1 ’E i teienei, tē parau fa’ahou atu nei au, ’o Iakoba, ’ia ’outou, e tō’u mau taea’e here, nō ni’a i teie ’āma’a parauti’a ’o tā’u i parau a’enei.

2 Inaha ho’i, te mau fafaura’a i fāri’ihia e tātou ’o te mau fafaura’a ïa ia tātou mai te au i tā te tino nei ; nō reira, ’ua fa’a’itehia mai au ē, e pohe tā tātou mau tamari’i e rave rahi i roto i te tino nei, nō te ti’aturi ’ore ; ’āre’a rā, e aroha mai te Atua ia rātou e rave rahi ; ’e e fa’aho’ihia tā tātou mau tamari’i, ’ia ti’a ia rātou ’ia tae i tei hōro’a ia rātou i te ’ite mau nō tō rātou Tāra’ehara.

3 Nō reira, mai tā’u i parau atu ia ’outou na, e mea ti’a roa i te Mesia—’o teie ho’i tōna i’oa ’o tā te melahi i fa’a’ite mai i te pō hope’a ’a paraparau mai ai ’oia iā’u ra—’ia ho’i mai i rotopū i te mau ’āti Iuda, i rotopū ia rātou ’o tei hau i te parauti’a ’ore i tō te ao ato’a nei ; ’e e fa’asātauro rātou iāna—’ia nā-reira-hia ho’i tō tātou Atua e ti’a ai ; ’e ’aore roa te hō’ē nūna’a ’ē i te ao ato’a nei, ’o tē ti’a ’ia fa’asātauro i tō rātou Atua.

4 Nō te mea ’āhiri ē ’ua ravehia te mau semeio rarahi i rotopū i te tahi atu mau nūna’a, ’ua tātarahapa ïa rātou, ’e ’ua ’ite ho’i ïa ē, ’o ’oia ïa tō rātou Atua.

5 ’E nō te mau ’ohipa ha’avare a te mau tahu’a ’e te mau ’ohipa ’ī’ino ho’i, e fa’a’eta’eta ai tō Ierusalema i tō rātou ’ā’au iāna, ’ia fa’asātaurohia ’oia.

6 Nō reira, nō tā rātou mau ’ohipa ’ī’ino, e tae mai ai i ni’a ia rātou te mau ha’amoura’a, ’e te mau o’e, ’e te mau ma’i rahi, ’e te ha’amani’ira’a toto ho’i ; ’e ’o tei ’ore i pohe, e ha’apurarahia ïa rātou i rotopū i te mau nūna’a ato’a.

7 Inaha rā, tē nā ’ō mai ra te Fatu te Atua : ’Ia tae i te mahana e ti’aturi ai rātou iā’u, ’e ’o vau te Mesia, ’e ’ua fafau atu vau i tō rātou mau metua ē, e fa’aho’i-tino-hia rātou i ni’a i te fenua nei, i tō rātou mau fenua ’āi’a.

8 ’E a muri a’era e ha’aputuputuhia rātou mai tō rātou purara-maoro-ra’a, mai te mau motu mai o te moana, e mai nā tufa’a e maha o te ao nei ; ’e e rahi te mau nūna’a o te mau ’Ētene i mua i tō’u nei mata i te hōpoira’a ia rātou i tō rātou ra fenua ’āi’a, tē nā reira mai ra te Atua.

9 ’Oia ïa, e riro te mau ari’i o te mau ’Ētene ’ei metua tāne fa’a’amu nō rātou, ’e e riro tā rātou mau ari’i vahine ’ei mau metua vahine fa’a’amu nō rātou ; nō reira, e mea rahi ïa te mau fafaura’a a te Fatu i te mau ’Ētene ; i parau na ho’i ’oia i te reira, ’e ’o vai ïa tē ti’a ’ia mārō atu ?

10 Inaha rā, tē nā ’ō mai ra te Atua, e riro teie fenua ’ei fenua ’āi’a nō ’outou ; ’e e ha’amaita’ihia te mau ’Ētene i ni’a i te fenua.

11 ’E e riro teie nei fenua ’ei fenua ti’amā i te mau ’Ētene, ’e ’aita roa e ari’i e vai i ni’a i te fenua, ’o tē tupu i rotopū i te mau ’Ētene.

12 ’E e ha’apūai au i teie nei fenua i mua i te mau nūna’a ato’a.

13 ’E ’o tē tama’i mai ia Ziona ra, e pohe ïa ’oia, tē nā reira mai ra te Atua.

14 ’O ’oia ho’i ’o tē fa’ati’a i te hō’ē ari’i nō te ’aro mai iā’u ra, e pohe ïa ’oia, nō te mea, e riro vau, ’o te Fatu, te ari’i o te ra’i, ’ei ari’i nō rātou ; ’e e riro vau ’ei māramarama nō rātou ’o tei fa’aro’o i tā’u ra mau parau, ē a muri noa atu.

