’Ua ’ere te pohe i tōna rē
Nā roto i te tāra’ehara fa’aora ’e te ti’afa’ahoura’a hanahana o Iesu Mesia, e ti’a i te ’ā’au māuiui ’ia fa’aorahia, te ’ā’au fāfati ’ia fa’ahauhia, ’e te ahoaho ’ia riro ’ei tīa’ira’a.
I teie sābati Pāsa hanahana, tē ’oa’oa nei te mau tamari’i i te hīmene : « I te pu’e tau fa’ahotura’a rā’au, ’ua ti’a mai Iesu Mesia ’e ’ua fa’aru’e i te mēnema i reira ’oia i te tāravara’a ; ’ua ’ōfati ’oia i te mau tāpea o te pohe ».1
Tē māuruuru nei tātou nō tō tātou ’ite nō te ti’afa’ahoura’a o Iesu Mesia. Noa atu rā, i te tahi taime o te orara’a, e ’oto tō tātou ’ā’au nō te mo’era’a te hō’ē ta’ata i herehia. I roto i teie pararera’a ma’i pohe ’ati a’e te ao nei, e rave rahi o tātou ’ua mo’e tei herehia—e melo ānei nō te ’utuāfare ’aore rā e hoa.2 Tē pure nei mātou nō rātou e heva ra nō te mo’era’a tei herehia.
’Ua parau te peresideni Russell M. Nelson :
« ’Aita e mā’itira’a te matahiti, tē heva nei tātou i tei herehia ’e tei mo’e. ’Ua riro te hevara’a ’ei fa’a’itera’a hōhonu roa nō te here mau […]
« Hau atu, e’ita e nehenehe ia tātou ’ia māuruuru i te mau fārereira’a ’oa’oa a muri a’e mai te mea ’aita e mau fa’ata’a-’ē-ra’a ’oto i teienei. Te rāve’a noa e ’īriti ’ē atu i te ’oto o te pohe, ’o te ’īriti-’ē-ra’a ïa i te here i rāpae atu i te orara’a. »3
E nehenehe tātou e feruri i te huru o te mau hoa o Iesu, tei ’āpe’e iāna ’e tei tāvini iāna,4 i te ’itera’a rātou i tōna pohe.5 ’Ua ’ite tātou ē, « tē mihi noa ra [rātou] ma te roimata. »6 I te mahana fa’asataurora’a, nō tō rātou ’ite ’ore e aha tē tupu i te sābati, ’ua teimaha roa paha ïa rātou ’e te hepohepo, ma te uiui te mana’o ē, nāhea rātou i teienei ’aita tō rātou Fatu. Noa atu rā, ’ua tāmau noa rātou i te tāvini iāna, noa atu ā ’ua pohe.
’Ua tāparu Iosepha nō Arimataio ia Pilato ’ia hōro’a mai i te tino o Iesu. ’Ua ha’apau mai ’oia i te tino, ’ua pū’ohu i te ’ahu parupape maita’i, ’ua fa’atārava i roto i tōna iho mēnema ’āpī ’e ’ua tūra’i i te hō’ē ’ōfa’i i mua i te ’ūputa o te mēnema.7
’Ua ’āfa’i mai Nikodemo i te mura ’e te ’āroe (aloes). ’Ua tauturu ’oia ia Iosepha nō te rave mai i te tino ’e nō te pū’ohu i te reira i te ’ahu parupape ma te fa’ano’ano’a.8
’Ua ’āpe’e atu ’o Maria Magadala ’e vetahi vahine ia Iosepha ’e Nikodemo, e ’ua hi’o rātou i hea te tino o Iesu i te tu’ura’ahia, ’e ’ua fa’aineine i te mau rā’au no’ano’a ’e te mau hinu nō te fa’atāhinu iāna.9 Nō te mau ture ’eta’eta rā nō terā mahana, ’ua tīa’i rātou nō te fa’aineine ’e nō te fa’atāhinu i te tino, nō te mea e ’ōro’a Sābati tō te mahana mā’a.10 Nō reira, i te po’ipo’i roa nō te mahana sābati, ’ua haere mai rātou i te mēnema. Nō te ’itera’a ē ’aita te tino o te Fa’aora i reira, ’ua haere atu rātou e fa’a’ite i te mau pipi, te mau ’āpōsetolo a Iesu. ’Ua haere a’e te mau ’āpōsetolo nā muri ia rātou i te mēnema, ’e ’ua ’ite atu ra ’aita e ta’ata i roto. Ho’i a’era rātou maori rā ’o Maria Magadala, ma te uiui māere e aha tei tupu i te tino o te Fa’aora.11
