1 Inaha ho’i, tē ’īriti ’ē nei te Fatu, ’oia te Fatu Sabaota, mai roto mai ia Ierusalema, ’e mai roto mai ia Iuda, i te mau tauturura’a nō te ora, te tauturura’a nō te pāne, ’e te tauturura’a nō te pape—

2 Te ta’ata pūai, ’e te ta’ata ’aro, te ha’avā, ’e te peropheta, ’e te ta’ata ’aravihi, ’e te ta’ata ruhiruhiā ;

3 Te ra’atira nō te mau ta’ata e pae ’ahuru, ’e te ta’ata tura, ’e te fa’aa’o, ’e te ’aravihi maita’i, ’e te ta’ata ’orero ’aravihi.

4 E fa’ariro vau i te mau tamari’i ’ei hui ari’i nō rātou, ’e te mau ’aiū ’ei tāvana nō rātou.

5 E hāmani-’ino-hia te mau ta’ata, te tahi i te tahi, te mau ta’ata ato’a nā tōna iho ta’ata tupu ; e fa’ate’ote’o atu te tamari’i iāna i te ta’ata ruhiruhiā, ’e tei ha’eha’a ra i tei tura.

6 ’Ia haru te ta’ata i tōna taea’e, nō te ’utuāfare o tōna ra metua, ’a parau atu ai ē : E ’ahu tō ’oe, ’a haere mai, ’ei fa’atere ’oe i ni’a ia mātou, ’e ’eiaha e vaiiho i teie ’ati ’ia tae mai i raro a’e i tō ’oe mana—

7 ’E i te reira mahana e tapu ai ’oia, i te nā-’ō-ra’a mai ē : ’Eiaha vau ’ia riro ’ei fa’aora i tō ’outou pohe ; ’aita roa e mā’a ’e te ’ahu i roto i tō’u ra fare ; ’eiaha roa vau ’ia fa’arirohia ’ei fa’atere i teie nei mau ta’ata.

8 Tē tūrorirori nei ho’i Ierusalema, ’e tē hi’a nei Iuda ; nō te mea tē pāto’i mai nei tō rātou arero ’e tā rātou mau rāve’a i te Fatu, nō te fa’ao’ō’o atu i te mata nō tōna ra hanahana.

9 Nā te hōho’a o tō rātou mata e fa’a’ite pāpū nei i tō rātou iho hape, ’e tē fa’a’ite ra te reira i tā rātou hara mai ia Sodoma te huru, ’e ’aore roa e ti’a ia rātou ’ia huna i te reira. ’Auē ho’i tō rātou mau vārua ē, nā rātou iho i hōpoi mai i te ’ino i ni’a ia rātou iho !

10 ’A parau atu i te feiā parauti’a e maita’i ïa tō rātou ; e ’amu ho’i rātou i te hotu o tā rātou ra ’ohipa.

11 ’Auē ho’i te feiā parauti’a ’ore ē, e ’ati rahi tō rātou ; e tāho’ohia mai te utu’a a tō rātou rima i ni’a ia rātou !

12 ’E tō’u nei mau ta’ata, e tamari’i te feiā hāmani ’ino ia rātou, ’e nā te mau vahine e fa’atere ia rātou. E tō’u nei mau ta’ata ē, nā te feiā i arata’i ia ’oe i arata’i ’ē atu ia ’oe ’e i ha’amou i te ’ē’a o tō ’oe ra mau haere’a.

13 Tē ti’a nei te Fatu nō te pāruru, ’e tē ti’a nei ’oia nō te ha’avā i te ta’ata.

14 ’E i te ha’avāra’a te Fatu e fārerei ai i te feiā ruhiruhiā o tōna ra mau ta’ata ’e tō rātou mau hui ari’i ; ’e ’ua ’amu-pau-hia e ’outou te ’ō vine, ’e te tao’a haru a te ta’ata ri’iri’i ra, tei roto ïa i tō ’outou mau fare.

15 E aha tenā na ? Tē hāmani ’ino nei ’outou i tō’u ra mau ta’ata, ’e tē oro nei i te mata o te ta’ata ri’iri’i, tē nā reira mai ra te Fatu te Atua Sabaota.

16 ’Oia fa’ahou, tē nā ’ō mai ra te Fatu : Nō te mea ’ua te’ote’o te mau tamāhine o Ziona, ’e ’ua haere ma te fa’ateni i te ’a’ī ra, ’e ma te mata ’apatahi ’ia haere, ’e tē haere ra ma te titotito, ’e ma te ha’amāniania i te mau fa’a’una’una i ni’a i tō rātou ra mau ’āvae—

17 Nō reira e fa’aha’eha’a te Fatu i te upo’o o te mau tamāhine o Ziona ; ’e e fa’a’ite ho’i te Fatu i tō rātou ra mau vāhi huna.

18 ’Ia tae i taua mahana ra, e rave ’ē ai te Fatu i tō rātou mau fa’a’una’una, ’e te mau ’ūpe’a rouru, ’e te mau huira menemene mai te ’āva’e ra ;

19 ’E te mau fifi ’arapo’a, ’e te mau fifi rima, ’e te mau ’ahu pū’āverevere nō te ’a’ī ’e te mata ;

20 ’E te mau tā’ai upo’o ra, ’e te mau fifi ’āvae ra, ’e te mau tā’amu upo’o ra, ’e te mau tao’a fa’ano’ano’a ra ; ’e te mau tāpe’a tari’a ra ;

21 ’E te mau tāpe’a rima ra, ’e te mau fa’a’una’una ihu ra ;

22 Te mau ’ahu fa’a’una’unahia ra, ’e te mau perēue roa, ’e te mau ’ahu tāpo’i upo’o ’e te ’a’ī ra, ’e te mau tao’a fa’anehenehe rouru ;

23 Te mau hi’o ra, ’e te ’ahu paruai maita’i ra ; ’e te mau tāupo’o ’ahu ra, ’e te mau pāruru mata ra.

24 ’E a muri a’era, e monohia te hau’a no’ano’a i te hau’a ’ino ; ’e e monohia te ’ahu tātua-maita’i-hia i te pūveuveu ; ’e e monohia te rouru fa’atororiro ra i te pahure ; ’e e monohia te tātua maita’i ra i te tātua ’ahu ’oto ra ; ’e te’iri pa’apa’a mahana ra ’ei mono i te purotu.

25 E pohe tō ’oe mau ta’ata i te ’o’e ’e tō ’oe mau ta’ata ’aito ra i roto ïa i te ’arora’a.

26 E ’ati tōna mau ’ūputa i te ’oto ’e te autā ; ’e e pārahi ho’i ’oia i raro i te repo ma te ano.