1 I teienei, e parau ri’i atu vau, ’o Nephi, i te mau parau ’o tā’u i pāpa’i, tei parauhia e te vaha o Isaia ra. ’E inaha ho’i, ’ua parau Isaia e rave rahi mau mea ’o tei riro ’ei mea fifi i te pae rahi o tō’u ra mau ta’ata ’ia māramarama ; nō te mea ’aore rātou i ’ite i te huru nō te tohura’a i rotopū i te mau ’āti Iuda ra.

2 ’Aita ho’i au, ’o Nephi, i ha’api’i ia rātou i te mau mea e rave rahi nō ni’a i te mau peu a te ’āti Iuda ra, nō te mea ’ua riro tā rātou mau ’ohipa ’ei mau ’ohipa nō te pōiri, ’e tā rātou i rave ra ’ei mau ’ohipa vi’ivi’i ïa.

3 Nō reira, e pāpa’i atu vau i tō’u ra mau ta’ata, ’ia rātou ato’a ’o tē fāri’i mai ’āraua’e i teie nei mau mea ’o tā’u e pāpa’i nei, ’ia ’ite rātou i te mau ha’avāra’a a te Atua ’o tē tae mai i ni’a i tō te mau nūna’a ato’a ra, mai te au i te parau tāna i parau ra.

4 Nō reira, ’a fa’aro’o mai na, e tō’u mau ta’ata nō te ’utuāfare o ’Īserā’ela, ’a fa’aro’o mai na i tā’u nei mau parau ; nō te mea ’aita te mau parau a Isaia i pāpū ia ’outou, ’āre’a rā ’ua pāpū te reira i te mau ta’ata ato’a i ’ī i te vārua nō te tohu. E tu’u atu vau i te hō’ē tohura’a ia ’outou mai tei au i tā te vārua i roto iā’u nei ; nō reira e tohu vau ma te pāpū mai te au i tei roto iā’u nei mai te tau i fa’aru’e ai māua tō’u metua tāne i Ierusalema ra ; inaha ho’i, tē ’oa’oa nei tō’u vārua i te parau pāpū i tō’u ra mau ta’ata, ’ia ha’api’ihia rātou.

5 ’Oia ïa, tē ’oa’oa nei tō’u vārua i te mau parau a Isaia, nō te mea nō Ierusalema mai au, ’e ’ua ’ite tō’u mata i te mau mea nō ni’a i te mau ’āti Iuda ; ’e ’ua ’ite ho’i au ē, ’ua māramarama te mau ’āti Iuda i te mau parau a te mau peropheta, ’e ’aita atu ā e mau ta’ata i māramarama i te mau mea i parauhia i te mau ’āti Iuda mai ia rātou ra, maori rā ’ua ha’api’ihia rātou i te mau peu a te mau ’āti Iuda.

6 Inaha rā, ’aore au ’o Nephi, i ha’api’i atu i tā’u ra mau tamari’i i te ha’api’ira’a a te ’āti Iuda ; inaha rā ’ua pārahi au, ’o vau iho, i Ierusalema, ’e nō reira ’ua ’ite au i te mau vāhi ato’a ē ’ati noa a’e ; ’e ’ua parau ho’i au i tā’u ra mau tamari’i nō ni’a i te mau ha’avāra’a a te Atua, ’o tē tae mai i rotopū i te mau ’āti Iuda, i ni’a i te mau tamari’i, ’ia au i tei parauhia e Isaia ra, ’e ’aita vau i pāpa’i i te reira.

7 Inaha rā, e pāpa’i ā vau i tā’u ihora tohura’a, mai te au i te vāhi pāpū iā’u ; ’ua ’ite ho’i au ē, e ’ore roa te ta’ata e hape i te reira ; ’āre’a rā i te mahana e tupu ai te mau tohura’a a Isaia, ’ei reira te mau ta’ata e ’ite pāpū ai i te mahana nō te tupura’a o te reira.

