Christ Teaching His Disciples [Iesu Mesia e ha’api’i ra i tāna mau pipi], nā Justin Kunz

18–24 nō Māti : « Teie te ’ē’a mau. »

2 Nephi 31–33

I roto i te mau parau hope’a tei pāpa’ihia e Nephi, tē vai nei teie parau : « ’Ua nā reira mai ra te Fatu i te fa’aue mai iā’u ra, ’e ’ia ha’apa’o vau i te reira e ti’a ai » (2 Nephi 33:15). Teie te hō’ē pū’ohura’a maita’i nō te orara’a o Nephi. ’Ua ’imi ’oia ’ia māramarama i te hina’aro o te Atua ’e ’ua ha’apa’o i te reira ma te itoito—e ’ōpuara’a ataata ānei nō te haere e ti’i i te mau ’api veo ia Labana ra, te patura’a ānei i te hō’ē pahī nō te fano nā ni’a i te moana ’aore rā te ha’api’i-māite-ra’a ānei i te ha’api’ira’a tumu a te Mesia ma te pāpū ’e te mana. E ti’a ia Nephi ’ia parau ’e ’ia fa’atae i te mana’o i ni’a i te tītaura’a « ’ia haere ti’a atu… i mua i te ti’a-māite-ra’a i te Mesia », i te pe’era’a i te « ’ē’a tītī’āifaro ’e te piriha’o ē tae roa atu ai i te ora mure ’ore » (2 Nephi 31:20,18), nō te mea ’o terā te ’ē’a o tāna i pe’e. ’Ua ’ite ’oia nā roto i te mau ’ohipa i tupu i ni’a iāna ē, teie ’ē’a, noa atu ā te pa’ari i te tahi taime, e ’ē’a ’oa’oa ato’a, ’e « ’aita atu e ’ē’a, ’e ’aore ho’i e i’oa i hōro’ahia mai i raro a’e i te ra’i, e ti’a ai i te ta’ata ’ia fa’aorahia i te bāsileia o te Atua ra » (2 Nephi 31:21).

Mana’o nō te ’apo i te ha’api’ira’a i te ’utuāfare ’e i te fare purera’a

2 Nephi 31

’O Iesu Mesia ana’e ’e tāna ha’api’ira’a tumu te ’ē’a nō te ora mure ’ore.

Mai te mea e ha’apoto ’outou i te parau nō te ’ē’a nō te ora mure ’ore, e aha tā ’outou e parau ? ’A hi’o ē e mea nāhea tō Nephi fa’ahōho’ara’a i te reira i roto i te 2 Nephi 31. E pāpa’i hōho’a i te hō’ē ’ē’a ’e e pāpa’i i ni’a i te ’ē’a te tahi o te mau parau tumu ’aore rā te tahi mau ta’ahira’a tā ’outou e ’ite mai i roto i teie mau pene. E nehenehe ’outou e ’āmui atu i tā ’outou iho pū’ohura’a nō te mea tā Nephi i ha’api’i nō ni’a i te parau tumu tāta’itahi.

’A tai’o ai ’outou i te 2 Nephi 31:18–20, ’a hi’opo’a i tā ’outou iho mau tauto’ora’a nō te « haere ti’a atu i mua » i ni’a i te ’ē’a o te ’evanelia.

Hi’o ato’a « Haere Tātou ma te Fa’aro’o, » Te Mau Hīmene, N°.37.

Nā te pe’era’a i te mau ha’api’ira’a a Iesu Mesia e arata’i ia tātou i te ora mure ’ore.

2 Nephi 31:4–13

’Ua hōro’a mai Iesu Mesia i te hi’ora’a maita’i roa a’e o te ha’apa’o i te bāpetizora’ahia ’oia.

