1 ’E i muri a’era, ’ua haere fa’ahou atu ra mātou i tō mātou tere i roto i te mēdēbara ; ’e ’ua rātere atu mātou i te pae i te hiti’a o te rā mai taua taime ra. ’E ’ua rātere ’e ’ua haere mātou nā roto i te mau ’ati e rave rahi i roto i te mēdēbara ; ’e ’ua fānau tā mātou mau vahine i te tamari’i i roto i te mēdēbara.

2 ’E ’ua rahi roa te mau ha’amaita’ira’a a te Fatu i ni’a ia mātou, nō reira ’a ’amu noa ai mātou i te pua’a ota i te mēdēbara ra, ’ua rahi roa te ū a tā mātou mau vahine nā tā rātou mau tamari’i, ’oia ïa, ’e ’ua itoito ho’i rātou mai te tāne te huru ; ’e ’ua haere rātou i tō rātou tere ma te amuamu ’ore.

3 ’E nō reira tē ’ite nei tātou ē, ’ia tupu te mau fa’auera’a a te Atua e ti’a ai. ’E mai te mea e ha’apa’o te mau tamari’i a te ta’ata nei i te mau fa’auera’a a te Atua, e fa’a’amu ïa ’oia ia rātou, e fa’aitoito ia rātou, ’e e fa’atupu ho’i ’oia i te rāve’a e ti’a ai ia rātou ’ia rave i te mea tāna i fa’aue mai ia rātou ; nō reira, ’ua hōro’a mai ’oia i te rāve’a nō mātou ’a tere ai mātou i roto i te mēdēbara ra.

4 ’E ’ua tere mātou nō te ārea e rave rahi matahiti te maoro, ’oia ïa, e va’u matahiti i roto i te mēdēbara.

5 ’E ’ua tae atu ra mātou i te fenua i parauhia ’o ’Auhune, nō te rahi o tōna hotu ’e te meli ’ōviri ; ’e ’ua fa’aineinehia taua mau mea ato’a ra e te Fatu ’ia ’ore mātou ’ia pohe. ’E ’ua ’ite atu mātou i te miti tā mātou i ma’iri i te i’oa o Ireanetuma, te aura’a, ’oia ho’i, te mau pape e rave rahi.

6 ’E i muri a’era, ’ua fa’ati’a ihora mātou i tō mātou mau ti’ahapa i te pae tahatai ; ’e noa atu ’ua fāri’i mātou i te mau ’ati e rave rahi ’e te pe’ape’a rahi, ’oia ïa, noa atu ’aore e ti’a ia mātou ’ia pāpa’i i te tā’āto’ara’a o te mau mea ato’a, ’ua ’oa’oa rahi mātou ’ia tae atu mātou i te pae tahatai ; ’e ’ua ma’iri ihora mātou i te i’oa o taua fenua ra ’o ’Auhune, nō te rahi o tōna ra hotu.

7 ’E i muri a’era, ’ia ma’iri te ārea e rave rahi mahana te maoro i tō’u, ’o Nephi, pārahira’a i te fenua nō ’Auhune, ’ua tae mai ra te reo o te Fatu iā’u, nā ’ō mai ra : ’A ti’a i ni’a, ’e ’a haere i ni’a i te mou’a. ’E i muri a’era, ’ua ti’a a’era vau i ni’a, ’e ’ua haere atu ra i ni’a i te mou’a, ’e ’ua ti’aoro atu ra i te Fatu.

8 ’E i muri a’era, ’ua parau mai ra te Fatu iā’u, nā ’ō mai ra : E hāmani ’oe i te hō’ē pahī ’ia au i te hōho’a ’o tā’u e fa’a’ite atu ia ’oe na, ’ia ti’a iā’u ’ia fa’auta atu i tō ’oe ra mau ta’ata i terā pae mai i teie nei mau pape.

9 ’E ’ua parau atu ra vau : E te Fatu, e haere au i hea ’ia roa’a mai iā’u te ’ōfa’i metalo nō te fa’atahe, ’ia ti’a iā’u ’ia hāmani i te mau mauha’a nō te hāmani i te pahī mai te au i te hōho’a tā ’oe i fa’a’ite mai iā’u ?

10 ’E i muri a’era, ’ua fa’a’ite mai ra te Fatu iā’u i te vāhi tā’u e haere nō te ’imi i te ’ōfa’i metalo, ’ia ti’a iā’u ’ia fa’atō i te mau mauha’a.

