1 ’E i muri a’era, ’ua parau mai ra te melahi iā’u : ’A hi’o na, ’a hi’o na i tō ’oe hua’ai, ’e i te hua’ai ato’a o tō ’oe nā tua’ana. ’E ’ua hi’o atu ra vau ’e ’ua ’ite atu ra i te fenua i fafauhia ra ; ’e ’ua ’ite ho’i au i te mau pupu ta’ata, ’oia ïa, mai te one tahatai rātou i te rahi ’ia tai’ohia.

2 ’E i muri a’era, ’ua hi’o atu ra vau i te mau pupu ta’ata i ha’aputuputu ’āmui nō te ’aro te tahi i te tahi ; ’e ’ua ’ite atu vau i te mau tama’i, ’e te mau parau tama’i, ’e te mau ta’ata e rave rahi i pohe i te ’o’e i rotopū i tō’u ra mau ta’ata.

3 ’E i muri a’era, ’ua ’ite atu ra vau i te mau u’i e rave rahi i ma’iri, ’a vai noa ai te mau tama’i ’e te mau mārōra’a i ni’a i te fenua ; ’e ’ua ’ite atu ra vau i te mau ’oire e rave rahi, ’oia ïa, ’aore i ti’a iā’u ’ia tai’o i te reira.

4 ’E i muri a’era, ’ua ’ite atu ra vau i te hō’ē māhu pōiri i ni’a iho i te fenua i fafauhia ra ; ’e ’ua ’ite atu vau i te mau uira, ’e ’ua fa’aro’o vau i te mau pātiri, ’e te mau ’āueuera’a fenua, ’e te mau huru haruru pūai ato’a ra ; ’e ’ua ’ite atu vau i te fenua ’e te mau mato, ’e ’ua ’amaha rātou ; ’e ’ua ’ite atu vau i te mau mou’a i te ma’irira’a mai ē hu’ahu’a roa ihora ; ’e ’ua ’ite atu vau i te mau fenua pāpū o te ao nei, ’e ’ua ’āmahamaha te reira ; ’e ’ua ’ite atu vau i te mau ’oire e rave rahi, ’e ’ua horomi’ihia rātou, ’e ’ua ’ite atu vau e rave rahi tei pa’apa’a i te auahi ; ’e ’ua ’ite atu vau e rave rahi tei ma’iri i ni’a i te fenua, nō te ’āueuera’a o te fenua.

5 ’E i muri a’era, i muri iho i tō’u ’itera’a i teie mau mea, ’ua ’ite atu ra vau i te māhu pōiri, ’e ’ua pe’e ’ē atu ra te reira mai ni’a atu i te fenua nei ; ’e inaha, ’ua ’ite atu ra vau i te mau pupu ta’ata ’o tei ’ore i ha’amouhia nō te mau ha’avāra’a rahi ’e te ri’ari’a a te Fatu ra.

6 ’E ’ua ’ite atu ra vau i te mau ra’i i te vēteara’a, ’e ’ua pou mai ra te ’Ārenio a te Atua mai ni’a mai i te ra’i, ’e ’ua pou mai ra ’oia i raro ’e ’ua fa’a’ite mai ra iāna iho ia rātou.

7 ’E ’ua ’ite ato’a vau ’e tē fa’a’ite pāpū atu nei ho’i au ē, ’ua tae mai te Vārua Maita’i i ni’a iho i te tahi atu ā mau ta’ata hō’ē ’ahuru ’e ma piti ; ’e ’ua fa’atōro’ahia rātou e te Atua, ’e ’ua mā’itihia.

8 ’E ’ua parau mai ra te melahi iā’u, nā ’ō mai ra : ’A hi’o na i te mau pipi hō’ē ’ahuru ’e ma piti a te ’Ārenio ’o tei mā’itihia nō te aupuru i tō ’oe ra hua’ai.

9 ’E ’ua parau mai ra ’oia iā’u : Tē ha’amana’o ra ānei ’oe i te tino hō’ē ’ahuru ’e ma piti ’āpōsetolo a te ’Ārenio ? Inaha, ’o rātou ïa tē ha’avā i nā ’ōpū tino hō’ē ’ahuru ’e ma piti nō ’Īserā’ela ; nō reira, e ha’avāhia nā ’orometua hō’ē ’ahuru ’e ma piti nō tō ’oe hua’ai e rātou ra ; nō te mea nō te ’utuāfare o ’Īserā’ela ’outou.

10 ’E nā teie tino hō’ē ’ahuru ’e ma piti ’orometua tā ’oe e hi’o na, e ha’avā i tō ’oe ra hua’ai. ’’E, inaha, e mea parauti’a rātou ē a muri noa atu ; nō tō rātou fa’aro’o i te ’Ārenio a te Atua e teatea ai tō rātou mau ’ahu i tōna ra toto.