’Ua tupu ānei tō ’outou bāpetizora’a inanahi ra ’aore rā a 80 matahiti i teienei, e taime faufa’a roa te reira. ’Ua tomo ’outou i roto i te hō’ē fafaura’a mure ’ore ’ia pe’e ia Iesu Mesia. ’A feruri i tō ’outou bāpetizora’a ’ia tai’o ’outou i te bāpetizora’a o te Fa’aora i roto i te 2 Nephi 31:4–13. E nehenehe teie mau huru uira’a e riro ’ei tauturura’a :

• Nō te aha Iesu i bāpetizohia ai ? Nō te aha vau i mā’iti ai e bāpetizo iā’u ?

• E aha te mau fafaura’a tā’u i rave i tō’u bāpetizo-ra’a-hia ? E aha tā te Fatu e fafau mai nō te fa’aho’ira’a ? (hi’o te mau ’īrava 12–13 ; hi’o ato’a i te Mosia 18:10, 13).

• Nāhea vau ’ia fa’a’ite ē tē fafau noa nei ā vau ’ia pe’e ia Iesu Mesia ?

2 Nephi 31:15–20

« O te ta’ata rā e mau pāpū e tae noa atu i te hope’a ra, e ora ïa ».

’A tai’o ai ’outou i te 2 Nephi 31:15–20, ’a ani ia ’outou iho, « Nāhea vau e ʼite ai ē, te mau pāpū nei au e tae noa atu i te hope’a ? » E aha tā ’outou e ha’api’i ra nō ni’a ia Nephi ’o tē tauturu ia ’outou ’ia pāhono i teie uira’a ?

’Ua ha’api o Elder Dale G. Renlund : « E ’ere te mau-māite-ra’a e tae noa atu i te hope’a i te hō’ē ta’ahira’a ta’a ’ē i roto i te ha’api’ira’a tumu a te Mesia—mai te mea ra ē tē rave ra tātou i nā ta’ahira’a mātāmua e maha, muri iho e pōpoti tātou ma te ’au’au te niho ’a tīa’i noa ai ’ia tae mai te pohe. ’Aita, te tāpe’a-māite-ra’a ē tae noa atu i te hope’a, ’o te rave-itoito-ra’a ïa i te mau ta’ahira’a » (« Lifelong Conversion [Fa’afāriura’a nō te orara’a tā’āto’a] » [Brigham Young University devotional, 14 nō Setepa 2021], 2, speeches.byu.edu). Nāhea ’outou i te fa’ahiti fa’ahou i te mau ta’ahira’a i roto i te ha’api’ira’a tumu a te Mesia (te fa’aro’o, te tātarahapa, te bāpetizora’a, ’e te fāri’ira’a i te Vārua Maita’i) ?

2 Nephi 32 ; 33:2

Nā roto i te mau parau a te Mesia ’e te Vārua Maita’i, e fa’a’ite mai te Atua iā’u e aha te rave.

’Ua ’ite a’enei ’outou i te pāpū ’ore nō ni’a i te mau ta’ahira’a i muri nei i roto i tō ’outou orara’a ? Hō’ē ā māna’ona’ora’a tō te mau ta’ata o Nephi (hi’o i te 2 Nephi 32:1). ’A ’imi i te pāhonora’a a Nephi i roto i te 2 Nephi 32:2–9. Nāhea ’outou i te parau nā roto i tā rātou iho mau parau i te mea tā Nephi i haʼapiʼi ? E aha te mau ’itera’a o tei ha’api’i ia ’outou ē, e parau mau te mau parau a Nephi ?