15 Nō reira, ’ia fa’atupuhia tā’u mau fafaura’a ’o tā’u i fafau atu i te mau tamari’i a te ta’ata nei, e tā’u e rave ia rātou ’a pārahi ai rātou i roto i te tino nei, ’oia ho’i ’ia ha’amou vau i te mau ’ohipa huna a te pōiri, ’e te mau taparahira’a ta’ata, ’e te mau ’ohipa vi’ivi’i ato’a e ti’a ai.

16 Nō reira, ’o ’oia ’o tē tama’i mai ia Ziona, te ’āti Iuda ’e te ’Ētene ato’a ho’i, te tītī ’e te ti’amā ato’a ho’i, te tāne ’e te vahine ato’a ho’i, e pohe ïa rātou ; nō te mea nō te vahine tai’ata o te ao nei ïa rātou ; ’e ’o rātou e ’ere i tō’u nei ra, tē pāto’i mai nei ïa rātou iā’u, tē nā reira mai ra tō tātou Atua.

17 E fa’atupu ho’i au i tā’u mau fafaura’a ato’a o tā’u i fafau atu i te mau tamari’i a te ta’ata nei, ’e e fa’atupu vau i te reira ia rātou ’a pārahi ai rātou i roto i te tino nei—

18 Nō reira, e tō’u mau taea’e here, tē nā ’ō mai ra tō tātou Atua : E fa’atae mai au i te ’ati rahi i ni’a i tō ’oe hua’ai nā roto i te rima o te mau ’Ētene ; ’āre’a rā e ha’amarū vau i te ’ā’au o te mau ’Ētene, ’ia riro rātou mai te hō’ē metua tāne ia rātou ; nō reira, e ha’amaita’ihia te mau ’Ētene ’e e tai’ohia rātou i rotopū i te ’utuāfare o ’Īserā’ela.

19 Nō reira, e ha’amo’a vau i teie nei fenua nō tō ’oe ra hua’ai, ’e nō rātou ’o tē tai’ohia i rotopū i tō ’oe ra hua’ai, ’ei fenua ’āi’a nō rātou ē a muri noa atu ; ’ua nā ’ō mai ra te Atua iā’u, e fenua maita’i ho’i ïa i te mau fenua ato’a, nō reira e tītau vau i te mau ta’ata ato’a e pārahi i ni’a i te reira ’ia ha’amori mai iā’u, tē nā reira mai ra te Atua.

20 ’E i teienei, e tō’u mau taea’e here, i te mea ē, ’ua hōro’a mai tō tātou Atua aroha i te ’ite rahi ia tātou nō teie nei mau mea, ’a ha’amana’o tātou iāna, ’e ’a fa’aru’e i tā tātou mau hara, ’e ’eiaha e fa’atautau i tō tātou upo’o i raro, ’aore ho’i tātou i fa’aru’ehia ; ’āre’a rā ’ua ti’avaruhia tātou i rāpae i tō tātou fenua ’āi’a ; ’e ’ua arata’ihia ho’i tātou i te hō’ē fenua maita’i a’e, ’e nā te Fatu ho’i i fa’ariro i te miti ’ei ’ē’a nō tātou, ’e tei ni’a tātou i te hō’ē motu nō te moana.

21 ’Āre’a rā ’ua rahi tā te Fatu mau fafaura’a ia rātou ’o tei pārahi i ni’a i te mau motu o te moana ; nō reira, i te mea i parauhia ē, e mau motu nō te moana, ’ua hau atu ïa i teie, ’e ’ua fa’aea-ato’a-hia ho’i te reira e tō tātou mau taea’e.

22 Inaha ho’i, ’ua arata’i ’ē atu te Fatu te Atua i te tahi pae ta’ata o te ’utuāfare o ’Īserā’ela nei i terā tau i terā tau ’ia au i tōna hina’aro e tōna mana’o. ’E i teienei, inaha, tē ha’amana’o nei te Fatu ia rātou i ’ōfene-’ē-hia ra, nō reira, tē ha’amana’o ato’a mai nei ’oia ia tātou.

23 Nō reira, ’ia ’oa’oa tō ’outou ’ā’au, ’e ’a ha’amana’o ē, e mea ti’amā ’outou ’ia rave noa atu i tei au i tō ’outou hina’aro—’ia mā’iti i te ’ē’a o te pohe mure ’ore ’e ’aore rā i te ’ē’a o te ora mure ’ore.

24 Nō reira, e tō’u mau taea’e here, ’a fa’a’āfaro ’outou ia ’outou iho i te hina’aro o te Atua, ’e ’eiaha i te hina’aro o te diabolo ’e tō te tino nei ; ’e ’a ha’amana’o ’outou ē, i muri a’e i tō ’outou fa’a’āfarora’a ia ’outou i te Atua, ’e nā roto ïa i te maita’i o te Atua e fa’aorahia ai ’outou.

25 Nō reira, ’ia fa’ati’a mai te Atua ia ’outou mai te pohe mai nā roto i te mana o te ti’afa’ahoura’a, e mai te pohe mure ’ore ho’i nā roto i te mana o te tāra’ehara, ’ia fāri’ihia ’outou i roto i te bāsileia mure ’ore o te Atua, ’e ’ia ’ārue ’outou iāna nā roto i te maita’i o te Atua. ’Āmene.