1 E ’ere rā te pōiri i te rahi mai roto i tōna mau ha’ape’ape’ara’a, mai iāna ho’i i tā’iri i muta’a ihora i te fenua ra nō Zebuluna, ’e te fenua ra nō Naphatali, ’e i te taime hope’a ra, e tā’iri ’ū’ana ïa ’oia i te haere’a tahatai, nā te pae i te miti ’Ute’ute i Ioridana ra, ’oia Galilea nō te mau nūna’a e rave rahi ra.

2 Te feiā i haere noa nā te pōiri ra, e māramarama rahi tei ’itea ia rātou ; te feiā i pārahi i roto i te maru pohe ra, ’ua ’ana’ana mai te māramarama i ni’a ia rātou.

3 ’Ua fa’arahi ’oe i te nūna’a, ’e ’ua fa’arahi i te ’oa’oa—tē ’oa’oa ra rātou i mua ia ’oe mai te ’oa’oa i te ’auhunera’a ra, ’e mai te ’oa’oa o te feiā e tufa i te tao’a haru ra.

4 ’Ua ’ōfati ho’i ’oe i te zugo nō tāna ra hōpoi’a, ’e te rā’au i ni’a i tōna ra tapono, te rā’au a te ta’ata hāmani ’ino ra.

5 I roto i te mau ’arora’a ato’a ho’i a te feiā tama’i ra e ’itehia te mānianiara’a, ’e te mau ’ahu i tāvirihia i roto i te toto ra ; ’e e ’ama noa ho’i te reira i te auahi ’e te vahie o te auahi ra.

6 ’Ua fānau mai ho’i te hō’ē tama nā tātou, ’ua hōro’ahia mai te hō’ē tamaiti nā tātou ; ’e i ni’a i tōna ra tapono te hau fenua e vai ai ; ’e e ma’irihia tōna ra i’oa, te Hau ’ē, te Fa’aa’o, Te Atua Pūai, Te Metua mure ’ore, Te Ari’i nō te Hau.

7 ’E te tupura’a rahi o te hau fenua ’e te hau ’aore ïa e hope’a, e mana ho’i ’oia i ni’a i te terōno o Davida, ’e i ni’a i tōna ra bāsileia, ’e e fa’ati’a ’oia i te reira ma te parau mau ’e te parauti’a i teienei, ē a muri noa atu. Nā te itoito o te Fatu Sabaota e rave i teie.

8 ’Ua fa’atae mai te Fatu i tāna parau ia Iakoba, ’e ’ua iri i ni’a ia ’Īserā’ela.

9 ’E e ’ite ho’i te mau ta’ata ato’a o Epheraima, ’e te mau ta’ata o Samaria, ’o tei parau ma te te’ote’o ’e te fa’ateitei o te ’ā’au ra, i te nā-’ō-ra’a ē :

10 ’Ua marua te mau ’ōfa’i ’araea i raro, ’ei ’ōfa’i tarai rā tā tātou e patu ; ’ua tāpūhia te rā’au sukaino, ’ei ’āreti rā tā tātou e mono.

11 Nō reira, e fa’ati’a ai te Fatu i te mau ’enemi o Resina ’ei rave iāna, ’e ’a ’āmui tāhō’ē ai i tōna mau ’enemi iāna ;

12 Tō Arama i mua ’e tō te Philiseti i muri ; ’e e pau ’Īserā’ela ato’a ē ’ati noa a’e ia rātou. Nō teie mau mea ato’a ’aita tōna riri i fāriu ’ē, tē fa’atoro-noa-hia mai ra rā tōna rima.

13 ’E ’aita taua feiā nei i fāriu mai iāna i tei tā’iri ia rātou ra ; ’e ’aore ho’i rātou i ’imi i te Fatu Sabaota ra.

14 Nō reira, e tāpū ’ē atu ai te Fatu ia ’Īserā’ela nei, i te upo’o ’e te ’āero, i te ’āma’a ’e te ohi i te mahana hō’ē.

15 ’O te ta’ata ruhiruhiā e te fa’aturahia, ’o te upo’o ïa ; ’e te peropheta e ha’api’i i te parau ha’avare ra, ’o te ’āero ïa.

16 ’E ’ua arata’i ’ē te feiā fa’atere i teie nei mau ta’ata ; ’e te feiā i arata’ihia e rātou ra, ’ua ha’amouhia ïa.

17 Nō reira, e ’ore roa te Fatu e ’oa’oa i tō rātou feiā ’āpī tāne, e ’ore ho’i ’oia e aroha i tā rātou mau ’ōtare ’e te mau vahine ’ivi ra ; e feiā ha’avare ho’i rātou ato’a ’e te rave i te ’ohipa ’ino, ’e e feiā parau ma’ama’a ana’e rātou ato’a. Nō teie mau mea ato’a ’aita tōna riri i fāriu ’ē, tē fa’atoro-noa-hia mai ra rā tōna rima.

18 Tē ’ama nei ho’i te mau ’ohipa ’ī’ino mai te auahi ra ; e pau te mau rā’au taratara ’e te mau tātarāmoa, ’e e ’ama ho’i te mau uru rā’au me’ume’u ra, ’e e pe’e ho’i i ni’a mai te au auahi e pe’e ra.

19 Nō te riri ’ū’ana o te Fatu Sabaota ra i ha’apōirihia ai te fenua nei, ’e e riro ho’i te ta’ata nei mai te vahie nō te auahi ra ; e aore roa te ta’ata e fa’aora noa i tōna iho taea’e.

20 ’E e haru ’oia i tō te rima atau, ’e e poia noa ; ’e e amu ho’i ’oia i tō te rima ’aui e ’aore e māha te hiaai ; ’e e ’amu ho’i te ta’ata ato’a i te ’i’o o tōna ihora rima—

21 E ’aro Manase ia Epheraima ; e ’aro Epheraima ia Manase ; e ’aro ’āmui ho’i rāua ia Iuda. Nō teie mau mea ato’a ’aita tōna riri i fāriu ’ē, tē fa’atoro-noa-hia mai ra rā tōna rima.