’Eiaha tō’u hina’aro, tō ’oe rā e ti’a ai, nā Harry Anderson

19–25 nō Fēpuare°: « ’Auē ho’i te rahi o te ’ōpuara’a a tō tātou Atua »

2 Nephi 6–10

E 40 matahiti i ma’iri i tō te ’utuāfare o Lehi fa’aru’era’a ia Ierusalema. Tei roto rātou i te hō’ē fenua ’āpī huru ’ē, te ’āfa ātea ia Ierusalema. ’Ua pohe ’o Lehi ’e ’ua ha’amata a’ena tōna ’utuāfare i te fa’atupu ’o tei riro mai ’ei mārōra’a nō te tau tenetere te maoro i rotopū i te mau ’āti Nephi—« tei ti’aturi i te mau parau fa’aara ’e te mau heheura’a a te Atua »—’e te mau ’āti Lamana, tei ’ore i ti’aturi (2 Nephi 5:6). ’O Iakoba, te teina o Nephi ’e tei fa’atōro’ahia i teienei ’ei ’orometua ha’api’i nō te mau ’āti Nephi, ’ua hina’aro ’oia ’ia ’ite te nūna’a fafauhia a te Atua ē, e’ita roa te Atua e ha’amo’e ia rātou ’e ’eiaha roa atu rātou e ha’amo’e iāna. E mea pāpū roa, teie te parau poro’i tā tātou e hina’aro i teie mahana (hi’o Te Ha’api’ira’a Tumu ’e te mau Fafaura’a 1:15–16). « ’A ha’amana’o tātou iāna… ’aore ho’i tātou i fa’aru’ehia. … ’Ua rahi tā te Fatu mau fafaura’a » ’ua parau Iakoba (2 Nephi 10:20–21 I roto i te reira mau parau fafau, ’aita e mea rahi a’e i te parau fafau o te hō’ē « tāra’ehara mure ’ore » nō te upo’oti’a i ni’a i te pohe ’e ia hade (2 Nephi 9:7). ’Ua fa’aoti Iakoba : « Nō reira, ’ia ’oa’oa tō ’outou ’ā’au » ! (2 Nephi 10:23).

Mana’o nō te ’apo i te ha’api’ira’a i te ’utuāfare ’e i te fare purera’a

2 Nephi 6–8

E aroha tō te Fatu i tōna mau ta’ata ’e e fa’atupu ’oia i tāna mau fafaura’a.

Nō te tauturu i tōna mau ta’ata ’ia māramarama ē, e tuha’a rātou nō te ’utuāfare o ’Īserā’ela, ’e e ti’a ia rātou ’ia ti’aturi i te Atua ’e i tāna mau parau fafau, ’ua fa’ahiti Iakoba i te mau parau tohu a Isaia i pāpa’ihia i roto te 2 Nephi 6–8. Nō ’outou ato’a teie poro’i, nō te mea e tuha’a ato’a te feiā mo’a i te mau mahana hope’a nei nō te nūna’a fafauhia a te Atua. ’A tai’o ai ’outou i teie mau pene, ’a feruri i te mau uira’a mai teie i muri nei :

• E aha tā’u i ha’api’i mai nō ni’a i te here fa’aora o te Fa’aora nō’u ? E aha te mau ta’o ’aore rā te mau pereota e fa’a’ite nei i teie here ta’a ’ē maita’i ?

• E aha tā te Fa’aora i pūpū i te mau ta’ata e ’imi iāna ?

• E aha tā’u e nehenehe e rave nō te « tīa’i » i te Fa’aora ’e tāna mau ha’amaita’ira’a i parau fafau mai ?

2 Nephi 9:1–26

E fa’aora Iesu Mesia iā’u i te hara ’e i te pohe.

Hōʼē rāveʼa nō te faʼahōhonu i tō tātou māuruuru nō Iesu Mesia, ’o te feruriraʼa ïa e aha te tupu mai ia tātou ʼāhani ’aita ’oia. ’A tai’o ai ’outou te 2 Nephi 9:1–26, e feruri e hāmani ’aore rā e tāpa’o i te hō’ē ’ū i te mau mea e tupu ia tātou ’āhani ’aita te tāra’ehara a Iesu Mesia. I muri iho, i roto i te tahi atu tāpura ’aore rā i te tahi atu ’ū, e nehenehe ’outou e fa’a’ite e aha tā tātou e fāri’i nā roto mai i te tāra’ehara a te Fa’aora. ’Ia au i te mau mea tā ’outou i tai’o, nāhea ’outou i te fa’ata’a nō te aha tātou e hina’aro ai i te tāra’ehara a Iesu Mesia ? E aha tei ’itehia mai ia ’outou tei fa’auru ia ’outou ’ia ’ārue i « te pa’ari o te Atua ē, tōna aroha ’e tōna maita’i » ? (2 Nephi 9:8).

Ta’a ’ē atu i te ha’api’ira’a i te mea tā Iesu Mesia i fa’aora ia tātou, ’ua hōro’a ato’a mai Iakoba i te mau mana’o e mea nāhea ’oia i te ravera’a i te reira. E pāpa’i i te mea tā ’outou i ’ite mai i roto te 2 Nephi 9:11–15, 20–24.