E hāmani i te hō’ē tāpura nō te mau fa’aotira’a ’aore rā te mau huru orara’a (i teienei ’e ananahi) o tā ’outou e hina’aro i te arata’ira’a a te Atua. E aha tā ’outou e nehenehe e ha’api’i mai roto mai i te 2 Nephi 32 ’o tē tauturu ia ’outou ’ia fāri’i i te fa’aurura’a nō ’ō mai iāna ra ? E aha te mea e nehenehe e tūra’i i te ta’ata ’ia « fa’a’eta’eta i tō rātou ’ā’au i ni’a i te Vārua Maita’i » ? (2 Nephi 33:2)

’A feruri ai ’outou i te parau a’o a Nephi, ’a feruri nāhea ’outou i te tuatāpapa i te mau parau a te Fa’aora. E parau ānei ’outou i te reira mai te ’amu’amura’a, te tāmā’ara’a, ’e ’aore rā te pōpoura’a ? E aha te ta’a-’ē-ra’a, i tō ’outou mana’o ? ’A feruri ē nāhea ’outou e nehenehe ai e fa’ariro i tō ’outou ’itera’a i te mau parau a te Fa’aora mai te hō’ē pōpoura’a. Penei a’e e nehenehe ’outou e fāri’i mai i te tahi mana’o nā roto mai i te hō’ē hoa ’aore rā te hō’ē melo o te utuāfare.

’A pōpou i te mau parau a te Mesia. E rave rahi rāve’a nō te pōpou i te mau parau a te Mesia, mai te purera’a nō te fa’aurura’a, te uira’a i te mau uira’a nā mua a’e ’e i te roara’a o te tuatāpapara’a, te tātarara’a i te mau ta’o, te feruri-māite-ra’a, te ravera’a i te mau fa’aho’i-ra’a, te pāpa’ira’a i te parau, te ’imira’a i te mau parau mau o te ’evanelia ’e te fa’a’ohipara’a i te mau pāpa’ira’a mo’a i tō ’outou orara’a (hi’o 1 Nephi 19:23).

Nāhea ’outou e ani ai i te Vārua Maita’i ’ia riro ’ei hoa tāmau i roto i tō ’outou orara’a, ’eiaha noa rā mai te hō’ē rātere tau poto ? ’A tai’o i na mana’o tauturu e toru a Elder David A. Bednar nō te fa’ariro i te auhoara’a o te Vārua Maita’i ’ei hō’ē « ’ohipa tāmau » i roto i « ’A fāri’i mai i te Vārua Maita’i » (Liahona, Novema 2010, 94–97). Nāhea ’outou ’ia fa’a’ohipa i tāna a’ora’a ?

Hi’o ato’a i te mau Parau tumu o te ’Evanelia, « Heheura’a, » Vaira’a buka ’Evanelia « Pāne nō te mau mahana ato’a : Hōho’a » (video), Vaira’a buka ’evanelia.

2 Nephi 33

Tē tāparu nei te Buka a Moromona i te tā’āto’ara’a ’ia ti’aturi i te Mesia.

I roto i te 2 Nephi 33, a fa’aoti ai Nephi i tāna pāpa’ira’a, ’ua fa’ata’a ’oia e aha te tumu i pāpa’i mātāmua ai ’oia. E aha te mau tumu tā ’outou e ’ite ra i roto i teie pene ? ’A feruri māite i ni’a i te mau ’ā’amu ’e te mau ha’api’ira’a tā ’outou i tai’o mai i roto i te 1 Nephi ’e te 2 Nephi. E aha te mea tei fa’auru rahi roa a’e ia ’outou ’e tō ’outou fa’aro’o i te Mesia.

Hi’o ato’a « ’Ua pāpa’i Nephi i tōna ’itera’a pāpū hope’a » (video), Vaira’a buka ’evanelia.

Nō te tahi atu ā mana’o, ’a hi’o i te mau ve’a Liahona nō teie ’āva’e ’e Nō te Pūai o te Feiā ’Āpī .

Mana’o nō te ha’api’i i te tamari’i

2 Nephi 31:4–13

’Ia bāpetizo-ana’e-hia vau, tē pe’e ra ïa vau ia Iesu Mesia.

