26 ni Feperueri–3 ni Maji: “Ena Vakatokai na Yacana … Na Ravouvou ni Sautu.”

2 Nifai 11–19

Na volavola ena peleti kaukamea e sega ni ka rawarawa, ka volai koto ena peleti lailai i Nifai ni vakaiyalayala. Ia na cava na vuna me cakava kina o Nifai na sasaga ni kena lavetaki e vuqa na veika a vola na parofita o Aisea ki na nona ivolatukutuku? E cakava o Koya baleta ni vinakata me da vakabauti Jisu Karisito. “Sa dau taleitaka na yaloqu,” a vola o koya, “meu vakadinadinataka vei ira na noqu tamata na dina ni nona lako mai na Karisito” (2 Nifai 11:4). Sa raica o Nifai na cava ena yaco vei ira na nona tamata ena veitabatamata mai muri. A raica o koya, se cava sara na nodra veivakalougatataki cecere, era na viavialevu, veileti, ka vakavuravura (raica na 1 Nifai 12; 15:4–6). A raica talega o Koya na leqa vata oqo ena noda gauna (raica na 1 Nifai 14). E veivakaroti na volavola nei Aisea me baleta na caka ca vakaoqo. Ia era sa solia talega vei Nifai na inuinui ni dua na veisiga ni mataka lagilagi—me sa tini na caka cala, mera soqoni mai na yalodina, kei na “rarama levu” kivei ira na tamata era a “lako ena butobuto” (2 Nifai 19:2). Ena yaco kece oqo baleta ni “sa sucu [mai] e dua na gone” ena vakaotia rawa na veileqa kecega—“Na Ravouvou ni Sautu” (2 Nifai 19:6).

Vakasama eso ni Vuli ena iTikotiko kei na Lotu

Ena rawa vakacava niu kila vakavinaka cake na ivakavuvuli i Aisea?

E vakaraitaka o Nifai vei ira na so, “sa sega ni macala vinaka vei kemudou na vosa i Aisea” (2 Nifai 25:4 Ia e soli vakasala vei keda o koya me vukei keda me vakaibalebale na volavola nei Aisea:

• “Vakatautauvatataka na nona vosa vei” iko (2 Nifai 11:2). E vuqa nai vakavuvuli nei Aisea e vakaibalebale ki na levu na ka, ka rawa ni vakayagataki talega ena levu na ituvaki. Me vakataka, ni o wilika me baleta na vanua ni vakaitikotiko ena 2 Nifai 14:5–6, vakasamataka na sala e vakayagataki kina na veitikina oqo ki na nomu itikotiko. Mo tarogi iko, “Na cava e vinakata na Tamada Vakalomalagi meu vulica?”

• Vakaraica na ivakatakarakara i Jisu Karisito (raica na 2 Nifai 11:4). E vuqa na ivakavuvuli nei Aisea me baleta na iVakabula era vakadewataki tu ena ivakatakarakara. Me vakataka, e matataki vakacava na iVakabula ena 2 Nifai 19:2? Na cava e vakavulica vei iko na ivakatakarakara oqo me baleti Koya?

• “Vakasaqara mo “vakasinaiti tu ena yalo ni parofisai” (2 Nifai 25:4). Ni ko vuli tiko, masulaka na veidusimaki vakayalo. Ena sega beka ni o rawa ni kila taumada vakavinaka na veika kece, ia na Yalo ena rawa ni vukei iko mo vulica na veika o gadreva mo kila.

Sa rawa talega mo na kunea ni na veivuke mo raica na ivukevuke ni vuli ena ivolanikalou, oka na ivakamacala e botona, ulutaga ni wase, kei na iDusidusi ki na iVolanikalou. Na ivolavakarau ni inisitute ni iVola i Momani kei na Veiyalayalati Makawa e tiko kina na ikuri ni itukutuku ena rawa ni vukei iko mo vulica na itukutuku makawa ni ivakavuvuli nei Aisea.

2 Nifai 11–19

E vakadinadinataki Jisu Karisito o Aisea.

