Nene’i ti’a atu i te tāpa’o
Te mea faufa’a, e ’ere ā te mea e rātere tātou i roto i te orara’a, ’o te ta’ata rā tā tātou e riro nei.
’Ia tai’o vau i te buka nō te ’Ohipa ’e te mau ’episetole a Paulo, e māere au i te huru Paulo i tūra’ihia i te here ’e te māuruuru i te tāvinira’a, te ha’api’ira’a ’e te parau-pāpū-ra’a nō Iesu Mesia. E nāhea pa’i te hō’ē ta’ata ’ia tāvini ma teie huru here ’e te māuruuru, ’ia hi’o iho ā rā tōna mau māuiui rahi ? E aha te mea i tūra’i ia Paulo ’ia tāvini ? « Tē nene’i ti’a atu nei au i te tāpa’o ’ia noa’a te berabeio nō te pi’ira’a teitei a te Atua i te Mesia nei ia Iesu ».1
Te nene’i-ti’a-atu-ra’a i te tāpa’o ’o te tāmaura’a ïa ma te ha’apa’o maita’i i ni’a i te « ’ē’a tītī’aifaro ’e te piriha’o e tae roa atu ai i te ora mure ’ore ra »2 ’e tō tātou Fa’aora ’e tō tātou Metua i te ra’i. ’Ua hi’o Paulo i tōna mau māuiui mai te mea ra ē « e ’ore teie nei mau pohe e au ’ia fāito i te maita’i e fa’a’itehia mai ia tātou nei ».3 ’Ua riro te rata a Paulo i tō Philipi, tāna i pāpa’i ’a mau ai ’oia i roto i te fare tāpe’ara’a ’ei rata ’oa’oa iti rahi ’e te pōpou, ’e e rata fa’aitoito ho’i nō tātou pā’āto’a, i roto iho ā rā i teie mau tau fifi ’e te pāpū ’ore. Tātou pauroa tē tītauhia ’ia fa’aitoito ia tātou i te mau parau a Paulo : « E mea faufa’a ’ore ato’a te mau mea ato’a nei iā’u, i te maita’i rahi rā i te ’ite i te Mesia i ta’u Fatu ra ia Iesu : e fa’aru’e ai au i te mau mea ato’a ra, ’e e āua ïa te reira iā’u, ’ia noa’a iā’u te Mesia ».4
’Ia hi’o tātou i te tāvinira’a a Paulo, e mana’o fa’auru tē tae mai ’e te fa’aitoito i tō tātou iho « mau Paulo » i teie mahana, ’o tē tāvini, ’o tē ha’api’i ’e ’o te parau pāpū ma te here ’e te māuruuru, i roto i te mau fifi tā rātou e fa’aruru nei i roto i tō rātou orara’a ’e te orara’a o tei herehia. E ’ohipa tei tupu ’a iva matahiti i teienei tei tauturu mai iā’u ’ia ’ite i te faufa’a rahi nō te nene’i-ti’a-ra’a-atu i te tāpa’o.
I te matahiti 2012 ra, tē haere ra vau i tā’u rurura’a feiā fa’atere mātāmua nō te ’āmuira’a rahi, ’e e’ita e nehenehe, ’ua tae mai iho ā te mana’o tuauru ’e te ma’ua. E ta’i onoono noa te hō’ē reo i roto i tō’u ferurira’a : « E ’ere nō ’oe teie vāhi ! E hape iti rahi teie ! » ’E tē pā’imi ra vau i te hō’ē vāhi nō te pārahi, ’ite a’era Elder Jeffrey R. Holland iā’u. Haere mai nei ma te parau ē : « Edward, ’oa’oa vau i te ’itera’a ia ’oe i’ō nei », ’e ’ua tāpe’a marū mai nei i tō’u pāpāri’a. Mai te huru vau i te hō’ē ’aiū ! ’Ua māhanahana vau i tōna here ’e tōna fāri’ira’a mai, ’ua ha’aputapū te reira iā’u i te vārua tā’amura’a ’e te autaea’era’a. I te mahana nō muri iho, ’ua ’ite au ia Elder Holland i te ravera’a i te mea tāna i rave i te mahana nā mua atu i ni’a iā’u, i ni’a ia Elder Dallin H. Oaks i taua taime ra, e mea pa’ari a’e iāna !
