“Pebrero 12–18: ‘Kami Mipuyo subay sa Matang sa Pagkamalipayon.’ 2 Nephi 3–5,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Pebrero 12–18. 2 Nephi 3–5,” Dali, Sunod Kanako—Alang sa Panimalay ug sa Simbahan: 2024 (2024)
Pebrero 12–18: “Kami Mipuyo subay sa Matang sa Pagkamalipayon”
2 Nephi 3–5
Ang pagbasa sa 1 Nephi, mahimong makahatag kaninyo og panghunahuna nga si Nephi ingon og makadani og pagtagad. “Dako ug taas ang pamarog” sa pisikal ug espirituwal (1 Nephi 2:16), siya ingon og wala matandog pinaagi sa mga pagsulay nga iyang giatubang. O labing minus kana mao tingali ang atong pangagpas. Apan samtang ang hugot nga pagtuo ni Nephi dalaygon, ang iyang malumo nga mga pulong diha sa 2 Nephi 4 nagpadayag nga bisan ang matinud-anong mga tawo usahay mobati og “pagkaalaot” ug “sayon nga duolon” og mga tintasyon. Dinhi atong makita ang usa ka tawo kinsa naningkamot, kinsa gustong magmalipayon, apan kansang “kasingkasing mag-agulo tungod sa [iyang] mga sala.” Kita makasabot niini ug ngadto sa malaomong determinasyon nga nagsunod: “Bisan pa niana, ako nasayod kang kinsa ako mosalig” (tan-awa sa 2 Nephi 4:15–19).
Samtang si Nephi ug ang iyang mga tawo nakakat-on sa pagpakabuhi “subay sa matang sa pagkamalipayon” (2 Nephi 5:27), nakakat-on usab sila nga ang kalipay dili sayon nga moabot o walay mga panahon sa kaguol. Kini sa kataposan moabot gikan sa pagsalig diha sa Ginoo, “ang lig-on nga sukaranan sa [atong] pagkamatarong” (2 Nephi 4:35).
Mga Ideya alang sa Pagkat-on diha sa Panimalay ug sa Simbahan
Si Joseph Smith gipili sa Dios sa pagpahiuli sa ebanghelyo.
Si Lehi mipakigbahin uban sa iyang anak nga si Joseph og usa ka panagna nga gihatag ni Jose sa Ehepto. Ang panagna mahitungod sa umaabot nga “pinili nga manalagna,” si Joseph Smith. Unsa ang gisulti sa mga bersikulo 6–24 nga buhaton ni Joseph Smith aron sa pagpanalangin sa katawhan sa Dios? Ikonsiderar kon sa unsang paagi ang buhat ni Joseph Smith nahimong “labing bililhon” nganha kaninyo. Hunahunaa ang mahitungod sa mga pangutana nga sama niini, ug ikonsiderar ang pagrekord sa inyong mga tubag:
-
Unsa ang inyong nasayran mahitungod sa Langitnong Amahan ug ni Jesukristo tungod sa unsay gitudlo ni Joseph Smith?
-
Sa unsa nga paagi ang inyong kinabuhi lahi tungod sa unsa ang gipahiuli sa Ginoo pinaagi ni Joseph Smith?
-
Unsa kaha ang inyong kinabuhi kon ang Pagpahiuli wala nahitabo?
Usa ka importanteng bahin sa misyon ni Joseph Smith mao ang pagpatungha sa Basahon ni Mormon. Unsa ang inyong makat-onan gikan niini nga kapitulo mahitungod kon nganong importante ang Basahon ni Mormon? Sa partikular, makapangita ka og mga rason diha sa mga bersikulo 7, 11–13, 18–24.
Tan-awa usab sa Ang Hubad ni Joseph Smith, Genesis 50:24–38 (diha sa Mga Tabang sa Pagtuon); Gospel Library; “Pagdayeg sa Tawo,” Mga Himno, nu. 19.
Propeta sa Ginoo, ni David Lindsley
“O Ginoo, ako misalig kaninyo.”
