« 5–11 nō Fēpuare : ‘E ti’amā… ’ia mā’iti i te ti’amāra’a ’e te ora mure ’ore, nā roto i te Arai rahi.’ 2 Nephi 1–2 », Mai, pe’e mai—Nō te ’utuāfare ’e te fare purera’a : Buka a Moromona 2024 (2024)
« 5–11 nō Fēpuare. 2 Nephi 1–2 », Mai, pe’e mai—Nō te ’utuāfare ’e te fare purera’a : 2024 (2024)
Adamu ’e ’o Eva, nā Douglas Fryer
5–11 nō Fēpuare : « E ti’amā…’ia mā’iti i te ti’amār’a ’e te ora mure ’ore, nā roto i te Arai rahi »
2 Nephi 1–2
’Āhani ’ua ’ite ’outou ē, ’ua tae ’outou i te hope’a o tō ’outou orara’a, e aha te mau poro’i hope’a tā ’outou e hina’aro e fa’a’ite atu i tei herehia e ’outou ? I te ’itera’a te peropheta Lehi ē, tē fātata ra ’oia i te hope’a o tōna orara’a, ’ua ha’aputuputu ’oia i tōna ’utuāfare nō te taime hope’a. ’Ua fa’a’ite ’oia ia rātou i te mea tā te Metua i te ao ra i heheu mai iāna. ’Ua fa’a’ite ’oia i tōna ’itera’a pāpū nō te Mesia. ’Ua ha’api’i ’oia i te mau parau mau o te ’evanelia tāna i poihere i te mau ta’ata tāna i poihere. ’Ua parau ’oia i te ti’amāra’a, te ha’apa’ora’a, te hi’ara’a ’o ’Adamu ’e ’o ’Eva, te fa’aorara’a nā roto ia Iesu Mesia ’e te ’oa’oa. ’Aita te tā’āto’ara’a o tāna mau tamari’i i mā’iti e ora i te mea tāna i ha’api’i—’aita hō’ē ’o tātou e nehenehe e rave i teie mau mā’itira’a nō tei herehia e tātou. E nehenehe rā tātou e ha’api’i ’e e fa’a’ite pāpū nō ni’a i te tāra’ehara, ’o tei « fa’ati’amā ia tātou ’ia mā’iti i te ti’amāra’a ’e te ora mure ’ore » (hi’o 2 Nephi 2:26–27).
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe au e « ara ! ’e e ti’a mai mai raro mai i te repo ».
I roto te 2 Nephi 1:13–29, ’a hi’o maita’i i te mau parau tā Lehi i fa’a’ohipa nō te fa’ata’a i te huru pae vārua ’o Lamana ’e ’o Lemuela. E aha te mea e tauturu ia ’outou ’ia ti’a mai mai roto mai i te « vare’a ta’oto rahi » pae vārua ? E aha te mea e tauturu ia ’outou ’ia ueue i « te mau fifi » pae vārua i roto i tō ’outou orara’a ? ’A feruri i te ’itera’a pāpū o Lehi i roto i te ’īrava 15 ’e i tāna anira’a i roto i te ’īrava 23. E aha te poro’i a te Metua i te ao ra nō ’outou i roto i teie mau ’īrava ?
Fa’a’ohipa i te mau hōho’a. E tauturu te fa’a’ohipara’a i te mau hōho’a i te mau pīahi ’ia māramarama i te mau parau mau o te ’evanelia ’e ’ia ha’amana’o maoro i te reira. ’A fa’aineine ai ’outou nō te ha’api’i nā roto i teie arata’i ha’api’ira’a, ’a feruri e aha te mau hōho’a tā ’outou e nehenehe e fa’a’ohipa. ’Ei hi’ora’a, penei a’e e tauturu te hō’ē fifi pāpie i te mau pīahi ’ia māramarama i te mau parau a Lehi i roto te 2 Nephi 1:13 ’aore rā te 2 Nephi 2:27.
