1 ’Auē ho’i rātou ’o tei ha’amana i te mau fa’auera’a mana parauti’a ’ore, ’e ’o tei pāpa’i i te parau hāmani ’ino ’o tā rātou iho i ’ōpua ;

2 Nō te fa’a’ere i te parauti’a i te feiā veve, ’e nō te haru i te ti’amāra’a o te feiā ha’eha’a o tō’u nei nūna’a, ’ia riro te mau vahine ’ivi ’ei tao’a nā rātou, ’e ’ia pau te mau ’ōtare i te haruhia e rātou !

3 E aha ho’i tā ’outou e rave ’ia tae i te mahana e ro’ohia atu ai ra, ’e ’ia tae mai te pau rahi nō te ātea mai ra ? E horo ti’a ’outou ’ia vai nō te tauturura’a ? ’E i hea ’outou e vaiiho ai i tā ’outou ra mau tao’a ?

4 ’Ia ’ore au nei, e tu’u-ha’eha’a-hia rātou i rotopū i te feiā mau ’āuri, ’e e hi’a rātou e te feiā e pohe ato’a ra i raro. Nō teie mau mea ato’a ’aita tōna riri i fāriu ’ē, tē fa’atoro-noa-hia mai ra rā tōna rima.

5 E tō Asura ē, te rā’au nō tō’u nei riri, ’e te mauha’a i roto i tō rātou ra rima ’o tō rātou ïa au ’ore rahi.

6 E tono atu vau iāna i te nūna’a ha’avare ra, ’e i te feiā i ririhia e au ra, ’ia ha’aputu ’oia i te tao’a haru, ’e ’ia hōpoi ’ē atu i te tao’a haru, ’e ’ia ta’ata’ahi ’oia ia rātou i raro mai te repo o te mau aroā ra.

7 ’Aita rā ’oia i nā reira i te mana’o, ’aita ato’a tōna ’ā’au i nā reira i te ’ōpua ; ’āre’a rā i roto i tōna ’ā’au ra nō te ha’amou ïa ’e nō te tāpū ’ē atu ïa i te mau nūna’a fenua ’eiaha ’ia iti.

8 Tē nā ’ō ra ho’i ’oia : E ’ere ato’a ānei tā’u mau tamaiti ari’i e hui ari’i ato’a ?

9 E ’ere ānei ’o Kalano tei riro mai ia Karekemisa ? E ’ere ānei o Hamata tei riro mai ia Araphada ? E ’ere ānei o Samaria tei riro mai ia Damaseko ?

10 ’E mai tō’u rima i fa’ati’a i te mau bāsileia o te mau ’īdolo ra, ’ua hau atu ïa te mau ti’i o teie mau bāsileia i tō Ierusalema ’e tō Samaria ;

11 Mai tā’u ho’i i rave i tō Samaria ’e tōna ra mau ’īdolo, e ’ore ānei au e nā reira i te rave ia Ierusalema ’e tōna ato’a ra mau ’īdolo ?

12 Nō reira, ’e a muri a’era, e riro ’ia hope te mau ’ohipa ato’a a te Fatu i te ravehia e ana i ni’a i te Mou’a ra o Ziona ’e i ni’a ia Ierusalema, e tāho’o ai ’oia i te hotu o te ’ā’au te’ote’o o te ari’i o Asura, ’e te hi’ora’a teitei o tōna mata.

13 ’E ’ua parau ho’i oia ē : Nā te pūai o tō’u nei rima ’e nā tō’u nei ho’i pa’ari i ti’a ai iā’u ’ia rave i teie mau mea ; ’e ’ua ha’apa’o ho’i au i tā’u i rave ; ’e ’ua ruri ho’i au i te ’ōti’a o te mau ta’ata ra, ’e ’ua haru vau i tā rātou mau tao’a i ha’aputu ra, ’e ’ua tu’u ho’i au i te feiā pārahira’a ’eta’eta ra i raro mai te ’aito ra ;

14 ’E ’ua ’itea e au te tao’a rahi a te mau ta’ata mai te ’ōfa’ara’a i ’itea ra ; ’e mai te ta’ata i ha’aputu i te huero i fa’aru’ehia ra, ’ua ha’aputu ho’i au i tō te fenua ato’a nei ; ’e ’aore roa te hō’ē i ’apa’apa noa a’e i te pererau, ’e i hāmama noa a’e te vaha, ’e ’aore rā i māniania noa mai.

15 E fa’aahaaha mai ānei te ’ōpahi iāna iho i tei rave iāna nō te tāpū ? E fa’aahaaha mai ānei te ’e’e iāna iho i tei rave iāna nō te ’e’e ? E au atu ra ho’i ē, e ti’a i te rā’au ’ia ha’uti iāna iho i tei hōpoi iāna i ni’a, ’e ’aore rā ’ia hōpoi iāna iho i ni’a, mai te mea ra ē, e ’ere i te rā’au !