8 Nō reira, e mea faufa’a rahi te reira i te mau tamari’i a te ta’ata nei ; ’e ’o ’oia ’o tē mana’o ē, e ’ere ïa i te mea faufa’a, e parau pāpū atu vau ia rātou, ’e e parau vau i tō’u ra mau ta’ata ana’e ; ’ua ’ite ho’i au ē, e mea faufa’a rahi roa te reira ia rātou ’ia tae i te mau mahana hope’a ra ; ’e i taua mahana ra e māramarama ai rātou i te reira ; nō reira, nō tō rātou maita’i ho’i i pāpa’i ai au i te reira.

9 ’E mai te hō’ē u’i i ha’amouhia i rotopū i te mau ’āti Iuda nō tā rātou ’ohipa ’ī’ino, ’oia ato’a ’ua ha’amouhia rātou mai terā u’i i terā u’i mai te au i tā rātou mau ’ohipa ’ī’ino ; ’e ’aore roa te hō’ē o rātou i ha’amouhia, maori rā ’ua fa’a’ite-ātea-hia na e te mau peropheta o te Fatu.

10 Nō reira, ’ua fa’a’itehia na ia rātou te ha’amoura’a e tae mai i ni’a iho ia rātou, i muri noa a’e i te mahana i fa’aru’e ai tō’u metua tāne i Ierusalema ra ; ’āre’a rā ’ua fa’a’eta’eta rātou i tō rātou ’ā’au ; e mai te au i tā’u tohura’a ’ua ha’amouhia rātou, maori rā ’o rātou ’o tei hōpoi-tītī-hia i Babulonia ra.

11 ’E i teienei, nō te vārua i roto iā’u nei i parau ai au i taua parau nei. E hōpoi-’ē-noa-hia rātou, e ho’i mai rā rātou, ’e e pārahi rātou i te fenua ra nō Ierusalema ; nō reira, e fa’aho’i-fa’ahou-hia rātou i tō rātou ra fenua ’āi’a.

12 Inaha rā, ’ua tupu tā rātou mau tama’i, ’e te mau parau tama’i, ’e ’ia tae mai te mahana e fa’a’ite tino mai ai te Fānau tahi a te Metua, ’oia ïa, te Metua o te ra’i ’e te fenua ato’a nei, iāna iho ia rātou ra, inaha, e pāto’i rātou iāna, nō tā rātou mau ’ohipa ’ī’ino, ’e nō te ’eta’eta o tō rātou ’ā’au, ’e te ha’apa’arira’a ia rātou iho.

13 Inaha, e fa’asātauro rātou iāna ; ’e i muri a’e i te vaira’a tōna tino i roto i te mēnema nō te ārea e toru mahana te maoro, e ti’afa’ahou mai ’oia mai te pohe mai ma te ora i raro a’e i tōna nā pererau ; ’e ’o rātou ato’a ’o tē ti’aturi i tōna ra i’oa, e fa’aorahia ïa i roto i te bāsileia o te Atua. Nō reira, ’ua ’oa’oa tō’u vārua ’ia tohu nō ni’a iāna, nō te mea ’ua ’ite au i tōna mahana, ’e tē fa’arahi nei tō’u ’ā’au i tōna ra i’oa mo’a.

14 ’E inaha, ’e a muri a’era ’ia ti’a mai te Mesia mai te pohe mai, ’e ’ia fa’a’ite atu iāna iho i tōna ra mau ta’ata, i te mau ta’ata ato’a ’o tē ti’aturi i tōna ra i’oa, inaha, e ha’amou-fa’ahou-hia Ierusalema ; e ’auē ho’i tō rātou ’o tei tama’i atu i te Atua ’e te mau ta’ata nō tōna ra ’ēkālesia.

15 Nō reira, e ha’apurarahia te mau ’āti Iuda i rotopū i te mau nūna’a ato’a ; ’oia ïa, e ha’amou-ato’a-hia Babulonia ; nō reira, e ha’apurarahia te mau ’āti Iuda e te tahi atu mau nūna’a ’ē.