’Ua fa’aea noa Maria Magadala i te mēnema, ’ōna ana’e. Ma’a mahana noa nā mua atu, ’ua ’ite ’oia i te pohe ’oto rahi o tōna hoa ’e ’Orometua. I teienei, ’aita e ta’ata i roto i te mēnema, ’e ’aita ho’i ’oia i ’ite tei hea roa. ’Ua rahi roa ïa nōna, ta’i a’enei. I taua taime ra, ’ua haere mai te Fa’aora ti’afa’ahou iāna ma te ui nō te aha ’oia e ta’i nei ’e ’o vai tāna e ’imi ra. Nō tōna mana’o ē ’o te tātanu terā e parau mai ra, ’ua ani atu ’oia nāna ānei i rave i te tino o tōna Fatu, ’e ’ia parau mai ’oia i hea ’oia i te tu’ura’a ’ia ti’i ’oia i te tino.12
Tē mana’o nei au ē, ’ua fa’ati’a te Fatu ia Maria Magadala ’ia ’oto ’e ’ia fa’a’ite i tōna māuiui.13 Pi’i a’era ’oia iāna ma tōna i’oa, fāriu a’era i ni’a iāna ’e ’ua ’ite atu ra ’o ’ōna terā. ’Ua ’ite ’oia i te Mesia ti’afa’ahou ’e ’ua riro mai ’ei ’ite nō tōna ti’afa’ahoura’a hanahana.14
Mai ia ’outou, e nehenehe ri’i tā’u e feruri i te māuiui rahi o Maria Magadala ’e tōna mau hoa ’a ’oto ai rātou i te pohe o tō rātou Fatu. I te ivaraʼa o tōʼu matahiti, ’ua fa’aru’e mai tō’u tua’ane i roto i te hō’ē ’āueuera’a fenua ’ino mau. Nō te mea e ’ohipa tīa’i-’ore-hia, ’aita vau i ’apo ’oi’oi roa i te ’ohipa i tupu. ’Ua māuiui roa tō’u ’ā’au i te ’oto, ’e e uiui noa tō’u mana’o : « E aha tei tupu i ni’a i tō’u taea’e ? Tei hea ’oia ? I hea ’oia i te haerera’a ? E ’ite fa’ahou ānei au iāna ? »
I terā tau, ’aita vau i te ’ite nō ni’a i te fa’anahora’a o te fa’aorara’a a te Atua, ’e tē vai ra terā hia’ai ’ia ’ite nō hea mai tātou, e aha te fā o te orara’a, ’e e aha tē tupu ’ia pohe tātou. E ’ere ānei tō tātou mau mana’o tāparu ’ia mo’e ana’e tei herehia ’aore rā ’ia nā roto tātou i te mau fifi o te orara’a ?
Ma’a matahiti i muri mai, ’ua ha’amata vau i te feruri i tō’u taea’e, e mea huru ta’a ’ē. E feruri au iāna tē pātōtō ra i tō mātou ’ūputa. E ’īriti au i te ’ūputa, e ti’a mai ’oia i mua iā’u, ’e e parau mai ’oia : « ’Aita vau i pohe. Tē ora nei au. E’ita tā’u e nehenehe e haere mai ia ’oe ra, i teienei rā, e fa’aea vau ia ’oe, e’ita fa’ahou vau e haere. » Nā te reira ferurira’a, mai te moemoeā roa te huru, i tauturu iā’u ’ia tāmarū i tō’u māuiui nō te mo’era’a ’oia. ’Ua tae mai te mana’o e ti’a noa ’oia i pīha’i iho iā’u, fa’ahou ’e fa’ahou ā. I te tahi taime e fā’ao roa vau i te ’ūputa, pene’i a’e ’o te pātōtō ’oia ’e e ’ite fa’ahou vau iāna.
