Not My Will, but Thine, Be Done [Dili ang Akong Pagbuot, maoy Matuman, kondili ang Imo], ni Harry Anderson

Pebrero 19–25: “O Unsa Kamahinungdanon sa Laraw sa Atong Dios”

2 Nephi 6–10

Mga 40 na ka tuig sa labing minos sukad mibiya ang pamilya ni Lehi sa Jerusalem. Didto sila sa laing bag-ong yuta, katunga sa kalibotan ang gilay-on gikan sa Jerusalem. Si Lehi namatay, ug ang iyang pamilya misugod na sa unsay mahimong panagbingkil nga milanat og mga siglo tali sa mga Nephite—“kinsa mituo sa mga pasidaan ug mga pagpadayag sa Dios”—ug ang mga Lamanite, kinsa wala motuo (2 Nephi 5:6). Si Jacob, kinsa manghod nga lalaki ni Nephi ug karon gi-orden isip usa ka magtutudlo alang sa mga Nephite, gusto nga makahibalo ang mga tawo sa pakigsaad nga ang Dios dili gayod makalimot kanila, busa sila kinahanglan dili gayod makalimot Kaniya. Kini ang usa ka mensahe nga siguradong gikinahanglan nato karon (tan-awa sa Doktrina ug mga Pakigsaad 1:15–16). “Ato siya nga hinumdoman … kay kita dili mga sinalikway. … Daghan ang mga saad sa Ginoo,” namahayag si Jacob (2 Nephi 10:20–21). Apil niadto nga mga saad, walay mas labaw pa kay sa usa ka “walay kinutoban nga pag-ula” sa pagbuntog sa kamatayon ug impyerno (2 Nephi 9:7). “Busa,” mitapos si Jacob, “lipaya ang inyong mga kasingkasing”! (2 Nephi 10:23).

Mga Ideya alang sa Pagkat-on diha sa Panimalay ug sa Simbahan

2 Nephi 6–8

Ang Ginoo maloloy-on sa Iyang katawhan ug motuman sa Iyang mga pakigsaad.

Sa pagtabang sa iyang katawhan nga makasabot nga sila kabahin sa balay ni Israel ug makasalig sa Dios ug sa Iyang mga saad, gikutlo ni Jacob ang mga panagna ni Isaias, nga narekord sa 2 Nephi 6–8. Kana nga mensahe alang usab kaninyo, tungod kay ang Santos sa Ulahing mga Adlaw kabahin usab sa mga tawo sa pakigsaad sa Dios. Samtang magbasa ka niini nga mga kapitulo, hunahunaa ang mga pangutana sama sa mosunod:

• Unsay akong makat-onan mahitungod sa matubsanong gugma sa Manluluwas alang kanako? Unsa nga mga pulong o hugpong sa mga pulong nga espesyal kaayong nagpahayag niining gugma?

• Unsa ang gitanyag sa Manluluwas sa mga tawo kinsa nagtinguha Kaniya?

• Unsay akong mahimo aron mas magmatinud-anong “maghulat” sa Manluluwas ug sa Iyang gisaad nga mga panalangin?

2 Nephi 9:1–26

Si Jesukristo miluwas kanako gikan sa sala ug kamatayon.

Usa ka paagi aron mapalawman ang inyong pagpasalamat alang ni Jesukristo mao ang paghunahuna mahitungod kon unsa kaha ang nahitabo kanato kon wala Siya. Samtang magbasa ka sa 2 Nephi 9:1–26, ikonsiderar ang paglista o markahan og usa ka kolor kon unsa ang mahitabo kanato kon wala ang Pag-ula ni Jesukristo. Dayon, sa laing lista o kolor, mahimo ninyong ilhon kon unsa ang atong madawat pinaagi sa Pag-ula sa Manluluwas. Base sa unsay inyong nabasa, unsaon ninyo sa pagpasabot kon nganong kita nagkinahanglan sa Pag-ula ni Jesukristo? Unsa ang inyong nakaplagan nga nakadasig kaninyo nga maoy nakapadayeg ninyo sa “kaalam sa Dios, sa iyang kalooy ug grasya”? (2 Nephi 9:8).

