12–18 nō Fēpuare : « ’Ua ora noa ihora mātou ma te ’oa’oa »

2 Nephi 3–5

I te tai’ora’a i te 1 Nephi, ’ua tupu mai paha te mana’o ē, e ta’ata pautuutu ’o Nephi. « E tino rahi » i te pae tino ’e i te pae vārua (1 Nephi 2:16), mai te huru ē, ’aita ’oia i ’āueue i mua i te mau tāmatara’a tāna i fa’aruru. ’Aore rā ’o terā te mana’o e tupu mai i roto ia tātou. Noa atu te fa’aro’o fa’ahiahia mau ’o Nephi, tē heheu mai nei tāna mau parau aroha i roto te 2 Nephi 4 ē, ’oia ato’a te mau ta’ata ha’apa’o maita’i e tupu mai te mana’o i te tahi taime te « ’ati rahi » ’e te « ro’ohia-’ōhie-hia » i te mau fa’ahemara’a. Tē ’ite nei tātou i’ō nei i te hō’ē ta’ata e tāmata nei, ’o tē hina’aro nei ’ia ’oa’oa, terā rā « tē autā nei [tōna] ’ā’au nō [tāna] mau hara ». E nehenehe tātou e māramarama i te reira ’e tē hina’aro pāpū tei ’ī i te tīa’ira’a i muri mai : « ’Āre’a rā, ’ua ’ite au iāna tā’u i ti’aturi » (hi’o 2 Nephi 4:15–19).

’A ha’api’i ai Nephi ’e tōna mau ta’ata ’ia ora « ma te ’oa’oa » (2 Nephi 5:27), ’ua ha’api’i ato’a mai rātou ē, e’ita te reira ’oa’oa e tae ’ōhie noa mai ’aore rā i te mau taime ’oto ’ore. E tae mai te reira i te hope’a nā roto i te ti’aturira’a i te Fatu, « te papa nō [tō tātou] ra parauti’a » (2 Nephi 4:35).

Mana’o nō te ’apo i te ha’api’ira’a i te ’utuāfare ’e i te fare purera’a

2 Nephi 3:6–24

’Ua mā’itihia Iosepha Semita e te Atua nō te fa’aho’i fa’ahou mai i te ’evanelia.

’Ua fa’a’ite Lehi i tāna tamaiti ia Iosepha i te hō’ē parau tohu tei hōro’ahia mai e Iosepha nō ’Aiphiti. Te parau tohu nō te hō’ē « hi’o maita’i » tauāmuri, ’o Iosepha Semita. E aha tā te mau ’īrava 6–24 e parau nei, e rave Iosepha Semita nō te ha’amaita’i i te mau ta’ata o te Atua ? ’A feruri e mea nāhea te ’ohipa a Iosepha Semita i te riro « ’ei mea faufa’a rahi roa » nō ’outou. E nehenehe ’outou e fāri’i i te tahi mau mana’o nā roto mai i te mau video nō ni’a ia Iosepha Semita i roto te « Prophets of the Restoration [Mau peropheta o te fa’aho’i-fa’ahou-ra’a mai] » i roto te ha’aputura’a vaira’a buka ’evanelia. ’A feruri i te mau uira’a mai teie ’e ’a feruri i te pāpa’ira’a i tā ’outou mau pāhonora’a :

• E aha tā ’outou i ’ite nō ni’a i te Metua i te ao ra ’e ia Iesu Mesia, maoti te mea tā Iosepha Semita i ha’api’i ?

• Mai te aha tō ’outou orara’a i ta’a ’ē ai, maoti i te mea tā te Fatu i fa’aho’i fa’ahou mai nā roto mai ia Iosepha Semita ?

• E aha te huru o tō ’outou orara’a ’āhiri ’aita i tupu te fa’aho’i-fa’ahou-ra’a mai ?

Hō’ē tuha’a faufa’a rahi roa nō te misiōni a Iosepha Semita ’oia ho’i, te fa’ataera’a mai i te Buka a Moromona. E aha tā ’outou i ha’api’i mai nā roto mai i teie pene nō ni’a i te faufa’a rahi o te Buka a Moromona ? ’Ei ta’a-’ē-ra’a, e nehenehe ’outou e ’imi i te mau tumu i roto i te mau ’īrava 7, 11–13, 18–24.

« ’Aue te ta’ata i parau ia Iehova », Te mau Hīmene, N°16.

Peropheta a te Fatu, nā David Lindsley

2 Nephi 4:15–35

« E te Fatu, ’ua ti’aturi au ia ’oe ».

’Ua parau Nephi ē, « tē pāpa’i nei au i te mau mea i roto i tō’u nei vārua » (’īrava 15). ’A tai’o ai ’outou i te mea tāna i pāpa’i i roto te 2 Nephi 4:15–35, ’a ui ia ’outou iho, « E aha te mau mea i roto i tō’u vairua ? » E pāpa’i i te reira, mai tā Nephi i rave, ’e ’a fa’a’ite atu i te reira i te mau ta’ata tā ’outou i here.

