1 ’Oia fa’ahou, ’ua nā ’ō mai ra te parau a te Fatu iā’u : ’A rave ’oe i te tahi ’ōtaro parau rahi, ’e ’a pāpa’i i ni’a iho i te reira i te tohi a te ta’ata tahu’a ra, Mahera-salala-hasabaza.

2 ’E ’ua arata’i atu ra vau i nā ’ite ha’avare ’ore nā muri iā’u ’ia pāpa’i rāua, ’o Uria te tahu’a ra, ’e ’o Zekaria te tamaiti a Ieberekia ra.

3 ’E ’ua ha’afātata atu ra vau i te peropheta vahine ra ; ’e ’ua tō ihora ’oia e fānau mai ra e tamaiti. ’E ’ua parau mai ra te Fatu iā’u : ’A ma’iri i tōna i’oa, ’o Mahera-salala-hasa-baza.

4 Inaha ho’i, e ’ore roa taua tamaiti ra e ’ite i te parau ē : E tō’u metua tāne, e tō’u metua vahine, nā mua a’e e hōpoi-’ē-hia ai te mau tao’a o Damaseko ’e te tao’a haru o Samaria mai mua i te aro o te ari’i o Asura ra.

5 ’Ua parau fa’ahou mai ra te Fatu iā’u, nā ’ō mai ra :

6 Nō te mea ’ua fa’aru’e teie nei feiā i te mau pape i Siloa ’o tei tahe ri’i māite ra, ’e tē poupou ra ia Resina, ’e te tamaiti a Remalia ra.

7 ’E i teienei, inaha, tē hōpoi mai ra te Fatu i ni’a ia rātou i te mau pape nō te ’ānāvai rahi ra, ’o tei ’eta’eta ’e tei pūai, ’oia te ari’i o Asura, ’e tōna ato’a ra hanahana ; ’e e hāono noa ’oia i ni’a i tōna ra mau tahera’a pape, ’e e manii noa nā ni’a i tōna ra mau hiti.

8 ’E e haere oia nā roto ia Iuda, i te hāono-noa-ra’a ’e te parare-ato’a-ra’a, e tae roa ’oia i te ’a’ī ra ; ’e te hōhorara’a o tōna pererau ra mai te ’ā’ano ato’a ïa o tō ’oe ra fenua, e Imanuela.

9 ’A ’āmui tāhō’ē ia ’outou iho, ’e te mau ta’ata, ’e e vāvāhi-fa’ahu’ahu’a-hia ’outou ; ’e ’a fa’aro’o mai na ’outou pā’āto’a e tō te mau fenua i te ātea roa ; ’a tātua na ia ’outou iho, ’e e vāvāhi-f’ā’ahu’ahu’a-hia ’outou ; ’a tātua na ia ’outou iho, ’e e vāvāhi-f’ā’ahu’ahu’a-hia ’outou.

10 ’A feruri ’āmui māite ’outou, ’e e riro ’ei mea faufa’a ’ore ; ’a parau na i te parau, ’e e ’ore ïa e tupu ; nō te mea tei pīha’i iho te Atua ia mātou nei.

11 ’E ’ua parau mai ra te Fatu iā’u ma te rima pūai, ’e ’ua fa’aue mai ra iā’u ē ’eiaha vau e haere nā te haere’a o teie nei feiā, i te nā-’ō-ra’a mai ē :

12 ’Eiaha ’outou e parau ē : E pupu tāhō’ē, i te mau mea tā teie nei feiā e parau nei ē, E pupu tāhō’ē ; ’eiaha ho’i ’outou e mata’u i tā rātou e mata’u ra ; ’eiaha ho’i e horuhoru.

13 ’A ha’amo’a i te Fatu Sabaota ra, ’e ’o ’oia tā ’outou e mata’u, ’e ’o ’oia tā ’outou e ri’ari’a.

14 ’E e riro ho’i ’oia ’ei ha’apūra’a nō ’outou ; ’e ’ei ’ōfa’i turorira’a ’e ’ei mato māheaitura’a i nā ’utuāfare e piti o ’Īserā’ela, ’ei herepata ’e ’ei mārei nō tō Ierusalema ra.

15 ’E e rave rahi i rotopū ia rātou ’o tē turori ’e ’o tē hi’a, ’e ’o tē pararī, ’e ’o tē māreihia, ’e ’o tē ravehia.

16 ’A ru’uru’u na i te ’itera’a pāpū ; ’a ha’amau na i te ture i rotopū i tā’u mau pipi.

17 ’E e tīa’i au i te Fatu, ’o tei huna i tōna mata i te ’utuāfare o Iakoba, ’e e tīa’i ā vau iāna.

18 Inaha, ’ua riro vau ’e te mau tamari’i tā te Fatu i hōro’a mai nā’u ra ’ei mau tāpa’o ’e ’ei māerera’a i ’Īserā’ela nei nō ’ō mai i te Fatu Sabaota ra, ’o tei pārahi i te Mou’a ra i Ziona.

19 ’E ’ia parau mai rātou ia ’outou ē : ’A ’imi ia rātou i te feiā vārua ’ino ’e te mau ta’ata hi’ohi’o ’o tē māniania ra ’e tē mutamuta ra—’eiaha ānei te ta’ata e ’imi i tō rātou iho Atua nō te feiā ora ’ia fa’aro’o i te parau a te feiā pohe ?

20 ’A ’imi i te ture ’e i te ’itera’a pāpū ; ’e ’ia ’ore rātou ’ia fa’aau i tā rātou parau i taua parau ra, nō te mea ïa ’aita te māramarama i roto ia rātou.

21 E hope roa ïa rātou i te haere nā roto i taua fenua nei nō te ’ati rahi ’e te po’ia ; ’e a muri a’era, ’ia pohe rātou i te po’ia, e riri rātou ia rātou iho, ’e e tuhi rātou i tō rātou ari’i e tō rātou Atua, ’e ’a hi’o ai i ni’a.

22 E mai reira ho’i e hi’o rātou i te fenua nei ’e e ’ite rātou i te ’ati ’e te pōiri, i te ’āru’iru’i ’e te ahoaho, ’e e ti’avaruhia i roto i te pōiri.