Agi og dugang sa pagtudlo kon sa unsa kita giluwas ni Jesukristo, si Jacob mihatag usab og mga panabot mahitungod kon giunsa Niya kini sa pagbuhat. Ikonsiderar ang pagrekord kon unsa ang inyong nakit-an diha sa 2 Nephi 9:11–15, 20–24.

Nahingangha kaayo si Jacob sa plano sa Dios kalabot sa katubsanan nga nakatuaw siya og, “O unsa kamahinungdanon sa laraw sa Atong Dios.” Pangitaa kining mga pagtuaw diha sa 2 Nephi 9 (kadaghanan niini makita diha sa mga bersikulo 8–20). Unsa ang inyong nakat-onan gikan niini nga mga bersikulo mahitungod sa plano sa Dios? Unsa nga mga kasinatian ang nakatabang ninyo nga mobati sa pipila sa unsay gibati ni Jacob? Isip kabahin sa inyong pagsimba ug pagtuon, ikonsiderar ang pagpangita og usa ka himno nga tingali makapahayag kon unsa ang inyong gibati Kaniya, sama sa “Gamhanan Ka” (Mga Himno, nu. 45).

Tan-awa usab sa “Mitudlo si Jacob bahin sa Pagkabanhaw” (mga bidyo), Gospel Library.

Mitudlo si Jacob bahin sa Pagkabanhaw | 2 Nephi 6:5–11; 9

2 Nephi 6:5–11, 9 | Si Jacob, propeta sa Basahon ni Mormon, naghisgot sa kaimportante sa Mesiyas. Sama nga ang Pagkapukan ni Adan nagdala sa kamatayon, ang Pagkabanhaw sa Manluluwas naghimong ang tanan mabanhaw.

2 Nephi 9:7

Ang Pag-ula sa Manluluwas walay kinutoban.

Unsa ang inyong buhaton aron mas masabtan ang “walay kinutoban nga pag-ula” ni Jesukristo? (2 Nephi 9:7). Tingali makapangita ka sa mga butang nga ingon og walay kinutoban ang gidaghanon—mga dahon sa sagbot sa kaumahan, mga lugas sa balas sa baybayon, o sa mga bitoon sa kalangitan. Sa unsa nga paagi nga ang Pag-ula sa Manluluwas walay kinutoban? Sa unsa nga paagi nga kini usab personal? Unsa nga mga pulong sa 2 Nephi 9 nga nakatabang kaninyo nga mobati og pagkamapasalamaton alang sa unsay gibuhat sa Manluluwas alang kaninyo?

2 Nephi 9:27–54

Ako mahimong moduol ngadto kang Kristo ug mosunod sa plano sa Dios.

Diha sa 2 Nephi 9, si Jacob migamit og duha ka gamhanang managlahi nga mga pulong: “[ang] maloloy-on nga laraw sa makagagahom nga Tiglalang” ug “kanang malipoton nga laraw sa usa ka daotan” (2 Nephi 9:6, 28). Tingali makadrowing kamo og usa ka dalan ug sulatan kini og Plano sa Langitnong Amahan. Dayon siksika ang 2 Nephi 9:27–52. Pangitaa ang mga pasidaan ug mga imbitasyon nga gihatag ni Jacob aron sa pagtabang kanato sa pagsunod niining plano. Isulat unsa ang inyong nakit-an sa daplin sa dalan. Sa unsang paagi si Satanas mosulay sa pagpahisalaag kanato gikan sa plano sa Dios? Unsa ang inyong gibati nga nadasig nga buhaton agig pagtubag sa mga pasidaan ug mga imbitasyon ni Jacob?

2 Nephi 10:20, 23–25

Ang sakripisyo ni Jesukristo makadala kanako og hingpit nga kalipay.

Ang mensahe ni Jacob usa nga makapalipay. “Ako mamulong nganha kaninyo niini nga mga butang,” miingon siya, “nga kamo magmaya, ug ihangad ang inyong mga ulo sa kahangtoran” (2 Nephi 9:3). Samtang kamo magbasa sa 2 Nephi 10:20, 23–25, unsay inyong nakita nga nakahatag sa inyong kasingkasing og kahimuot? Unsay inyong buhaton aron mahinumdoman kining mga butanga kon inyong bation nga nawad-an og kadasig?

Tan-awa usab sa Juan 16:33; D. Todd Christofferson, “Ang Hingpit nga Kalipay sa mga Santos,” Liahona, Nob. 2019, 15–18.

