1 Te parau poro’i ia Babulonia, ’o tā Isaia te tamaiti a Amoza i ’ite.

2 ’A fa’ati’a na ’outou i te hō’ē reva i ni’a i te mou’a teitei, ’a fa’ateitei ai i te reo ia rātou, ’a tārape atu ai i te rima, ’ia tomo rātou i roto i te mau ’ūputa o te hui ari’i ra.

3 ’Ua fa’aue au i tō’u mau ta’ata i ha’amo’ahia ra, ’ua pi’i ato’a vau i tō’u mau ta’ata pūai, ’e ’aita ho’i tō’u riri i ni’a ia rātou ’o tei ’oa’oa i tō’u teiteira’a.

4 ’Ua fa’aro’ohia te haruru o te pupu ta’ata i ni’a i te mau mou’a, mai te haruru o te feiā e rave rahi ra, e haruru nane noa nō te mau bāsileia o te mau nūna’a e ha’aputuputu ’āmui ra, nā te Fatu Sabaota e ha’aputuputu ra i te mau nu’u ato’a e ’aro ra.

5 ’Ua haere mai rātou nō te fenua ātea roa mai, mai te hope’a o te ra’i mai, ’oia ïa, ’o te Fatu ’e te mau mauha’a o tōna ra au ’ore rahi, nō te ha’amou i te fenua ato’a nei.

6 ’A ’auē nā ’outou, ’ua fātata mai ho’i te mahana o te Fatu ; e tae mai ho’i te reira ’ei ha’amoura’a nō ’ō mai i te Manahope ra.

7 Nō reira, e paruparu te mau rima ato’a ra, ’e e tarapape ho’i te ’ā’au o te ta’ata ato’a ra.

8 ’E e mata’u rātou ; ’e e ro’ohia rātou i te māuiui ’e te ’oto ; e hi’o rātou te tahi i te tahi ma te māere ; e riro tō rātou mau mata mai te mau auahi ura ra.

9 Inaha, tē fātata mai ra te mahana o te Fatu, mahana ri’ari’a rahi e mahana nō te riri ’ū’ana ’e nō te riri rahi, nō te fa’aano roa i te fenua ; ’e e ha’amou ’oia i te feiā rave hara ato’a i roto.

10 ’E te mau feti’a o te ra’i ra e tōna mau pupu feti’a ato’a, e ’ore ïa e hōro’a mai i tō rātou māramarama ; e ha’apōirihia te mahana i tōna haere’a mai, e ’ore ho’i te ’āva’e e hōro’a mai i tōna māramarama.

11 E fa’autu’a vau i te ao nei nō tōna ’ino, ’e te feiā paieti ’ore nō tā rātou mau ’ohipa ’ī’ino ; e fa’a’ore au i te fa’arahi o te feiā te’ote’o, ’e e tu’u vau i raro i te fa’ateitei o te feiā ha’amata’u ra.

12 E fa’ariro vau i te ta’ata nei ’ei mea tao’a rahi a’e i te ’auro ra ; ’oia ïa, i te ta’ata hō’ē nei ’ei mea tao’a rahi a’e i te hō’ē tāpū ’auro nō Ophira ra.

13 Nō reira, e fa’a’āueue au i te mau ra’i ; ’e e fa’ata’ata’ahia te fenua ’ia ta’a ’ē atu i tōna ra vāhi, nā roto i te riri ’ū’ana o te Fatu Sabaota ra, ’e ’ia tae i te mahana nō tōna riri rahi ra.

14 E riro ho’i te reira mai te zabi a’ua’uhia ra, e mai te māmoe ’aore e ta’ata nō te ha’aputuputu mai ; ’e e ho’i te ta’ata tāta’itahi i tōna ihora mau ta’ata, ’e e horo ho’i te ta’ata ato’a ra i tōna ihora fenua.

15 ’E te ta’ata te’ote’o ato’a e pātia-ha’apohe-hia ïa ; ’oia ïa, ’e te feiā ato’a i ’āmui-ato’a-hia i te feiā parauti’a ’ore ra, e hi’a ana’e ïa i te ’o’e.

16 E tā’iri-fatifati-noa-hia tā rātou mau tamari’i i mua i tō rātou mau mata ; e pau tō rātou mau fare i te haruhia ’e e rave-’ino-hia ho’i tā rātou ra mau vahine.

17 Inaha, e fa’ati’arepu vau i te mau Medai ’ia ’aro atu ia rātou, ’e ’aita ho’i rātou i nounou i te ’ārio ’e te ’auro, ’e ’aore ato’a rātou e au atu i te reira.

18 Nā tā rātou mau fana e tā’iri i te feiā ’āpī tāne ’ia hu’ahu’a ; ’e ’aita roa tō rātou e aroha i tō roto i te ’ōpū ra ; ’e ’aita ho’i tō rātou mau mata e fa’aora noa atu i te mau tamari’i.

19 ’E ’o Babulonia, te hanahana o te mau bāsileia, te nehenehe o te ’una’una rahi o te mau Kaladaio ra, e tupu ho’i i te tau e ha’amou ai te Atua ia Sodoma ’e ia Gomora.

20 E ’ore roa ho’i te reira e ta’ata-fa’ahou-hia ; e ’ore ato’a e pārahihia mai terā u’i i terā u’i : e ’ore ho’i tō Arabia e fa’ati’a i tōna ti’ahapa i reira ; e ’ore ho’i te feiā tīa’i māmoe e ’āua i tā rātou mau ’āua i reira.

21 ’E i reira te mau ’ānimara taehae o te mēdēbara ra e ta’oto ai, e ’ī ho’i tō rātou mau fare i te okima ana’e ; ’e i reira ho’i te fanau’a ione e pārahi ai, ’e i reira te sairima e ’ori ai i tā rātou ’orira’a.

22 E ’aoa noa te mau ’ānimara taehae o te mau motu i roto i tō rātou mau fare ano ra, ’e te mau teni i roto i tō rātou mau vāhi fa’ahiahia ; ’e ’ua fātata tōna tau, e ’ore ho’i tōna pu’e mahana e ha’amaorohia. E ha’amou vave ho’i au iāna ; ’oia ïa, e aroha ho’i au i tō’u ra mau ta’ata, e pohe rā te feiā parauti’a ’ore.