1 ’E e tupu te hō’ē ohi nō roto mai i te ’āma’a ra o Iese ; e riro te hō’ē aveave i te hotu mai nō roto mai i tōna ra mau a’a.

2 ’E e tae mai te Vārua o te Fatu i ni’a iāna ; te vārua nō te pa’ari ’e nō te māramarama, te vārua fa’aa’o ’e nō te pūai, te vārua nō te ’ite ’e nō te mata’u i te Fatu ;

3 E rahi ho’i tōna māramarama i te mata’u i te Fatu ; ’e ’aita ho’i ’oia e ha’avā mai te au i te ’itea e tōna nā mata, ’e ’aita ho’i ’oia e a’o mai te au i tei fa’aro’ohia e tōna nā tari’a.

4 E ha’avā rā ’oia i te mau ta’ata ri’iri’i ma te parauti’a, ’e e a’o ho’i ’oia ma te fāito ti’a i te feiā ha’eha’a o te fenua nei ; ’e e tā’iri ’oia i te fenua nei i te rā’au o tōna ra vaha, ’e nā roto i te mata’i o tōna ra vaha e ha’apohe ai ’oia i te feiā parauti’a ’ore.

5 ’E te parauti’a ra, ’o te tātua ïa o tōna tau’upu, ’e te parau mau ra, ’o te tātua ïa o tōna ’ōpū.

6 E pārahi ato’a ho’i te luko i pīha’i iho i te ’ārenio, e tārava ’āmui ho’i te nēmera i pīha’i iho i te pinia māmoe, ’e te fanau’a pua’atoro, ’e te liona ’āpī, ’e te fanau’a ’ānimara poria ra ; ’e nā te hō’ē tamari’i ri’i e arata’i ia rātou.

7 E ’āmui tāhō’ē te pua’atoro ’e te bea i te ’amura’a i te mā’a ; e tārava ’āmui ho’i tō rātou mau fanau’a te tahi i pīha’i iho i te tahi ; ’e e ’amu ho’i te liona i te matie mai te pua’atoro ato’a ra.

8 ’E e ha’uti noa ho’i te ’aiū ’aru’aru i ni’a i te ’āpo’o o te asepi, ’e te tamari’i i fa’a’orehia te ū ra, e tu’u ïa ’oia i tōna rima i ni’a i te pūpunira’a o te zepho ra.

9 ’E ’aita roa rātou e ha’amāuiui ’e ’aita ho’i e hāmani ’ino i te hō’ē a’e mea i ni’a i tō’u ato’a ra mou’a mo’a, ’e e ’ī ho’i te fenua nei i te ’ite nō ni’a i te Fatu, mai te mau pape e tāpo’i ra i te miti.

10 ’E ’ia tae i taua mahana ra, e ’itea mai ai te hō’ē nō te tumu ra o Iese, ’e e ti’a ’oia i ni’a ’ei reva nō te nūna’a ; e ’imi ho’i te mau ’Ētene iāna ; ’e e riro tōna fa’aeara’a ’ei mea hanahana.

11 ’E a muri a’era, ’ia tae i taua mahana ra e fa’atoro fa’ahou mai te Fatu i tōna rima i te piti o te taime nō te fa’aora i te toe’a o tōna ra mau ta’ata, ’o tei toe i Asura, ’e i ’Aiphiti, ’e i Patarota, ’e i Kusa, ’e i Elama, ’e i Sinara, ’e i Hamata, ’e i te mau motu o te moana ra.

12 ’E e fa’ati’a ’oia i te hō’ē reva i ni’a nō te mau nūna’a ; ’e e ha’aputuputu mai ’oia i to ’Īserā’ela i fa’aru’ehia ra, ’e e ’āmui tāhō’ē mai ho’i i tō Iuda i ha’apurarahia mai nā poro e maha mai o te fenua nei.

13 E reva ’ē atu te mi’imi’i o Epheraima, ’e e tāpū-’ē-hia te mau ’enemi o Iuda ra ; e ’ore ho’i Epheraima e mi’imi’i ia Iuda, e ’ore ho’i Iuda e fa’aehuehu ia Epheraima.

14 ’Āre’a rā e ma’iri rātou i ni’a i te mau tapono o tō Philiseti ra i te pae i te tō’o’a o te rā ; e pau ato’a tō te pae i te hiti’a o te rā ia rātou ; ’e e haru ho’i rātou ia Edoma ’e Moabi ; ’e e riro ho’i te mau tamari’i a Amona i te fa’aro’o ia rātou.

15 ’E e ha’amou roa te Fatu i te reo o te miti o ’Aiphiti ra ; ’e e ueue ’oia i tōna rima i ni’a i te ’ānāvai pape ma te mata’i rahi pūai nāna ra ; ’e e tā’iri ’oia i te reira i roto e ta’ihitu pape tahe ra, ’e e fa’ahaere ’oia i te mau ta’ata i te tahi pae ma te ’āvae rari ’ore ra.

16 ’E tē vai ra ho’i te hō’ē ’ē’a rahi nō te toe’a o tōna ra mau ta’ata ’o tei toe, mai Asura mai ra, mai tō ’Īserā’ela i te mahana i haere mai ai ’oia mai te fenua mai ra nō ’Aiphiti.