I terā taime ’ua putapū vau i te here o te Fatu nā roto i teie mau ta’ata tā tātou e pāturu nei ’ei mau peropheta, ’ei mau hi’o ’e ’ei heheu parau. Nā roto i tōna hāmani maita’i ’e tāna peu, ’ua tauturu mai ’o Elder Hollan ’iā’u ’ia upo’oti’a i ni’a i te mana’o ha’apa’o noa iā’u iho ’e te mana’o ma’ua. ’Ua tauturu mai ’oia iā’u ’ia fa’atumu i ni’a i te ’ohipa mo’a ’e te ’oa’oa tei pi’ihia iā’u ’ia rave—te ’āfa’ira’a i te mau vārua i te Mesia. Mai tā Paulo i tahito ra, ’ua fa’atoro mai ’oia iā’u i ni’a i te nene’i-ti’a-ra’a-atu i te tāpa’o.
Te mea ta’a ’ē, tē a’o nei Paulo ia tātou ’ia nene’i ti’a atu ’a pi’i ato’a ai ia tātou ’ia ha’amo’e i te mea i ma’iri—tō tātou taiā tahito, te rōtahira’a tahito, te manuia-’ore-ra’a tahito ’e te ’oto tahito. Tē ani nei ’oia ia tātou, mai tō tātou ho’i peropheta here, te peresideni Russell M. Nelson, ’ia pe’e « i te hō’ē arata’ira’a ’āpī ’e te moa a’e ».5 E parau mau pāpū tā te Fa’aora : « ’O tei hina’aro ho’i i te tāpe’a i tōna ora, e ’ere ïa i te ora ; ’e o tei ti’a ’iāna i te tu’u i tōna ora iā’u nei, e roa’a ïa iāna te ora.6
I roto i tā’u a’ora’a mātāmua i te ’āmuira’a rahi, ’ua fa’a’ite atu vau i te ha’api’ira’a tō’u metua vahine iā’u ’ia ’ohipa i roto i te ’āua. ’Ua parau mai ’oia : « ’Eiaha e hi’o i muri ». « ’A hi’o rā i mua i te ’ohipa e vai fa’ahou ra. »7
I te pae hope’a o tōna orara’a, ’a ’aro ai i te ma’i mariri ’aita’ata, ’ua ora Māma i pīha’i iho ia māua Naume. I te hō’ē pō, ’ua fa’aro’o vau iāna i te autāra’a i roto i tōna piha. ’Ua māuiui roa ’ino ’oia, noa atu ā ’ua rave ’oia i tāna rā’au tāmarū ’a piti noa hora nā mua atu.
’Ua tomo vau i roto i tōna piha ’e ’ua ta’i ato’a vau. ’Ua pure ha’apūai au ’ia marū mai tōna māuiui i reira ra. Rave a’era ’oia mai tāna i rave i roto i te ’āua tau matahiti nā mua atu : ’ua fa’aea ’oia ’e ’ua ha’api’i mai i te hō’ē ha’api’ira’a iā’u. E’ita roa atu e mo’e iā’u tōna hōho’a mata i terā taime : e mea paruparu, e mea teimaha, e mea māuiui roa, tē hi’o aroha ra i tāna tamaiti i te ’otora’a. E mata ’ata’ata tā’u i ’ite i roto i tōna roimata, hi’o ’āfaro mai nei i roto i tō’u mata ’e ’ua nā ’ō mai : « E ’ere nā ’oe ’aore rā nā te ta’ata e parau, nā te Atua rā e parau e fa’a’ore ānei i teie māuiui ’aore rā ’aita. »
Pārahi marū a’era vau. Pārahi marū ato’a mai nei ’oia. ’Ua mau roa te reira i roto i tō’u upo’o. I terā pō, nā roto i tō’u metua vahine, ’ua ha’api’i mai te Fatu iā’u i te hō’ē ha’api’ira’a e vai noa ē a muri noa atu. I te fa’a’itera’a mai tō’u metua vahine tē fāri’i ra ’oia i te hina’aro o te Atua, ’ua ha’amana’o vau i te tumu Iesu Mesia i mamae ai i roto i te ’ō nō Getesemane ’e i ni’a ato’a i te satauro i Golagota. ’Ua nā ’ō ’oia : « Inaha, ’ua hōro’a atu vau i tā’u ’evanelia ia ’outou, ’e ’o teie [tā’u] ’evanelia i hōro’a atu ia ’outou ē—i haere mai au i roto i teie nei ao e rave i tō te Metua hina’aro, ’o ta’u Metua i tono mai iā’u »8
