Na Vunau ni Kena Taukeni
Na ivunau no kena taukeni e vakatabakidua vei keda; au duavata kei Karisito ena kosipeli ni veiyalayalati.
Au gadreva meu vosa me baleta na ka au vakatoka me vunau ni lewe tudei ni Lotu i Jisu Karisito ni Yalododonu Edaidai. Na vunau oqo e wase tolu: (1) na itavi ni lewe tudei ni vakasokumunini tamata ni veiyalayalati ni Turaga. (2) na bibi ni veiqaravi kei na solibula ni lewe tudei, kei na (3) sa usutu o Jisu Karisito ni lewe tudei.
Na Lotu i Jisu Karisito ni Yalododonu Edaidai ena kena itekivu era lewena vakalevu o ira na vavalagi Yalododonu Edaidai ena Vualiku kei Amerika kei na vualiku kei Iurope ka vica wale na itaukei kei Amerika, kai Aferika e Amerika, kei na Yatu Pasifika. Oqo, ni vo e walu na yabaki kina ika 200 ni ivakananumi ni kena tauyavu, sa tubucake sara na iwiliwili ena Lotu ka sa rabailevu sara ena Vualiku kei Amerika ka vakakina ena veiyasai vuravura.
Ni sa parofisaitaki tiko mai vakabalavu na nodra vakasoqoni edaidai o ira na tamata ni Turaga sa gumatua sara, na Lotu era na lewena vakaidina na lewenivanua ena veimatanitu, veimataqali, duivosavosa, kei na tamata.1 Oqo e sega ni cakacaka levu vakafikataki se vakasaurarataki ni veimataqali duidui ia sa cakacaka cecere ga vakai koya eda sa namaka tiko, e kilai kina ni lawa ni kosipeli sa sokumuna mai na veimatanitu kei na tamata kece.
Eda sa kalougata dina meda raica ni o Saioni sa mai tauyavutaki tiko ena gauna vata ga ena veivanua lelevu yadua kei na noda itikotiko raraba. Me vaka a kaya o Parofita Josefa Simici, o ira na tamata ni Kalou ena yabaki ni bula yadua sa nanamaki ena yalo mamarau ki na siga nikua, ka “sai keda na tamata sa vinakata na Kalou sa digitaka me kauta mai na lagilagi ena iotioti ni gauna oqo.”2
Ni soli mai na madigi oqo, eda na sega ni vakatara na veivakaduiduitaki, veicacati vakayavusa, se veisei tale eso me tiko ena Lotu i Karisito edaidai. Sa vakaroti keda na Turaga, “mo dou duavata sara; ia kevaka dou sa sega ni duavata, dou sa sega ni noqu.”3 E dodonu meda gumatuataka na kena cavuraki na lewa tani kei na veivakaduiduitaki mai na Lotu, mai na noda itikotiko, ka vakabibi mai na yaloda. Ni tubu tiko na iwiliwili lewe ni Lotu ka sa rabailevu sara, na noda veikidavaki me yaloda vinaka dina . Eda sa tiko veilomani.4
Ena iMatai ni Nona iVola ki Korinica a kaya kina o Paula ni ira kece sa papitaiso ki na Lotu era sa duabau ena yago i Karisito:
“Me vaka sa duabau ga na yago, ka sa vuqa na kena tikina, ia na tiki ni yago kecega, sa vuqa ga, ka sa duabau ga na yago: sa vakatalega kina na Karisito.
“Nida sa papitaisotaki kece ga kina yago e dua bauga e na Yalo Tabu e dua bauga, se da kai Jutia se da kai tani, se da bobula se da itaukei; eda sa vagunuvi talega e na Yalo Tabu e dua bauga. …
“Me kakua kina ni veisei na yago; ka me veinanumi vakatautauvata na veitikina vakai ira.
