Tō tātou iho Fa’aora
Maoti tāna tusia tāra’ehara, e mana tō te Fa’aora nō te tāmā, nō te fa’aora, ’e nō te ha’apūai ia tātou tāta’itahi.
Tē māuruuru nei au ’ia tae mai i rotopū ia ’outou i teie po’ipo’i Pāsa nehenehe. ’Ia feruri ana’e au i te Pāsa e mea au roa nā’u ’ia fa’a’ite i roto i tō’u ferurira’a i te mau parau tei parauhia ’e te mau melahi i te feiā i te mēnema : « E aha ’outou i ’imi ai i te ora i te vaira’a o te pohe ? ’Aore ’oia i’ō nei, ’ua ti’a ïa i ni’a »1 Tē fa’a’ite pāpū nei au ē ’ua ti’afa’ahou mai o Iesu nō Nazareta ’e tē ora nei ’oia.
E aha tō ’outou mana’o i te Mesia ?
’A toru ’ahuru ma maha matahiti i teienei, ’ua fārerei ’e ’ua ha’api’i māua tō’u hoa misiōnare i te hō’ē ta’ata māramarama roa ’o tei riro ’ei pāpa’i parau tauturu i roto i te ve’a o te fenua iho i Davao City, Philipino. E mea au roa nā māua ’ia ha’api’i iāna nō te mea e mea rahi roa tāna mau uira’a ’e e mea fa’atura roa ’oia i tō māua mau ti’aturira’a. Te uira’a rahi roa a’e ’o tāna i ui mai ’oia ho’i « E aha tō ’ōrua mana’o i te Mesia ? »2 Pāpū ē ’ua ’oa’oa roa māua nō te hōro’a i tō māua mau mana’o ’e ’ia fa’a’ite atu i te ’itera’a pāpū nō Iesu Mesia. I muri a’e ’ua nene’i ’oia i te hō’ē parau pāpa’i nō ni’a i te hō’ē ā tumu parau tei roto te mau ta’o ’e te mau fa’ahitira’a parau fa’ahiahia nō ni’a i te Fa’aora. Tē ha’amana’o ra vau i tō’u māere ’aita rā i fa’ateiteihia. Tē vai ra i roto te mau ha’amāramaramara’a maita’i e mana’o māoaoa rā ’e ’aita e pūai pae vārua.
Tē rahi noa atu ra te ’itera’a iāna
« E aha tō ’ōrua mana’o i te Mesia ? » Tē ’ite nei au ē tō’u iho huru ’itera’a i te Fa’aora ’o te fa’auru rahi i tō’u pūai nō te fa’aro’o iāna, ’e tae noa atu i tā’u huru pāhonora’a. Tau matahiti i te maoro i teienei, ’ua ui o Elder David A Bednar i te mau uira’a i muri nei ’ei tuha’a nō tāna mau parau : « E ’ite noa ānei tātou nō ni’a i te Fa’aora, ’aore rā e fa’arahi roa atu ānei tātou i tō tātou ’itera’a nō ni’a iāna ? E nāhea tātou e roa’a ai te ’ite iāna ? »3
’A tuatāpapa ’e ’a feruri ai au, ’ua ’ite pāpū vau ē te mea tā’u i ’ite nō ni’a i te Fa’aora e mea rahi a’e ïa tā’u e ’ite mau nei iāna. ’Ua fa’aoti a’era vau e fa’aitoito rahi atu ā nō te ’ite iāna. ’Ua māuruuru roa vau nō te mau pāpa’ira’a mo’a ’e te mau ’itera’a pāpū o te mau pipi tāne ’e vahine ha’apa’o maita’i o Iesu Mesia. Nā roto i tō’u iho tere i te mau matahiti i ma’iri a’enei ’ua rātere au nā ni’a i te mau ’ē’a e rave rahi nō te ha’api’ira’a ’e nō te ’itera’a. Tē pure nei au ’ia hōro’a mai te Vārua Maita’i ia ’outou i teie mahana i te hō’ē poro’i rahi a’e i te mau parau tano ’ore tā’u i pāpa’i.
’A tahi, e ti’a ia tātou ’ia ’ite ē ’o te ’itera’a i te Fa’aora ’o te tauto’ora’a faufa’a roa a’e ïa i roto i tō tātou orara’a. E ti’a ’ia fa’ariro i te reira ’ei ’ohipa mātāmua roa i ni’a i te tahi atu mau mea.
