1 ’E i muri a’era, ’ua parau mai ra te melahi iā’u, nā ’ō mai ra : ’A hi’o na ! ’E ’ua hi’o atu ra vau ’e ’ua ’ite atu ra vau i te mau nūna’a ’e te mau bāsileia e rave rahi.

2 ’E ’ua parau mai ra te melahi iā’u : E aha tā ’oe e ’ite ra ? ’E ’ua parau atu ra vau : Tē ’ite ra vau i te mau nūna’a ’e te mau bāsileia e rave rahi.

3 ’E ’ua parau mai ra ’oia iā’u : Teie ïa te mau nūna’a ’e te mau bāsileia o te mau ’Ētene.

4 ’E i muri a’era, ’ua ’ite atu ra vau i te fa’ati’ara’ahia o te hō’ē ’ēkālesia rahi i rotopū i te mau nūna’a o te mau ’Ētene ra.

5 ’E ’ua parau mai ra te melahi iā’u : ’A hi’o na i te fa’ati’ara’ahia o te hō’ē ’ēkālesia vi’ivi’i roa i te tahi atu mau ’ēkālesia ato’a, ’o tē taparahi i te feiā mo’a o te Atua, ’oia ïa, tē ha’amāmae ia rātou ’e tē ru’uru’u ia rātou i raro, ’e tē fa’azugo ia rātou i te hō’ē zugo ’āuri, ’e tē arata’i ia rātou i raro i roto i te fa’atītīra’a.

6 ’E i muri a’era, ’ua ’ite atu ra vau i teie ’ēkālesia rahi ’e te vi’ivi’i ; ’e ’ua ’ite atu vau i te diabolo, ’o ’oia ho’i te fa’atere nō te reira.

7 ’E ’ua ’ite ato’a atu ra vau i te ’auro, ’e te ’ārio, ’e te mau tirita, ’e te mau ’ahu ’ute’ute, ’e te ’ahu paruai maita’i roa, ’e te mau huru ’ahu maitata’i ato’a ; ’e ’ua ’ite ato’a atu vau i te mau vahine tai’ata e rave rahi.

8 ’E ’ua parau mai ra te melahi iā’u, nā ’ō mai ra : ’A hi’o na i te ’auro, ’e te ’ārio, ’e te mau tirita, ’e te mau ’ahu ’ute’ute, ’e te ’ahu paruai maita’i roa, ’e te mau ’ahu maitata’i ato’a, ’e te mau vahine tai’ata, ’o te mau hina’aro ïa teie o taua ’ēkālesia rahi ’e te vi’ivi’i.

9 ’E nō te ha’apoupoura’a ato’a a tō te ao nei, e ha’amou ai rātou i te feiā mo’a o te Atua, ’e e arata’i ai ia rātou i raro i roto i te fa’atītīra’a.

10 ’E i muri a’era, ’ua hi’o atu ra vau ’e ’ua ’ite atu ra i te mau pape e rave rahi ; ’e ’ua fa’ata’a ’ē atu te reira i te mau ’Ētene ’e te hua’ai o tō’u ra nā tua’ana.

11 ’E i muri a’era, ’ua parau mai ra te melahi iā’u : ’A hi’o na tei ni’a te riri ’ū’ana o te Atua i te hua’ai o tō ’oe ra nā tua’ana.

12 ’E ’ua hi’o atu ra vau ’e ’ua ’ite atu ra i te hō’ē ta’ata i rotopū i te mau ’Ētene, ’e ’ua fa’ata’a-’ē-hia ’oia i te hua’ai o tō’u ra nā tua’ana ’e te mau pape e rave rahi ra ; ’e ’ua ’ite atu ra vau i te Vārua o te Atua i te poura’a mai i raro ’e te fa’aurura’a i taua ta’ata ra ; ’e ’ua haere atu ra ’oia nā ni’a i te mau pape e rave rahi, ’e tae atu ra i te hua’ai o tō’u ra nā tua’ana i te fenua i fafauhia ra.

