1 ’E i teienei ’ua hina’aro vau ’ia ’ite ’outou ē, ’ia fa’aoti a’era tō’u metua tāne, ’o Lehi, i te tohu nō ni’a i tōna hua’ai, i muri a’era ’ua parau fa’ahou mai ra te Fatu iāna, nā ’ō mai ra, e ’ere i te mea ti’a iāna, ’ia Lehi, ’ia ’āfa’i atu i tōna ana’e iho ’utuāfare i roto i te mēdēbara ; e mea ti’a rā i tāna mau tamari’i tamāroa ’ia rave i te mau tamāhine ’ei vahine nā rātou, ’ia ti’a ia rātou ’ia fa’atupu i te hua’ai nō te Fatu i te fenua i fafauhia ra.

2 ’E i muri a’era, ’ua fa’aue mai ra te Fatu iāna, ’ia ho’i fa’ahou atu vau, ’o Nephi, ’e tō’u mau tua’ana i te fenua ra nō Ierusalema, ’e ’ia arata’i mai ia Isema’ela ’e tōna ’utuāfare i te mēdēbara.

3 ’E i muri a’era, ’ua haere fa’ahou atu ra vau, ’o Nephi, ’e tō’u mau tua’ana i roto i te mēdēbara, e haere atu ra ho’i i ni’a, i Ierusalema.

4 ’E i muri a’era, ’ua haere atu ra mātou i ni’a, i te fare o Isema’ela, ’e ’ua fāri’i maita’i mai Isema’ela ia mātou, ’e nō reira ’ua parau atu ra mātou i te mau parau a te Fatu iāna ra.

5 ’E i muri a’era, ’ua tāmarū ihora te Fatu i te ’ā’au o Isema’ela ’e tō tōna ’utuāfare ato’a, ’e nō reira ’ua haere mai rātou nā muri ia mātou i raro i roto i te mēdēbara i te ti’ahapa o tō mātou ra metua tāne.

6 ’E i muri a’era, ’a tere atu ai mātou i roto i te mēdēbara, inaha, ’ua mārō mai ra Lamana rāua ’o Lemuela, ’e e to’opiti nō te mau tamāhine a Isema’ela, ’e nā tamari’i tamāroa to’opiti a Isema’ela ’e tō rātou mau ’utuāfare ia mātou ; ’oia ïa, iā’u, ia Nephi, ’e ia Samu, ’e i tō rātou metua tāne, ia Isema’ela, ’e i tāna vahine, ’e i tāna atu ā mau tamāhine e to’otoru ra.

7 ’E i muri a’era, i roto i taua mārōra’a ra, ’ua hina’aro rātou ’ia ho’i atu i te fenua ra nō Ierusalema.

8 ’E i teienei, nō te ’eta’eta o tō rātou ’ā’au i ’oto ai au, ’o Nephi, ’e i parau atu ai ho’i au ia rāua, ’oia ïa, ia Lamana rāua ’o Lemuela, i te nā-’ō-ra’a ē : Inaha, e nā tua’ana ’ōrua nō’u, ’e nō te aha ho’i i ’eta’eta ai tō ’ōrua ’ā’au, ’e i pōiri ai tō ’ōrua mana’o, ’e nō reira i tītauhia ai iā’u, tō ’ōrua teina, ’ia paraparau atu ia ’ōrua, ’oia ïa, ’e ’ia riro ho’i ’ei hi’ora’a nō ’ōrua ?

9 Nō te aha ho’i ’ōrua i ’ore ai i fa’aro’o i te parau a te Fatu ?

10 Nō te aha ho’i i mo’e ai ia ’ōrua ē ’ua ’ite na ’ōrua i te hō’ē melahi a te Fatu ?

11 ’Oia ïa, nō te aha ho’i i mo’e ai ia ’ōrua te mau mea rahi tā te Fatu i rave nō tātou, i te fa’aorara’a ia tātou mai roto mai i te rima o Labana, ’e ’ia noa’a ho’i ia tātou te pāpa’a parau ?

12 ’Oia ïa, nō te aha ho’i i mo’e ai ia ’ōrua ē, e ti’a i te Fatu ’ia rave i te mau mea ato’a, mai te au i tōna hina’aro, nō te mau tamari’i a te ta’ata nei, mai te mea e fa’a’ohipa rātou i te fa’aro’o iāna ? Nō reira, ’a ha’apa’o tātou i tōna hina’aro.

13 ’E mai te mea e ha’apa’o maita’i tātou i tōna hina’aro, e noa’a ia tātou te fenua i fafauhia ra ; ’e tē vai ra te tau e ’ite ai ’ōrua ē, e fa’atupuhia te parau a te Fatu nō te ha’amoura’a o Ierusalema ; nō te mea e tupu te mau mea ato’a tā te Fatu i parau nō ni’a i te ha’amoura’a o Ierusalema.