Maoti Iesu Mesia, « e ti’amā [vau] ’ia mā’iti i te ti’amāra’a ’e te ora mure ’ore ».
Tei roto te ’utuāfare o Lehi i te hō’ē fenua ’āpī i teienei, tei ’ī i te mau rāve’a ’āpī. E mea faufa’a rahi te mau mā’itira’a tā rātou e rave i roto i teie vāhi ’āpī, nō tō rātou manuiara’a ’e tō rātou ’oa’oa. Penei a’e nō te reira tumu Lehi i ha’api’i ai i tāna tamaiti ’o Iakoba i te ti’amāra’a ’ia mā’iti, ’aore rā te ti’ara’a ’ia rave i te mau mā’itira’a, i roto te 2 Nephi 2. ’A tuatāpapa ai ’outou i te mau ’īrava 11–30, ’a pāpa’i i te mau pāhonora’a e roa’a i teie mau uira’a :
-
Nō te aha e mea faufa’a rahi roa te ti’amāra’a nō te Metua i te ao ra, noa atu ē, tē fa’a’ohipa nei te tahi mau ta’ata i te reira ma te mau rāve’a ha’amāuiui ?
-
Nāhea te ’enemi i te tāmata i te ha’aparuparu ’aore rā i te ha’amou i tō ’outou ti’amāra’a ’ia mā’iti ?
-
Nāhea te Faʼaora i te tauturu ia ’outou ’ia « mā’iti i te tiʼamāra’a ʼe te ora mure ʼore » (’īrava 27) ?
Teie te tahi atu rāve’a nō te ha’api’i mai i te ti’amāra’a i roto te 2 Nephi 2 : ’A ’imi i te mau ’ohipa e mea faufa’a rahi nō tātou ’ia fāri’i i te ti’amāra’a ’ia mā’iti ’e ’ia tae’ahia tō tātou fāito pūai hanahana. ’Ei hi’ora’a :
-
2 Nephi 2:5 : Hō’ē ’itera’a nō te maita’i ’e te ’ino ; hō’ē ture
E aha te ’ohipa e tupu i tō tātou ti’amāra’a ’ia mā’iti, mai te peu e ma’iri hō’ē ’aore e rave rahi o teie mau mea ?
Tei roto i nā tuha’a tāta’itahi e ono o te Nō te pūai o te feiā ’āpī : E arata’i nō te rave i te mau mā’itira’a, tē vai ra « Te mau tītaura’a manihini » ’e « Te mau ha’amaita’ira’a i parauhia ». ’A hi’o i te hō’ē ’aore rā hau atu o teie mau tuha’a, ’e ’a mā’iti i te hō’ē ha’amaita’ira’a i parauhia tā ’outou e tīa’i nei i roto i tō ’outou orara’a. E aha te tītaura’a manihini tā ’outou e ti’a ’ia rave nō te fāri’i i teie ha’amaita’ira’a ? E fa’a’ite i te hō’ē ta’ata i te mau ha’amaita’ira’a tā ’outou i fāri’i nā roto i te pe’era’a i teie mau tītaura’a manihini.
Hi’o ato’a, « ’Ua ti’amā te ta’ata », Te mau Hīmene, N°145.
E nehenehe te Atua e fa’ariro i tō’u mau tāmatara’a ’ei ha’amaita’ira’a.
’Ua ’ite Lehi ē, ’ua fa’aruru tāna tamaiti ’āpī ’o Iakoba i « te mau ’ati » ’e « te ’oto rahi » i te roara’a o tōna tamari’ira’a (2 Nephi 2:1). I tō ’outou mana’o, nō te aha te ’itera’a pāpū o Lehi i roto te 2 Nephi 2:1–3, 6–25, e riro ai ’ei mea faufa’a nō Iakoba ? Nō te aha e mea faufa’a te reira nō ’outou ? ’A ’imi i te mau ta’o ’e te mau pereota tā ’outou e mana’o ra e mea pūai ta’a ’ē. Nāhea tō te Atua ha’amo’ara’a i tō ’outou mau ’ati nō tō ’outou maita’i ? (Hi’o 2 Nephi 2:2.)