11 ’E ’ua parau mai ra te melahi iā’u : ’A hi’o na ! ’E ’ua hi’o atu ra vau, ’e ’ua ’ite atu ra vau i te mau u’i e toru i pohe i roto i te parauti’a ; ’e ’ua teatea tō rātou mau ’ahu mai tō te ’Ārenio a te Atua ra. ’E ’ua parau mai ra te melahi iā’u : ’Ua teatea tō rātou mau ’ahu i te toto o te ’Ārenio nō tō rātou ra fa’aro’o iāna.

12 ’E ’ua ’ite ato’a vau, ’o Nephi, i te mau ta’ata e rave rahi nō te u’i maha i pohe i roto i te parauti’a.

13 ’E i muri a’era, ’ua ’ite atu ra vau i te mau pupu ta’ata o te fenua nei i te ha’aputuputu-’āmui-ra’a.

14 ’E ’ua parau mai ra te melahi iā’u : ’A hi’o na i tō ’oe hua’ai, ’e i te hua’ai ato’a o tō ’oe na mau tua’ana.

15 ’E i muri a’era, ’ua hi’o atu ra vau ’e ’ua ’ite atu ra i te mau ta’ata o tō’u ra hua’ai ’o tei ha’aputuputu ’āmui ’ei mau pupu ta’ata nō te ’aro atu i te hua’ai o tō’u ra mau tua’ana ; ’e ’ua ha’aputuputu ’āmui rātou nō te ’aro.

16 ’E ’ua parau mai ra te melahi iā’u, nā ’ō mai ra : ’A hi’o na i te pape piha’a vi’ivi’i tā tō ’oe metua tāne i hi’o ; ’oia ïa, i te ’ānāvai tāna i parau mai ra ; ’e te mau hōhonura’a nō te reira ra, ’o te mau hōhonura’a ïa nō hade.

17 ’E te mau māhu pōiri ra, ’o te mau fa’ahemara’a ïa a te diabolo, ’o tei ha’apōiri i te mata ’e tei fa’a’eta’eta ho’i i te ’ā’au o te mau tamari’i a te ta’ata nei ; ’e tei arata’i ’ē atu ia rātou i roto i te mau ’ē’a ’ā’ano, ’ia pohe rātou ’e ’ia mo’e roa atu.

18 ’E te fare rahi ’e te ’ā’ano tā tō ’oe metua tāne i hi’o ra, ’o te mau mana’o faufa’a ’ore ïa ’e te te’ote’o o te mau tamari’i a te ta’ata nei. ’E ’ua fa’ata’a-’ē-hia rātou e te hō’ē ārea rahi ’e te ri’ari’a ra ; ’oia ïa, te parau nō te parauti’a a te Atua mure ’ore, ’e te Mesia ho’i, ’oia te ’Ārenio a te Atua, ’o tā te Vārua Maita’i e fa’a’ite pāpū mai, mai te ha’amatara’a mai ā o teie nei ao ē tae roa mai i teienei, ’e mai teienei atu, ē a muri noa atu.

19 ’E ’a parau ai te melahi i teie nei mau parau, ’ua hi’o atu ra vau ’e ’ua ’ite atu ra i te hua’ai o tō’u ra nā tua’ana, ’e tē ’aro ra rātou i tō’u hua’ai, mai te au i te parau a te melahi ; ’e nō te te’ote’o o tō’u ra hua’ai ’e te mau fa’ahemara’a a te diabolo, ’ua ’ite au ē ’ua ha’avīhia te mau ta’ata o tō’u ra hua’ai e te hua’ai o tō’u ra nā tua’ana.

20 ’E i muri a’era, ’ua hi’o atu ra vau, ’e ’ua ’ite atu ra vau i te mau ta’ata nō te hua’ai o tō’u ra nā tua’ana, ’e ’ua ha’avī rātou i tō’u ra hua’ai ; ’e ’ua haere noa rātou ’ei mau pupu ta’ata nā ni’a i te fenua nei.

21 ’E ’ua ’ite atu vau ia rātou i te ha’aputuputu-’āmui-ra’a i roto i te mau pupu ta’ata ; ’e ’ua ’ite atu vau i te mau tama’i ’e te mau parau tama’i i rotopū ia rātou ; ’e ’ua ’ite atu vau i te mau tau e rave rahi i te ma’irira’a ’a vai noa ai te mau tama’i ’e te mau parau tama’i.

22 ’E ’ua parau mai ra te melahi iā’u : Inaha, e paruparu tō rātou fa’aro’o.

23 ’E i muri a’era, ’ua ’ite au ē i muri iho i te paruparura’a tō rātou fa’aro’o, ’ua riro rātou ’ei feiā huru ’ere’ere ’e te peu hā’iri’iri, ’e ’ei feiā vi’ivi’i, ’o tei ’ī i te fa’atau ’e te mau huru ’ohipa vi’ivi’i ato’a.