11 ’E i muri a’era, ’ua hāmani ihora vau, ’o Nephi, i te puhipuhi mata’i nō roto mai i te mau ’iri ’ānimara, nō te ha’apūai i te auahi ; ’e i muri iho i tō’u hāmanira’a i te puhipuhi mata’i nō te puhipuhi i te auahi, ’ua tūpa’i ihora vau i nā ’ōfa’i e piti te tahi i te tahi, nō te fa’a’ama i te auahi.

12 ’Aore ho’i te Fatu i fa’ati’a ia mātou ’ia fa’a’ama rahi i te auahi i te mātāmua ’a haere ai mātou nā roto i te mēdēbara ; nō te mea i parau mai ’oia ē : E ha’amonamona vau i tā ’outou mā’a, ’ia ’ore ’outou ’ia tunu i te reira.

13 ’E e riro ato’a vau ’ei māramarama nō ’outou i roto i te mēdēbara ra ; ’e e fa’aineine au i te ’ē’a i mua ia ’outou, mai te mea e ha’apa’o ’outou i tā’u mau fa’auera’a ; nō reira, mai te mea e ha’apa’o ’outou i tā’u mau fa’auera’a, e arata’ihia ’outou i te fenua i fafauhia ra ; ’e e ite ho’i ’outou ē, nā’u ’outou i arata’i.

14 ’Oia ïa, ’e ’ua parau ato’a mai ra te Fatu ē : ’Ia tae atu ’outou i te fenua i fafauhia ra, e ite ’outou ē, ’o vau nei, ’o te Fatu, ’o te Atua ïa ; ’e nā’u, nā te Fatu, ’outou i fa’aora i te pohe ; ’e nā’u ho’i ’outou i arata’i mai mai te fenua nō Ierusalema mai.

15 Nō reira, ’ua tāmata noa ihora vau, ’o Nephi, i te ha’apa’o i te mau fa’auera’a a te Fatu, ’e ’ua a’o atu ho’i au i tō’u nā tua’ana ’ia ha’apa’o maita’i ’e ’ia fa’aitoito noa.

16 ’E i muri a’era, ’ua hāmani ihora vau i te mau mauha’a nō roto mai i te ’ōfa’i metalo ’o tā’u i fa’atahe nō roto i te mato ra.

17 ’E ’ia ’ite mai ra tō’u nā tua’ana ē, ’ua fātata vau i te hāmani i te pahī, ’ua ha’amata ihora rāua i te amuamu mai iā’u, i te nā-’ō-ra’a ē : E ta’ata ma’ama’a tō taua teina, nō te mea ’ua mana’o ’oia ē, e ti’a iāna ’ia hāmani i te pahī ; ’oia ïa, ’ua mana’o ato’a ’oia ē, e tae atu ’oia i terā pae mai i teie nei mau pape rahi.

18 ’Ua nā reira tō’u nā tua’ana i te amuamu mai iā’u, ’e ’aore ho’i rāua i hina’aro ’ia rave i te ’ohipa, nō te mea ’ua mana’o rāua ē, ’aita e ti’a iā’u i te hāmani i te pahī ; ’e ’aita ato’a rāua i ti’aturi ē ’ua ha’api’ihia mai au e te Fatu.

19 ’E i teienei, i muri a’era, ’ua ’oto rahi ihora vau, ’o Nephi, nō te ’eta’eta o tō rāua ’ā’au ; ’e i teienei ’ia ’ite mai rāua ē ’ua ha’amata vau i te ’oto, ’ua ’oa’oa ihora tō rāua ’ā’au, ’e ’ua ’oa’oa ihora rāua iā’u, i te nā-’ō-ra’a ē : ’Ua ’ite māua ē, ’aore roa e ti’a ia ’oe ’ia hāmani i te pahī, nō te mea ’ua ’ite māua i tō ’oe pa’ari ’ore, nō reira, ’aita roa e ti’a ia ’oe ’ia rave i te hō’ē ’ohipa rahi mai te reira.

20 ’E mai tō tātou metua tāne ho’i tō ’oe huru i te arata’ira’ahia e te mau mana’o ma’ama’a o tōna ra ’ā’au, ’oia ïa, ’ua arata’i mai ’oia ia tātou i rāpae i te fenua nō Ierusalema, ’e ’ua haere noa tātou nā roto i te mēdēbara nō teie mau matahiti e rave rahi ; ’e ’ua ’ohipa rahi noa tā tātou mau vahine ’a fātata ai rātou i te fānau ; ’e ’ua fānau ho’i rātou i te tamari’i i roto i te mēdēbara ’e ’ua fāri’i i te mau ’ati rahi ’e ’aita ho’i rātou i pohe ; ’e e mea maita’i a’e paha ’āhiri rātou i pohe atu ’a pārahi ai rātou i Ierusalema, i te ro’ohia i teie nei mau ’ati.