Hi’o ato’a Roma 8:28 ; Dale G. Renlund, « ’Ohipa tano ’ore e fa’atupu i te riri », Liahona, Mē 2021, 41–45.
Te hi’ara’a ’e te tāra’ehara a Iesu Mesia e mau tuha’a tumu nō te fa’anahora’a a te Metua i te ao ra.
E rave rahi ta’ata e ti’aturi nei ē, te hi’ara’a o te hō’ē noa ïa ’ati rahi ’e ’ua rave Eva ’e ’o Adamu i te hō’ē hape tāmau, ’a mā’iti ai rāua i te ’amu i te hotu. I roto te 2 Nephi 2:15–28, tē ha’api’i nei Lehi i te tahi atu ā parau mau nō te hi’ara’a—’e nō te fa’aorara’a nā roto i te Mesia. ’A ’imi ai ’outou i teie mau ’īrava, ’a hāmani i te hō’ē tāpura nō te mau parau mau nō te ’ohipa i tupu i roto i te ’ō i Edene. E nehenehe te mau uira’a mai teie te huru e tauturu :
-
Nō te aha te hi’ara’a e tītauhia ai ?
-
E aha te ti’ara’a o Iesu Mesia i roto i te upo’oti’ara’a i ni’a i te mau hope’ara’a o te hi’ara’a ?
-
Nāhea te hāro’aro’a-maita’i-ra’a i te hiʼaraʼa i te tauturu ia tātou ’ia taʼa maitaʼi aʼe i tō tātou hinaʼaro ia Iesu Mesia ?
}Hi’o ato’a Dallin H. Oaks, « The Great Plan of Happiness [Te rāve’a rahi ’oa’oa] » Ensign, Nov. 1993, 72–75.
Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī.
’Eiaha e taiā tō ’outou ’ā’au, nā Howard Lyon
Mana’o nō te ha’api’i i te tamari’i
Tē tauturu nei Iesu Mesia iā’u ’ia upo’oti’a i ni’a i te mau hope’ara’a o te hara.
-
Nō te tauturu i tā ’outou mau tamari’i ’ia māramarama i te anira’a a Lehi ’ia « ueue i te mau fifi » o te hara, penei a’e e nehenehe ’outou e ’ohipa ’āmui nō te hāmani i te hō’ē fifi i te mau ’api parau. I ni’a i te mau ’api parau, e nehenehe tā ’outou mau tamari’i e tauturu ia ’outou, ’ia pāpa’i i te tahi mau mea tā Sātane e fa’ahema nei ia tātou ’ia rave. I muri iho e tai’o ’āmui te 2 Nephi 1:13, 15, 23, ’a ha’uti ai rātou i te tahi mau pereota i roto i teie mau ’īrava—’oia ato’a te ueuera’a i te fifi ’api parau. Nāhea te hara e riro ai mai te hō’ē fifi ? Nāhea Iesu i te tauturu ia tātou ’ia « ueue i te mau fifi » o te hara ?
E ha’amaita’ihia vau ’ia ha’apa’o ana’e au i te mau fa’auera’a a te Atua.
-
E tauturu ānei te reira i tā ’outou mau tamari’i, ’ia fa’aau i te mau fa’auera’a a te Atua i te mau tīa’a, te mau tāupo’o, te mau rimarima, ’aore rā i te tahi atu mau mea e pāruru ia tātou ? Penei a’e e nehenehe ’outou e vaiiho ia rātou ’ia tāmata i te tahi, ’a paraparau ai ’outou e nāhea te mau fa’auera’a i te pāruru ia tātou. I muri iho e tai’o i te 2 Nephi 1:20, ma te ha’apāpū ē, « e manuia » (e ha’amaita’ihia ’aore rā e pāruruhia) tātou, ’ia ha’apa’o ana’e tātou i te mau fa’auera’a. Fa’a’ite i te hō’ē ’itera’a ’a ha’amaita’ihia ai ’aore rā ’a pāruruhia ai ’outou, i te pe’era’a i te mau fa’auera’a.
