“11–17 ni Maji: ‘E Dua na Cakacaka Talei ka Veivakurabuitaki.’ 2 Nifai 26–30,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“11–17 ni Maji. 2 Nifai 26–30,” Lako Mai, Mo Muri Au—Me Baleta na iTikotiko kei na Lotu: 2024 (2024)
Ena Liutaki Kemudou ena Ligana, mai vei Sandra Rast
11–17 ni Maji: “E Dua na Cakacaka Talei ka Veivakurabuitaki.”
2 Nifai 26–30
“Au sa parofisai vei kemudou me baleta na veisiga mai muri,” e vola o Nifai (2 Nifai 26:14). E rawa ni tukuni talega, ni vola tiko o koya me baleta na noda gauna. Ka sa vu ni noda rawa ni kauwai kina ena veika a raica: ni ra cakitaka na tamata na kaukauwa kei na cakacaka mana ni Kalou; na rabailevu ni vuvu kei na veisaqasaqa. Ia me ikuri ni veika ena gauna edaidai “na cakacaka ni butobuto” (2 Nifai 26:10,22) liutaki mai na vu-ni-meca, e tukuna talega o Nifai na “cakacaka talei ka veivakurabuitaki” e liutaka na Turaga Vakai Koya (2 Nifai 27:26) Na itakele ni cakacaka oya ena dua na ivola—e dua na ivola ka na vakaraitaki kina na lasu nei Setani ka vakasoqoni ira vata mai na yalododonu. Na ivola oqori na iVola i Momani, na cakacaka totoka ka talei oqori na cakacaka ni Lotu ni Turaga ena gauna edaidai, kei na kena talei—ena dua mada ga na tikina—sai koya ni sureti keda kece tu na Kalou, se cava sara na noda malumalumu, meda sa vakaitavi ga ena veivasokumuni.
Vakasama eso ni Vuli ena iTikotiko kei na Lotu
E vakarautaka na iVola i Momani na Kalou me baleta na noda gauna.
Ena 2 Nifai 26–27, a cavuta kina o Nifai e dua na parofisai taumada ni Aisea (raica na Aisea 29) ka vakayagataka vei ira na nona tamata kei na kedra itukutuku—na iVola i Momani. E kila o koya ena ivakatakila, ena gauna sara madaga ni se bera ni volai vakaoti na iVola i Momani, ni na yaco mai na siga me “yaga vakalevu sara vei ira na luve ni tamata” (2 Nifai 28:2 Na cava na vuna e rui bibi kina vei iko na iVola i Momani? Vakasamataka na taro oqo ni o wilika na 2 Nifai 29–30. Na cava na “cakacaka talei” (2 Nifai 27:26) e sa cakava tiko na Kalou e vuravura vakakina ena nomu bula mai na iVola i Momani?
Raica na Josefa Simici—Ai Tukutuku 1:62–65
E sureti keda o Jisu Karisito meda lako mai Vua.
E vuqa tu na dina totoka me vakasamataki ena 2 NIfai 26:23–24. Me ivakaraitaki, e rawa ni o vakasamataka na veika sa cakava o Jisu Karisito “me yaga vei ira na kai vuravura”—vakakina vei iko. E cakava vakacava o Koya me “vakayarayarataki ira kina na tamata kecega—kei iko—“ ki vua”? Na cava o vakila o sa vakauqeti kina mo cakava me idole ki na Nona ivakaraitaki ni loloma?
Wilika tikoga ka vakasaqara na dina me baleta na iVakabula ena tikina e 25–33. Raica vakatabakidua na Nona veisureti. O na vakalekalekataka vakacava vei iko na itukutuku i Jisu Karisito ena dua ga na iyatuvosa? Na serenilotu me vaka na “Bau Mai vei Jisu” (Serenilotu, naba 64) e rawa ni dolava na nomu vakasama ki na ikuri ni veivakauqeti.
Vakasamataka na sala e rawa ni vakayarayarataka kina na veitikina oqo na sala o veimaliwai kina kei ira na tani ka sureti ira me ra lako mai vei Karisito. O na raica beka eso na vakasama ena itukutuku nei Elder D. Todd Christofferson “Na Vunau ni Kena Taukeni” (Liaona, Nove. 2022, 53–56).
Raica talega na 3 Nifai 18:30–32; Dallin H. Oaks, “Na Cava sa Cakava na Noda iVakabula ena Vukuda?,” Liaona, Me 2021, 75–77; Gospel Topics, “Belonging in the Church of Jesus Christ,” Gospel Library.
Kakua ni rerevaka na vagagalu. Na taro vinaka ena taura toka e dua na gauna qai dau saumi mai. Era na gadreva na vakasama titobu, na vaqaqara, kei na veivakauqeti. Na gauna o waraka tiko kina na isaunitaro sa gauna tabu ni vakasama vakatitobu. Drovaka na veitemaki mo yalana na gauna ena nomu sauma ga na nomu taro se mo toso tale kina dua na ulutaga.
E vakasaqara o Setani me veilawakitaki.
E vuqa na lasu kei na ivadi lasu nei Setani e laurai ena 2 Nifai 28. Vakaraici ira ena tikina e 6, 8, 21–23, 29. Na cava o gadreva mo kila me baleta na lasu nei Setani? Na cava o na cakava ni saga me vakaisini iko na vu ni ca?