Ena vuku ga ni a vakayagataka vakalevu o Aisea na vosa ivakatakarakara, e rawarawa sara me na raibaleti kina na nona ivakadinadina kaukauwa i Jisu Karisito. Vakaraica na iVakabula ena 2 Nifai 13:13; 14:4–6; 15:1–7; 16:1–7; 17:14; 18:14–15; 22:2. Na cava beka e vakatavulica vei iko na veitikina oqo me baleta na Kalou?

Na parofisai e tiko ena 2 Nifai 19:6 e tukuna tiko e vica na itutu i Jisu Karisito. E sa vakayacora vakacava na Karisito na ilesilesi oqo ki na nomu bula?

Raica talega na Ulisses Soares, “Jisu Karisito: Na Dauveiqaravi ni Yaloda,” Liaona, Me 2021, 82–84.

2 Nifai 12–13; 15

O ira sa dokadoka ka dau vakavuravura era na vakayalomalumalumutaki.

Sa raica oti tu o Nifai ni na qai vakavuna mera lutu na nona tamata na viavialevu (raica na 1 Nifai 12:19). Ka sega ni ka e vakidacalataki ni wasea vei ira nona tamata o Nifai na ivakaro ka tokaruataka o Aisea me baleta na viavialevu. Ena wase 12 kei na 13, raica na vosa eso e vakayagataka ko Aisea me vakamacalataka kina na itovo viavialevu, me vakataka na vakacerecerei koya kei na qaciqacia. Ena 2 Nifai 15:1–24, vakaraica na vosa vakatakarakara e vakamacalataka na revurevu ni viavialevu. Sa rawa mo tovolea mo vakalekalekataka na veika o sa wilika ena nomu vosa ga. Vakasamataka mada na sala o na digitaka kina mo yalomalumalumu.

Raica talega na “Wase 18: Qarauna na Viavialevu,” Nodra iVakavuvuli na Peresitedi ni Lotu: Ezra Taft Benson (2014), 229–40.

2 Nifai 12:2–3

Na valetabu e vale ni Turaga

E vakatoka o Aisea na valetabu me “ulunivanua ni vale ni Turaga” (2 Nifai 12:2). Na cava e ivakatakarakara vinaka kina ni valetabu na ulunivanua?

O na vakamacalataka vakacava vua e dua na vuna eda gadreva kina na valetabu? Sa rawa mo raica eso na isaunitaro donu ena 2 Nifai 12:2–3 kei na itukutuku nei Peresitedi Russell M. Nelson “Na Valetabu kei na Nomu Yavu Vakayalo” (Liaona, Nove. 2021, 93–96). Yavutaki ena veika o sa wilika, na cava e vinakata na Turaga mo vulica ka sotava ena Nona vale tabu? Na cava soti o sa sotava e kea?

Sa rawa mo raica na taro ni veivakatarogi ni ivolatara ni valetabu ena tabana e 36–37 ni Me iSakisaki ni iTabagone: Dua na iDusidusi ni Lewai ni Digidigi. Vakasamataka mo wilika yadua ka tarogi iko, na cava e vakavulica vei au na taro oqo me baleta na sala ni Turaga? E vukei au vakacava meu “lako ena nona sala”?

Raica talega na Ulutaga ni Kosipeli, “Temples,” Gospel Library; “E Ulunivanua,” Serenilotu, naba 4.

2 Nifai 11–19

O Jisu Karisito ena vueti ira na Nona tamata.

Dina ga ni raica na veicaka cala sa tu, a raica o Aisea na inuinui ki na veisiga ni mataka. Vakasamataka mo vulica na veimalanivosa yadua oqo. Vola e dua se sivia na dina e vakavulica na veitikina oqo me baleta na noda gauna oqo: 2 Nifai 12:1–5; 14:2–6; 15:20–26; 19:2–8. Na cava o nanuma kina ni sa rui bibi vei keda na veitikina oqo me da kila vinaka?

Me baleta na ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone enai kena mekasini.