16 ’E i muri a’e i tō rātou ha’apurarara’ahia, ’e tō rātou tā’irira’ahia e te Fatu te Atua nā roto i te mau nūna’a ’ē nō te ārea e rave rahi mau u’i te maoro, ’oia ïa, mai terā u’i i terā u’i, ē tae noa atu i te tau e ti’aturi ai rātou i te Mesia ra, i te Tamaiti a te Atua, ’e i te tāra’ehara hope ’ore nō te mau ta’ata ato’a—’e ’ia tae mai taua mahana ra e ti’aturi rātou i te Mesia, ’e e ha’amori atu ho’i i te Metua nā roto i tōna ra i’oa, ma te ’ā’au mā, ’e te rima vi’ivi’i ’ore, ’e e ’ore ho’i e tīa’i atu ā i te tahi Mesia, ’e i reira, i taua ihora tau, e tae mai ai te mahana e ti’aturi rātou i teie nei mau mea e ti’a ai.

17 ’E e fa’atoro fa’ahou mai te Fatu i tōna rima i te piti o te taime nō te fa’aho’i mai i tōna ra mau ta’ata, mai tō rātou mo’era’a ’e tō rātou hi’ara’a. Nō reira, e nā reira ’oia i te rave i te hō’ē ’ohipa māere ’e te ’ūmere i rotopū i te mau tamari’i a te ta’ata nei.

18 Nō reira, e fa’a’ite atu ’oia i tāna mau parau ia rātou, ’e nā taua mau parau ra e ha’avā ia rātou i te mahana hope’a ra, ’e e hōro’ahia ho’i te reira ia rātou nō te ha’apāpū ia rātou i te Mesia mau ’o tei pāto’ihia e rātou ra ; ’e nō te ha’apāpū ho’i ia rātou ē, ’eiaha rātou e tīa’i fa’ahou nō te hō’ē Mesia ’ia tae mai, nō te mea ’aita atu ā e Mesia e tae mai, maori rā ’o te Mesia ha’avare, ’o tē ha’avare i te ta’ata nei ; hō’ē noa iho ho’i Mesia i parauhia e te mau peropheta, ’e ’o te Mesia ho’i ’oia ’o tē pāto’ihia ’e te mau ’āti Iuda ra.

19 ’E mai te au i te mau parau a te mau peropheta, e tae mai te Mesia i te matahiti e ono hānere i muri a’e i te matahiti i fa’aru’e ai tō’u metua tāne i Ierusalema ; ’e mai te au i te mau parau a te mau peropheta ’e te parau ho’i a te melahi a te Atua, e ma’irihia tōna i’oa ’o Iesu Mesia, te Tamaiti a te Atua.

20 ’E i teienei, e tō’u mau taea’e, ’ua parau pāpū vau ’ia ’ore ’outou ’ia hape. ’E mai te Fatu te Atua e ora ra, tei ’āfa’i mai i tō ’Īserā’ela i rāpae i te fenua nō ’Aiphiti, ’e tei hōro’a mai i te mana ia Mose ’ia fa’aora ’oia i tō te mau nūna’a i hohonihia ’e te mau ’ōphī ta’ero ra, ’ia hi’o tō rātou mata i te ’ōphī tāna i fa’ateitei i mua ia rātou ra, ’e i hōro’a ato’a mai i te mana iāna ’ia tā’iri ’oia i te mato ’e ’ua tahe noa mai ra te pape ra ; ’oia ïa, inaha tē parau atu nei au ia ’outou na, e parau mau teie mau mea, ’e tē ora ra ho’i te Fatu te Atua, ’e ’aita roa atu e i’oa i raro a’e i te ra’i nei e ora ai te ta’ata nei, maori rā ’o Iesu Mesia nei ’o tā’u i parau iho nei.

21 Nō reira, nō te reira ho’i te Fatu te Atua i fafau mai ai iā’u nei ’ia ha’apa’ohia ’e ’ia fa’ahereherehia teie mau mea ’o tā’u e pāpa’i, ’e ’ia tu’uhia ho’i i roto i te rima o tō’u ra hua’ai, mai terā u’i i terā u’i, ’ia tupu te fafaura’a i fafauhia atu ia Iosepha, ’e e ’ore roa tōna hua’ai e mou ’a vai noa ai te fenua nei.

22 Nō reira, e tae teie nei mau mea i terā u’i i terā u’i ’a vai noa ai te fenua nei ; ’e e tu’uhia atu te reira mai te au i te hina’aro ’e te mana’o o te Atua ; ’e te mau nūna’a e fāri’i i te reira, e ha’avāhia rātou mai te au i te mau parau i pāpa’ihia ra.

