1 ’Oia ïa, tē nā ’ō mai ra te Fatu : ’Ua fa’aātea ānei au ia ’outou, ’e ’aore rā ’ua ti’avaru ānei au ia ’outou ē a muri noa atu ? Tē nā ’ō mai ra ho’i te Fatu : Tei hea te parau ha’apae a tō ’outou metua vahine ? ’Ua tu’u ’ē atu vau ia ’outou ia vai, ’e ’ua ho’o atu vau ia ’outou ia vai i roto i tā’u mau ’amu tārahu ra ? ’Oia ïa, ’ua ho’o atu vau ia ’outou ia vai ? Inaha, nō tā ’outou mau ’ohipa ’ī’ino i ho’o atu ai ’outou ia ’outou iho, ’e nō tā ’outou mau hara i tu’ua-’ē-hia ai tō ’outou metua vahine.

2 Nō reira, iā’u i haere mai ai, ’aore roa ïa e ta’ata ; e iā’u ho’i i pi’i ai, ’oia ïa, ’aore roa ïa e ta’ata nō te pāhono mai. E te ’utuāfare o ’Īserā’ela ē, ’ua ha’apotohia ānei tō’u rima ’e ’aita e ti’a ’ia fa’aora, ’e ’aore rā ’aita ānei tō’u e mana ’ia fa’aora ? Inaha, ’ia ’avau ana’e au ra, ’ua marō ïa te moana iā’u ; e fa’ariro ho’i au i tā rātou mau ’ānāvai pape ’ei mēdēbara ’e tā rātou mau i’a ’ei mea hau’a ’ino nō te mea ’ua marō te mau pape, ’e ’ua pohe atu ra rātou nō te po’ihā.

3 Tē fa’a’ahu nei au i te mau ra’i i te ’ere’ere, ’e tē hāmani nei au i te ’ahu ’oto ’ei tāpo’i nō rātou.

4 ’Ua hōro’a mai te Fatu te Atua i te vaha o te feiā ’ite ra iā’u, ’ia ti’a iā’u ’ia parau atu i te parau au i te taime mau ia ’outou na, e te ’utuāfare o ’Īserā’ela. ’Ia rohirohi ’outou ra, tē fa’aara nei ’oia i terā po’ipo’i, i terā po’ipo’i. Tē fa’aara nei ’oia i tō’u tari’a, ’ia ha’apa’o vau mai te feiā ’ite ra.

5 ’Ua fa’ahāmama te Fatu te Atua i tō’u tari’a, ’e ’aita vau i mārō atu, ’e ’aita ho’i i fāriu ti’a i muri.

6 ’Ua tu’u noa atu vau i tō’u tua i te feiā i tā’iri mai ; ’e tō’u nā pāpāri’a i te feiā i hūhuti i te ’umi’umi. ’Aore ho’i au i huna ’ē atu i tō’u mata i te ha’amā ’e te tūtuhara’a.

7 E tauturu mai ho’i te Fatu te Atua iā’u, nō reira e ’ore roa vau e fa’aha’amāhia. Nō reira, e ha’amau vau i tō’u mata mai te ’ōfa’i ’arā ra, ’e ’ua ’ite ho’i au ē, e ’ore au e ha’amā.

8 E mea fātata mai te Fatu, ’e nāna e fa’ati’a mai iā’u. ’O vai te mārō mai iā’u ? ’A ti’a taua nō te ’aro. ’O vai tō’u nei ’enemi ? ’A ha’afātata mai ’oia iā’u nei, ’e e tā’iri au iāna i te pūai o tō’u ra vaha.

9 Nā te Fatu ho’i te Atua e tauturu mai iā’u. ’E ’o rātou ato’a ’o tē fa’ahapa mai iā’u nei, inaha, e marau rātou mai te ’ahu nei, ’e e pau rātou i te ’amuhia e te huhu.

10 ’O vai ho’i tō rotopū ia ’outou ’o tē mata’u i te Fatu, ’o tē fa’aro’o i te reo o tōna ra tāvini, ’o tē haere noa i roto i te pōiri ’e ’aita e māramarama ?

11 Inaha, ’o ’outou ato’a ’o tei tūtu’i i te auahi, ’e ’ua ha’a’ati ia ’outou iho i te mau pura auahi, ’a haere i roto i te māramarama o tā outou auahi ’e i roto i te mau pura auahi i tūtu’ihia e ’outou na. Teie tē noa’a ia ’outou i tō’u nei rima—e ta’oto ’outou i raro ma te ’oto ra.