21 Inaha, i roto i teie mau matahiti e rave rahi ’ua fāri’i tātou i te ’ati i roto i te mēdēbara, ’e i taua taime ra ’ua ti’a roa ho’i ia tātou ’ia ’oa’oa i tā tātou mau tao’a ’e i te fenua o tō tātou ra ’āi’a ; ’oia ïa, ’e ’ua ’oa’oa ho’i tātou i reira.

22 ’E ’ua ’ite ho’i māua ē, e feiā parauti’a te feiā i pārahi i te fenua nō Ierusalema ; nō te mea ’ua ha’apa’o rātou i te mau ture ’e te mau parau a te Fatu, ’e tāna mau fa’auera’a ato’a, mai te au i te ture a Mose ra ; nō reira, ’ua ’ite māua ē, e feiā parauti’a rātou ; ’e ’ua ha’avā rā tō tātou metua tāne ia rātou, ’e ’ua arata’i mai ’oia ia tātou i’ō nei, nō te mea e fa’aro’o tātou i tāna ra mau parau ; ’oia ïa, e mai iāna ato’a ho’i tō taua teina. ’Ua nā reira tō’u ra nā tua’ana i te amuamu ’e te ’ōhumu mai ia māua ra.

23 ’E i muri a’era, ’ua parau atu ra vau, ’o Nephi, ’ia rāua, nā ’ō atu ra : Tē ti’aturi ra ānei ’ōrua ē, ’ua arata’ihia mai tō tātou mau metua, ’oia ho’i te mau tamari’i nō ’Īserā’ela, mai te rima mai o te mau ’Aiphiti, ’āhiri ’aita rātou i ha’apa’o i te mau parau a te Fatu ?

24 ’Oia ïa, tē mana’o ra ānei ’ōrua ē, ’ua arata’ihia rātou mai roto mai i te fa’atītīra’a, ’āhiri ’aita te Fatu i fa’aue mai ia Mose ’ia arata’i mai ia rātou i rāpae i te fa’atītīra’a ?

25 I teienei ’ua ’ite ’ōrua ē, tei roto te mau tamari’i o ’Īserā’ela i te fa’atītīra’a ; ’e ’ua ’ite ho’i ’ōrua ē, ’ua fa’arave-rahi-hia rātou i te ’ohipa, i te mau ’ohipa teiaha roa ’ia rave ; nō reira, ’ua ’ite ’ōrua ē, e mea ti’a roa ia rātou ’ia arata’ihia mai i rāpae i te fa’atītīra’a.

26 I teienei, ’ua ’ite ’ōrua ē ’ua fa’auehia Mose e te Fatu ’ia rave i taua ’ohipa rahi ra ; ’e ’ua ’ite ho’i ’ōrua ē, nā tāna parau i fa’ata’a ’ē i te mau pape nō te miti ’Ute’ute i terā pae ’e i terā pae, ’e ’ua haere mai ra rātou nā ni’a i te fenua marō ra.

27 ’Āre’a rā ’ua ’ite ’ōrua ē, ’ua paremo tō ’Aiphiti, ’oia ho’i te mau nu’u fa’ehau o Phara’o, i roto i te miti ’Ute’ute.

28 ’E ’ua ’ite ato’a ’ōrua ē, ’ua fa’a’amuhia rātou i te māna i roto i te mēdēbara.

29 ’Oia ïa, ’ua ’ite ato’a ’ōrua ē, nā te parau a Mose, ’o tei au i te mana o te Atua i roto iāna ra, ’ua tā’iri ’oia i te mato, ’e ’ua tahe noa mai ra te pape ’ia ti’a i te mau tamari’i nō ’Īserā’ela ’ia ha’amāha i tō rātou po’ihā.

30 ’E noa atu ā te arata’ihia ra rātou, ’e tei mua ia rātou te Fatu tō rātou Atua, ’e tō rātou Tāra’ehara, i te arata’ira’a ia rātou i te ao, ’e i te ha’amāramaramara’a mai ia rātou i te ru’i, ’e i te ravera’a i te mau mea ato’a nō rātou, ’o tē ti’a i te ta’ata ’ia fāri’i, ’ua fa’a’eta’eta noa rātou i tō rātou mau ’ā’au, ’e ’ua ha’apōiri ho’i i tō rātou mau mana’o, ’e ’ua fa’a’ino rātou ia Mose ’e i te Atua parau mau ’e te ora.