“Ia kevaka sa rarawa e dua na tikina, sa rarawa vata na tikina kecega, se dua na tikina sa dokai, sa reki vata na tikina kecega.”5
Na yalo mo taukeni sa ka bibi kina keda ituvaki vakayago, vakasama, ka vakayalo. Ia, sa yaco talega ena so na gauna eda rawa ni vakila yadua nida sega ni okati. Ena gauna luluqa eso, eda rawa ni vakila nida sega ni rawata na itagede cecere ni Turaga se na nodra nanamaki na tamata.6 Eda na rairai dau vakasaurarataka eso—se vei keda mada ga—e sega ni namaka tiko na Turaga. Eda na rairai veivosaki ena sala duatani ni yavubula ni yalo sa yavutaki ena rawa ka se veikacivi eso, ia oqo e sega ni vakarau ni noda tu e mata ni Turaga. “Ia sa raica na yalo ko Jiova.”7 Sa kauwai kina noda gagadre kei na igu ni yaloda kei na keda icavacava.8
A vola o Sister Jodi King na veika a sotava ena veiyabaki sa oti:
“Au a sega ni bau vakila niu sega ni lewe tudei ena lotu me yacova keirau sa tekivu sotava na dredre kei Cameron na watiqu na sega ni vakaluveni. O ira na gone kei na vuvale era a kauti au mai meu raica na marau ena lotu sa tekivu me vakavuna na noqu lolosi ka au sa rarawa kina.
“Sa tekivu meu vakila ni sega na gone meu roqota se kato ni daipa e ligaqu. …
“Na kena dredre duadua oya na imatai ni Sigatabu ena dua na tabanalevu vou. Baleta ni sega na luvei keirau, keirau a tarogi ke keirau se qai vakawati vou ga ka gauna cava me tekivu kina na vuvale. Au sa lei mataitaka sara na noqu dau sauma na veitaro oqori ka qarauna mera kakua ni vakaleqai au—au kila ni,era sega ni via vakamosia na yaloqu.
“Ia, ena Sigatabu oqo, na saumi ni taro oqori a ka dredre sara. Keirau sa qai kila kina, ni sa seva tale na neirau nuinui—ka sega ni bukete.
“Au a curu yani kina soqoni ni sakaramede ena yalolailai, ka sauma na taro dau tarogi wasoma ‘mera veikilai taki ira’ ia sa dredre sara vei au. …
“ Ena Matawilivola ni Sigatabu saraga a kavoro kina na yaloqu. Na lesoni—a nakiti me baleta na ilesilesi vakalou ni tina—sa veisau totolo sara me gauna ni talaucaketaki ni bula. E luluvu na yaloqu ka turu nomodi na waini mataqu e baluqu noqu rogoca nodra kudru na marama me baleta e dua na kalougata au na solibula kina.
“Au a curu yani ituba. Taumada, au sega ni via lesu tale. Au sega ni via sotava tale na yalo ni galili oya. Ia ena bogi oya, ni oti neirau veitalanoa kei watiqu, keirau kila ni dodonu me keirau gole tiko ga i lotu sega walegani gadreva keda kina na Turaga ia baleta talega ni keirau kila tu na reki e yaco mai ena vakavoui ni veiyalayalati ka vakila na Yalo ena lotu sa uasivita na rarawa au a vakila ena siga o ya. …
“Ena Lotu, era tiko kina o ira na vada, sere oti, kei na tawa vakawati; o ira na lewe ni vuvale era sa lutu mai na kosipeli; o ira era tauvimate tudei se bula dredre vakailavo; lewenilotu era veivinakati vakamataqali vata; lewenilotu era sasaga tiko mera valuta na veitotogani se vakatitiqa, lewenilotu vou; ira na toki vou mai, itubutubu tiko duadua; kei ira tale eso. …
“Sa sureti keda na iVakabula meda lako mai Vua—se cava ga na keda ituvaki. Eda gole mai ki lotu meda vakavouia na noda veiyalayalati, meda tosoa cake noda vakabauta, meda kunea na vakacegu, ka cakava na veika a cakava vakauasivi ena Nona bula—qaravi ira na tamata era vakila ni ra sega ni taukeni.”9
A vakamacalataka o Paula ni lotu kei ira na kena vakailesilesi sa solia na Kalou “mera vakavinakataki kina o ira sa lotu, me ia na cakacaka ni talatala, me vakatata taki cake nayago i Karisito:
“Meda yaco sara o keda kecega meda lomavata ena vakabauta, ka kila sara na Luve ni Kalou, meda tautauvata kei na ivakarau ni tamata dina, era sa sinai sara kei Karisito.”10
Sa ka vakaloloma, me dua e vakila ni sega ni sotava na veika vinaka ena bula vakataucokotaki, era tinia ni ra sega ni okati ena isoqosoqo sa tauyavutaka na Kalou me vukea noda torocake ki na veika eda gadreva.