Fātata 40 matahiti i muri mai, i te pu’e tau Pāsa, tē feruri ra vau nō ni’a i te ti’afa’ahoura’a o Iesu Mesia ’e ’ua ha’amata i te feruri i tō’u taea’e. I terā taime ’ua puta mai te hō’ē mana’o. ’Ua ha’amana’o vau ’ua feruri au iāna tē haere mai ra e hi’o iā’u.
I terā mahana tō’u ’itera’a ē, ’o te Vārua tei hōro’a mai i te tāmāhanahanara’a i roto i te taime fifi. E ’itera’a pāpū tā’u i fāri’i ē, ’aita te vārua o tō’u taea’e i pohe ; tē ora noa ra. Tē haere noa roa ’oia i mua i tōna vaira’a mure ’ore. ’Ua ’ite au ē « e ti’a fa’ahou mai ïa [tō’u] tua’ane »15 i terā taime rahi fa’ahiahia e ti’a fa’ahou mai ai tātou pā’āto’a, maoti te ti’afa’ahoura’a o Iesu Mesia. Hau atu, maoti ’oia e ti’a ai ia tātou pā’āto’a ’ia tāhō’ē-fa’ahou-hia ’ei ’utuāfare ’e ’ia noa’a te ’oa’oa mure ’ore i mua i te aro o te Atua mai te mea e mā’iti tātou ’ia rave ’e ’ia tāpe’a i te mau fafaura’a ’e ana ra.
’Ua ha’api’i te peresideni Nelson :
« Te pohe, te hō’ē ïa tuha’a tītauhia nō tō tātou ora mure ’ore. ’Aita e ta’ata e ’ite ē ahea ra e tae mai ai, ’āre’a rā, e mea faufa’a ïa nō tā te Atua fa’anahora’a nō te ’oa’oa. Māuruuru i te tāra’ehara a te Fatu, e tupu mau ā te ti’afa’ahoura’a ’e te ora mure ’ore, nō te mau ta’ata ato’a ïa […]
« […] Nō te feiā [e ’oto i tei herehia] i vaiihohia mai i muri […] te ’ino o te pohe, ’ua tāmarūhia ïa e te fa’aro’o pāpū i te Mesia ra, ’e te māramarama hau atu i te maita’i nō te ti’aturira’a, ’e te here nō te Atua ’e nō te ta’ata ato’a ra, ’e te hina’aro hōhonu ’ia tāvini atu ia rātou. Nā taua fa’aro’o ra, te ti’aturira’a, te here e fa’ati’a ia tātou ’ia haere i mua i te aro hanahana o te Atua, ’e tō tātou mau hoa fa’aipoipo mure ’ore ’e te ’utuāfare, e pārahi ai i pīha’i iho iāna ē a muri noa atu. »16
Tē parau pāpū nei au ē « ’āhiri ’aita te Mesia i ti’afa’ahou mai mai te pohe mai ra, ’e ’aore i motu te tāpe’a o te pohe ra, ’ia ’ere tō te pohe rē, ’ia ’ore ho’i tō hade e tara, ’aita roa ïa e ti’afa’ahoura’a i reira.
« Tē vai ra rā te ti’afa’ahoura’a, i ’ere ai te pohe i tōna rē ; ’e te tara o Hade, ’ua horomi’ihia ïa i te Mesia ra.
« ’Oia te māramarama ’e te ora i te ao nei ; ’oia ïa, e māramarama mure ’ore, e ’ore roa e mohimohi ; ’oia ïa, te ora e ’ore e mure, ’aita atu e pohe fa’ahou. »17
’Ua fa’a’ite Iesu iho ē : « Tei iā’u te ti’afa’ahoura’a ’e te ora, ’o tē fa’aro’o mai iā’u ra, pohe noa ā ’oia e ora ā ïa. »18
Tē parau pāpū nei au ē nā roto i te tāra’ehara fa’aora ’e te ti’afa’ahoura’a hanahana o Iesu Mesia, e ti’a i te ’ā’au māuiui ’ia fa’aorahia, te ’ā’au fāfati ’ia fa’ahauhia, ’e te ahoaho ’ia riro ’ei tīa’ira’a. E ti’a iāna ’ia tauahi mai i tōna rima aroha ’e te tāmāhanahana ’e te ha’afaufa’a ’e te fa’aora māuiui, ia tātou tāta’itahi. I te i’oa o Iesu Mesia, ’āmene.