13 ’E i muri a’era, ’ua ’ite atu ra vau i te Vārua o te Atua i te fa’aurura’a i te tahi atu mau ’Ētene ; ’e ’ua haere atu rātou mai roto atu i te fa’atītīra’a, nā ni’a i te mau pape e rave rahi ra.

14 ’E i muri a’era, ’ua ’ite atu ra vau i te mau pupu ta’ata e rave rahi o te mau ’Ētene i ni’a i te fenua i fafauhia ra ; ’e ’ua ’ite atu ra vau i te riri ’ū’ana o te Atua, ’e tei ni’a iho te reira i te hua’ai o tō’u ra nā tua’ana ; ’e ’ua ha’apurarahia rātou nā mua i te mau ’Ētene ’e ’ua tā’irihia.

15 ’E ’ua ’ite atu ra vau i te Vārua o te Fatu i ni’a iho i te mau ’Ētene, ’e ’ua manuia rātou ’e ’ua noa’a ia rātou te fenua ’ei ’āi’a nō rātou ; ’e ’ua ’ite atu ra vau ē e mea ’uo’uo rātou, ’e te purotu rahi ’e te nehenehe ho’i, mai tō’u iho mau ta’ata nā mua a’e i tō rātou ra taparahira’ahia.

16 ’E i muri a’era, ’ua ’ite atu ra vau, ’o Nephi, i te mau ’Ētene ’o tei haere atu mai roto atu i te fa’atītīra’a, ’e ’ua fa’aha’eha’a rātou ia rātou iho i mua i te Fatu ; ’e tei ni’a ia rātou te mana o te Fatu.

17 ’E ’ua ’ite atu ra vau ē, ’ua ha’aputuputu ’āmui tō rātou metua vahine nō te mau ’Ētene i ni’a i te mau pape, ’e i ni’a ato’a i te fenua nō te ’aro ia rātou.

18 ’E ’ua ’ite atu ra vau ē tei ni’a ia rātou te mana o te Atua, ’e tei ni’a ato’a ho’i te riri ’ū’ana o te Atua ia rātou ato’a ’o tei ha’aputuputu ’āmui nō te ’aro atu ia rātou.

19 ’E ’ua ’ite atu vau, ’o Nephi ē, te mau ’Ētene i haere atu mai roto atu i te fa’atītīra’a ra, ’ua fa’aorahia ïa rātou e te mana o te Atua i te rima o te mau nūna’a ato’a.

20 ’E i muri a’era, ’ua ’ite atu ra vau, ’o Nephi ē, ’ua manuia rātou i ni’a i te fenua ; ’e ’ua ’ite atu vau i te hō’ē buka, ’e ’ua hōpoi-noa-hia te reira i rotopū ia rātou.

21 ’E ’ua parau mai ra te melahi iā’u : ’Ua ’ite ānei ’oe i te aura’a nō taua buka ra ?

22 ’E ’ua parau atu ra vau iāna : ’Aita vau i ’ite.

23 ’E ’ua parau mai ra ’oia : ’A hi’o na, tē tae mai nei te reira mai roto mai i te vaha o te ’āti Iuda. ’E ’ua ’ite atu vau, ’o Nephi, i te reira ; ’e ’ua parau mai ra ’oia iā’u : Te buka tā ’oe e hi’o nei, ’o te pāpa’a parau ïa o te mau ’āti Iuda, tei roto i te reira te mau fafaura’a a te Fatu, ’o tāna i parau i te ’utuāfare o ’Īserā’ela ; ’e tei roto ato’a i te reira te mau tohura’a e rave rahi a te mau peropheta mo’a ; ’e e pāpa’a parau ïa mai tei ’ō’otihia i ni’a i te mau ’api veo ra, ’e e’ita ho’i i te mea rahi roa ; ’āre’a rā tei roto i te reira te mau fafaura’a a te Fatu, ’o tāna i fafau atu i te ’utuāfare o ’Īserā’ela ; nō reira, e mea faufa’a rahi roa te reira nō te mau ’Ētene.