• Tē vai ra te hō’ē hōho’a nō Iesu i bāpetizo-hia i te pae hope’a o teie arata’i ha’api’ira’a. Penei a’e e nehenehe tā ’outou mau tamari’i e fa’a’ohipa i te reira nō te fa’a’ite mai ia ’outou i te mea tā rātou i ’ite nō ni’a i teie ’ohipa i tupu (hi’o ato’a i te Mataio 3:13–17). Nō te aha Iesu e hina’aro ai ia tātou ’ia bāpetizo-hia mai iāna ? E nehenehe tā ’outou mau tamari’i e fa’aro’o i te mau tumu ’a tai’o ’āmui ai ’outou i te mau tuha’a o te 2 Nephi 31: 4–13. E nehenehe e riro ’ei tauturu mai te mea ē e fa’a’ite mai te hō’ē ta’ata tei bāpetizohia ’aita i maoro a’enei i te ’ohipa i tupu nōna.

2 Nephi 31

’Ua ha’api’i mai Iesu Mesia iā’u nāhea ’ia ho’i i te Metua i te Ao ra.

• Nō te tauturu i tā ’outou mau tamari’i ’ia hi’o i te mau ha’api’ira’a i roto i te 2 Nephi 31, e nehenehe rātou e pāpa’i hōho’a i te hō’ē ’ē’a ’e te hōho’a o te Mesia i te hope’a. E nehenehe ’outou e tauturu ia rātou ’ia ’ite mai ’aore rā ’ia pāpa’i i te mau hōho’a e fa’ahōho’a ra i te mau ta’ahira’a nō tera ’ē’a, mai te fa’aro’o i te Mesia, te tātarahapara’a, te bāpetizora’a, te hōro’ara’a o te Vārua Maita’i, ’e te tāmau-māite-ra’a ē tae noa atu i te hope’a. E nehenehe rātou e fa’a’ite i te mau hōho’a ’a tai’o ’āmui ai ’outou i te 2 Nephi 31:17–20 .

2 Nephi 32:3–5

E nehenehe au e pōpou i te parau a te Mesia.

• Nō te ha’api’i nō ni’a i te « fa’a’amu’a » i te mau parau a te Mesia, e nehenehe ’outou e ani i te mau tamari’i ’ia fa’a’ite mai ē nāhea rātou i te pōpou i te tahi mau mā’a auhia e rātou. I roto i te 2 Nephi 32:3, e aha te mea tā Nephi e parau ra ē, e pōpou tātou ? Nāhea te fa’a’amu’a i te parau a te Atua e ta’a ’ē ai i te tai’o-noa-ra’a ? Penei a’e e nehenehe tā ’outou mau tamari’i e ha’uti ta’ata ora mai i teie mau ta’a’ē-ra’a. ’A fa’a’ite ia rātou i te mau ha’amaita’ira’a tā ’outou i fāri’i ’a pōpou ai ’outou i te mau pāpa’ira’a mo’a.

2 Nephi 32:8–9

Tē hinaʼaro nei te Metua i te Ao ra ’ia pure tāmau noa vau.

• I muri iho te tai’ora’a i te 2 Nephi 32:8–9, ’a ’āparau i tā ’outou tamari’i ē nō te aha Sātane e ’ore ai e hina’aro ’ia pure tātou. Nō te aha te Atua e hina’aro ai ’ia « pure tāmau noa tātou » ? E nehenehe tā ’outou mau tamari’i e hāmani i te hō’ē tābula ’aore rā e pāpa’i hōho’a i te tahi mau huru tupura’a e ti’a ai ia rātou ’ia pure. ’Ei reira, e nehenehe ’outou e hīmene i te hō’ē hīmene o tē ha’api’i ra nō ni’a i te pure, mai te hīmene « ’Ua pure ānei ’oe ? » (Te mau Hīmene, N°72). E nehenehe ’outou e taui i te tahi mau parau i roto i te hīmene i te mau parau i ni’a i te tāpura. Nāhea te Fatu i te ha’amaita’i ia tātou ’ia pure tāmau noa tātou ?

Nō te tahi atu ā mana’o, ’a hi’o i te ve’a Hoa nō teie ’āva’e.

’Ua ’ī i te parau ti’a, nā Liz Lemon Swindle