Vakaisulutaki Iko ena Nomu Kaukauwa, Saioni
E dodonu meda vakadikeva ena yalo masumasu vakagumatua na veika eda vakabibitaka ena noda bula vakayago kei na bula vakayalo.
Na vosa vakatautauvata era sa ivakarau cecere ni Turaga o Jisu Karisiuto ni nona tuvanaka vakavuku na veivakavulici Ena kena rawarawa, na vosa vakatautauvata ni iVakabula era sa italanoa me vakatauvatani kina na dina vakayalo ki na ka vakayago kei na bula ni tamata. Me vakataka, na kosipeli ni Veiyalayalati Vou sa sinai tu ena ivakavuvuli sa vakatauvatani ki na matanitu vakalomalagi ki na sore ni mosita,1 ki na dua na mataniciva talei,2 ki na itaukei ni vale kei na tamata cakacaka ena nona were ni vaini,3 ki na tini na goneyalewa,4 kei na vuqa tale. Dua na gauna ni veiqaravi ni Turaga mai Kaleli, a tukuna na ivolanikalou ni “sa sega ni vosa walega vei ira sa vosa vakatautauvata tikoga.”5
Na inaki se itukutuku ni dua na vosa vakatautauvata e sega ni vakamatatataki vakataucoko. Ia, na italanoa e tukuna walega na dina vakalou vei koya sa ciqoma me yaga ki na nona vakabauta na Kalou, vakavakarau vakayalo yadua, kei na yalodina me vulica. Ia, na tamata yadua me taurivaka nona bula galala ka guta me “kerea, vakasaqara, ka tukituki”6 me kunea na dina sa umani tiko ena vosa vakatautauvata.
Au sa masu vagumatua me vakararamataki keda yadua na Yalo Tabu ni da raica eke na bibi ni vosa vakatautauvata ni kana magiti ni vakamau vakatui.
Na Kana Magiti ni Vakamau Vakatui
“Sa vosa ko Jisu … ka tukuna vei ira na vosa vakatautauvata, ka kaya,
“Sa tautauvata na matanitu vakalomalagi kei na dua na tui, ko koya sa cakava na magiti ni vakawati ni luvena tagane,
“A sa talai ira yani na nona tamata me ra lakovi ira ka sureti ki na kana magiti ni vakawati: a ra sa sega ni via lako mai.
“Sa qai tala tale ko koya na tamata tani eso, ka kaya, Laki kaya vei ira era sureti, Raica kau sa vakarautaka oti na noqui vakasigalevu: sa vakamatei eso na noqu pulumokau, kei na noqu manumanu uro, ka sa vakarautaki oti tu na ka kecega: dou lako mai ki na magiti ni vakawati.
“A ra sa vakaweleweletaka, a ra sa dui lako, e dua ki na nona were, ka dua ki na nona veivoli.”7
Ena gauna makawa, dua vei ira na gauna marautaki ena bula vaka Jiu o ya na marautaki ni vakamau—na soqo e dau taura me dua se rua na macawa. Na soqo vakaoqo e dau vakarautaki vakavinaka sara, ka ra sureti taumada e liu na vulagi, ka veivakananumi tale ena siga me sa tekivu kina na soqo. Na veisureti mai vua na tui vei ira na nona tamata ki na vakamau vakaoqo sa vakatokai bibi toka me ivakaro. Ia, e vuqa vei ira na vulagi a sureti ena vosa vakatautauvata oqo a sega ni yaco mai.8
“Na cata na tiko ena kana magiti ni tui [sa itovo] e saqata … na lewa vakatui ka sa ivakarau ni tamata yadua e beca kina na veiliutaki vakatui kei na luvena. … Na nona lako tani na tamata o ya ki na nona were kei koya ki na nona [cakacaka ni bisinisi]”9 e tukuna tiko nodra vakaliuca na ka cala ka vakawalena na lewa ni tui.10
E tomani na vosa vakatautauvata:
“Sa qai kaya ko koya vei ira na nona tamata, Sa vakarautaki oti tu na magiti ni vakawati, a ra sa sega ni yaga kina ko ira a sureti.