24 ’E ’ua parau mai ra te melahi a te Fatu iā’u : ’Ua ’ite ’oe ē i tae mai taua buka ra mai roto mai i te vaha o te ’āti Iuda ; ’e ’ia tae mai te reira mai roto mai i te vaha o te ’āti Iuda ra, tei roto ïa i te reira te ’īra’a nō te ’evanelia a te Fatu, ’o tā te mau ’āpōsetolo tino hō’ē ’ahuru ’e ma piti i fa’a’ite pāpū mai ; ’e ’ua fa’a’ite pāpū mai te reira mai te au i te parau mau i roto i te ’Ārenio a te Atua.

25 Nō reira, e tae mai teie mau mea mai te mau ’āti Iuda mai i te mau ’Ētene ma te vi’ivi’i ’ore, mai te au i te parau mau i roto i te Atua.

26 ’E ’ia tae mai te reira mai roto mai i te rima o te mau ’āti Iuda i te mau ’Ētene, nā roto mai i te rima o te mau ’āpōsetolo tino hō’ē ’ahuru ’e ma piti a te ’Ārenio, e ’ite atu ’oe i te fa’ati’ara’ahia o te hō’ē ’ēkālesia rahi ’e te vi’ivi’i ; ’e ’ua hau tōna vi’ivi’i i tō te mau ’ēkālesia ato’a ; inaha ho’i, ’ua ’īriti ’ē atu rātou i te mau tufa’a pāpū ’e te faufa’a rahi e rave rahi nō roto mai i te ’evanelia a te ’Ārenio ; ’e ’ua ’īriti ’ē ato’a atu ho’i rātou i te mau fafaura’a e rave rahi a te Fatu.

27 ’E ’ua rave rātou i teie mau mea ato’a ’ia ti’a ia rātou ’ia ha’api’o i te mau ’ē’a ti’a o te Fatu ; ’e ’ia ti’a ia rātou ’ia ha’amatapō ’e ’ia fa’a’eta’eta i te ’ā’au o te mau tamari’i a te ta’ata.

28 Nō reira, e ’ite ’oe ē ’ia tae taua buka ra i roto i te rima o taua ’ēkālesia rahi ’e te vi’ivi’i ra, ’ua ’īriti-’ē-hia atu te mau mea pāpū ’e te faufa’a e rave rahi nō roto mai i taua buka ra ; ’o teie ïa te buka a te ’Ārenio a te Atua.

29 ’E i muri iho i te ’īriti-’ē-ra’a-hia atu teie mau mea pāpū ’e te faufa’a rahi, ’ua tae atu ra taua buka ra i te mau nūna’a ato’a o te mau ’Ētene ; ’e i muri iho i tōna taera’a atu i te mau nūna’a ato’a o te mau ’Ētene, ’oia ïa, i terā pae mai i te mau pape e rave rahi tā ’oe i hi’o na ē tei te mau ’Ētene ra ho’i te reira ’o tei haere atu mai roto atu i te fa’atītīra’a ra ; ’ua ’ite atu ’oe ē—no te mau mea pāpū ’e te faufa’a rahi e rave rahi tei ’īriti-’ē-hia atu nō roto mai i taua buka ra, ’o tei riro ’ei mea pāpū i te māramarama i te mau tamari’i a te ta’ata nei, mai te au i te pāpūra’a tei roto i te ’Ārenio a te Atua—nō teie mau mea i ’īriti-’ē-hia atu nō roto mai i te ’evanelia a te ’Ārenio ra, i turori ai te mau ta’ata e rave rahi, ’oia ïa, ’e nō reira ho’i ’ua noa’a te mana rahi ia Sātane i ni’a ia rātou.