Meda laiva ga na lewa me nona na Turaga kei ira sa lesia o Koya ka marautaka mo loloma ka veivukei vakai keda na kena eda rawata rawa. Meda sa qai kerei Koya me vakaraitaka vei keda na sala, ena veisiga yadua, meda “kauti ira mai … na dravudravua, kei na gera, kei na lokiloki, kei na mataboko [oya, na tamata kecega]” kina kana magiti levu ni Turaga.11
Na ikarua ni usutu ni vunau mo lewe tudei oya me baleta tiko na noda dui cau. Dina ga nida sega tu ni vakasamataka, e vuqa na noda vakataukeiti e lako mai ena noda veiqaravi kei na solibula eda cakava vei ira eso kei na Turaga. Noda raica vakasivia na noda dui gagadre se noda tiko vakacegu ena rawa me vakataotaka na noda gagadre me da okati.
Eda saga meda muria na ivunau ni iVakabula.
“Ia ko koya yadua vei kemudou sa cecere me nomudou dauniveiqaravi. …
“Me vaka sa sega ni lako mai na luve ni tamata me qaravi, ka me dauveiqaravi ga, ka me solia na nona bula me kedra ivoli e lewevuqa.”12
Meda okati ena lako mai nida waraka ia nida dolele yani meda veivukei vakai keda.
Nikua, e ka ni rarawa, na vakatabui keda kina dua na inaki, se solibula ki vua e dua e sa sega ni vakarau ni bula. Ena dua na tiki ni Mekasini ni Deseret ena yabaki sa oti, a vola kina o Rod Dreher na nona veivosaki kei na dua na tina gone mai Budapest:
“Au a vodo tiko ena dua na lori e Budapest kei na dua … na itokani se qai yabaki 30—me sa yacana o Kristina—ena ilakolako kina dua na veivakatarogi vei dua na marama yada [lotu Vakarisito] rau a sotava vata kei watina sa takali na veivakararawataki ni matanitu vakomunisi. Ni toso yani kina loma ni siti, a talanoataka o Kristina na dredre me dau tukuna na ka dina vei ira na itokani era yabaki vata baleta na dredre a sotava ena vakawati ka tinadra na gonelalai.
“Na dredre nei Kristina sa kena ivakarau vei ira na goneyalewa era vulica tiko na itavi vakatina kei na vakawati—ia na ivakarau tudei ena kedra maliwa nona itabavata o ya ni dredre ni bula sa na tarova na bula vinaka ka dodonu me valuti. E rau dau veiba beka vakaveiwatini ena so na gauna? Me sa na biuti watina ga, era kaya. Era vakacudrui koya tiko beka na luvena? Me qai kauti ira ga kina vale ni veiqaravi.