“O koya mo dou qai lako yani ki na veisalatu, ia ko ira kecega dou na kunea, dou sureti ira mai ki na magiti ni vakawati.
“Era sa qai lako yani ko ira na tamata oqori ki na veisalatu, ka vakasoqoni ira kecega era sa kunea, se ra ca se ra vinaka: a sa mai tiko mera kania na magiti ni vakawati.”11
Na kena ivakarau ni gauna o ya ni o koya sa veisureti ki na magiti ni vakamau—ena vosa vakatautauvata oqo, na tui—me vakarautaka na nodra isulu na vulagi ni vakamau. Na isulu ni vakamau oqo e rawarawa tu ga, na sulu balavu sau lailai era dara kece na vulagi Ena sala oqo, na itutu kei na ituvaki e biu tani, na tamata yadua ena vakamau era na veicurumaki vakatautauvata.12
O ira a sureti mai na veisalatu ki na vakamau ena sega na nodra gauna se ivurevure mera volia na isulu totoka me vakavakarau ki na soqo. Sa yaco kina, na tui ena solia na isulu vei ira na vulagi oqo mai na nona kovate ni isulu. Na tamata kece a soli vei ira na madigi mera vakaisulutaki ira ena isulu vakatui.13
Ni sa curu mai na tui ki na olo ni vakamau, a vakaraici ira na vulagi sa tiko ka raica sara ni dua a sega ni dara tiko na isulu ni vakamau. Sa qai kau mai na tamata oqo, ka taroga na tui: “Noqu itau, e vakaevei ni ko sa curu mai ki ke ni sa sega vei iko na isulu ni vakawati? A sa vagagalu ga ko koya.”14 Ena kena bibi, a taroga na tui, “Cava na vuna ko sa sega ni dara kina na isulu ni vakamau, dina ga ni a soli vei iko e dua mo dara?”15
Sa laurai vua na tamata oqo ni a vakaisulu tu vakaca ena soqo levu oqo, ia na malanivosa, “A sa vagagalu ga,” sa tukuna tiko ni sa sega na nona ulubale.16
E vakarautaka o Elder James E. Talmage na ivakamacala matailalai oqo me baleta na bibi ni veika e vakayacora na tamata oqo: “Ni vulagi e sega nona isulu ni vakamau oqo a nona cala na vakawelewele, veibeci vakaidina, se so tale na cala ni veicacati, sa tukuni tu vakamatata. Taumada na tui a yalololoma sara, ka a taroga ga se a curu mai vakacava na tagane ni sega tu na nona isulu ni vakamau. Kevaka a vakamacalataka beka na tagane o ya na vu ni kena irairai, se me a solia e dua na ulubale vinaka, a rawa sara ga me vosa; ia e tukuni vei keda ni a vagagalu ga. Na lewa ni tui a soli wale yani vei ira kece a kunea ko ira na nona tamata; ia o ira yadua a curu ki na vale ni tui ena katuba; ni bera ni ra curu ki na olo ni kana, me na rairai mai kina na tui, na tamata yadua mera sa vakaisulu vinaka tu; ia vei koya a duatani, ena dua tale na sala a curu mai kina; ka sega ni lako curumi ira na ivakatawa ena katuba, a curu kina vakailoa.”17
E dua na daunivola Vakarisito o John Reid, a raica ni nona cata na tagane o ya na isulu ni vakamau e tukuna tiko na nona veibeci vua na tui kei na luvena. A sega walega ni sega na nona isulu ni vakamau, ia a lewa ga me kua ni dara e dua. A saqata vakaukauwa me vakaisulu vakavinaka ena soqo o ya. Na lewa ni tui a totolo ka dodonu sara: “Dou vesuka, a yavana kei na ligana, ka kauti koya tani, ka biuta ki na butobuto e tautuba, ena dau tagi kina ka vakasequruquru bati.”18
Na lewa ni tui vua na tagane e sega walega ni yavutaki ena vuku ni sega na nona isulu ni vakamau—ia na kena dina, a lewa sara ga me kua ni dara e dua. A gadreva na tagane me rokovi ni tiko ena kana ni vakamau ia a sega ni via muria na lewa ni itovo vakatui. A vinakata me cakava na lomana vakai koya. Na nona a vakaisulu vaka ca e tukuna tiko ni yalona sa saqata tiko na tui kei na nona ivakaro.”19
Sa Lewevuqa Era sa Kacivi ka Lewe Lailai Era Sa Digitaki.