23 ’E ’ua itoito ho’i tātou i te pāpa’i ’e i te fa’aitoito i tā tātou mau tamari’i ’e tō tātou mau taea’e ato’a ’ia ti’aturi i te Mesia, ’e ’ia fa’a’āfarohia ho’i i te Atua ; ’ua ’ite ho’i tātou ē, nā roto i te maita’i e fa’aorahia ai tātou, hope noa atu ā te mau mea ato’a ’o tē mara’a ia tātou ’ia rave.

24 ’E noa atu ā tō tātou ti’aturi i te Mesia, tē ha’apa’o nei ā ho’i tātou i te ture a Mose, ma te hi’o-māite-ra’a i mua i te Mesia ra, ē tae noa atu i te fa’ati’ara’a i te ture ra.

25 ’E teie ho’i te tumu i hōro’ahia mai ai te ture ; nō reira, ’ua riro ïa te ture ’ei mea pohe ia tātou nei, ’e ’ua fa’aorahia tātou i te Mesia ra nā roto i tō tātou fa’aro’o ; ’āre’a rā nō te mau fa’auera’a, i ha’apa’o ai tātou i te mau ture.

26 ’E tē paraparau nei tātou nō ni’a i te Mesia, tē ’oa’oa nei tātou nō te Mesia, tē a’o nei tātou nō ni’a i te Mesia, tē tohu nei tātou nō ni’a i te Mesia, ’e tē pāpa’i nei ho’i tātou ’ia au i tā tātou mau tohura’a, ’ia ’ite tā tātou mau tamari’i ’o vai tā rātou e hi’o atu nō te ha’amatarara’a i tā rātou ra mau hara.

27 Nō reira, e paraparau tātou nō ni’a i te ture, ’ia ’ite tā tātou mau tamari’i i te pohera’a nō te ture ; ’e ’ia ’ite rātou i te pohera’a nō te ture ra, e hi’o ïa rātou i mua i te ora tei roto i te Mesia ra ; ’e ’ia ’ite ho’i i te mea i hōro’ahia mai ai te ture ra. ’E ’ia fa’ati’ahia te ture i te Mesia ra, e’ita ïa rātou e fa’a’eta’eta i tō rātou ’ā’au iāna ra ; e mea ti’a ïa ’ia fa’a’orehia te ture i reira.

28 ’E i teienei, inaha, e tō’u mau ta’ata, e feiā ’ā’au ’eta’eta ’outou ; nō reira, i parau pāpū atu ai au ia ’outou, ’ia māramarama maita’i ’outou. ’E te mau parau tā’u i parau na, e riro ïa ’ei faa’itera’a pāpū ia ’outou ; ’e ’ua nava’i ho’i te reira nō te ha’api’i atu i te mau ta’ata ato’a i te ’ē’a tia, ’e te ’ē’a ti’a ra, ’o te ti’aturi ïa i te Mesia ma te huna ’ore iāna ; nā roto i te hunara’a iāna, ’ua huna ato’a ïa ’outou i te mau peropheta ’e te ture.

29 ’E i teienei, inaha, tē parau atu nei au ia ’outou na, ’o te ’ē’a ti’a ra, ’o tē ti’aturi ïa i te Mesia, ma te huna ’ore iāna ; ’e ’o te Mesia Tei Mo’a i ’Īserā’ela nei : nō reira, e mea ti’a ia ’outou ia tīpapa i mua iāna ’e ’ia ha’amori atu iāna ma tō ’outou mana ato’a, tō ’outou mana’o ato’a, e tō ’outou pūai ato’a, e tō ’outou vārua ato’a ; ’e mai te mea e nā reira ’outou, e ’ore roa ’outou e hurihia i rāpae.

30 ’’Ē, mai te mea e tia, ’ia ha’apa’o ā ’outou i te ture nō te ravera’a i te mau ’ohipa ’e te mau ’ōro’a a te Atua e ti’a ai, ē tae noa atu i te tau e fa’ati’ahia ai te ture i tu’uhia mai ia Mose ra.