ເຖິງສິ່ງທີ່ຕ້ອງເຮັດໃຫ້ສຳເລັດ ດັ່ງນີ້:

“ຄົນທີ່ບໍ່ສະອາດຈະຢຸດຢັ້ງວຽກງານນີ້ຈາກຄວາມກ້າວໜ້າບໍ່ໄດ້; ການຂົ່ມເຫັງອາດຮ້າຍແຮງຂຶ້ນ, ກຸ່ມທຳຮ້າຍອາດຮ່ວມເຂົ້າກັນ, ກອງທັບເຕົ້າໂຮມກັນ, ການໃສ່ຮ້າຍອາດເຮັດໃຫ້ເສື່ອມເສຍ, ແຕ່ຄວາມຈິງຂອງພຣະເຈົ້າຈະກ້າວໄປໜ້າຢ່າງອາດຫານ, ຢ່າງສູງສົ່ງ, ແລະ ເປັນອິດສະລະ, ຈົນກວ່າມັນໄດ້ເຂົ້າໄປເຖິງທຸກທະວີບ, ໄດ້ຢ້ຽມຢາມທຸກພາກພື້ນຂອງແຜ່ນດິນ, ໄດ້ຜ່ານໄປໃນທຸກປະເທດ, ແລະ ທຸກຄົນໄດ້ຍິນ, ຈົນກວ່າພຣະປະສົງຂອງພຣະເຈົ້າຈະສຳເລັດຄົບຖ້ວນ, ແລະ ພຣະເຢໂຮວາອົງຍິ່ງໃຫຍ່ຈະກ່າວວ່າ ວຽກງານສຳເລັດແລ້ວ.”²⁷

ນີ້ແມ່ນການເອີ້ນທີ່ເປັ່ງສຽງດັງເປັນເວລາຫລາຍລຸ້ນຄົນຂອງໄພ່ພົນຍຸກສຸດທ້າຍ, ໂດຍສະເພາະຜູ້ສອນສາດສະໜາ. ໃນວິນຍານຂອງ “ມາດຕະຖານແຫ່ງຄວາມຈິງ,” ພວກເຮົາຮູ້ບຸນຄຸນທີ່ໃນທ່າມກາງການແຜ່ລະບາດຕະຫລອດທົ່ວໂລກ ຜູ້ສອນສາດສະໜາທີ່ຊື່ສັດໄດ້ແບ່ງປັນພຣະກິດຕິຄຸນ. ຜູ້ສອນສາດສະໜາທັງຫລາຍ, ພວກເຮົາຮັກພວກທ່ານ! ພຣະຜູ້ເປັນເຈົ້າຂໍຮ້ອງໃຫ້ເຮົາແຕ່ລະຄົນແບ່ງປັນພຣະກິດຕິຄຸນຂອງພຣະອົງ ດ້ວຍວາຈາ ແລະ ການກະທຳ. ການປ່ຽນໃຈເຫລື້ອມໃສຂອງເຮົາແມ່ນລວມທັງໜ້າທີ່ຮັບຜິດຊອບທີ່ຈະແບ່ງປັນພຣະກິດຕິຄຸນຂອງພຣະເຢຊູຄຣິດໃຫ້ກັບຊາວໂລກ.

ພອນຂອງການແບ່ງປັນພຣະກິດຕິຄຸນແມ່ນລວມທັງການປ່ຽນໃຈເຫລື້ອມໃສຕໍ່ພຣະປະສົງຂອງພຣະອົງຫລາຍຂຶ້ນ ແລະ ໃຫ້ພຣະເຈົ້າໄຊຊະນະໃນຊີວິດຂອງເຮົາ.²⁸ ເຮົາເປັນພອນໃຫ້ກັບຄົນອື່ນ ເພື່ອໃຫ້ມີປະສົບການ “ປ່ຽນແປງອັນຍິ່ງໃຫຍ່” ຂອງໃຈ.²⁹ ມັນເປັນຄວາມສຸກນິລັນດອນແທ້ໆ ໃນການຊ່ວຍນຳຈິດວິນຍານມາຫາພຣະຄຣິດ.³⁰ ການອອກແຮງເພື່ອການປ່ຽນໃຈເຫລື້ອມໃສຂອງຕົວເອງ ແລະ ຂອງຄົນອື່ນ ເປັນ ວຽກງານ ສູງສົ່ງ.³¹ ຂ້າພະເຈົ້າເປັນພະຍານໃນພຣະນາມຂອງພຣະເຢຊູຄຣິດ, ອາແມນ.