14 Inaha ho’i, e fa’aea vave te Vārua o te Fatu i te mārō ia rātou ; inaha ho’i, ’ua pāto’i rātou i te mau peropheta, ’e ’ua tu’u ho’i rātou ia Ieremia i roto i te fare tāpe’ara’a. ’E ’ua tītau ho’i rātou ’ia taparahi i tō’u metua tāne, ’e nō reira ho’i ’ua ti’avaru ’ē atu rātou iāna i rāpae i te fenua.

15 I teienei, inaha, tē parau atu nei au ia ’ōrua, mai te mea e ho’i atu ’ōrua i Ierusalema, e pohe ato’a ïa ’ōrua i pīha’i iho ia rātou. ’E i teienei, mai te mea ē ’ua hina’aro ’ōrua, ’a ho’i i ni’a, i te fenua, ’e ’a ha’amana’o i te mau parau tā’u e parau atu ia ’ōrua na, mai te mea e haere ’ōrua, e pohe ato’a ïa ’ōrua ; ’e teie ho’i tā te Vārua o te Fatu i fa’aue mai iā’u ’ia parau atu ia ’ōrua.

16 ’E i muri a’era, i te paraura’a atu vau, ’o Nephi, i teie nei mau parau i tō’u ra nā tua’ana, ’ua riri ihora rāua iā’u. ’E i muri a’era, ’ua fa’atae mai rāua i tō rāua rima i ni’a iā’u, inaha ho’i, ’ua riri roa rāua, ’e ’ua ru’uru’u ihora rāua iā’u i te taura, ’e ’ua hina’aro ho’i rāua ’ia rave ’ē atu i tō’u ora, ’e ’ia vaiiho iā’u i roto i te mēdēbara ’ia ’amuhia e te mau ’ānimara taehae ra.

17 ’E i muri a’era, ’ua pure atu ra vau i te Fatu, nā ’ō atu ra : E te Fatu ē, mai te au i tō’u fa’aro’o ia ’oe na, ’a fa’aora mai na iā’u i te rima o tō’u nā tua’ana ; ’oia ïa, ’a hōro’a mai na i te pūai iā’u ’ia ti’a iā’u ’ia tātara i teie nei mau taura i ru’uru’uhia ai au nei ra.

18 ’E i muri a’era, i muri iho i tō’u paraura’a atu i teie nei mau parau, inaha, ’ua matara ihora te mau taura i tō’u nā rima ’e tō’u nā ’āvae ho’i, ’e ’ua ti’a a’era vau i mua i tō’u nā tua’ana, ’e ’ua parau fa’ahou atu ra vau ia rāua.

19 ’E i muri a’era, ’ua riri fa’ahou ihora rāua iā’u, ’e ’ua hina’aro a’era rāua ’ia fa’atae mai i tō rāua rima i ni’a iā’u ; inaha rā, ’ua tāparu mai ra te hō’ē o te mau tamāhine a Isema’ela, ’oia ïa, ’e tōna metua vahine ato’a, ’e te hō’ē o te mau tamari’i tamāroa a Isema’ela, i tō’u nā tua’ana, ’e nō reira ho’i ’ua tāmarū rātou i tō rāua ’ā’au ; ’e ’ua fa’aea rāua i te tāmata i te rave ’ē atu i tō’u ora.

20 ’E i muri a’era, ’ua ’oto ihora rāua, nō tā rāua mau ’ohipa parauti’a ’ore, ’e nō reira ho’i ’ua tāhopu ihora rāua i mua iā’u, ’e ’ua ani mai ra rāua iā’u ’ia fa’a’ore au i te mea tā rāua i rave i ni’a iā’u.

21 ’E i muri a’era, ’ua fa’a’ore mau vau i te mau mea ato’a tā rāua i rave, ’e ’ua a’o atu vau ia rāua ’ia pure i te Fatu tō rāua ra Atua, ’ia fa’a’ore i te reira. ’E i muri a’era, ’ua nā reira rāua. ’E i muri iho i tō rāua fa’aotira’a i tā rāua pure i te Fatu, ’ua tere fa’ahou atu ra mātou i te ti’ahapa o tō mātou ra metua tāne.

22 ’E i muri a’era, ’ua tae atu ra mātou i raro, i te ti’ahapa o tō mātou ra metua tāne. ’E ’ia tae atu vau, ’e tō’u mau tua’ana, ’e te ’utuāfare pā’āto’a o Isema’ela i raro, i te ti’ahapa o tō’u ra metua tāne, ’ua ha’amāuruuru atu ra rātou i te Fatu tō rātou Atua ; ’e ’ua pūpū atu ra rātou i te tusia ’e te mau tusia tāauahi iāna ra.