1 ’E i muri a’era, i te mau mahana o Ahaza te ari’i nō Iuda, te tamaiti a Iotama, te tamaiti a Uzia, ’ua haere mai ra Resina, te ari’i nō Arama, ’e ’o Peka te ari’i nō ’Īserā’ela, te tamaiti a Remalia, nō te ’aro ia Ierusalema, ’e ’aita rā i pau ia rāua.

2 ’E ’ua fa’a’itehia te ’utuāfare o Davida, i te nā-’ō-ra’a-hia atu ē : ’Ua turuhia Arama ’e Epheraima. ’E ’ua ’āueue ihora te ’ā’au o te ari’i ’e te ’ā’au o tōna ra mau ta’ata, mai te mau tumu rā’au o te vāhi uru rā’au e ’āueue i te mata’i ra.

3 ’E ’ua parau mai ra te Fatu ia Isaia : ’A haere atu i teienei e fārerei ia Ahaza, ’o ’oe ’e tā ’oe tamaiti ra ’o Seare-iasuba, i te hope’a roa o te pape tahe ra o te roto i ni’a, i te arati’a o te ’āua o te tāmā ’ahu ra ;

4 ’E ’a parau atu iāna : ’A ha’apa’o maita’i, ’e ’ia vai hau noa ; ’eiaha e mata’u, ’eiaha ato’a e taiā te ’ā’au i nā aveave o teie nei mau ’ōmo’i e ’ama nei, i te riri rahi o Resina ’e o Arama, ’e tō te tamaiti a Remalia ra.

5 Nō te mea, ’ua ’ōpua Arama, Epheraima, ’e te tamaiti a Remalia, i te mana’o ’ino ia ’oe i te nā-’ō-ra’a ē :

6 E haere tātou i ni’a e rave ia Iuda ’e e a’ua’u atu ; e vāhi mai tātou i te tahi pae nō tātou iho ; ’e e fa’ata’a tātou i te tahi ari’i i rōpū, ’oia ïa, i te tamaiti a Tabeala.

7 Tē nā ’ō mai ra te Fatu te Atua : E ’ore ïa parau e ti’a, ’e e ’ore ho’i e tupu.

8 Nō te mea te upo’o o Arama ’o Damaseko ïa, ’e te upo’o o Damaseko ’o Resina ïa ; e’ita e tae i te toru ta’au ma pae o te matahiti, e ’āmahamaha ai Epheraima, e ’ore atu ra e parauhia e ta’ata.

9 ’E te upo’o o Epheraima ’o Samaria ïa ; ’e te upo’o o Samaria ’o te tamaiti ïa a Remalia. ’Ia ’ore ’outou e ti’aturi, e ’ore ’outou e ha’apāpūhia.

10 ’Oia fa’ahou, ’ua parau mai ra te Fatu ia Ahaza, nā ’ō mai ra :

11 ’A ani ’oe i te tahi tāpa’o i tō ’oe Fatu ra i te Atua ; ’a ani i te reira nō te mau mea hōhonu roa i raro ’e ’aore rā nō te mau mea teitei roa i ni’a roa.

12 ’E ’ua parau atu ra Ahaza : E ’ore au e ani, e ’ore ho’i au e tāmata atu i te Fatu.

13 ’E ’ua parau mai ra ’oia : ’A fa’aro’o mai na ’oe i teie nei, e te ’utuāfare o Davida ; e mea iti ānei ’outou i fa’aha’umani i te ta’ata, e fa’aha’umani ato’a ānei ’outou i tō’u Atua ?

14 Nō reira, nā te Fatu iho e hōro’a i te hō’ē tāpa’o ia ’outou—Inaha, e tō te hō’ē pāretenia, ’e e fānau i te hō’ē tamaiti, e ma’irihia ho’i tōna i’oa ’o Imanuela.

15 E ’amu ’oia i te pata ’e te meli, ’e e ’ite ’oia i te pāto’i i te mea ’ino ’e i te mā’iti i te mea maita’i.

16 Nā mua ho’i teie nei tamaiti e ’ite ai i te pāto’i i te ’ino ’e i te mā’iti i te mea maita’i, e fa’aru’ehia te fenua ’o tā ’oe i fa’aru’e e tōna nā ari’i.

17 E ro’ohia mai ra ’oe e te Fatu, ’e tō ’oe ato’a ra mau ta’ata, ’e te ’utuāfare ato’a o tō ’oe ra metua, i te mau mahana ’aita i ’itea mai, e mai te mahana mai ā i fa’aru’e ai Epheraima ia Iuda, ’oia te ari’i nō Asura ra.

18 ’E a muri a’era, ’ia tae i taua mahana ra e hiohio ai te Fatu i te ra’o, i te tufa’a hope’a roa o ’Aiphiti ra ; ’e i te debure i te fenua ra nō Asura.

19 ’E e haere mai ho’i rātou, ’e e tau rātou ato’a i ni’a i te mau peho i fa’aru’ehia ra, ’e te mau ’āpo’o o te mau mato ra, ’e i ni’a i te mau rā’au tātarāmoa ra, ’e i ni’a i te mau pū ’aihere ato’a ra.

20 ’E i taua ato’a ra mahana e fa’a’ohipa ai te Fatu i te hahu tārahuhia ra, nā roto i te feiā i terā pae mai i te tahera’a pape, ’e nā roto i te ari’i nō Asura, i te upo’o ’e te huruhuru ’āvae ; ’e e ha’apau roa ato’a te reira i te ’umi’umi.

21 ’E a muri a’era, ’ia tae i taua mahana ra, e fa’a’amu te ta’ata i te pua’atoro ’āpī hō’ē roa ’e nā māmoe e piti ra.

22 ’E a muri a’era, nō te rahi o te ū tā rātou e hōro’a mai, e ’amu ā ’oia i te pata ; ’e te ta’ata ato’a tei toe mai i ni’a i te fenua e ’amu ïa rātou i te pata ’e te meli.

23 ’E a muri a’era, ’ia tae i taua mahana ra, te mau vāhi ato’a tei reira hō’ē tauatini vine ’o tē ho’ohia ra i te hō’ē tauatini moni ’ārio, e riro ïa ’ei vāhi nō te mau rā’au taratara ’e nō te mau tātarāmoa.

24 Ma te te’a ’e te fana e haere mai te mau ta’ata ato’a i reira, nō te mea e riro te fenua ato’a ’ei rā’au taratara ’e ’ei tātarāmoa.

25 ’E te mau ’āivi ato’a i ’ūtaruhia i te tapahi repo ra, te vāhi ’aore i mata’uhia ’e te mau rā’au taratara ’e te mau tātarāmoa ra, e riro ïa ’ei haere’a nō te mau pua’atoro, ’e ’ei ta’ata’ahira’a nā te pua’aniho ’e nā te māmoe.