Te ’itera’a e nāhea tō Nephi fāri’ira’a i te tāmāhanahana i te taime ’a teimaha roa ai ’e ’a pe’ape’a roa ai ’oia, e tauturu te reira ia ’outou i te taime ’a fāri’i ai ’outou i te hō’ē ā mana’o. ’A ’imi i roto i te mau ’īrava 15–35 i te mau tuha’a o tē hōro’a mai ia ’outou i te tāmāhanahanara’a. ’Ua mātau ānei ’outou i te tahi atu ta’ata e nehenehe e fāri’i i te tāmāhanahanara’a i roto i teie mau tuha’a ’īrava ?

’A hi’o ato’a Ronald A. Rasband, « Te mau mea nō tō’u vairua » », Liahona, Novema. 2021, 39–41.

2 Nephi 5

E nehenehe au e fāri’i i te ’oa’oa nā roto i te orara’a i te ’evanelia a Iesu Mesia.

I tō ’outou mana’o, e aha te aura’a o te parau ’ia ’oa’oa ? ’Ua pāpa’i Nephi ē, « ’ua ora noa ihora [tōna mau ta’ata] ma te ’oa’oa » (2 Nephi 5:27). E nehenehe ’outou e ’imi i te mau mā’itira’a tā Nephi ’e tōna mau ta’ata i rave, tei tauturu ia rātou ’ia ’oa’oa (hi’o, ’ei hi’ora’a 2 Nephi 5:6, 10–17). E aha te mea e nehenehe e tauturu ia ’outou ’ia patu i te hō’ē orara’a ’oa’oa mai tō te mau ta’ata o Nephi ?

2 Nephi 5:20–21

E aha te ’anatemara’a tei tae mai i ni’a i te mau ’āti Lamana ?

I te tau o Nephi, te ’anatemara’a o te mau ’āti Lamana, ’oia ho’i « ’ua tāpū-’ē-hia rātou mai mua atu i te aro o [te Fatu] nō tā [rātou] mau hara » (2 Nephi 5:20–21). Te aura’a o te reira, ’ua ’īriti-’ē-hia te Vārua o te Fatu i tō rātou orara’a. I te tauahira’a te mau ’āti Lamana i te ’evanelia a Iesu Mesia i muri iho, « ’aita roa te ’anatemara’a a te Atua i ma’iri fa’ahou mai i ni’a ia rātou » (Alama 23:18).

Tē ha’apāpū ato’a nei te Buka a Moromona ē, ’ua tae mai te tāpa’o nō te ’iri ’ere’ere i ni’a i te mau ’āti Lamana, i muri a’e i te fa’aāteara’a mai te mau ’āti Nephi ia rātou. ’Aita te nātura ’e te huru hōho’a o te reira tāpa’o i māramarama-hope-hia. I te ha’amatara’a, e fa’ata’a ’ē te tāpa’o i te mau ’āti Lamana i te mau ’āti Nephi. I muri mai, nō te haere-to’opiti-ra’a te mau ’āti Nephi ’e te mau ’āti Lamana nā roto i te mau taime ’ino ’e te mau taime parau-ti’a, riro atura te tāpa’o ’ei mea faufa’a ’ore.

Tē ha’apāpū nei te mau peropheta i tō tātou nei ’anotau ē, e ’ere te ’iri ’ere’ere i te tāpa’o nō te au ’ore o te Atua ’aore rā te hō’ē ’anatemara’a. ’Ua parau te peresideni Russell M. Nelson : « Tē ha’apāpū atu nei au ia ’outou ē, ’aita tō ’outou ti’ara’a i mua i te Atua e fa’ata’ahia i te ’ū o tō ’outou ’iri. Te au maita’i ’aore rā te au maita’i ’ore i te Atua, tei te huru ïa o tō ’outou ha’amorira’a i te Atua ’e i tāna mau fa’auera’a ’e ’eiaha rā i te ’ū o tō ’outou ’iri » (« ’A vaiiho i te Atua ’ia upo’oti’a », Liahona, Nov. 2020, 94)

Mai tā Nephi i ha’api’i ra, ’aita roa te Fatu « e pāto’i i te hō’ē ’ia haere mai iāna ra, te ’ere’ere ’e te ’uo’uo, te tītī ’e te ti’amā, te tāne ’e te vahine ; e hō’ē ana’e rātou ato’a i mua i te Atua » (2 Nephi 26:33).

Hi’o ato’a « Till We All Come in the Unity of the Faith [E tae noa atu i te taime e hō’ē ai tātou pā’āto’a i roto i te fa’aro’o » (video), Vaira’a buka ’evanelia.

Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī.