Nō tō Iakoba maere rahi i te fa’anahora’a nō te fa’aorara’a a te Atua, ’ua fa’ahiti ’oia « ’Auē ho’i te rahi o te ’ōpuara’a a tō tātou Atua » ’A ’imi i tāna mau fa’ahitira’a i roto te 2 Nephi 9 (e ’itehia te rahira’a o te reira i roto i te mau ’īrava 8–20). E aha tā ’outou i ’apo mai i roto i teie mau ’īrava nō ni’a i te fa’anahora’a a te Atua ? E aha te mau ’ohipa i tupu tei tauturu ia ’outou ’ia putapū i te tahi o te mau mea tā Iakoba i putapū ? ’Ei tuha’a nō tā ’outou ha’amorira’a ’e tuatāpapara’a, ’a feruri e ’imi i te hō’ē hīmene ’o tē fa’a’ite nei i te mea tā ’outou e putapū nei nō ni’a iāna, mai te « Tō’u Fa’aora ! tō’u Atua ! » (Te mau Hīmene, N°42).

Hi’o ato’a « Where Justice, Love, and Mercy Meet [I reira te parauti’a, te here ’e te aroha e fārerei ai », « Jacob Teaches of the Resurrection [Te ha’api’i nei Iakoba nō ni’a i te ti’afa’ahoura’a] » (video), Vaira’a buka ’evanelia.

2 Nephi 9:7

E mea mure ’ore te tāra’ehara a te Fa’aora.

E aha tā ’outou e nehenehe e rave nō te hāro’aro’a maita’i a’e i te « tāra’ehara mure ’ore » a Iesu Mesia ? 2 Nephi 9:7 Penei a’e e nehenehe ’outou e hi’o i te mau mea e nūmera hope’a ’ore—te ’aihere i ni’a i te hō’ē māhora, te one i tahatai, ’aore rā te mau fēti’a i roto i te ra’i. E mea nāhea te tāra’ehara a te Fa’aora e riro ai ’ei mea hope’a ’ore ? Nāhea te reia e riro ai nō te ta’ata hō’ē ato’a ? E aha te mau pereota i roto te 2 Nephi 9 e tauturu ia ’outou ’ia māuruuru nō te mea tā te Fa’aora i rave nō ’outou ?

2 Nephi 9:27–54

E nehenehe au e haere i te Mesia ra ’e e pe’e i te fa’anahora’a a te Atua.

I roto te 2 Nephi 9, ʼua faʼaʼohipa Iakoba e piti pereota pūai ʼe te taʼa ʼē : « te ’ōpuara’a aroha a Tei Hāmani » ʼe « te ’ōpuara’a ha’avare a te diabolo ra » (2 Nephi 9:6, 28). E nehenehe paha ’outou e pāpa’i hōho’a i te hō’ē ’ē’a ʼe ʼia tāpaʼo i te reira Te ’ōpuara’a a te Metua i te ao ra. I muri iho e ’imi te 2 Nephi 9:27–52. ’A ’imi i te mau fa’aarara’a ’e te mau anira’a tā Iakoba i hōro’a mai, nō te tauturu ia tātou ’ia pe’e i teie ’ōpuara’a. ’A pāpa’i i te mea tā ’outou i ʼite mai i pīha’i iho i te ʼēʼa. Nāhea Sātane i te tāmata i te arata’i ’ē atu ia tātou i te ’ōpuara’a a te Atua ? E aha tā te Vārua e fa’auru nei ia ’outou ’ia rave ’ei pāhonora’a i te mau fa’aarara’a ’e i te mau anira’a a Iakoba ?

2 Nephi 10:20, 23–25

E nehenehe te tāra’ehara a Iesu Mesia e hōro’a mai iā’u i te oa’oa.

Te poro’i a Iakoba e mea ’oa’oa ïa. ’Ua nā ’ō ’oia, « tē parau atu nei au i teie mau mea ia ’outou ’ia ’oa’oa ’outou, ’e ’ia fa’ateitei ’outou i tō ’outou upo’o ē a muri noa atu » (2 Nephi 9:3). ’Ia tai’o ’outou te 2 Nephi 10:20, 23–25, e aha te mea tā ’outou e ’ite nei ’o tē fa’a’oa’oa i tō ’outou ’ā’au ? E aha tā ’outou e rave nō te ha’amana’o i teie mau mea i te taime e tae mai te mana’o paruparu ?

Hi’o ato’a Ioane 16:33; D. Todd Christofferson, « Te ’oa’oa o te feiā mo’a », Liahona, Nov. 2019, 15–18 ; « Jacob Encourages the Nephites to Be Reconciled with God [Tē fa’aitoito nei Iakoba i te ’āti Nephi ’ia fa’ahau ’e te Atua] » (video), Vaira’a buka ’evanelia.