31 ’E i muri a’era, mai tāna i parau ra ’ua ha’amou a’era ’oia ia rātou ; ’e mai tāna i parau ra, ’ua arata’i ’oia ia rātou ; ’e mai tāna ho’i i parau ra, ’ua rave ’oia i te mau mea ato’a nō rātou ra ; ’e ’aita ho’i te hō’ē mea i ravehia maori rā nā roto i tāna ra parau.

32 ’E ’ia tae a’era rātou i terā pae mai i te ’ānāvai Ioridana, ’ua fa’ariro ihora ’oia ia rātou ’ei feiā pūai i te ti’avarura’a atu i te mau tamari’i o te fenua i rāpae’au ra, ’oia ïa, i te ha’apurarara’a ia rātou nō te ha’amoura’a.

33 ’E i teienei, tē mana’o ra ānei ’ōrua ē, e feiā parauti’a te mau tamari’i o teie nei fenua, ’o tei pārahi i te fenua i fafauhia ra, ’e tei ti’avaruhia ho’i e tō tātou ra mau metua ; tē mana’o ra ānei ’ōrua ē, e mea parauti’a rātou ? Inaha, tē parau atu nei au ia ’ōrua, ’Aita roa.

34 Tē mana’o ra ānei ’ōrua ē, e hau atu te maita’i o tō tātou mau metua i tō rātou ’āhiri e feiā parauti’a rātou ? Tē parau atu nei au ia ’ōrua, ’Aita roa.

35 Inaha, hō’ē ā huru tō te Fatu hi’ora’a i te mau ta’ata ato’a ; ’e tei parauti’a ra, ’o tā te Atua ïa e here roa atu. Inaha rā, ’ua pāto’i teie feiā i te mau parau ato’a a te Atua, ’e ’ua ’ī rātou i te mau ’ohipa ’ī’ino ; ’e tei ni’a ho’i ia rātou te ’īra’a o te riri ’ū’ana o te Atua ; ’e ’ua ’anatema ihora te Fatu i te fenua nō rātou, ’e ’ua ha’amaita’i ihora i te reira nō tō tātou mau metua ; ’oia ïa, ’ua ’anatema ’oia i te reira nō rātou ’ia ha’amouhia rātou, ’e ’ua ha’amaita’i ho’i i te reira nō tō tātou mau metua ’ia roa’a ia rātou te mana i ni’a i te reira.

36 Inaha, ’ua hāmani te Fatu i te fenua ’ia ta’atahia ; ’e ’ua hāmani ho’i ’oia i tāna mau tamari’i ’ia ti’a ia rātou ’ia fāri’i i te reira.

37 ’E tē fa’atupu nei ’oia i te nūna’a parauti’a, ’e tē ha’amou nei i te mau nūna’a o te feiā parauti’a ’ore.

38 ’E tē arata’i nei ’oia i te feiā parauti’a i te mau fenua maitata’i roa, ’e tē ha’amou noa nei ’oia i te feiā parauti’a ’ore, ’e tē ’anatema nei ho’i ’oia i te fenua nō rātou nō tā rātou hape.

39 Tē fa’atere nei ’oia i ni’a roa i roto i te mau ra’i, nō te mea, ’o tōna ïa terōno, ’e teie nei ao, ’o tōna ïa ta’ahira’a ’āvae.

40 ’E tē here nei ’oia i te mau ta’ata ’o tei hina’aro iāna ’ei Atua nō rātou. Inaha, ’ua here ’oia i tō tātou mau metua, ’e ’ua fafau atu ’oia ia rātou, ’oia ïa, ia Aberahama, ’e ia Isaaka, ’e ia Iakoba ; ’e ’ua ha’amana’o ho’i ’oia i tāna ra mau fafaura’a ia rātou ; nō reira, ’ua ’āfa’i mai ’oia ia rātou i rāpae i te fenua nō ’’Aiphiti.

