tē pāpa’i ra Isaia i ni’a i te ’ōtaro

26 nō Fepuare–3 nō Māti : « E ma’irihia tōna ra i’oa […] Te Ari’i nō te hau »

2 Nephi 11–19

E ’ere te nana’ora’a i ni’a i te mau ’api ’auri i te ’ohipa ’ōhie, ’e ’aita ho’i i rahi roa te mau ’api iti a Nephi. Nō reira, nō te aha Nephi i tūtava ai i te pāpa’i e rave rahi pāpa’ira’a a te peropheta Isaia i roto i tāna pāpa’a parau ? ’Ua rave ’oia i te reira nō te mea ’ua hina’aro ’oia ’ia ti’aturi tātou ia Iesu Mesia. ’Ua pāpa’i ’oia : « ’ua ’oa’oa tō’u vārua i te fa’a’ite-pāpū-ra’a atu i tō’u mau ta’ata i te parau mau nō te taera’a mai o te Mesia » (2 Nephi 11:4). ’Ua ’ite Nephi i te mea e tupu i ni’a i tōna mau ta’ata i roto i te mau u’i nō ananahi. ’Ua ’ite ’oia ē, noa atu tō rātou mau ha’amaita’ira’a rahi, e riro mai rātou ’ei ta’ata te’ote’o, te mārō ’e te tino nei (hi’o 1 Nephi 12 ; 15:4–6). ’Ua ’ite ato’a ’oia i taua mau fifi ra i tō tātou nei ’anotau (’a hi’o 1 Nephi 14). ’Ua fa’aara te mau pāpa’ira’a a Isaia nō ni’a i taua huru ’ino ra. ’Ua hōro’a ato’a rā rātou ia Nephi i te tīa’ira’a nō te hō’ē ananahi hanahana—hō’ē hope’a nō te ’ino, te ha’aputuputura’a i te feiā ha’apa’o maita’i ’e te « māramarama rahi » nō te feiā tei « haere nā roto i te pōuri » (2 Nephi 19:2). E tupu teie mau mea ato’a nō te mea « ’ua fānauhia te hō’ē tamari’i » ’o tē nehenehe e fa’aoti i te mau mārōra’a ato’a—« Te Ari’i nō te hau » (2 Nephi 19:6).

Mana’o nō te ’apo i te ha’api’ira’a i te ’utuāfare ’e i te fare purera’a

Nāhea vau e nehenehe ai e māramarama maita’i a’e i te mau ha’api’ira’a a Isaia ?

’Ua ’ite o Nephi ē, « ’aita te mau parau a Isaia i pāpū » (2 Nephi 25:4). ’Ua hōro’a ato’a rā ’oia i te tahi rāve’a nō te tauturu ia tātou ’ia ’ite i te aura’a o te mau parau a Isaia :

• « Fa’aau i tāna ra mau parau » ia ’outou iho (2 Nephi 11:2). E rave rahi ha’api’ira’a a Isaia ’ua rau te aura’a ’e te fa’a’ohipara’a. ’Ei hi’ora’a, ’ia tai’o ’outou nō ni’a i te mau vāhi fa’aeara’a i roto i te 2 Nephi 14:5–6, ’a feruri nāhea teie mau ’īrava e tano ai i tō ’outou fare. ’A ui ia ’outou iho, « Eaha tā te Metua i te ao ra e hina’aro iā’u ’ia ha’api’i mai ? »

• ’Imi i te mau tāipe nō Iesu Mesia (hi’o 2 Nephi 11:4). E rave rahi ha’api’ira’a a Isaia nō ni’a i te Fa’aora tei hōro’ahia mai nā roto i te mau taipe. ’Ei hi’ora’a, nāhea te Fa’aora e fa’ahōho’ahia ai i roto i te 2 Nephi 19:2 ? E aha tā teie tāipe e ha’api’i nei ia ’outou nō ni’a iāna ?

• « ’Imi ’ia « ’ī i te vārua tohu » (2 Nephi 25:4). ’A tuatāpapa ai ’outou, ’a pure nō te arata’ira’a pae vārua. E’ita paha ’outou e māramarama pau roa i terā taime, e ti’a rā i te Vārua ’ia tauturu ia ’outou ’ia ha’api’i mai i te mea e tītauhia ia ’outou ’ia ’ite.

Penei a’e e tauturu ato’a ’ia hi’o i te mau tauturu tuatāpapara’a i roto i te mau pāpa’ira’a mo’a, mai te mau fa’ahorora’a, te mau upo’o parau pene, ’e te Arata’i nō te mau pāpa’ira’a mo’a. Tē vai fa’ahou ra te tahi atu ā ha’amāramaramara’a i roto i te Buka a Moromona ’e te Faufa’a Tahito e nehenehe e tauturu ia ’outou ’ia ha’api’i mai nō ni’a i te tumu parau o te mau ha’api’ira’a a Isaia.

2 Nephi 11–19

ʼUa fa’a’ite pāpū Isaia nō Iesu Mesia.