Si Jacob Miawhag sa mga Nephite nga Makig-uli sa Dios | 2 Nephi 10:3–25

2 Nephi 10:3–25 | Si Jacob, propeta sa Basahon ni Mormon, nanagna bahin ni Jesukristo ug miawhag sa mga Nephite sa paghinumdom sa ilang Manluluwas, sa paghinulsol, ug makig-uli sa Dios.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

2 Nephi 9:6–10, 19–24

Si Jesukristo ang akong Manluluwas.

• Unsaon ninyo pagtabang ang inyong mga anak nga makasabot ug mobati nga sila nagkinahanglan sa Manluluwas nga si Jesukristo? Ang pahina sa kalihokan niining semanaha makatabang. Kini naggamit og usa ka yano nga analohiya sa usa ka lungag ug usa ka hagdanan. Ikonsiderar ang paggamit sa 2 Nephi 9:21–22 sa pagpakig-istorya sa inyong mga anak mahitungod kon ngano nga kamo mapasalamaton alang ni Jesukristo.

• Usa sa paagi sa pagtabang sa inyong mga anak nga makasabot kon ngano nga kita nagkinahanglan sa Manluluwas mao nga aron matudloan sila mahitungod sa Pagkapukan. Mahimo ninyong ipakita ang usa ka hulagway ni Adan ug Eva, sama sa Leaving the Garden of Eden [Pagbiya sa Tanaman sa Eden] (Gospel Library), ug usa ka hulagway ni Jesukristo diha sa krus. Ikonsiderar ang paghangyo kanila sa paghulagway kon unsa ang nahitabo diha sa matag hulagway. Sa unsang paagi kita sama nilang Adan ug Eva? Tingali ang 2 Nephi 9:6–10 makatabang nila nga makakita kon unsa ang gibuhat ni Jesukristo alang kanato. Ikonsiderar ang pagdapit sa mga anak sa pagpakigbahin sa ilang mga pagbati mahitungod ni Jesukristo. Usa ka awit sama sa “Gibati Ko ang Gugma sa Akong Manluluwas, (Songbook sa mga Bata, 42–43) mahimong makatabang.

Pagtudlo sa kamatuoran gamit ang mga istorya ug mga ehemplo. Siguroha nga ang mga istorya ug mga ehemplo nga inyong gamiton nagtudlo og kamatuoran. Pananglitan, kon mogamit sa pahina sa kalihokan niining semanaha, itudlo nga si Jesukristo miduol ngadto sa “lungag” aron sa pagtabang kanato sa matag lakang samtang kita mogawas.

2 Nephi 9:20, 28–29, 42–43, 49

“Ang akong kasingkasing nahinangop diha sa pagkamatarong.”

• Sa pag-awhag sa inyong mga anak nga “[mahinangop] diha sa pagkamatarong” o malipayon nga motuman sa Ginoo (2 Nephi 9:49), tingali mahimo ninyong ipakigbahin ang mga ehemplo diin ang usa ka anak naghimo og usa ka maayo nga pagpili o usa ka dili maayo nga pagpili. Dapita ang mga anak sa pagbarog kon ang pagpili makahatag og kalipay ug molingkod kon ang pagpili makahatag og kagul-anan. Kanus-a kita mibati og kalipay tungod kay kita mihimo og usa ka pagpili sa pagsunod ni Jesukristo?

• Ang inyong mga anak lagmit makig-interaksiyon sa mga tawo (kon sila wala pa) nga naghunahuna nga ang kasugoan sa Dios binuang o wala na sa panahon. Tingali kamo ug ang inyong mga anak makahisgot mahitungod kon nganong kita malipay sa pagtuman sa mga sugo. Nganong importante man nga mosalig sa tambag sa Dios bisan og wala kita makasabot niini sa hingpit? Mahimo ninyo silang awhagon sa pagpangita diha sa 2 Nephi 9:20, 28–29, ug 42–43 alang sa tabang uban sa paghunahuna mahitungod ug sa paghisgot niining mga pangutana.

Alang sa dugang nga mga ideya, tan-awa ang isyu karong bulana sa Higala nga magasin.

He Healed Many of Diverse Diseases [Giayo Niya ang Daghan nga may Nagkalain-laing mga Sakit], ni J.Kirk Richards