Vakaraica na ivakarau. Ena ivolanikalou eda rawa ni kunea kina na veiwalewale eso e vakaraitaka na veika e ivakarau ni cakacaka ni Turaga. Ena 2 Nifai 11–19, sa rawa mo raica na ivakarau e vakaraitaka na sala e veivakaroti kina na Turaga baleta na ivalavala ca ka vosoti ira na tamata era veivutuni.

Vakasama ni Nodra Tuberi na Gonelalai

2 Nifai 12:2–3

Na valetabu e vale ni Turaga

• E vakamacalataka o Aisea na valetabu me “ulunivanua ni vale ni Turaga.” Era na marautaka na luvemu mera dramataka ni ra kabata tiko e dua na ulunivanua ni o wilika na 2 Nifai 12:2–3. Vukei ira me ra kunea na malanivosa ena veitikina oqo ka vakamacalataka na vuna me tiko kina vei keda na valetabu.

• Me vakamacalataki na malanivosa “eda na lakova na nona sala” mai na 2 Nifai 12:3, sa rawa ni o cakava e dua na sala ena vuloa, me mua yani ki na dua na iyaloyalo ni valetabu. Ni ra lakova na sala na luvemuni, e rawa ni ra cavuta na veika e rawa ni ra cakava me ra lakova kina na sala ni Turaga.

• Sureta na gone mera droinitaka e dua na kedra iyaloyalo ni ra lako tiko ki na valetabu. Lagata vata kei ira na gone e dua na sere me baleta na valetabu, me vaka na “I Love to See the Temple” (Nodra Sere na Lalai, 95). Vukei ira me ra kunea na vosa kei na malanivosa ena sere ka vakavulica na cava na valetabu kei na ka eda dau cakava kina.

2 Nifai 11:4–7; 17:14; 19:6

O Jisu Karisito sa noqu iVakabula.

• E vica na yaca e tiko me baleti Jisu Karisito ena 2 Nifai 11:4–7; 17:14; 19:6. Vukei ira na luvemu me ra kunea ka veivosakitaka na kedra ibalebale. Me vakataka na “Karisito” sa kena ibalebale “na lumuti” kei “Imanueli” e kena ibalebale “na Kalou sa tiko kei keda.” Na cava e vakavulica vei keda na yaca eso oqo me baleti Jisu Karisito?

• Vakaraitaka eso na tiki ni vidio “The Christ Child” (Gospel Library) e vakaraitaka na tamata duidui era raici Jisu ena imatai ni gauna. Cegu mada na vidio ena ivakaraitaki oqo, ka tarogi ira na luvemu me baleta na veika era a vakila na tamata oqo. Na cava eda na vakila ke da a tiko e kea? E vakaevei na ivakarau ni yaloda ni da sa raici Koya tale?

2 Nifai 15:20

E dau tovolea o Setani me vakasesea noqu vakasama baleta na vinaka kei na ca.

• Vakaraitaka vei ira na gone e dua na ka gaga se wiwi, me vaka na molikaro, ena dua na iolo ni loli. Wilika vata na 2 Nifai 15:20. E dau tovolea vakacava o Setani me vakarairai vinakataka na veika ca? E rawa talega ni o vakaraitaka na imatai ni 90 na sekodi ni vidio “You Will Be Freed” (Gospel Library). Na cava na vuna e matavulotaka kina nona batinisiwa na dausiwa oqo? Na cava e dau matavulotaka kina o Setani na ivalavala ca? E vukei keda vakacava o Jisu Karisito meda kakua ni vakacalai tiko mai vei Setani?

Ko na Sereki

Mai na Veisorovaki i Jisu Karisito, sa rawa kina vei keda kecega me da veisautaki, vakasavasavataki, ka sereki mai na veivakatotogani.

Me ikuri ni vakasama, raica na ilavelave ni vula oqo ena iTokani ena kena mekasini.

Valetabu e Panama City Panama. “Ni na vakataudeitaki na ulunivanua ni vale ni Turaga ena veiulunivanua, … ka ra na drodro yani kina na veimatanitu kecega” (2 Nifai 12:2).