41 ’E ’ua papa’i ’oia ia rātou i roto i te mēdēbara i tāna ra rā’au ; nō te mea ’ua fa’a’eta’eta rātou i tō rātou ’ā’au, mai ia ’ōrua ato’a na ; ’e ’ua papa’i te Fatu ia rātou nō tā rātou ra mau ’ohipa ’ī’ino. ’Ua tu’u mai ’oia i te ’ōphī auahi pererau i rotopū ia rātou ; ’e ’ia hohonihia a’era rātou, ’ua fa’aineine ihora ’oia i te rāve’a ’ia fa’aorahia rātou ; ’e te ’ohipa i tītauhia ia rātou ’ia rave, ’o tē hi’o noa ïa ; ’e nō te ’ohipa ’ore o te rāve’a, ’e ’aore rā nō te ’ōhie o te reira, e rave rahi tei pohe.

42 ’E ’ua fa’a’eta’eta rātou i tō rātou ’ā’au i terā taime ’e i terā taime, ’e ’ua fa’a’ino atu rātou ia Mose, ’e i te Atua ato’a ho’i ; ’āre’a rā ’ua ’ite ’ōrua ē, ’ua arata’ihia rātou e tōna mana fāito ’ore i te fenua i fafauhia ra.

43 ’E i teienei, i muri a’e i taua mau mea ato’a ra, ’ua tae mai te tau i riro ai rātou ’ei feiā parauti’a ’ore, ’oia ïa, ’e ’ua fātata rātou i te ’ino roa ; ’e ’aore au i ’ite, ’ua fātata rā rātou i teie mahana i te ha’amouhia ; ’e ’ua ’ite rā vau ē, e tae mai te mahana e ha’amouhia ai rātou ra e ti’a ai, maori rā te tahi pae iti ana’e, ’o tē arata’ihia i roto i te fa’atītīra’a.

44 Nō reira, ’ua fa’aue mai te Fatu i tō’u ra metua tāne ’ia haere atu i te mēdēbara ; ’e ’ua tītau ato’a te mau ’āti Iuda ’ia taparahi iāna ; ’oia ïa, ’ua tītau ato’a ho’i ’ōrua ’ia taparahi iāna ; nō reira, e taparahi ta’ata ’ōrua i roto i tō ’ōrua ’ā’au, e mai ia rātou ato’a ho’i ’ōrua.

45 ’Ua ’oi’oi ’ōrua i te rave i te mau ’ohipa ’ī’ino, ’e ’ua tāere rā i te ha’amana’o i te Fatu i tō ’ōrua Atua. ’Ua ’ite ’ōrua i te hō’ē melahi, ’e ’ua paraparau mai ’oia ia ’ōrua, ’oia ïa, ’ua fa’aro’o ’ōrua i tōna reo i terā taime ’e i terā taime ; ’e ’ua paraparau mai ho’i ’oia ia ’ōrua nā roto i te hō’ē reo iti ha’iha’i, ’aore rā tō ’ōrua fa’aro’o e ti’a ai i tō ’ōrua ’ā’au ’ia putapū i tāna mau parau ; nō reira, ’ua paraparau mai ’oia ia ’ōrua mai te reo o te pātiri, ’e ’ua fa’a’āueue te reira i te fenua mai te mea ra ē, e ’āfāfā.

46 ’E ’ua ’ite ato’a ’ōrua ē, nā roto i te mana o tāna ra parau mana hope, e ti’a iāna ’ia ha’amou i te fenua nei ; ’oia ïa, ’ua ’ite ato’a ’ōrua ē, nā roto i tāna ra parau e ti’a iāna ia ha’amānina i te mau vāhi pu’upu’u, ’e ’ia ha’apararī i te mau vāhi mānina. E teienei, e aha te mea i ’eta’eta ai tō ’ōrua ’ā’au ?

47 Inaha, ’ua ’oto roa tō’u nei vārua i te māuiui rahi ia ’ōrua, ’e ’ua mamae tō’u ’ā’au ; tē mata’u nei au ’o te fa’aru’ehia ’ōrua ē a muri noa atu. Inaha, ’ua ’ī roa vau i te Vārua o te Atua, ’e nō reira ’ua ’ore roa tō’u pūai i te tino nei.

