1 ’E i teienei, inaha, e tō’u mau taea’e here, ’ua mana’o vau ē, tē feruri hōhonu nei ’outou i roto i tō ’outou ’ā’au i tā ’outou e rave ’a ha’amata ai ’outou i te haere nā te ’ē’a. Inaha rā, nō te aha ’outou i feruri hōhonu ai i teie mau mea i roto i tō ’outou ’ā’au ?

2 ’Aita ānei ’outou i ha’amana’o i tā’u i parau atu ia ’outou, i te nā-’ō-ra’a atu ē, ’ia fāri’i ’outou i te Vārua Maita’i, e ti’a ia ’outou ’ia parau ma te reo o te mau melahi ? ’E i teienei, nāhea e ti’a ai ia ’outou ’ia parau mai ma te reo o te mau melahi, maori rā nā roto i te Vārua Maita’i ?

3 E paraparau mai te mau melahi nā roto i te mana o te Vārua Maita’i ; nō reira, e paraparau mai rātou i te mau parau a te Mesia. Nō reira, tē parau atu nei au ia ’outou na, ’a rave i te fa’a’amu’a i te mau parau a te Mesia ; inaha ho’i, e fa’a’ite te mau parau a te Mesia ia ’outou i te mau mea tā ’outou e ti’a ’ia rave.

4 Nō reira, i teienei, i parau na vau i teie nei mau parau, ’e mai te mea ē ’aita ’outou i māramarama i te reira, nō te mea ïa ’aita ’outou i ani mai, ’e ’aita ho’i ’outou i pātōtō mai ; nō reira, ’aita ’outou i arata’ihia i roto i te māramarama, ’ia pohe rā ’outou i roto i te pōiri e ti’a ai.

5 Inaha ho’i, tē parau fa’ahou atu nei au ia ’outou na, mai te mea e tomo mai ’outou nā te ’ē’a, ’e e fāri’i ho’i i te Vārua Maita’i, nā te reira e fa’a’ite ia ’outou i te mau mea ato’a tā ’outou e rave.

6 Inaha, ’o teie te mau ha’api’ira’a tumu a te Mesia, ’e ’aita e mau ha’api’ira’a tumu e hōro’a-fa’ahou-hia ē tae noa atu ’ua fa’a’ite mai ’oia iāna iho ia ’outou i roto i te tino nei. ’E ’ia fa’a’ite mai ’oia iāna iho ia ’outou i roto i te tino nei, te mau mea tāna e fa’a’ite ia ’outou ra, ’o tā ’outou ïa e ha’apa’o e ti’a ai.

7 ’E i teienei, ’aita e ti’a iā’u, ia Nephi, ’ia parau fa’arahi atu ā ; ’ua tāpe’a ho’i te Vārua i tā’u parau, ’e ’ua vaiihohia vau ’ia ’oto nō te ti’aturi ’ore, ’e te mau ’ohipa ’ī’ino, ’e te pōiri, ’e te ’ā’au ’eta’eta o te ta’ata nei ; nō te mea ’aita roa rātou e ’imi i te ’ite, ’e ’aita ato’a e tītau ’ia māramarama i te ’ite rahi, ’o tei hōro’ahia mai ia rātou ma te pāpū maita’i, ’oia mau, i te parau pāpū roa.

8 ’E i teienei, e tō’u mau taea’e here, ’ua ’ite au ē tē feruri hōhonu nei ā ’outou i roto i tō ’outou ’ā’au ; ’e tē ’oto nei au i te mea ē, e mea ti’a iā’u ’ia parau atu nō ni’a i teie nei mea. Mai te mea e fa’aro’o ’outou i te Vārua, ’o tē ha’api’i i te ta’ata ’ia pure, e ’ite ïa ’outou i reira ē, e mea ti’a ia ’outou ’ia pure ; ’aita ho’i te vārua ’ino e ha’api’i nei i te ta’ata ’ia pure, tē ha’api’i nei rā te reira iāna ’eiaha e pure.

9 Inaha rā, tē parau atu nei au ia ’outou, e mea ti’a ia ’outou ’ia pure tāmau noa, ’eiaha e ha’aparuparu ; ’eiaha ’outou e rave i te hō’ē mea i te Fatu, maori rā ē ’ia pure ’outou nā mua i te Metua nā roto i te i’oa o te Mesia, ’ia ha’amo’a ’oia i tā ’outou ra ’ohipa ia ’outou na, ’ia riro tā ’outou ra ’ohipa ’ei maita’i nō tō ’outou vārua.