1 ’E i teienei, ’ua parau atu ’o Iakoba e rave rahi atu ā mau mea i tō’u ra mau ta’ata i taua taime ra ; ’āre’a rā, ’o teie mau mea ana’e tā’u i hina’aro ’ia pāpa’ihia, nō te mea ’ua nava’i iā’u te mau mea i pāpa’ihia e au ra.

2 ’E i teienei, e pāpa’i ā vau, ’o Nephi, i te mau parau a Isaia, nō te mea ’ua ’oa’oa tō’u vārua i tāna ra mau parau. E fa’aau ho’i au i tāna ra mau parau i tō’u ra mau ta’ata, ’e e fa’atae atu ho’i au i te reira i tā’u mau tamari’i ato’a, ’e ’ua ’ite mau ho’i ’oia i tō’u ra Tāra’ehara, mai tā’u ato’a iho i ’ite iāna ra.

3 ’E ’ua ’ite ato’a ho’i tō’u teina, ’o Iakoba, iāna, mai tā’u ho’i i ’ite iāna ; nō reira, e fa’atae atu vau i tā rāua mau parau i tā’u ra mau tamari’i nō te fa’a’ite pāpū ia rātou ē, e parau mau tā’u mau parau. Nō reira, i parau mai ai te Atua ē, nā roto i nā ’ite to’otoru e fa’ati’a vau i tā’u nei mau parau. ’Āre’a rā, tē tono noa nei ā te Atua i te mau ’ite, ’e tē ha’apāpū mai ra ’oia i tāna ihora mau parau.

4 ’E inaha, ’ua ’oa’oa tō’u vārua i te fa’a’ite-pāpū-ra’a atu i tō’u mau ta’ata i te parau mau nō te taera’a mai o te Mesia ; nō te reira ho’i i hōro’ahia mai ai te ture a Mose ra ; ’e te mau mea ato’a ho’i i hōro’ahia mai e te Atua mai te ha’amatara’a mai ā o te ao nei, i te ta’ata nei, e taipe ana’e ïa nōna ra.

5 Tē ’oa’oa ato’a nei ho’i tō’u vārua i te mau fafaura’a tā te Fatu i fafau mai i tō mātou ra mau metua ; ’oia ïa, tē ’oa’oa nei tō’u vārua i roto i tōna ra maita’i, ’e i roto i tāna ra parauti’a, ’e te mana, ’e te aroha i roto i te ’ōpuara’a rahi ’e te mure ’ore nō te fa’aorara’a mai te pohe mai ra.

6 ’E tē oaoa nei ho’i tō’u vārua i te fa’a’ite-pāpū-ra’a atu i tō’u ra mau ta’ata ē, ’ia ’ore te Mesia e tae mai, e pohe ïa te mau ta’ata ato’a.

7 ’Āhiri ho’i ’aita e Mesia, ’aita ato’a ïa e Atua ; ’e ’āhiri ’aita e Atua, ’aita ato’a ïa tātou nei, nō te mea ’aore ïa te hō’ē a’e mea i hāmanihia. ’Āre’a rā tē vai nei te Atua, ’e ’o ’oia te Mesia, ’e e tae mai ’oia i te ’īra’a o tōna ra tau mau.

8 ’E i teienei tē pāpa’i nei au i te tahi mau parau a Isaia, ’ia ’oa’oa te ’ā’au o tō’u ra mau ta’ata ’o tē ’ite i teie nei mau parau, ’e ’ia pōpou rātou nō te mau ta’ata ato’a. I teienei ’o teie te mau parau, ’e ’ua ti’a ho’i ia ’outou ’ia fa’aau i te reira ia ’outou ’e i te mau ta’ata ato’a ho’i.