1 E aroha ho’i te Fatu ia Iakoba, e mā’iti fa’ahou ā ’oia ia ’Īserā’ela, e ha’amau ho’i ’oia ia rātou i tō rātou ihora fenua ; e tā’ati ato’a ai ho’i te mau ta’ata ’ē ia rātou, ’e e ’āmui atu ho’i rātou i te ’utuāfare o Iakoba ra.

2 ’E e rave te mau ta’ata ia rātou ’e e ’āfa’i atu ia rātou i tō rātou ra vāhi ; ’oia ïa, mai te ātea roa i te mau hope’a o te fenua ; ’e e ho’i fa’ahou mai rātou i tō rātou ra mau fenua i fafauhia ra. E rave ho’i te ’utuāfare o ’Īserā’ela ia rātou, ’e e riro te fenua o te Fatu nō te mau tāvini tāne ’e nō te mau tāvini vahine ; ’e ’o tei fa’ariro ia rātou ’ei tītī ra, ’o tē riro mai ïa ’ei tītī nā rātou, ’e e mana ho’i rātou i ni’a iho i te feiā i hāmani ’ino mai ia rātou ra.

3 ’E a muri a’era, ’ia tae i taua mahana ra e ha’amāha mai ai te Fatu i tō ’oe ra rohirohi, ’e tō ’oe ra mata’u, ’e tō ’oe ra ’ati i te ’ohipa i tu’uhia mai i ni’a ia ’oe ra.

4 ’E a muri a’era, ’ia tae i taua mahana ra e parau atu ai ’oe i teie nei parabole i te Ari’i o Babulonia, ’a nā ’ō ai ē : E mea nāhea ho’i te hāmani ’ino i ’ore ai ’e te ’oire ’auro i ’ore ai !

5 ’Ua ’ōfati ho’i te Fatu i te rā’au a te feiā parauti’a ’ore ’e te mau sēpeta a te mau tāvana.

6 ’O tei tā’iri i te ta’ata ma te riri ’ū’ana, ma te tā’iri tāmau noa, ’o tei fa’atere i te mau nūna’a ma te riri, ’ua rave-’ino-hia ïa, ’e ’aore roa e ti’a i te hō’ē ’ia fa’a’ore.

7 ’Ua pārahi hau noa tō te fenua ato’a nei ’e ’aore e parau ; ’ua ha’amata mai rātou i te hīmene ma te ’oa’oa.

8 ’Oia ïa, te mau berusi teie e ’oa’oa nei ia ’oe, ’e te mau ’āreti ho’i o Lebanona, i te nā-’ō-ra’a ē : Nō te mea ’ua tu’uhia ’oe i raro i te pohe ra, ’aore ïa e ta’ata tāpū rā’au e tae mai nō te tāpū ia mātou nei.

9 ’O hade i raro ra tei ’ārepurepu iho nei ia ’oe ’ia fārerei mai ia ’oe i te haerera’a atu ; tē fa’aaraara ra ’oia i te feiā i pohe ra, ’e i te feiā rarahi ato’a o te fenua nei ra ; ’e tē fa’ati’atia ana’e ra i te mau ari’i ato’a o te mau nūna’a mai tō rātou mau terōno ra.

10 E parau ato’a mai rātou, ’e ’a nā ’ō mai ai ia ’oe : ’Ua riro ānei ’oe ’ei mea paruparu mai ia mātou nei ? ’Ua fa’ariro-ato’a-hia ānei ’oe mai ia mātou ato’a nei ?

11 ’Ua tu’uhia tō te’ote’o i raro i te mēnema ; ’e ’aita te haruru nō tā ’oe mau nabala i fa’aro’ohia ; ’ua riro ho’i te to’e ’ei vauvau nō ’oe, ’e ’ua tāpo’ihia ’oe e te mau to’e.

12 E mea nāhea ho’i tō ’oe ma’irira’a mai te ra’i mai, e Lucifero, te tamaiti nō te po’ipo’i ! ’Ua tāpūhia ānei ’oe i raro i te repo, ’o tei ha’aparuparu i te mau nūna’a nei !

13 ’E i parau na ’oe i roto i tō ’ā’au ē : E haere au i ni’a roa i te ra’i ra, e fa’ateitei au i tō’u terōno i ni’a a’e i te mau feti’a o te Atua ra ; e pārahi ato’a ho’i au i ni’a i te mou’a ’āmuira’a ra, i te mau pae i ’apato’erau ra ;

14 E haere au i ni’a roa i te teiteira’a o te mau ata ra ; e riro ho’i au mai Tei Teitei Roa ra.

15 E hōpoi-roa-hia rā ’oe i raro roa i hade ra, i te hiti roa o te ’āpo’o ra.

16 Te feiā e ’ite ia ’oe ra, e riro i te ti’atonu māite ia ’oe, ’e e feruri rātou ia ’oe, ’a parau ai ē : ’O te ta’ata ānei teie i fa’arurutaina i te fenua nei, ’e i fa’āueue ato’a i te mau bāsileia ra ?