“E lomaleqataka o Kristina nira na sega ni ciqoma na itokani na veivakatovolei o ya, kei na rarawa e sa tiki ni bula—ka rairai tiki ni dua na bula vinaka, ke veivakavulici na rarawa oya meda vosota, lomasoli ka dauloloma. …
“… Na kenadau ni vulici ni tamata lotuena Univesiti e Notre Dame o Christian Smith a kuneani vuqa na [yabaki] ni uabula 18–23 era vakabauta ni bula raraba sa dua ga na ‘soqoni vata ni galala ni tamata yadua me ra marautaka na bula.’”13
Mai na vakanananu oqo, na veika kecega o kunea ni dredre sa ‘ivakarau ni veivakasaurarataki.’”14
Kena veibasai, ira noda painia e liu sa okati ira vakabibi, duavata, ka nuitaka na Karisito ena nodra solibula mera kaulotu, tara valetabu, biuta nodra itikotiko vinaka, a vakacacani ka tekivu tale, kei na sala e vuqa era vakatabui ira kei na iyau ena inaki kei Saioni. Sa lomadra dina mera solibula mera mate kina ke gadrevi. Eda sa mai kalougata kece ena vuku ni nodra vosota. Sa dina talega oqo vei ira e vuqa nikua era na vakayalia nodra vuvale kei na itokani, calata na madigi ni cakacaka, se sotava talega na vakaduiduitaki se tawavosoti ena vuku ni ra sa papitaiso. Na kedra isau, era sa yaloqaqa mera okati ena kedra maliwa na tamata ni veiyalayalati. Na solibula cava ga eda cakava ena inaki ni Turaga ena vukea me vakadeitaki keda Vua a solia na Nona bula me isau kina vuqa.
Na iotioti ni usutu ka bibi duadua ni vunau mo okati oya na uto ni ilesilesi i Jisu Karisito. Eda sega walega ni lewena na Lotu meda mai veivakacokotaki, ena kena bibi. Eda mai lewena meda mai vueti ena yalovinaka kei na loloma i Jisu Karisito. Eda mai lewena meda vakadeitaka na cakacala vakalotu ni veivakabulai kei na noda bula vakacerecerei kei ira eda lomana ena yasa ruarua ni ilati. Eda lewena meda vakaitavi ena cakacaka levu meda tauyavutaki Saioni me vakavakarau kina lesu mai ni Turaga.
Na Lotu sa ivakatawa ni veiyalayalati ni veivakabulai kei na bula vakacerecerei e solia na Kalou vei keda ena cakacaka vakalotu ni matabete tabu.15 Ena kena maroroi na veiyalayalati oqo eda sa taura kina na yalo cecere ka titobu meda sa taukeni. A vola vakaoqo o Peresitedi Russell M. Nelson:
“Ni daru sa cakava e dua na veiyalayalati kei na Kalou, na nodaru veiwekani kei Koya sa yaco me voleka cake ni bera na veiyalayalati. Ia oqo eda sa vauci vata. Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka sega vakadua ni da vakawalena na Nona dauvosoti keda ena yalololoma. Oi keda yadua sa tiko ena tikina totoka ni yalo ni Kalou.
“… O Jisu Karisito sa kena ivakadei ena veiyalayalati oqori (raica na Iperiu 7:22; 8:6).” 16
Ke da nanuma tiko oqo, na nanamaki levu ni Turaga vei keda ena veiuqeti, sega ni da yalolailai.
Eda na vakila na reki nida sasaga, keda yadua kei na lewevuqa, “sa sinai sara kei Karisito.”17 Dina ni yaco na leqa eso kei na vakatao ena ilakolako, sa dua tiko na sasaga qaqa. Eda na veilaveti ka veivaqaqacotaki ni sasagataki na salatu cere, ka da kila se cava sara na veika dredre se veivakataotaki kina kalougata yalataki, sa rawa “mo dou vakacegu [na Karisito] sa vakamalumalumutaki vuravura,”18eda sa tiko kei Koya. Ena duabau kei na Tamana , Luvena, kei na Yalo Tabu e sega ni vakatitiqataki ni sa usutu mo okati kina.19
Oqo gona, na vunau mo taukeni sa kena usutu oqo—keda yadua sa vakadeitaka: a mate o Jisu Karisito ena vukuqu; sa nanuma ni sa rauti au na Nona dra. E lomani au ka rawa ni veisautaka kece na noqu bula. Niu sa veivutuni, na Nona loloma soliwale ena vakavoutaki au. Au sa duabau kei Koya ena veiyalayalati ni kosipeli; au sa taukeni ena Nona Lotu kei na matanitu; kau sa okati ena Nona inaki mera vueti na luvena taucoko na Kalou.
Au sa vakadinadinataka nio sa taukeni, ena yaca i Jisu Karisito, emeni.