30 ’Āre’a rā, tē ’ite ra ’oe ē, te mau ’Ētene i haere atu mai roto atu i te fa’atītīra’a, ’e ’o tei fa’ateiteihia i ni’a e te mana o te Atua i ni’a a’e i te tahi atu mau nūna’a ato’a i ni’a i te fenua ’e tei hau tōna maita’i i tō te mau fenua ato’a ra, ’o te fenua ïa tā te Fatu te Atua i fafau atu i tō ’oe metua tāne, i te nā-’ō-ra’a ē, e noa’a i tōna hua’ai teie fenua ’ei ’āi’a nō rātou ; nō reira, tē ’ite ra ’oe ē, e ’ore roa te Fatu te Atua e fa’ati’a ’ia ha’amou te mau ’Ētene i tō ’oe hua’ai ’o tei ’āno’ihia, ’e ’o tē pārahi nei i rotopū i tō ’oe ra nā tua’ana.

31 E ’ore ato’a ’oia e fa’ati’a ’ia ha’amou te mau ’Ētene i te hua’ai o tō ’oe nā tua’ana.

32 E ’ore ato’a te Fatu te Atua e fa’ati’a ’ia pārahi noa te mau ’Ētene i roto i taua huru matapō rahi ra, ’o tā ’oe e ’ite nei ia rātou, nō te mau tufa’a pāpū ’e te faufa’a rahi o te ’evanelia a te ’Ārenio ’o tei hunahia e taua ’ēkālesia vi’ivi’i ra, ’ua ’ite ho’i ’oe i tōna fa’ati’ara’ahia.

33 Nō reira, tē parau mai ra te ’Ārenio a te Atua : E aroha vau i te mau ’Ētene, ’a tāho’o ai i te toe’a o te ’utuāfare o ’Īserā’ela nā roto i te ha’avāra’a rahi.

34 ’E i muri a’era, ’ua parau mai ra te melahi a te Fatu iā’u, nā ’ō mai ra : Inaha, tē parau mai ra te ’Ārenio a te Atua, ’e i muri a’e i tō’u tāho’ora’a i te toe’a o te ’utuāfare o ’Īserā’ela—’o tā’u e parau nei, ’o te hua’ai ïa o tō ’oe ra metua tāne—nō reira, i muri a’e i tō’u tāho’ora’a ia rātou nā roto i te ha’avāra’a, ’e te tā’irira’a ho’i ia rātou nā roto i te rima o te mau ’Ētene, ’e i muri a’e i tō te mau ’Ētene turorira’a rahi nō te mau tufa’a pāpū ’e te faufa’a rahi nō te ’evanelia a te ’Ārenio ’o tei hunahia e taua ’ēkālesia vi’ivi’i ra, te metua vahine nō te mau vahine tai’ata, tē nā reira mai ra te ’Ārenio—e aroha vau i te mau ’Ētene i taua mahana ra, ’e nō reira e hōpoi mai au, nā roto i tō’u iho mana, i te mau vāhi e rave rahi nō tā’u ’evanelia ia rātou ra, e mea pāpū ’e te faufa’a rahi ho’i, tē nā reira mai ra te ’Ārenio.

35 Inaha ho’i, tē nā ’ō mai ra te ’Ārenio : E fa’a’ite au iā’u iho i tō ’oe hua’ai, ’ia pāpa’i rātou i te mau mea e rave rahi tā’u e ha’api’i ia rātou ra, ’e e riro ïa ’ei mea pāpū ’e te faufa’a rahi ; ’e ’ia ha’amouhia tō ’oe ra hua’ai e te hua’ai ho’i o tō ’oe nā tua’ana, ’e e paruparu tō rātou fa’aro’o ; inaha, e hunahia teie mau mea, ’ia ti’a i te reira ’ia tae mai i te mau ’Ētene, nā roto i te hōro’a ’e te mana ho’i o te ’Ārenio.

36 ’E i roto i te reira e pāpa’ihia tā’u ’evanelia, ’e tā’u papa, ’e tā’u fa’aorara’a, tē nā reira mai ra te ’Ārenio.