« Teie ho’i te ora mure ’ore, ’ia ’ite rātou ia ’oe i te Atua mau ra, ’e ia Iesu i te Mesia i tā ’oe i tono mai ».4
« Nā ’ō atura Iesu iāna, ’o vau tē ’ē’a, tē parau mau, ’e tē ora : ’aore roa e ta’ata e tae i te Metua ra, maori rā ’ei iā’u ».5
« ’O vau tē māramarama o teie nei ao : ’o tē pe’e mai iā’u ra e ’ore ïa e haere noa i te pōiri, e māramarama ora ïa tōna ».6
’A piti, ’a mātau noa ai tātou i te Fa’aroa, e riro roa atu ā te mau ’īrava o te mau pāpa’ira’a mo’a ’e te mau parau a te mau peropheta ’ei mea faufa’a nō tātou ’e e riro mai rātou ’ei tā tātou iho mau parau. ’Aita e tītauhia ’ia tīpe’e i te mau ta’o, te mau mana’o ’e te mau ’itera’a o vetahi ’ē i te ’itera’a mai nā roto ia tātou iho, nā roto i tā tātou iho ravera’a, nā roto i te ’itera’a i te parau7 ’e nā roto i te fāri’ira’a i te hō’ē ’itera’a pāpū nō te Vārua Maita’i. Mai tā te peropheta Alama i fa’ahiti :
« ’Aita ānei ’outou i mana’o ē ’ua ’ite au iho i taua mau mea nei ? Inaha, tē fa’a’ite pāpū atu nei au ia ’outou na ē ’ua ’ite roa vau ē ’o te parau mau ana’e tā’u i parau iho nei ia ’outou na. ’E i tō ’outou mana’ora’a, nāhea vau i ’ite hua ai i te reira ?
« Tē parau atu nei au ia ’outou na ē, nā roto i te Vārua Maita’i o te Atua i ’ite ai au i te reira. Inaha ho’i, i ha’apae a’enei au i te mā’a, ’e i pure a’enei ho’i au i nā mahana e rave rahi, ’ia ’itea taua mau mea nei iā’u iho. ’E tē ’ite māite nei au ē ’o te parau mau ïa ; nā te Fatu te Atua iho ho’i i fa’a’ite mai iā’u i te reira i tōna ra Vārua Maita’i ; ’o te Vārua heheura’a parau teie tei roto iā’u nei. »8
’A toru, nā te hō’ē māramaramara’a hau atu nō te ’itera’a ē e au te Tāra’ehara a Iesu Mesia nō tātou tāta’itahi ’e e tauturu ia tātou iho ’ia mātau iāna. Pinepine e mea ’ōhie a’e nā tātou ’ia mana’o ’e ’ia parau nō ni’a i te Tāra’ehara a te Mesia i tōna huru rahi i te ’itera’a i tōna aura’a mau i roto i tō tātou iho orara’a. E mea hope ’ore ’e te mure ’ore te Tāra’ehara a Iesu Mesia ’e e pū’ohuhia i roto i tōna ’ā’anora’a ’e tōna hōhonura’a tera rā e tano roa tōna mau hope’ara’a nō te ta’ata tāta’itahi iho. Maoti tāna tusia tāra’ehara, e mana tō te Fa’aora nō te tāmā, nō te fa’aora, ’e nō te ha’apūai ia tātou tāta’itahi.
Tō tē Fa’aora noa hina’aro, tāna noa fā mai te ha’amatara’a mai ā, o tē ravera’a ïa i te hina’aro o te Metua. Te hina’aro o te Metua ’oia ho’i ’ia tauturu ’oia iāna nō te « [fa’atupura’a] i tē tahuti ’ore ’e tē ora mure ’ore o tē ta’ata nei »9 nā roto i te rirora’a mai « ’ei ti’a nō tātou tei ’ō i te Metua ra ».10 « ’E nō te mea ’ua ha’amo’a-roa-hia ’oia, riro atura ’oia ’ei tumu nō te ora mure ’ore nō te feiā ato’a e fa’aro’o iāna ra ».11
« ’E e haere atu ’oia ma te fa’a’oroma’i i te māuiui ’e te ’ati ’e te mau huru fa’ahemara’a ato’a ra…
« ’E e faʼaoroma’i ʼoia i tōna pohera’a, i tātara ai ʼoia i te mau tāpe’a o te pohe i ruʼuruʼuhia ai tōna ra mau taʼata ; ’e e rave ʼoia i tō rātou paruparu i ni’a iāna iho ʼia faʼaʼīhia tōna ra ʼāʼau i te aroha… ʼia ʼite ʼoia nā roto i te tino, te rāve’a e faʼaora ai i tōna mau taʼata i tō rātou paruparuraʼa ra.
« E faʼaʼoromaʼi te Tamaiti a te Atua i te mamae tino nei, ’ia rave ʼoia i te mau hara a tōna ra mau taʼata i niʼa iāna iho, ’ia parai ʼoia i tā rātou mau hapa mai te au i te mana o tōna faʼaora ».12
Tē hina’aro nei au e fa’a’ite i te hō’ē ’ohipa ’ōhie nō te fa’ahōho’a i tā tātou tauto’ora’a i te tahi mau taime nō te fāri’ira’a i te nātura tāta’itahi nō te tāra’ehara a te Fatu.