Miingon si Nephi nga siya “mosulat sa mga butang sa akong kalag” (bersikulo 15). Samtang mobasa ka sa unsay iyang gisulat diha sa 2 Nephi 4:15–35, pangutan-a ang inyong kaugalingon, “Unsa ang mga butang sa akong kalag?” Ikonsiderar ang pagsulat niini, sama sa gibuhat ni Nephi, ug sa pagpakigbahin niini sa mga tawo nga inyong gimahal.
Ang makita kon sa unsang paagi si Nephi nakakaplag og kahupay sa dihang siya mibati nga nabug-atan ug nabalaka makatabang kaninyo kon kamo adunay susama nga mga pagbati. Pangitaa diha sa mga bersikulo 15–35 alang sa mga tudling nga makahatag kaninyo og kahupay. Nakaila ka ba og laing tawo nga tingali makakaplag og kahupay niining mga tudling?
Tan-awa usab sa Ronald A. Rasband, “Ang mga Butang sa Akong Kalag,” Liahona, Nob. 2021, 39–41.
Ako makakaplag og kalipay diha sa pagsunod sa ebanghelyo ni Jesukristo.
Unsa kaha ang gipasabot sa pagkahimong malipayon? Si Nephi misulat nga ang iyang katawhan mipuyo “subay sa matang sa pagkamalipayon” (2 Nephi 5:27). Tingali mangita ka sa mga gipili ni Nephi ug sa iyang katawhan nga mitabang kanila nga mahimong malipayon (tan-awa, pananglitan sa 2 Nephi 5:6, 10–17). Unsa ang makatabang ninyo sa pagpalambo og kinabuhi sa kalipay sama sa katawhan ni Nephi?
Unsa nga tunglo ang miabot diha sa mga Lamanite?
Sa panahon ni Nephi ang tunglo sa mga Lamanite mao nga sila “[gi]pahimulag gikan sa atubangan [sa Ginoo] … tungod sa ilang kadaotan” (2 Nephi 5:20–21). Kini nagpasabot nga ang Espiritu sa Ginoo gikuha gikan sa ilang mga kinabuhi. Sa dihang ang mga Lamanite sa kaulahian mihangop sa ebanghelyo ni Jesukristo, “ang tunglo sa Dios wala na mosunod kanila” (Alma 23:18).
Ang Basahon ni Mormon nagpahayag usab nga usa ka timaan sa itom nga panit miabot sa mga Lamanite human ang mga Nephite mibulag gikan kanila. Ang matang ug dagway niini nga timaan wala masabti sa hingpit. Ang timaan sa sinugdanan mipaila sa mga Lamanite gikan sa mga Nephite. Sa kadugayan, samtang ang mga Nephite ug mga Lamanite managsama nga miagi og mga panahon sa pagkadaotan ug pagkamatarong, ang timaan nahimong wala nay kalabotan.
Ang mga propeta mimatuod sa atong panahon nga ang itom nga panit dili timailhan sa balaang pagkawalay gusto o pagtunglo. Si Presidente Russell M. Nelson mipahayag: “Akong iseguro kaninyo nga ang inyong kahimtang atubangan sa Dios dili tinoon pinaagi sa kolor sa inyong panit. Ang pagkanauyonan o wala mauyoni sa Dios mag-agad sa inyong debosyon ngadto sa Dios ug sa Iyang mga sugo ug dili sa kolor sa inyong panit” (“Ipatigbabaw ang Dios Labaw sa Tanan,” Liahona, Nob. 2020, 94).
Sama sa gitudlo ni Nephi, ang Ginoo “wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye; … ang tanan managsama ngadto sa Dios” (2 Nephi 26:33).
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Si Joseph Smith usa ka propeta.