37 E ao tō rātou tei tītau ’ia fa’atupu i tō’u Ziona i taua mahana ra, nō te mea e noa’a te hōro’a ’e te mana o te Vārua Maita’i ia rātou ra ; ’e mai te mea e fa’aitoito noa rātou ē tae noa atu i te hope’a ra, e fa’ateiteihia rātou i te mahana hope’a ra, ’e e fa’aorahia i roto i te bāsileia mure ’ore o te ’Ārenio ; ’auē tō rātou nehenehe i ni’a i te mau mou’a, rātou ’o tei fa’a’ite mai i te parau hau, ’oia ïa, te mau parau ’oa’oa rahi.

38 ’E i muri a’era, ’ua ’ite atu ra vau i te toe’a o te hua’ai o tō’u ra nā tua’ana, ’e te buka ato’a a te ’Ārenio a te Atua, tei tae mai nā roto i te vaha o te ’āti Iuda, ’e ’ua tae mai ra te reira mai te mau ’Ētene mai i te toe’a o te hua’ai o tō’u ra nā tua’ana.

39 ’E i muri iho i te taera’a mai te reira ia rātou, ’ua ’ite atu ra vau i te tahi atu ā mau buka, tei tae mai nā roto i te mana o te ’Ārenio, mai te mau ’Ētene mai ia rātou ra, nō te fa’a’ite-pāpū-ra’a i te mau ’Ētene ’e te toe’a ho’i o te hua’ai o tō’u ra nā tua’ana, ’e i te ’āti Iuda ato’a i ha’apurarahia nā roto i te ao ato’a nei ē, e parau mau te mau pāpa’a parau a te mau peropheta ’e te tino hō’ē ’ahuru ’e ma piti ’āpōsetolo a te ’Ārenio ra.

40 ’E ’ua parau mai ra te melahi iā’u, nā ’ō mai ra : Teie mau pāpa’a parau hope’a tā ’oe i ’ite i rotopū i te mau ’Ētene ra, e ha’apāpū te reira i te parau mau nō te mau pāpa’a parau mātāmua ra, ’o tā te tino hō’ē ’ahuru ’e ma piti ’āpōsetolo a te ’Ārenio, ’e e fa’a’ite ho’i te reira i te mau mea pāpū ’e te faufa’a rahi, ’o tei ’īriti-’ē-hia mai roto i te reira ; ’e e fa’a’ite atu i te mau ’ōpū ato’a, ’e te mau reo ato’a, ’e te mau ta’ata ato’a ē, te ’Ārenio a te Atua, ’o te Tamaiti ïa a te Metua mure ’ore, ’e te Fa’aora ho’i o te ao nei ; ’e ’ia haere mai te mau ta’ata ato’a iāna ra e ti’a ai, ’ia ’ore rā, e’ita ïa rātou e fa’aorahia.

41 ’E e haere mai rātou mai te au i te mau parau i ha’amauhia e te vaha o te ’Ārenio ra e ti’a ai ; ’e e fa’a’itehia mai te mau parau a te ’Ārenio nā roto i te pāpa’a parau a tō ’oe hua’ai, ’e nā roto ato’a i te mau pāpa’a parau a te tino hō’ē ’ahuru ’e ma piti ’āpōsetolo a te ’Ārenio, nō reira, e fa’ati’ahia ai te reira ’ei hō’ē ; hō’ē ho’i Atua, ’e hō’ē Tīa’i māmoe i ni’a i te ao ato’a nei.

42 ’E e tae mai te tau e fa’a’ite mai ai ’oia iāna iho i tō te mau nūna’a ato’a, i te mau ’āti Iuda ’e i te mau ’Ētene ato’a ho’i ; ’e i muri iho i tōna fa’a’itera’a mai iāna iho i te mau ’āti Iuda ’e i te mau ’Ētene ato’a ho’i ; ’ei reira e fa’a’ite mai ’oia iāna iho i te mau ’Ētene ’e i te mau ’āti Iuda ato’a ho’i, ’e e riro te hope’a ’ei mātāmeha’i, ’e te mātāmeha’i ’ei hope’a.