Iesu Mesia : Te utuutu o tō tātou vārua
’Ia tātarahapa mau tātou i tā tātou mau hara, e fa’ati’a tātou i te tusia tāra’ehara a te Mesia ’ia manuia hope i roto i tō tātou orara’a.
E au mau taea’e, e au mau tuahine, i teie po’ipo’i nehenehe nō Pāsa, tē ’oa’oa nei te ’ā’au i te ha’amana’ora’a i te ’ohipa māere roa a’e ’e te hanahana roa a’e ’e te fāito ’ore roa a’e tei tupu i roto i te tua’ā’ai o te ta’ata nei—te tusia tāra’ehara a tō tātou Fatu Iesu Mesia. Tē fa’arahi nei te mau parau tu’iro’o a te peropheta Isaia i te fāito rahi ’e te nounou ’ore o tō te Fa’aora fa’aha’eha’ara’a iāna iho ’e tāna tusia nō te mau tamari’i ato’a a te Atua :
« ’Ua rave mau rā ’oia i tō tātou paruparu, ’e ’ua hōpoi ’ē ’oia i tō tātou ’oto ; ’ua parau rā tātou iāna ē, tā’iri utu’a tōna ; mai te ta’ata tā’irihia e te Atua, i pohe ai ra.
« I paruparu rā ’oia i tā tātou nei hara, i tā’irihia ’oia i tō tātou nei ’ino ; ’e te a’o i hauhia ai tō tātou, tei ni’a ïa iāna, ’e nō tōna paruparu e ora ai tātou ».1
Nā roto i te amora’a i ni’a iāna i te mau hara o te ta’ata nei, te pātiti-taehae-ra’a-hia ’oia i ni’a i te satauro ’e te upo’oti’ara’a i ni’a i te pohe i te toru o te mahana,2 i hōro’a ai Iesu i te aura’a mo’a a’e i te ’ōro’a Pāsa a te ’āti Iuda tei tu’uhia mai ia ’Īserā’ela i te mau tau tahito ra.3 ’Ei tupura’a parau tohu, ’ua pūpū ’oia i tōna iho tino ’e tōna toto faufa’a rahi ’ei tusia rahi ’e te hope’a,4 ’e ’ua ha’amau roa i te mau tāpa’o tumu tei fa’a’ohipahia i roto i te ’ōro’a nō te Pāsa a te Fatu.5 ’A nā reira ai, ’ua fa’aruru te Mesia i te mamae pae tino ’e pae vārua e’ita te ferurira’a ta’ata e nehenehe e māramarama. ’Ua parau te Fa’aora iho ē :
« Nō te mea inaha, ’ua fa’aoroma’i au, ’o te Atua, i teie nei mau mea nō te ta’ata ato’a […]
« Nā te reira mamae rahi i fa’atupu i roto iā’u, ’oia ’o te Atua, ’o tei hau a’e i te mau mea ato’a ra, i te rurutaina nō te mauiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e te vārua ato’a ho’i—’E ’ua hina’aro ho’i ’ia ’ore au ’ia inu i te ’āu’a maramara ’e ’ōriorio atu—
« ’Ārea rā, ’ei hanahana tō te Metua, ’e ’ua inu vau ’e ’ua fa’aoti ho’i i tā’u mau fa’aineinera’a i te tamari’i a te ta’ata nei ».6
’Ua fa’aoti te Mesia i te hina’aro o te Metua ma te au maita’i7 nā roto i tāna tusia tā’ōti’a ’ore ’e te aroha. ’Ua upo’oti’a ’oia i ni’a i te tara nō te pohe pae tino ’e pae vārua,8 tei tae mai i te ao nei nā roto i te Hi’ara’a,9 ’e ’ua pūpū ïa i te rāve’a hanahana nō te fa’aorara’a mure ’ore.10
’O Iesu ana’e te ta’ata e nehenehe e fa’atupu i teie tusia mure ’ore ’e te fāito maita’i roa nō tātou pā’āto’a.11 ’Ua mā’itihia ’oia ’e ’ua fa’atōro’a-ātea-hia i roto i te ’Āpo’ora’a rahi i te ra’i ra, nā mua roa te ao i hāmanihia ai.12 Nā ni’a i te reira, nō te fānaura’ahia ’oia e te metua vahine tāhuti, tei iāna ra te pohe pae tino, mai roto rā i te Atua, ’ei Tamaiti fānau tahi nō te Metua, tei iāna ra ïa te mana nō te tu’u i tōna ora ’e nō te rave fa’ahou mai.13 Hau atu, ’ua ora te Mesia i te orara’a fāito maita’i roa, ’aita e hape, ’e nō reira, ’aita tā te parauti’a hanahana tītaura’a i ni’a iāna.14 Tē vai nei te mau taime ’ua ha’api’i te peropheta Iosepha Semita :
« E’ita te fa’aorara’a e nehenehe e tae mai i ni’a i tō te ao mai te mea ’aita te āraira’a a Iesu Mesia.