-
Ikonsiderar kon unsaon ninyo sa pagtudlo ang inyong mga anak mahitungod sa talagsaon nga buhat nga natuman sa Dios pinaagi ni Joseph Smith. Sa pagsugod, mahimong makatabang kamo sa inyong mga anak sa pagpangita sa pulong nga “manalagna” diha sa 2 Nephi 3:6 ug ipasabot nga ang mga propeta gitawag og mga manalagna tungod kay ang Langitnong Amahan nagtabang kanila nga makakita sa mga butang nga kita dili makakita. Ipakigbahin kon nganong mapasalamaton ka nga adunay usa ka manalagna nga nangulo sa Simbahan.
-
Ang Libro sa mga Hulagway sa Ebanghelyo adunay pipila ka mga hulagway nga inyong magamit sa pagtudlo mahitungod sa buhat nga gihimo sa Dios pinaagi ni Joseph Smith (tan-awa sa mga hulagway 89–95). Tugoti ang inyong mga anak sa pagpakigbahin sa unsay ilang nahibaloan mahitungod sa mga hulagway. Nganong gitawag man si Joseph Smith nga “pinili nga manalagna”? Unsa man ang gibuhat ni Joseph Smith nga “labing bililhon”? (bersikulo 7).
Ako ganahan “sa mga butang sa Ginoo.”
-
Unsay makapalipay kanato? Ikonsiderar ang magdugan sa pagbasa sa mga bersikulo gikan sa 2 Nephi 4 aron sa pagsuta unsa ang gikahimut-an ni Nephi o nakapahimo kaniya nga malipayon (tan-aw sa mga bersikulo 15–16, 20–25, 34–35). Sa iyang mensahe “Ang mga Butang sa Akong Kalag,” si Elder Ronald A. Rasband mipakigbahin og pito ka “mga butang sa Ginoo” nga bililhon ngadto kaniya (Liahona, Nob. 2021, 39–41). Tingali mahimo kamong mag-uban sa pagrebyo sa iyang lista ug maghisgot mahitungod sa “mga butang sa Ginoo” nga bililhon nganha kaninyo.
-
Ang 2 Nephi 5 naghulagway usab sa mga butang nga nakatabang sa mga Nephite nga magpuyo “subay sa matang sa pagkamalipayon” (bersikulo 27). Mahimo kamo nga makahatag og pipila ka mga pulong o mga hulagwaynga nagrepresentar niining mga butanga ug motabang sa inyong mga anak sa pagpares-pares niini ngadto sa mga bersikulo diha sa kapitulo 5. Pipila sa mga ehemplo naglakip sa pamilya (bersikulo 6), mga sugo sa Dios (bersikulo 10), ang mga kasulatan(bersikulo 12), buhat (mga bersikulo 15 ug 17), mga templo (bersikulo 16), ug mga calling sa Simbahan (bersikulo 26). Sa unsa nga paagi kining mga butanga makahatag kanato og kalipay?
Ang templo mao ang balay sa Ginoo.
-
Samtang mobasa kamo sa 2 Nephi 5:15–16 ngadto sa inyong mga anak, sila mahimo kunohay nga ilang gitabangan si Nephi sa pagtukod og usa ka templo. Mahimo usab ninyong ipakita ang mga hulagway sa lain-laing mga gambalay, lakip ang usa ka templo. Sa unsang paagi ang mga templo lahi gikan sa uban nga mga gambalay? Ipakigbahin sa usag usa kon nganong ang templo importante diha kaninyo (tan-awa usab sa “Gusto Ko nga Makita ang Templo,” Songbook sa mga Bata, 99).
Bisan kanus-a nga higayon mahimong usa ka higayon sa pagtudlo. Ayaw paghunahuna sa pagtudlo sa inyong pamilya isip usa ka butang nga inyong buhaton kausa sa semana atol sa usa ka pormal nga panahon sa pagtudlo. Hunahunaa kini isip butang nga inyong buhaton sa tanang panahon.
Alang sa dugang nga mga ideya, tan-awa ang isyu karong bulana sa Higala nga magasin.
The Temple of Nephi [Ang Templo ni Nephi], ni Michael T. Malm