1 Inaha rā, e rave rahi te ta’ata—i taua mahana ’a ha’amata ai au i te fa’atupu i te ’ohipa māere i rotopū ia rātou ra, e ha’amana’o ā vau i tā’u ra mau fafaura’a, ’o tā’u i fafau atu i te mau tamari’i a te ta’ata nei ; ia fa’atoro fa’ahou atu vau i tō’u nei rima, i te piti o te taime nō te fa’aora i tō’u ra feiā, nō te ’utuāfare o ’Īserā’ela ho’i rātou.

2 ’E ’ia ha’amana’o ato’a ho’i au i tā’u mau fafaura’a ia ’oe, e Nephi, ’e i tō ’oe ato’a ra metua tāne, ’o tei nā ’ō mai ē, e ha’amana’o ā vau i tō ’oe ra hua’ai ; ’e nā roto i tō’u nei vaha te mau parau a tō ’oe ra hua’ai i te fa’ataehia atu i tō ’oe ra hua’ai ; ’e e hiohiohia ho’i tā’u mau parau ē tae noa atu i te mau hope’a o te fenua nei, ’ei reva nō tō’u ra mau ta’ata, nō te ’utuāfare o ’Īserā’ela ho’i rātou.

3 ’E nō te mea e hiohiohia atu tā’u mau parau—e parau mai te mau ’Ētene e rave rahi ē : E Bibilia ! E Bibilia ! E Bibilia ho’i tā mātou, ’e ’aita atu ā e Bibilia.

4 ’E tē nā ’ō mai ra ho’i te Fatu te Atua : E te feiā ma’ama’a ē, e Bibilia tā rātou, ’e nō ’ō mai ho’i te reira i te mau ’āti Iuda, i tō’u ra feiā tahito i fafau mai iā’u. E mea nāhea ho’i tā rātou ha’amāuruurura’a i te mau ’āti Iuda nō te Bibilia i roa’a ia rātou nō ’ō mai ia rātou ra ? ’Oia ïa, e aha te mana’o o te mau ’Ētene ra ? ’Ua ha’amana’o ānei rātou i te mau mamae rahi, ’e te mau ’ohipa, ’e te mau māuiui o te mau ’āti Iuda, ’e tō rātou ha’apa’o maita’i iā’u nei, i te fa’ataera’a mai i te fa’aorara’a i te mau ’Ētene ra ?

5 E te mau ’Ētene ē, ’ua ha’amana’o ānei ’outou i tō’u ra feiā tahito i fafau mai iā’u, i te mau ’āti Iuda ? ’Aita roa ïa ; ’ua tuhi rā ’outou ia rātou, ’e ’ua ’ino’ino ia rātou, ’e ’aita ho’i ’outou i ’imi ’ia fa’aora ia rātou. Inaha rā, e fa’aho’i atu vau i taua mau mea ato’a ra i ni’a iho i tō ’outou upo’o ; nō te mea ’aita roa vau ’o te Fatu i ha’amo’e i tō’u ra mau ta’ata.

6 E terā ra ta’ata ma’ama’a ’o tē parau ē : E Bibilia, e Bibilia ho’i tā mātou, ’e ’aita atu ā e Bibilia tā mātou e hina’aro. ’Ua fāri’i ānei ’outou i te Bibilia, maori rā nō ’ō mai i te mau ’āti Iuda ra ?

7 ’Aita ānei ’outou i ’ite ē, e rave rahi te mau nūna’a, e ’ere i te hō’ē ana’e iho ? ’Aita ’outou i ’ite ē, e nā’u, nā te Fatu ra tō ’outou Atua i hāmani i te mau ta’ata ato’a, ’e te ha’amana’o nei ho’i au ia rātou ’o tē pārahi ra i ni’a i te mau motu o te moana ; ’e tē fa’atere nei au i roto i te mau ra’i i ni’a ra, ’e i roto ho’i i te ao i raro nei ; ’e tē fa’atae noa nei ā vau i tā’u parau i te mau tamari’i a te ta’ata nei ; ’oia ïa, i te mau fenua ato’a o te ao nei ?