Sa tuvai koto e ra eso na ivolanikalou e saqata na lasu i Setani. Raica kevaka e rawa ni o vakasotara vata na ivunau dina ena veitikina oqo kei na ivunau lasu e vakaroti keda kina o Nifai ena 2 Nifai 28:
-
2 Nifai 2:17: e tiko e dua na tevoro (2 Nifai 28:22: “Au sega ni tevoro, ni sa sega e dua na tevoro”)
Raica talega na Gary E. Stevenson, “Kakua ni Mai Vakatovolei Au,” Liaona, Nove. 2019, 93 – 96
E solia tikoga na Kalou na ivakatakila me dusimaki ira kina na Luvena.
Oi keda na Yalododonu Edaidai, eda sa vakalougatataki ena levu ni vosa ni Kalou. Ia, me vaka a vakarota o Nifai, meda kakua sara ni nanuma “ni sa rauti keda!” Ni o sa wilika na ivakaro ena 2 Nifai 28:27–31 kei na 2 Nifai 29, vakasamataka na taro vakaoqo:
-
Na cava e vinakata vei au na Kalou meu vakila ka cakava ena vuku ni Nona vosa?
-
Na cava era dau “cudru” kina o ira na tamata me baleta na kena ciqomi e levu tale na dina mai vua na Kalou? (2 Nifai 28:28). E dau vaka beka oqo na veika au vakila? Ke vakakina, meu na veisau vakacava?
-
Na cava na kena ibalebale me da ciqoma na vosa ni Kalou? Au na vakaraitaka vakacava vei Koya niu vinakata meu ciqoma vakalevu na Nona vosa?
Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
E vinakati keda kece o Jisu Karisito me da lako mai Vua.
-
Mo vakavulici ira na luvemu me baleta na veisureti ni iVakabula ena veitikina oqo, e rawa ni o vosa vei ira me baleta na gauna era sureti ira kina na tamata ki na dua na soqo talei, me vaka e dua na soqo ni siganisucu. Mo ni qai wilika vata na 2 Nifai 26:23–28 ka raica na veika sa sureti keda tiko kina o Jisu meda cakava. Era na vinakata beka na luvemu me ra cakava e dua na kadi ka sureta e dua me lako mai vei Jisu Karisito. Vakayaloqaqataki ira me ra vakayagataka e dua na malanivosa mai na veitikina oqo ena nodra veisureti.
-
Na droini ena mua ni ituvatuva oqo e vakaraitaki ira na tamata mai na vuqa na ituvaki. Sa rawa mera raica na luvemu na iyaloyalo oqo ni o wilika na 2 Nifai 26:33. Sa rawa mo tokaruataka na malanivosa “Sa sureti ira na tamata kecega ko Jisu me ra lako mai Vua” ni ra dusia na luvemuni yadua na tamata ena iyaloyalo—ka qai dusi ira vakai ira. Me da lako mai vakacava vei Jisu?
-
E rawa ni vukei iko e dua na sere me baleta na lomani ira na tamata kecega, me vaka na “I’ll Walk with You” (Nodra Sere na Lalai, 140–41), e rawa ni vukei iko mo vakavulica na itukutuku ni 2 Nifai 26:33.
Na iVola i Momani e dua na veivakalougatataki.
-
Me vukei ira na luvemu me ra vakila ni iVola i Momani e “yaga vakalevu sara” (2 Nifai 28:2), sa rawa mo ologa e dua na iloloma ka me ra qai vakilakila se cava e tiko e loma. Sa rawa mera raica na ivakatakilakila ena 2 Nifai 30:3–6. Tukuna vei ira na luvemu na vuna e yaga vakalevu sara kina vei iko na iVola i Momani, ka me ra wasea talega na nodra nanuma.
-
Kerei ira na gone me ra raitayalotaka ni tukuna vei ira e dua nodra itokani, “Au sega ni gadreva meu wilika na iVola i Momani. Au sa wilika oti na iVolatabu.” Na cava eda rawa ni kaya vua na noda itokani? Me wiliki vata na 2 Nifai 29:7–11 me vulici kina na vuna e vinakata kina na Kalou meda taukena ruarua na ivola.
E dau vakavulici au vakalalai na Tamada Vakalomalagi.
-
O na rawa beka ni vakasamataka e dua na lesoni vakaraitaki ka na vukei ira na luvemu me ra raica na ibalebale ni vuli ena “vosa ena vosa.” Me ivakaraitaki, e rawa ni ra cakava vata e dua na iba se tara e dua na ka ena buloko, dua na tikina ena dua na gauna. Vakavulica vei ira na gone e dua na cakacaka ni liga ena kena veitarataravi, me vaka a vesuka e dua na ibuki bebe se droinitaka e dua na iyaloyalo. Sa rawa mo qai wilika na 2 Nifai 28:30 ka veivosakitaka na sala e vakavulica kina vei keda na Tamada Vakalomalagi e dua na dina ena kena veitarataravi.
-
E dua tale na vakasama o ya me digitaki e dua na malanivosa mai na 2 Nifai 28:30 ka veivukevuke ni kena volai, dua na vosa ena dua na gauna. E tautauvata vakacava oqo ki na ivakarau e solia kina vei keda na dina na Kalou? Na cava e dauvakaraitaka kina vei keda na dina na Kalou mai “na vosa ena vosa, ivunau ena ivunau, vakalailai eke ka vakalailai e kea” ka sega ni biu kece mai ena dua ga na gauna? E rawa vakacava me da vakaraitaka vua na Kalou ni da vinakata me da ciqoma eso tale na dina mai Vua?
Me ikuri ni vakasama, raica na ilavelave ni vula oqo ena iTokani ena kena mekasini.
Karisito ni tu e Loma, mai vei Judith A. Mehr