Tē feruri nei au i te mau uira’a a tō tātou peropheta here, te peresideni Nelson, ia tātou nei i te ’āmuira’a rahi i ma’iri. ’Ua ui te peresideni Nelson : « E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? … E vaiiho ānei ’outou i tōna reo ’ia riro ’ei reo mātāmua i ni’a a’e i te tahi atu ? E hina’aro ānei ’outou ’ia horomi’ihia tō ’outou hina’aro i roto i tōna ?9 ’Āhani ’o tō’u metua vahine terā, e pāhono pāpū ïa ’oia ma te putapū ē « ’ē », ’e tē vai ato’a ra te mau melo ha’apa’o maita’i nō te ’Ēkālesia ’ati a’e i te ao nei ’o tē pāhono pāpū ma te putapū ē « ’ē ». E te peresideni Nelson ē, māuruuru nō te fa’aurura’a ’e te fa’aitotora’a o teie mau uira’a peropheta.
’Aita i maoro a’enei i Pretoria, i ’Āfirita Apato’a, ’ua paraparau vau i te hō’ē ’episekōpo tei tanu i tāna vahine ’e tāna tamāhine pa’ari i te hō’ē ā mahana. ’Ua pohe rāua nō teie pararera’a ma’i pohe coronavirus. ’Ua ui atu vau e aha tōna huru. I te pāhonora’a a te ’episekōpo Teddy Thabethe ’ua pūaihia tō’u fa’aotira’a e pe’e i te mau parau ’e te a’ora’a a te mau peropheta, te mau hi’o ’e te mau heheu parau a te Fatu. ’Ua pāhono mai te ’episekōpo Thabethe ē, e vai noa te tīa’ira’a ’e te tāmāhanahanara’a nō te ’itera’a ē, ’ua rave te Fa’aora i ni’a iāna i te mau māuiui o tōna mau ta’ata, ’ia ’ite ’oia nāhea i te tauturu i tō tātou ’ati.10 Ma te fa’aro’o rahi ’ua parau pāpū mai ’oia : « ’Ua māuruuru vau nō te fa’anahora’a nō te fa’aorara’a, te fa’anahora’a nō te ’oa’oa ». Ui mai nei ’oia : « E ’ere ānei te mea tā tō tātou peropheta i tāmata i te ha’api’i ia tātou i te ’āmuira’a i ma’iri ? »
E tae mai iho ā te mau tāmatara’a nō te tāhuti nei i ni’a ia tātou pā’āto’a, ta’a ’ē noa atu te huru, rōtahi ana’e rā i ni’a i te fā nō tō tātou « [nene’i-ti’a-atu-ra’a] i te tāpa’o », ’oia ho’i « te berabeio [nō te pira’a teitei] a te Atua ».11
Tā’u nei anira’a ha’eha’a ia tātou pā’āto’a, ’oia ho’i ’eiaha roa atu e fa’aru’e ! ’Ua pi’ihia tātou nō te « ha’apae i te mau mea teimaha ato’a, ’e te ’ino e hara ai tātou nei, ’a horo tāmau māite ai i teie nei horora’a i mua ia tātou nei, ma te ti’atonu māite tō tātou mata ia Iesu, i te tumu ’e te fa’aoti i tō tātou fa’aro’o ».12
Te mea faufa’a, e ’ere ā te mea e rātere tātou i roto i te orara’a, ’o te ta’ata rā tā tātou e riro nei. Tē vai nei te ʼoaʼoa i roto i te nene’i-ti’a-ra’a-atu i te tāpa’o. Tē parau pāpū nei au ē e riro ’oia tei upo’oti’a i te mau mea ato’a i te tauturu ia tātou ’a hi’o ai tātou i ni’a iāna. I te i’oa ’o Iesu Mesia, ’āmene.