Nō te tahi atu ā mana’o, hi’o i te mau ve’a nō teie ’āva’e o te Liahona ’e Nō te Pūai ’o te Feiā ’Āpī.

Mana’o nō te ha’api’i i te tamari’i

2 Nephi 9:6–10, 19–24

’O Iesu Mesia tō’u Fa’aora.

• Nāhea ’outou i te tauturu i tā ’outou mau tamari’i ’ia hāro’aro’a ’e ’ia putapū ē, e hina’aro rātou i te Fa’aora ’o Iesu Mesia ? E tauturu te ’api fa’a’ana’anataera’a o teie hepetoma. Tē fa’a’ohipa nei te reira i te hō’ē fa’aaura’a ’ōhie roa nō te hō’ē ’āpo’o ’e te hō’ē ’ē’a. E fa’a’ohipa i te 2 Nephi 9:21–22 nō te fa’ata’a i tā ’outou mau tamari’i ē, nō te aha ’outou i māuruuru ai ia Iesu Mesia.

• Hō’ē rāve’a nō te tauturu i tā ’outou mau tamari’i ’ia māramarama nō te aha tātou e hina’aro ai i te Fa’aora, ’o te ha’api’ira’a ïa ia rātou nō ni’a i te hi’ara’a. E nehenehe ’outou e fa’a’ite i te hō’ē hōho’a nō Adamu ’e ’o Eva, mai te Fa’aru’era’a i te ’ō i Edene (Vaira’a buka ’evanelia), ’e hō’ē hōho’a nō Iesu Mesia i ni’a i te sātauro. ’E ani i te mau tamari’i ’ia fa’ata’a mai e aha te mea e tupu ra i roto i te hōho’a tāta’itahi. Nāhea tātou e riro ai mai ia Adamu ’e ’o Eva te huru ? E nehenehe paha te 2 Nephi 9:6–10 e tauturu ia rātou ’ia ’ite e aha tā Iesu Mesia i rave nō tātou. E ani i te mau tamari’i ’ia fa’a’ite mai i tō rātou mau mana’o nō ni’a ia Iesu Mesia. E nehenehe hō’ē hīmene mai te « Je ressens son amour » (Chants pour les enfants, 42–43) e tauturu.

Ha’api’i i te parau mau nā roto i te mau ’ā’amu ’e te mau hi’ora’a. ’Ia pāpū maita’i ē, te mau ’ā’amu ’e te mau hi’ora’a tā ’outou e fa’a’ohipa ra, tē ha’api’i nei i te parau mau. ’Ei hi’ora’a, ’ia fa’a’ohipa-ana’e-hia te ’api fa’a’ana’anataera’a nō teie hepetoma, ’a ha’api’i ē, ’ua tomo atu Iesu Mesia i roto i te « ’āpo’o », nō te tauturu ia tātou i ni’a i te ta’ahira’a tāta’itahi o te ’ē’a ’a haere mai ai tātou i rāpae.

2 Nephi 9:20, 28–29, 42–43, 49

« ’Ua ’oa’oa ho’i tō’u ’ā’au i te parauti’a ».

• Nō te fa’aitoito i tā ’outou mau tamari’i ’ia « ’oa’oa i te parauti’a » ’aore rā ’ia ha’apa’o ma te ’oa’oa i tā te Fatu (2 Nephi 9:49), penei a’e e nehenehe ’outou e fa’a’ite i te mau hi’ora’a i reira te hō’ē tamari’i e rave ai i te hō’ē mā’itira’a maita’i ’aore rā te hō’ē mā’itira’a ’ino. E ani i te mau tamari’i ’ia ti’a mai i ni’a ’ia hōro’a ana’e mai te mā’itira’a i te ’oa’oa ’e ’ia pārahi i raro ’ia hōro’a ana’e mai te mā’itira’a i te ’oto. E aha te taime i ’ite ai tātou i te ’oa’oa nō te mea ’ua mā’iti tātou i te pe’e ia Iesu Mesia ?

• E riro tā ’outou mau tamari’i i te ’āparau atu ’e te mau ta’ata (mai te mea ’aita rātou i rave a’ena) ’o tē mana’o nei ē, e mea ma’ama’a te mau fa’auera’a a te Fatu ’aore rā ’ua hope tōna tau. Penei a’e e nehenehe ’outou ’e tā ’outou mau tamari’i e paraparau, e nāhea ’ia fa’ata’a nō te aha tātou e ’oa’oa ai ’ia ha’apa’o i te mau fa’auera’a. Nō te aha e mea faufa’a ’ia ti’aturi i te parau a’o a te Atua noa atu ē, ’aita tātou e māramarama hope roa i te reira ? E nehenehe ’outou e fa’aitoito ia rātou ’ia hi’o i roto te 2 Nephi 9:20, 28–29, 42–43, nō te tauturu i te feruri-māite-ra’a ’e te ’āparaura’a i teie mau uira’a.

Nō te tahi atu ā mana’o, hi’o i te ve’a nō teie ’āva’e o te Hoa.

’Ua fa’aora ’oia e rave rahi ma’i, nā J. Kirk Richards