17 ’E i fa’ariro i te ao nei mai te mēdēbara, ’e i ha’amou i te mau ’oire ato’a ; ’e ’aore i tātara i te fare o tōna ra feiā mau ’āuri ?

18 Tē tārava ra te mau ari’i ato’a nō te mau nūna’a ma tō rātou hanahana, ’oia ïa, ’o rātou ato’a, te ta’ata tāta’itahi i roto i tō rātou iho ra fare.

19 ’Ua hūa’ihia rā ’oe i rāpae i tō ’oe ra mēnema mai te ’āma’a i ha’avi’ivi’ihia ra, ’e mai te toe’a ’o tei taparahihia, ’e ’ua pātiahia i te ’o’e ra ; i tei reva i raro i te mau ’ōfa’i o te ’āpo’o ra ; mai te pera i ta’ata’ahihia e te ’āvae ra.

20 E ’ore ’oe e ’āmui-ato’a-hia ia rātou i te tanura’a ra, nō te mea ’ua ha’amou ’oe i tō ’oe fenua ’e ’ua taparahi i tō ’oe ra mau ta’ata ; e ’ore roa te hua’ai o te feiā rave ’ohipa ’ino ra e ha’amaita’ihia.

21 ’A fa’aineine i te taparahi i tāna mau tamari’i nō te mau ’ohipa ’ī’ino a tō rātou mau metua, ’ia ’ore rātou ’ia mana fa’ahou, ’e ’ia ’ore ho’i ’ia fatu i te fenua, ’e ’ia ’ore ho’i ’ia fa’a’ī i te fenua ato’a nei i te mau ’oire.

22 E ’aro atu vau ia rātou, tē nā reira mai ra ho’i te Fatu Sabaota, ’e e tāpū ’ē atu vau i te i’oa i Babulonia nei, ’e te toe’a, ’e te tamaiti, ’e te tamaiti nā taua tamaiti ra, tē nā reira mai ra te Fatu Sabaota ra.

23 E fa’ariro ho’i au i te reira ’ei pārahira’a nō te kephoda, e riro ho’i ’ei pape hōpuna ana’e ; ’e e purūmu vau i te reira i te purūmu nō te pohe, tē nā reira mai ra te Fatu Sabaota ra.

24 ’Ua tapu ho’i te Fatu Sabaota ra, i te nā-’ō-ra’a ē : ’O tā’u mau i feruri ra, e tupu ïa ; ’e ’o tā’u i ’ōpua ra e tupu ato’a ïa—

25 E hōpoi mai au i te ’āti Asura i tō’u nei fenua, ’e i ni’a i tō’u mau mou’a e ta’ata’ahi ai au iāna i raro a’e i tō’u ra ’āvae ; ’e i reira e pe’e ’ē atu ai tāna zugo mai ia rātou ra, ’e tāna hōpoi’a i tō rātou ra mau tapono.

26 ’O teie te ’ōpuara’a i ’ōpuahia nō te fenua ato’a nei ; ’e ’o teie ho’i te rima i fa’atorohia i ni’a i te mau nūna’a ato’a nei.

27 ’Ua ’ōpua ho’i te Fatu Sabaota ra, ’e nā vai ïa e fa’a’ore ? ’E ’ua fa’atorohia ho’i tōna ra rima, ’e nā vai ho’i ïa e fa’aho’i mai ?

28 I te matahiti i pohe ai te ari’i ra ’o Ahaza i tu’uhia mai ai teie nei parau poro’i.

29 ’Eiaha ’oe e ’oa’oa, e tō Parleysetina pā’āto’a, nō te mea ’ua fati te rā’au i papa’ihia ai ’oe ra ; e mea nā roto mai ho’i i te u’i o te ’ōphī ra e tupu mai ai te zepho, ’e tōna fanau’a e riro ïa ’ei ’ōphī ma’ue mai te auahi ra.

30 E ’amu ho’i te matahiapo o te feiā ri’iri’i ra, ’e e ta’oto ho’i te feiā veve ma te fifi ’ore ; ’e e ha’apohe au i tō ’oe ra tumu i te o’e ; ’e e taparahi ’oia i tō ’oe ra toe’a.

31 ’A ’auē, e te mau ’ūputa ē ; ’a ’oto, e te ’oire ē ; ’auē ho’i ’oe e Parleysetina tā’āto’a ē, ’ua tarapape roa ; e au auahi tei pe’e mai mai te pae ’apato’erau ra ; ’e ’aore roa te hō’ē i roto i tāna ra nu’u e vai ’ōtahi noa i te mau taime i fa’ata’ahia.

32 E aha ïa te pāhonora’a tā te mau ve’a nō te mau nūna’a nei e hōro’a atu ? ’Ua fa’ati’ahia Ziona e te Fatu, ’e te feiā ri’iri’i o tōna ra nūna’a e ti’aturi ïa rātou i te reira.