Nō te mea hoʼi ʼua faʼaʼohipa rahi Isaia i te parau parabole, e mea ʼōhie roa ’ia tāu’a ʼore i tōna ʼiteraʼa pāpū pūai nō Iesu Mesia. ’A ’imi i te Fa’aora i roto i te 2 Nephi 13:13 ; 14:4–6 ; 15:1–7 ; 16:1–7 ; 17:14 ; 18:14–15 ; 22:2. E aha tā teie mau ’īrava e haʼapiʼi nei ia ’outou nō niʼa iāna ?

Tē tāpura nei te tohuraʼa i roto i te 2 Nephi 19:6 e rave rahi iʼoa o Iesu Mesia. Nāhea tō te Mesia rave-fa’aoti-ra’a i teie mau ti’ara’a i roto i tō tātou orara’a ?

Hi’o ato’a Ulisses Soares, « Iesu Mesia : Te ta’ata aupuru i tō tātou vārua », Liahona, Mē 2021, 82–84.

2 Nephi 12–13 ; 15

E fa’aha’eha’ahia tei te’ote’o ’e tei hina’aro i tō te ao nei.

’Ua ’ite ātea ’o Nephi ē, e riro te te’ote’o i te fa’atupu i te hi’ara’a o tōna mau ta’ata (hi’o 1 Nephi 12:19). Nō reira, e ’ere i te ’ohipa māere ’ua fa’a’ite Nephi i tōna mau ta’ata i te mau fa’aarara’a pinepine a Isaia i mua i te te’ote’o. I roto i te mau pene 12 ’e 13, ’a ’imi i te mau ta’o tā Isaia i fa’a’ohipa nō te fa’ahiti i te parau nō te te’ote’o, mai te mata teitei ’e te mata ’ōfefa. I roto i te 2 Nephi 15:1–24, ’a ’imi i te reo tāipe o te fa’a’ite mai i te mau hope’ara’a o te te’ote’o. I muri iho e tāmata i te ha’apoto i te mea tā ’outou i tai’o nā roto i tā ’outou iho mau parau. ’A feruri e nāhea ’outou i te mā’iti ’ia fa’aha’eha’a.

Hi’o ato’a « Pene 18 : E ara i te te’ote’o » Te Mau Ha’api’ira’a a te Mau Peresideni o te ’Ēkālesia : Ezra Taft Benson (2014), 255–66.

īteti nō te séminaire

2 Nephi 12:2–3

Te hiero ’o te fare ïa o te Fatu.

’Ua pi’i Isaia i te hiero « te mou’a ra o te fare o Fatu » (2 Nephi 12:2). Nō te aha te mou’a e riro ai ’ei tāipe maita’i nō te hiero ?

Nāhea ’outou i te fa’ata’a atu i te hō’ē ta’ata nō te aha tātou e hina’aro ai i te hiero ? E nehenehe ’outou e ’ite mai i te tahi mau pāhonora’a i roto i te 2 Nephi 12:2–3 ’e te parau poro’i a te peresideni Russell M. Nelson « Te hiero ’e tō ’outou niu pae vārua » (Liahona, Novema 2021, 93–96). ’Ia au i te mau mea tā ’outou i tai’o, e aha tā te Fatu e hina’aro ia ’outou ’ia ha’api’i mai ’e ’ia ’ite i roto i tōna fare mo’a ? E aha te mau ’itera’a tā ’outou i fāri’i i reira ?

E nehenehe ’outou e ’ite mai i te mau uira’a nō te uiuira’a parau fa’ati’a nō te hiero i te mau ’api 36–37 o Nō Te Pūai o te Feiā ’Āpī : Hō’ē arata’i nō te ravera’a i te mau mā’itira’a. E tai’o i te mau uira’a tāta’itahi ’e e ui ia ’outou iho, e aha tā teie uira’a e ha’api’i nei iā’u nō ni’a i te mau rāve’a a te Fatu ? Nāhea te reira i te tauturu iā’u ’ia « haere nā tōna haere’a » ?

Hi’o ato’a Te mau Parau Tumu o te ’Evanelia, « Hiero », Vaira’a buka ’evanelia ; « E te Mau Nūna’a ē, » Te Mau Hīmene, no 4.

2 Nephi 11–19

E fa’aora Iesu Mesia i tōna ra mau ta’ata.

Noa atu te ’ino tāna i ’ite, ’ua ’ite Isaia i te tīa’ira’a nō te ananahi. E tuatāpapa i te mau tuha’a tāta’itahi i muri nei. ’A pāpa’i hō’ē ’e ’aore rā hau atu parau mau tā te ’īrava tāta’itahi e ha’api’i mai nei nō ni’a i tō tātou ’anotau : 2 Nephi 12:1–5 ; 14:2–6 ; 15:20–26 ; 19:2–8. I tō ’outou mana’o, nō te aha e mea faufa’a ia tātou ’ia māramarama i teie mau tuha’a ?