8 Nō reira, nō te aha ho’i ’outou e amuamu ai, i te mea e roa’a ā ia ’outou tā’u nei parau ? ’Aita ānei ’outou i ’ite ē, ’ua riro te ’itera’a pāpū o nā nūna’a e piti ’ei ’ite nō te fa’a’ite ia ’outou ē, ’o vau nei te Atua, ’e hō’ē ā tō’u ha’amana’ora’a i te tahi nūna’a i te tahi atu ? E nō reira, hō’ē ā te mau parau tā’u e parau i te hō’ē nūna’a i te tahi atu. ’E ’ia fāriu mai nā nūna’a e piti te tahi i te tahi, e fa’ariro-ato’a-hia ho’i te ’itera’a pāpū o nā nūna’a e piti ra ’ei hō’ē.

9 E nā reira vau ’ia ti’a iā’u ’ia fa’a’ite atu i te mau ta’ata e rave rahi ē, hō’ē ā tō’u huru i nanahi ra, i teie nei mahana, ē a muri noa atu ; ’e tē parau atu nei ho’i au i tā’u mau parau mai te au i tō’u iho hina’aro. ’E nō te mea ’ua oti iā’u tē parau atu i te hō’ē parau ra, ’eiaha ’outou e mana’o ē, ’aita e ti’a iā’u ’ia parau atu i te tahi atu ā parau ; ’aita ā ho’i tā’u ’ohipa i oti ; ’e ’aita te reira e oti ē tae noa atu i te hope’a o te ta’ata nei, ’e ’aita ho’i e oti i reira ē a muri noa atu.

10 Nō reira, nō te mea e Bibilia tā ’outou, ’eiaha ’outou e mana’o ē, tei roto i te reira tā’u mau parau ē hope roa a’e ; ’e ’eiaha ato’a ’outou e mana’o ē, ’aita atu ā e mau parau ’o tā’u i fa’aue ’ia pāpa’ihia.

11 ’E tē fa’aue ra ho’i au i te mau ta’ata ato’a i te pae nō te hiti’a o te rā ’e i te pae nō te tō’o’a o te rā, ’e i te pae apato’erau, ’e i te pae apato’a, ’e i te mau motu nō te moana, ’ia pāpa’i rātou i te mau parau tā’u e parau atu ia rātou ; ’e nā roto ho’i i te mau buka e pāpa’ihia ra, e ha’avā ai au i tō te ao nei, te mau ta’ata ato’a ’ia au i tāna ra ’ohipa, mai tei pāpa’ihia ra.

12 Inaha ho’i, e parau atu vau i te mau ’āti Iuda ’e e pāpa’i rātou i te reira ; ’e e parau atu vau i te mau ’āti Nephi ’e e pāpa’i ho’i rātou i te reira ; ’e e parau atu ho’i au i te tahi atu mau ’ōpū nō te ’utuāfare o ’Īserā’ela, ’o tā’u i arata’i ’ē atura, ’e e pāpa’i ho’i rātou i te reira ; ’e e parau atu ho’i au i te mau fenua ato’a o te ao nei, ’e e pāpa’i rātou i te reira.

13 ’E a muri a’era, e roa’a i te mau ’āti Iuda te mau parau nō te mau ’āti Nephi, ’e e roa’a ho’i i te mau ’āti Nephi te mau parau nō te ’āti Iuda ; ’e e roa’a ho’i i te mau ’āti Nephi ’e i te mau ’āti Iuda ato’a te mau parau nō te mau ’ōpū nō ’Īserā’ela i mo’e ra ; ’e e roa’a ho’i i te mau ’ōpū nō ’Īserā’ela i mo’e ra te mau parau nō te mau ’āti Nephi ’e nō te mau ’āti Iuda ho’i.

14 ’E a muri a’era, e ha’aputuputuhia tō’u ra mau ta’ata nō te ’utuāfare o ’Īserā’ela i te fenua ’āi’a nō rātou ra ; ’e e ha’aputuputuhia ho’i tā’u ra parau ’ia riro ’ei hō’ē. ’E e fa’a’ite atu vau i te feiā ’o tē aro mai i tā’u ra parau ’e i tō’u ra mau ta’ata, ’oia ho’i te ’utuāfare o ’Īserā’ela ē, ’o vau nei te Atua, ’e ’ua fafau atu vau ia Aberahama, i te nā-’ō-ra’a atu ē, e ha’amana’o ā vau i tōna hua’ai ē a muri noa atu.