-
Nō te fa’ahōho’a i te ta’a-’ē-ra’a i rotopū i te manuiara’a ’e te tāpū-’ē-ra’a-hia i te Atua (hi’o 2 Nephi 1:20), e nehenehe ’outou ’e tā ’outou mau tamari’i e hi’o i te hō’ē rā’au tanu maita’i ’e te hō’ē rauere ’aore rā te hō’ē ’āma’a tei tāpū-’ē-hia i te rā’au tanu. I muri iho e hi’o fa’ahou tā ’outou mau tamari’i i te mau mā’itira’a tā Nephi ’e tōna mau taea’e i rave (hi’o 1 Nephi 2:11–16 ; 3:5–7 ; 18:9–11). E aha te mau fa’ahope’ara’a nō teie mau mā’itira’a ? E aha te mau mā’itira’a e tauturu ia tātou ’ia vai tū’ati noa i te Atua ?
’Ua hōro’a mai te Atua iā’u i te ti’amāra’a ’ia mā’iti.
-
Nō te tauturu i tā ’outou mau tamari’i ’ia hāro’aro’a i te mea tā Lehi i ha’api’i nō ni’a i te mau pāto’ira’a ’e te ravera’a i te mau mā’itira’a, e nehenehe ’outou e ha’uti i te hō’ē ha’uti i reira ’outou e parau ai i te hō’ē ta’o (mai te māramarama) ’e e parau tā ’outou mau tamari’i i tōna pāto’ira’a (te pōiri). E tauturu ia rātou ’ia ha’api’i mai nō te aha e tuha’a te mau pāto’ira’a nō te fa’anahora’a a te Atua, ’a tai’o ’āmui ai ’outou te 2 Nephi 2:11, 16. I muri iho, e fa’a’ite i te mau ’ā’amu nō te hō’ē tamari’i tei fa’ahemahia ’ia rave i te hō’ē mā’itira’a ’ino. E nehenehe tā ’outou mau tamari’i e fa’a’ite mai e aha te pāto’ira’a o te mā’itira’a ’ino ’e ’ia ha’uti mai i te reira.
-
Nō te ha’api’i mai i te ta’a-’ē-ra’a i rotopū i te « ti’amāra’a » ’e te « tītīra’a » (2 Nephi 2:27), e nehenehe tā ’outou mau tamari’i e pāpa’i hōho’a o te hō’ē ’ānimara i roto i te hō’ē ’āua ’e te hō’ē ’ānimara i roto i tōna orara’a i roto i te natura. Tei hea te ’ānimara ti’amā ? E ani i te mau tamari’i ’ia fa’atoro i te hōho’a tano, ’ia tai’o ana’e ’outou i te ta’o « ti’amā » i roto te 2 Nephi 2:27. ’A fa’a’ite pāpū ē, ’ua hōro’a mai Iesu Mesia ia tātou te ti’amāra’a ’ia mā’iti.
-
E hīmene ’āmui i te hō’ē hīmene mai te « Mā’iti i te maita’i » (Te mau Hīmene, N°144). E aha tā tātou i ha’api’i mai nā roto mai i teie hīmene nō ni’a i te ravera’a i te mau mā’itira’a ?
Nō te tahi atu ā mana’o, hi’o i te ve’a nō teie ’āva’e o te Hoa.
Te taera’a Lehi ’e tōna mau ta’ata i te ao ’āpī,, nā Clark Kelley Price