Mana’o nō te ha’api’i i te tamari’i

2 Nephi 3:6–24

E peropheta ’o Iosepha Semita.

• ’A feruri nāhea ’outou e nehenehe ai e ha’api’i i tā ’outou mau tamari’i nō ni’a i te ’ohipa rahi tā te Atua i rave nā roto ia Iosepha Semita. Nō te ha’amata, e tauturu i tā ’outou mau tamari’i ’ia ’imi i te ta’o « hi’o » i roto te 2 Nephi 3:6 ’e ’a fa’ata’a ē, e pi’ihia te mau peropheta ’ei hi’o nō te mea tē tauturu nei te Metua i te ao ra ia rātou ’ia hi’o i te mau mea ’aita tātou e nehenehe e hi’o. ’A fa’a’ite nō te aha ’outou i māuruuru ai ’ia vai mai te hō’ē hi’o nō te arata’i i te ’Ēkālesia.

• E rave rahi hōho’a i roto i te Buka hōho’a ’evanelia tā ’outou e nehenehe e fa’a’ohipa nō te ha’api’i nō ni’a i te ’ohipa tā te Atua i rave nā roto ia Iosepha Semita (hi’o te mau hōho’a 89–95). ’A vaiiho i tā ’outou mau tamari’i ’ia fa’a’ite mai e aha tā rātou i ’ite nō ni’a i te mau hōho’a. Nō te aha Iosepha Semita i pi’ihia ai « ’ei hi’o maita’i » ? E aha tā Iosepha Semita i rave ’o tei riro « ’ei mea faufa’a rahi roa » ? (’īrava 7).

2 Nephi 4:15–35 ; 5

E mea au nā’u « te mau mea a te Fatu ».

• E aha te mea e fa’a’oa’oa ia tātou ? E tai’o ’āmui i te mau ’īrava i roto te 2 Nephi 4 nō te ’ite mai e aha tei ha’apoupou ia Nephi ’aore rā tei fa’a’oa’oa iāna (hi’o ’īrava 15–16, 20–25, 34–35). I roto i tāna parau poro’i « Te mau mea o tō’u vārua », ’ua fa’a’ite Elder Ronald A. Rasband e hitu « mau mea a te Fatu » tei riro ’ei mea faufa’a rahi nōna (Liahona, Novema 2021, 39–41). E nehenehe paha ’outou e hi’o ’āmui i tāna tāpura ’e e ’āparau nō ni’a i « te mau mea a te Fatu » tei riro ’ei mea faufa’a rahi roa nō ’outou.

• Tē fa’ata’a ato’a nei te 2 Nephi 5 i te mau mea tei tauturu i te mau ’āti Nephi ’ia ora « i muri a’e […] ma te ’oa’oa » (’īrava 27). E hōro’a i te tahi mau ta’o ’aore rā mau hōho’a e fa’ahōho’a nei i teie mau mea, ’e e tauturu i tā ’outou mau tamari’i ’ia fa’atū’ati i te reira i te mau ’īrava i roto te pene 5. Te tahi mau hi’ora’a tē vai ra te ’utuāfare (’īrava 6), te mau fa’auera’a a te Atua (’īrava 10), te mau pāpa’ira’a mo’a (’īrava 12), te ’ohipa (’īrava 15 ’e 17), te mau hiero (’īrava 16), ’e te mau pi’ira’a o te ’Ēkālesia (’īrava 26). Nāhea teie mau mea i te hōpoi mai i te ’oa’oa ia tātou ?

2 Nephi 5:15–16

Te hiero o te fare ïa o te Fatu.

• ’A tai’o ai ’outou te 2 Nephi 5:15–16 i tā ’outou mau tamari’i, e nehenehe rātou e fa’ahua tē tauturu ra rātou ia Nephi ’ia patu i te hō’ē hiero. E nehenehe ato’a ’outou e fa’a’ite ia rātou i te mau hōho’a nō te mau fare patu rau, tae noa atu i te hō’ē hiero. Nāhea te mau hiero e ta’a ’ē ai i te tahi atu mau fare patu ? ’A fa’a’ite i te tahi e te tahi nō te aha e mea faufa’a te hiero nō ’outou (hi’o ato’a « Oh, j’aime voir le temple », Chants pour les enfants, 99).

E nehenehe te mau huru taime ato’a e riro ’ei taime ha’api’ira’a. ’Eiaha e feruri, te ha’api’ira’a i tō ’outou ’utuāfare mai te hō’ē ’ohipa tā ’outou e rave hō’ē taime i te hepetoma, i roto i te hō’ē ha’api’ira’a pāpū. ’A feruri i te reira mai te hō’ē ’ohipa tā ’outou e rave i te mau taime ato’a.

Nō te tahi atu ā mana’o, hi’o i te ve’a nō teie ’āva’e o te Hoa.

Te hiero o Nephi, nā Michael T. Malm