« ’Ua fa’aineine te Atua […] i te hō’ē tusia nā roto i te hōro’ara’a i tāna iho Tamaiti, ’o tei tonohia i te taime tano […] nō te ’īriti i te hō’ē ’ūputa e nehenehe ai te ta’ata e tomo atu i mua i te aro o te Fatu ».15
Noa atu ē nā roto i tāna tusia ’ua ’īriti ’ē te Fa’aora, ma te tītau ’ore i te hō’ē mea, i te ’ohipa a te pohe pae tino,16 ’aita ’oia i fa’a’ore i tā tātou iho hōpoi’a e tātarahapa i te mau hara e rave tātou.17 ’Aita, ’ua fa’atae mai rā ’oia i te anira’a ’ā’au here e fa’afāite i tō tātou Metua mure ’ore. Nā roro ia Iesu Mesia ’e tāna tusia tāra’ehara, e ti’a ia tātou ’ia ’ite i te tauira’a pūai mau i te ferurira’a ’e i te ’ā’au, ’e e noa’a mai te peu ’āpī, i ni’a i te Atua ’e i roto noa ho’i i te orara’a.18 ’Ia tātarahapa mau tātou i tā tātou mau hara, ’e ’ia fāriu i tō tātou ’ā’au ’e tō tātou hina’aro i ni’a i te Atua ’e i tāna mau fa’auera’a, e ti’a ia tātou ’ia fāri’i i te fa’aorera’a hara ’e e putapū tātou i te mana o tōna Vārua mo’a ma te ’auhune rahi a’e. ’E ’aua’a a’e maoti, e’ita tātou e ’ite i te mamaera’a hōhonu tā te Fa’aora i fa’a’oroma’i.19
’Ua riro te hōro’a nō te tātarahapa ’ei fa’a’itera’a nō te maita’i o te Atua i ni’a i tāna mau tamari’i, ’e ’ei fa’a’itera’a pāpū ho’i nō tōna mana fāito ’ore nō te tauturu ia tātou ’ia upo’oti’a i ni’a i te mau hara e rave tātou. E fa’a’itera’a ato’a nō te fa’a’oroma’i ’e te fa’aoromai-noa-ra’a a tō tātou Metua mure ’ore i tō tātou paruparu tāhuti ’e tō tātou fati noa. ’Ua fa’ahiti te peresideni Russell M. Nelson, tō tātou peropheta here, e « tāviri te reira i te ’oa’oa ’e te mana’o hau ».20
E au mau hoa, tē parau pāpū nei au ē, ’ia tātarahapa mau tātou i tā tātou mau hara,21 e fa’ati’a tātou i te tusia tāra’ehara a te Mesia ’ia manuia hope i roto i tō tātou orara’a.22 E ti’amā mai tātou i te tītīra’a a te hara, e ’ite mai tātou i te ’oa’oa i roto i tō tātou tere i te fenua nei ’e e au tātou ’ia mā’itihia nō te fāri’i i te fa’aorara’a mure ’ore, tei fa’aineinehia mai te hāmanira’ahia o te ao nei nō te tā’āto’ara’a e ti’aturi ia Iesu Mesia ’e e haere mai iāna ra.23
Nā ni’a atu i te hōro’a hanahana nō te fa’aorara’a, tē pūpū mai nei te Fa’aora i te māmāra’a ’e te tāmāhanahana ’a fa’aruru ai tātou i tō tātou mau ’ati, te mau fa’ahemara’a ’e te mau paruparu o te orara’a tāhuti nei, mai te ’ohipa i fa’aruruhia a’enei nō teie pararera’a ma’i pohe. E ti’a iā’u ’ia ha’apāpū atu ē, ’ua ta’a noa i te Mesia te mau ’ati tā tātou e fa’aruru nei i te tāhuti nei. ’Ua māramarama ’oia i te maramara ato’a, te ahoaho ’e te māuiui pae tino, nā reira ato’a te mau fifi pae manava ’e pae vārua tā tātou e fa’aruru nei. ’Ua ’ī te ’ā’au o te Fa’aora i te aroha, ’e ’ua ineine noa ’oia e tauturu mai ia tātou. E haere te reira nō te mea ’ua nā roto ’oia iho i te reira, ’e ’ua amo ho’i i roto i te ’i’o nei i te māuiui o tō tātou paruparu ’e te humara’a.24
Ma te marū ’e te ’ā’au haeha’a, ’ua pou ’oia i raro i te mau mea ato’a ’e ’ua fāri’i ho’i ’ia vahavahahia ’oia, ’ia tīahihia ’e ’ia fa’aha’aha’ahia e te ta’ata nei, i pēpē ho’i ’oia nō tā tātou mau ’ōfatira’a ture ’e te mau ’ohipa ’ī’ino. ’Ua mamae ’oia i teie mau mea nō tātou pā’āto’a, ma te rave i ni’a iāna te mau hara o te ao nei,25 i riro mai nei ’oia ’ei utuutu pae vārua hope roa nō tātou.