I te mau matahiti i ma’iri, i te anira’a a tō’u ti’a fa’atere, ’ua tai’o vau i te Buka a Moromona mai te ha’amatara’a ’e tae atu i te hope’a ’e ’ua tāpa’o vau i te mau ’īrava e fa’a’ite ra nō ni’a i te Tāra’ehara a te Fatu. ’Ua ani ato’a mai tō’u ti’a fa’atere iā’u ’ia fa’aineine i te hō’ē ha’apotora’a hō’ē ’api nō te mea o tā’u i ha’api’i mai. ’Ua parau vau i roto iā’u, « Hō’ē ’api ? Maita’i, e mea ’ōhie te reira ». I tō’u hitimahuta rahi, ’ua ’ite ihora vau ē e ’ohipa rahi roa teie ’e ’aita vau i manuia.
’Ua ’ite ihora vau ē ’ua hape au nō te mea ’aita vau i tāpae i te tāpa’o ’e e mea hape ana’e tā’u mau tātarara’a. ’A tahi, ’ua mana’o vau ē e fa’auru te ha’apotora’a i te mau ta’ata ato’a. E aura’a tō te ha’apotora’a nō’u ’e ’eiaha nō vetahi ’ē. ’Ua riro te reira ’ei harura’a mai i tō’u mau mana’o ’e tō’u ferurira’a nō ni’a i te Fa’aora ’e te mea o tāna i rave nō’u nō reira ’ia tai’o ana’e au i te reira, e mara’a mai te mau ’itera’a pae vārua nehenehe mau, te putapū ’e nō’u iho.
’A piti, ’ua mana’o vau ē e rahi ’e e maita’i te ha’apotora’a ’e tei roto i te reira te mau ta’o ’e te mau pereota. E ’ere roa atu nō ni’a i te mau ta’o rarahi. E fa’ahitira’a māramarama ’e tē ’ōhie nō te ’itera’a. « ’Ua ’oa’oa tā’u nei ’ā’au i te parau pāpū : ’e tē nā reira rā ho’i te Fatu te Atua ra i te fa’atupu i te parau au i rotopū i te mau tamari’i a te ta’ata nei. Tē hōro’a mai ra ho’i te Fatu te Atua ra i te māramarama ».13
Te toru, tē tīa’i nei au ’ia maita’i roa te reira, hō’ē ha’apotora’a hope’a nō te mau ha’apotora’a ato’a—hō’ē ha’apotora’a ’aita e nehenehe ’e ’aita e tītauhia e tu’u—’āhiri i te hō’ē ’ohipa e tupu ra o tā’u e nehenehe e tu’u i te hō’ē ta’o i’ō nei ’aore rā te hō’ē pereota i’ō atu ’a rahi noa atu ai tō’u māramaramara’a nō te tāra’eahara a Iesu Mesia.
Te ’itera’a pāpū ’e te ani-manihini-ra’a
’Ei taure’are’a, ’ua ha’api’i rahi mai au nā roto i tā’u mau tāu’ara’a parau ’e tō’u ’episekōpo. I roto i terā mau matahiti marū, ’ua ha’api’i mai au ’ia here i teie mau ta’o nā roto mai i te hō’ē hīmene auhia :
Tē māere nei au i tō Iesu nei aroha,
Ahoahoahia i tōna ra parauti’a,
Tē rurutaina nei au i te mana’o nō tātou Iesu i fa’asataurohia ai.
Nō’u, tē hō’ē ta’ata hara, ’ua māuiui ’oia, ’ua tahe tōna toto ’e ’ua pohe ’oia.
’Ua ani manihini mai te peropheta Moroni ia tātou : « ’E tē parau atu nei au ia ’outou ’ia tītau ’outou i teie nei Iesu i tā tē mau peropheta ’e te mau ’āpōsetolo i pāpa’i ra ».15
’Ua fafau mai te Peresideni Russell M. Nelson ē « mai te peu e tāmau [tātou] i te ha’api’i mai i te mau mea ato’a tā [tātou] e nehenehe nō ni’a ia Iesu Mesia… e mara’a tō [tātou] ’aravihi nō te fāriu ’ē i te hara. E mara’a tā’ue tō [tātou] hina’aro ’ia ha’apa’o i te mau fa’auera’a ».16
I teie sābati Pāsa, mai te Fa’aora i haere mai mai roto mai i tōna mēnema ’ōfa’i, ’ia ara mai tātou i tō tātou ta’oto pae vārua ’e ’ia fa’ateitei ia tātou i ni’a atu i te mau ata nō te tapitapi, te ravera’a o te taiā, o te te’ote’o ta’ero, ’e te titeamata hani rauma’i. Tē ora nei Iesu Mesia ’e te Metua i te ao ra. Tē fa’a’ite pāpū nei au nō tō rāua here mau ia tātou. I te i’oa o Iesu Mesia, ’āmene.