48 ’E i teienei, i muri a’era, ’ia oti ihora iā’u te parau i taua mau parau ra, ’ua riri roa mai ra rāua iā’u, ’e ’ua hina’aro rāua i te huri iā’u i roto i te moana hōhonu ra ; ’e i tō rāua haerera’a mai nō te haru iā’u, ’ua parau atu ra vau ia rāua, nā ’ō atu ra : nā roto i te i’oa o te Atua Manahope, tē fa’aue atu nei au ia ’ōrua ’eiaha roa ’ōrua e tāpe’a mai iā’u nei, nō te mea ’ua ’ī au i te mana o te Atua, ’e ’ua ’ama roa tō’u nei tino ; ’e ’o ’oia ’o tē fa’atae mai i tōna rima i ni’a iā’u nei, e ’ōriorio ïa ’oia mai te ’ā’eho e ’ōriorio ra ; ’e e ’ore roa ïa tōna pūai i mua i te mana o te Atua, ’e e tā’iri ho’i te Atua iāna.

49 ’E i muri a’era, ’ua parau atu ra vau, ’o Nephi, ’ia rāua ē, ’eiaha roa rāua e amuamu fa’ahou i tō rāua metua tāne ; ’e ’eiaha ho’i rāua e fa’aea i te tauturu mai iā’u nei, nō te mea ’ua fa’aue mai te Atua iā’u ’ia hāmani i te pahī.

50 ’E ’ua parau atu ra vau ia rāua : ’Āhiri e fa’aue mai te Atua iā’u ’ia rave i te mau mea ato’a, e ti’a ïa iā’u ’ia rave i te reira. ’E ’āhiri e fa’aue mai ’oia iā’u ’ia parau atu i teie nei pape ’ia riro ’ei fenua, ’ua riro iho ā ïa ’ei fenua ; ’e ’āhiri e parau vau i te reira, e tupu iho ā ïa.

51 ’E i teienei, mai te mea e mana rahi tō te Fatu mai te reira te huru, ’e ’ua rave ho’i ’oia i te mau semeio e rave rahi i rotopū i te tamari’i a te ta’ata nei, e aha ïa te mea ’aita e ti’a iāna ’ia ha’api’i mai iā’u, ’ia ti’a iā’u ’ia hāmani i te pahī ?

52 ’E i muri a’era, e rave rahi te mau mea ta’u, tā Nephi, i parau atu i tō’u ra nā tua’ana, ’e nō reira ’ua ha’amāmūhia ihora rāua, ’e ’aore atu ra i ti’a ia rāua ’ia mārō mai iā’u ; ’e ’aore ato’a e ti’a ’ia fa’atae mai i tō rāua rima i ni’a iā’u ’e ’aore rā ’ia tāpe’a mai iā’u i tō rāua mau manimani rima, ’oia mau, nō te ārea e rave rahi mahana te maoro. I teienei, ’aita roa rāua i hina’aro ’ia nā reira, ’o te ’ōriorio rāua i mua iā’u, nō te pūai o te Vārua o te Atua ; ’e nō reira ’ua nā-reira-hia rāua.

53 ’E i muri a’era, ’ua parau mai ra te Fatu iā’u : ’A fa’atoro fa’ahou atu na i tō rima i ni’a i tō ’oe ra nā tua’ana, ’e ’aita rāua e ’ōriorio i mua ia ’oe, e fa’a’āueue rā vau ia rāua, tē nā reira mai ra te Fatu, ’e e nā reira vau ’ia ’ite rāua ē, ’o vau nei ho’i te Fatu tō rāua ra Atua.

54 ’E i muri a’era, ’ua fa’atoro atu ra vau i tō’u rima i ni’a i tō’u ra nā tua’ana, ’e ’aita rāua i ’ōriorio i mua iā’u ; ’ua fa’a’āueue rā te Fatu ia rāua mai te au i te parau tāna i parau mai ra.

55 ’E i teienei, ’ua nā ’ō mai ra rāua : ’Ua ’ite pāpū māua ē, tei pīha’i iho te Fatu ia ’oe na, nō te mea ’ua ’ite māua ē, ’o te mana o te Atua tei fa’a’āueue mai ia māua. ’E ’ua tīpapa ihora rāua i raro i mua iā’u, ’e ’ua fātata roa i te ha’amori mai iā’u, ’āre’a rā ’aita vau i fa’ati’a ia rāua, ma te parau atu ē : ’O vau nei tō ’ōrua taea’e, ’oia ïa, tō ’ōrua teina ; nō reira, ’a ha’amori i te Fatu i tō ’ōrua Atua, ’e ’a fa’atura ho’i i tō ’ōrua metua tāne ’e tō ’ōrua metua vahine, ’ia ha’amaorohia tō ’ōrua pu’e mahana i ni’a i te fenua nei ’o tā te Fatu ra tā tō ’ōrua Atua e hōro’a mai nō ’ōrua.