’A ha’afātata atu ā ai tātou iāna, ma te auraro i tō tātou vārua i tāna utuutu, e noa’a ïa ’ia rave i ni’a ia tātou i tāna zugo, e mea marū ho’i, ’e tāna hōpoi’a, e mea māmā ho’i, ’ia ’ite ho’i tātou i te tāmāhanahanara’a ’e te fa’afaeara’a i parauhia mai. Nā ni’a roa atu, e fāri’i tātou i te pūai tei tītauhia ia tātou pā’āto’a nō te upo’oti’a i ni’a i te mau fifi, te mau paruparu ’e te mau ’oto o te orara’a, e mea pa’ari roa ho’i ’aita ana’e tāna tauturura’a ’e tōna mana fa’a’ora māuiui.26 Tē ha’api’i mai nei te mau pāpa’ira’a mo’a ē, « e tu’u ’oe i tā ’oe hōpoi’a ia Iehova ra, ’e nāna ’oe e tauturu mai ».27 « ’E ’ia ha’amāmā te Atua i tō [tātou] hōpoi’a i reira ra, nā roto i te ’oa’oa i tāna ra Tamaiti ».28
I te pae hope’a o te matahiti i ma’iri, ’ua fa’aro’o vau ’ua fa’aru’e mai nā ta’ata fa’aipoipo iti ra, ’o Mario rāua ’o Regina Emerick, tei ha’apa’o maita’i noa i mua i te Fatu, maha mahana noa i muri iho te tahi i te pohera’a, i te ma’i-roa-ra’a-hia i te COVID-19.
’Ua fa’ati’a mai hō’ē o tā rāua nā tamaiti e tāvini ra ’ei ’episekōpo i Beresiria : « E mea fifi roa ’ia ’ite i tō’u nā metua ’ia fa’aru’e mai i teie nei ao mai te reira, ’ua ti’a roa rā iā’u ’ia putapū i te rima o te Fatu i roto i tō’u orara’a, i roto i teie ’ati pohe, inaha ’ua fāri’i au i te pūai ’e te hau tei hau atu i tō’u hāro’aro’a. Nā roto i tō’u fa’aro’o ia Iesu Mesia ’e i tāna tāra’ehara, ’ua fāri’i au i te tauturu a te ra’i nō te ha’apūai ’e nō te tāmāhanahana i te mau melo o te ’utuāfare, nā reira ato’a te feiā ato’a tei tauturu mai i terā taime fifi mau. Noa atu ā ’aita i tupu te temeio i tīa’i-noa-hia e mātou pā’āto’a, iā’u nei rā, ’ua ’ite au i te tahi atu mau semeio tei tupu i roto i tō’u iho nei orara’a ’e i roto i te orara’a o te mau melo o tō’u ’utuāfare. E hau e’ita e nehenehe e tātara atu, tei puta mai i te hōhonu o tō’u ’ā’au, tei hōro’a mai i te tīa’ira’a ’e te ti’aturi i te here o te Fa’aora iā’u nei ’e i te fa’anahora’a ’oa’oa a te Atua nō tāna mau tamari’i. I ha’api’i na vau ē, i te mau mahana hevara’a mau, e mea toro noa te rima here o te Fa’aora ’ia ’imi tātou iāna mā tō tātou ’ā’au ato’a, te pūai, te mana’o ’e te itoito. »
E au mau taea’e, e au mau tuahine, i teie sābati Pāsa, tē hōro’a nei au i tō’u ’itera’a pāpū ma te tura ē, ’ua ti’a mai Iesu mai te pohe mai ’e tē ora nei ’oia. Tē parau pāpū nei au ia ’outou ē, nā roto iāna ’e tāna tāra’ehara, tē fa’afāna’o nei te Fa’aora ia tātou i te rāve’a nō te upo’oti’a i ni’a i te pohe, to’opiti te pae tino ’e te pae vārua. Nā ni’a i teie mau ha’amaita’ira’a rarahi, tē pūpū ato’a nei ’oia i te tāmāhanahana ’e te pāpūra’a i roto i te taime fifi. Tē ha’apāpū nei au ia ’outou ē, ’ia tu’u tātou i tō tātou ti’aturi i ni’a ia Iesu Mesia ’e tāna tusia tāra’ehara rahi roa ’ino, ma te fa’aitoito noa i roto i te fa’aro’o ē hope noa atu, e roa’a mai ia tātou tei parauhia mai e tō tātou Metua i te ao ra, tei rave i te mau mea ato’a e noa’a iāna nō te tauturu ia tātou ’ia ho’i i mua i tōna aro, ’ia tae i te hō’ē mahana. ’O teie tāna ’ohipa ’e tōna hanahana !29 Tē parau pāpū nei au ē, ’o Iesu te Mesia, tē Tāra’ehara o te ao nei, te Mesia tei parauhia e te mau ’āti Iuda, te Ti’afa’ahoura’a ’e te Ora.30 ’E tē fa’a’ite nei au i teie mau parau mau ia ’outou i tōna i’oa mo’a, te Fānau tahi a te Metua, tō tātou Fatu, ’o Iesu Mesia, ’āmene.