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

’Imi i te mau hōho’a fa’anahora’a. I roto i te mau pāpa’ira’a mo’a e ti’a ia tātou ’ia ’ite mai i te tahi mau hōho’a e fa’a’ite ra nāhea te Fatu e ’ohipa nei. I roto i te 2 Nephi 11–19, e nehenehe tā ’outou e ’imi i te mau hōho’a e fa’a’ite ra nāhea te Fatu i te fa’aara i te hara ’e i te fa’a’orera’a i te hapa a te mau ta’ata e tātarahapa.

Mana’o nō te ha’api’i i te tamari’i

2 Nephi 12:2–3

Te hiero ’o te fare ïa o te Fatu.

• ’Ua fa’ata’a Isaia i te hiero ’ei « mou’a ra o te fare o te Fatu ». E au paha tā ’outou mau tamari’i e fa’ahua ta’uma i ni’a i te hō’ē mou’a ’a tai’o ai ’outou i te 2 Nephi 12:2–3. ’A tauturu ia rātou ’ia ’imi i te mau pereota i roto i teie mau ’īrava ’o tē fa’ata’a nei nō te aha e hiero tō tātou.

• Nō te fa’ahōho’a i te pereota « e haere tātou nā ni’a i tōna ’ē’a » i roto i te 2 Nephi 12:3, e nehenehe tā ’outou e hāmani i te hō’ē ’ē’a i ni’a i te tahua, ma te arata’i atu i te hō’ē hōho’a nō te hō’ē hiero. ’A haere ai tā ’outou mau tamari’i nā ni’a i te ’ē’a, e nehenehe rātou e fa’a’ite mai i te mau mea tā rātou e nehenehe e rave nō te haere nā ni’a i te mau ’ē’a a te Fatu.

• ’A ani i te mau tamariʼi e pāpa’i hōhoʼa ia rātou iho e haere ra i te hiero. E nehenehe ato’a rātou e hīmene ’aore rā e fa’aro’o i te hō’ē hīmene nō ni’a i te hiero, mai te « Oh, J’aime voir le temple » (Chants pour les enfants, 99). E tauturu ia rātou ’ia ’imi i te mau ta’o ’e te mau pereota i roto i te hīmene ’o tē ha’api’i ra e aha te hiero ’e e aha tā tātou e rave i reira.

2 Nephi 11:4–7 ; 17:14 ; 19:6

’O Iesu Mesia tō’u Fa’aora.

• E rave rahi i’oa nō Iesu Mesia i roto i te 2 Nephi 11:4–7 ; 17:14 ; 19:6. ’A tauturu i tā ’outou mau tamari’i ’ia ’imi i te reira ’e ’ia paraparau nō ni’a i te aura’a o te reira ’Ei hi’ora’a, te aura’a o « te Mesia » ’oia ho’i, « tei fa’atāhinuhia » ’e « Emanuela » ’oia ho’i, « te Atua iō tātou nei ». E aha tā teie mau ʼāʼamu e haʼapiʼi mai nei ia tātou nō niʼa ia Iesu Mesia ?

• Fa’a’ite i te tahi mau tuha’a o te video « Te tamari’i Mesia » (Vaira’a buka ’evanelia) ’o tē fa’a’ite nei i te mau ta’ata huru rau e hi’o ra ia Iesu nō te taime mātāmua roa. ’A fa’afa’aea i te video i roto i teie mau fa’a’ite’ara’a, ’e ’a ani i tā ’outou mau tamari’i nō ni’a i te mea tā teie mau ta’ata i fāri’i. E aha tō tātou mana’o ’āhiri ē tei reira tātou ? E aha tō tātou mana’o ’ia ’ite fa’ahou tātou iāna ?

2 Nephi 15:20

Tē tāmata nei Sātane i te ha’afifi iā’u nō ni’a i te maita’i ’e te ’ino.

• Fa’a’ite i te mau tamari’i i te hō’ē mea maramara ’e ’aore rā ’ava’ava, mai te hō’ē tāporo, i roto i te hō’ē pū’ohu monamona. ’A tai’o ’āmui i te 2 Nephi 15:20. Nāhea Sātane i te tāmata i te fa’ariro i te mau mea ’ino ’ei mea maita’i ? E nehenehe ato’a ’outou e fa’a’ite i nā 90 tetoni mātāmua o te video « E fa’ati’amāhia ’outou » (Vaira’a buka ’evanelia). Nō te aha te ta’ata rava’āi e fa’ahuru ’ē ai i tāna matau ? Nō te aha Sātane e fa’ahuru ’ē ai i te hara ? Nāhea Iesu Mesia i te tauturu ia tātou ’eiaha ’ia ha’avarehia e Sātane ?

Nō te tahi atu mana’o, ’a hi’o i te ve’a Hoa nō teie ’āva’e.

Hiero nō Panama City (Panama)

Hiero nō Pamana City (Panama). « E fa’ati’ahia te mou’a ra o te fare o te Fatu i ni’a i te tupua’i o te mau mou’a […] ’e e ta’iruru mai tō te mau nūna’a ato’a ra i reira » (2 Nephi 12:2).

’api ’ohipara’a : Te hiero ’o te fare ïa o te Fatu.