16 Nō reira, nā te Fatu, nā te Fatu Sabaota ra, e hōpoi atu i te tiahape i rotopū i te mau ta’ata poria nōna ra ; e i raro a’e i tōna maita’i e tūtu’i ’oia mai te auahi vera ra.

17 ’E e riro te māramarama o ’Īserā’ela ra ’ei auahi, ’e tei Mo’a nōna ra, ’ei auahi ura ; ’e e ’ama ho’i ’oia ’e e pau tāna mau tātarāmoa ’e tāna mau rā’au taratara i te mahana ’ōtahi.

18 ’E te ’una’una ho’i o te uru rā’au nāna ra, ’e nō te ’ō ruperupe nāna ra, te vārua ’e tae noa atu i te tino ra, te pau ïa iāna ; ’e e riro rātou mai te mea ra ’ua pohe te hōpoi reva ra.

19 ’E te toe’a o te mau rā’au i taua uru rā’au nāna ra, e mea iti ïa, ’e e hope noa i te hō’ē tamari’i ’ia tai’o.

20 ’E a muri a’era, ’ia tae i taua mahana ra, e ’ore te toe’a o ’Īserā’ela ra, e tō te ’utuāfare o Iakoba i ora ra, e ti’aturi fa’ahou i tei tā’iri mai ia rātou ; e ti’aturi rā rātou i te Fatu, i Tei Mo’a i ’Īserā’ela nei, ma te parau mau.

21 E ho’i mai ā te toe’a, ’oia ïa, te tahi toe’a nō Iakoba, i te Atua manahope ra.

22 ’E noa atu ’ua riro tō ’oe ra mau ta’ata e ’Īserā’ela mai te one tahatai ra, e ho’i mai ā te tahi toe’a o rātou ra ; te ha’amoura’a i fa’aotihia ra e fa’atupu ïa i te parauti’a rahi.

23 ’E nā te Fatu te Atua Sabaota e rave i te ha’amoura’a, ē tae noa atu i te fa’aotira’a i roto i te fenua ato’a ra.

24 Nō reira, tē nā ’ō mai ra te Fatu te Atua Sabaota : E au mau ta’ata ’o tē pārahi nei i Ziona, ’eiaha e mata’u i te ta’ata Asura ; e tā’iri mai ’oia ia ’oe i te rā’au, ’e e tā’iri mai ’oia ia ’oe i tāna rā’au, mai te au i tō ’Aiphiti ra.

25 ’E ’ua poto roa te tau, e māha tō’u o’ō’o, ’e e ’ore ho’i tō’u riri ’ia ha’amouhia atu rātou.

26 E nā te Fatu Sabaota ra e fa’ati’arepu i te hō’ē fa’autu’ara’a i ni’a iāna, ma te tā’iri ia Midiana i te mato ra nō Oreba ; ’e mai te rā’au tāna i hōpoi i ni’a a’e i te miti ra, e hōpoi ā ’oia i ni’a mai te au i tō ’Aiphiti ra.

27 ’E a muri a’era, ’ia tae i taua mahana ra, e fa’ata’a-’ē-hia ai tāna hōpoi’a i tō tapono ra, e tāna zugo i tō ’a’ī ra ; ’e e ha’amouhia te zugo nō te fa’atāhinura’a ra.

28 ’Ua haere mai ra ’oia i Aiata ; ’e ’ua tae roa mai ra i Migerona ; ’e tei Mikamasa tāna ra mau pere’o’o.

29 ’Ua haere rātou nā ni’a i te hō’ē vāhi oaoa ; ’ua ta’oto rātou i Geba ; ’ua mata’u Ramata ; ’e ’ua horo ’o Gibea o Saula.

30 ’A pi’i māite tō reo, ’e te tamāhine a Galima ; ’ia fa’aro’ohia te reira i Laisa ; ’Auē ho’i e Anatota ē.

31 ’Ua reva ’ē atu Mademena ; ’ua ha’aputuputu tō Gebima ia rātou iho nō te horo ’ē atu.

32 E fa’aea noa ’oia i Noba i taua mahana ra ; e ueue ’oia i tōna rima i te mou’a nō te tamāhine o Ziona, te ’āivi nō Ierusalema.

33 Inaha, nā te Fatu, nā te Fatu Sabaota ra e tāpū i te ’āma’a ma te mata’u rahi, ’e te feiā teitei ra e tāpūhia ïa i raro ; ’e te feiā te’ote’o ra, e fa’aha’eha’ahia ïa.

34 ’E e tāpū ’oia i te mau vāhi me’ume’u o te mau uru rā’au i te ’āuri, ’e e hi’a Lebanona i te rima pūai ra.