A tini na vosa vakatautauvata ena ivolanikalou titobu oqo, “Ni ra sa lewevuqa era sa kacivi ka lewe lailai era sa digitaki.”20
E veivakurabuitaki, a veisautaka o Josefa Simici na tikina oqo mai na Maciu ena nona ivakadewa veiuqeti ni iVola Tabu: “Ni ra sa lewevuqa era sa kacivi, ka lewe lailai era sadigitaki; sa qai sega e dua sa dara tiko na isulu ni vakamau.” 21
Na veisureti ki na magiti ni vakamau kei na digidigi mo kana ena magiti era sa sema ia e duidui. Sa sureti na tagane kei na yalewa kecega. Vua e dua sa rawa me ciqoma na veisureti ka dabe ena kana magiti—ia se bera ga ni digitaki me kana baleta ni se bera ni vakaisulu vinaka tiko ni vakamau ni saumaki mai ena vakabauta na Turaga o Jisu kei na Nona loloma vakalou. Koya gona, sa kacivi keda na Kalou ka da sa dui sauma na veikacivi o ya, ka vuqa era sa kacivi ia e lailai era sa digitaki.22
Meda na digitaki se sa digitaki e sega ni tuvaki taucoko sa vakatikori mai. Ia, sa nodaru ga na digidigi me daru digitaki ena ivalavala dodonu mai na nodaru galala ga.
Yalovinaka raica na vakayagataki ni vosa na digitaki ena tikina rogolevu e tarava mai na Vunau kei na Veiyalayalati:
Raica sa lewe vuqa era sa kacivi, ia sa lewe lailai ga sa digitaki. Ia a cava era sa sega ni digitakikina?
Sa baleta ga ni sa rui domona na lomadra na veika ni vuravura, ka ra gadreva mera dokai kina maivei ira na tamata.”23
Au vakabauta na mana ni vetikina oqo sa matata vinaka tu. Na Kalou e sega vua na yacadra era taleitaki ni kena meda sa nuinui kina me tiko kina na yacada. E sega ni yalana o Koya era “sa digitaki” me lewe vica ga. Ia, na yaloda, na noda gagadre, noda doka na veiyalayalati kei na cakacaka vakalotu tabu, noda talairawarawa ki na ivakaro, ka vakabibi, na loloma veivueti ni iVakabula sa vakadeitaka noda na wili meda dua vei ira sa digitaka na Kalou.24
“Ni da sa cakacaka vagumatua me da volavola, me da vakauqeti ira kina na noda kawa, kei ira talega na wekada, me ra vakabauti Karisito, ka vakaduavatataki tale kei na Kalou; ia eda sa kila ni da sa vakabulai ena loloma soli wale, ni sa oti sara na veika kece eda rawa ni cakava.”25
Ena osooso ni noda bula e veisiga kei na veimedreyaki ni itovo vakavuravura eda bula tiko kina, eda na rairai vagolei mai na veika tawamudu e bibi sara ena noda cakava na mamarau, vakaiyau, rogo, kei na viavia turaga eda sa vakaliuca tiko. Na noda cakacaka veivakaogai nikua ena “veika ni vuravura” kei “na nodra veidokai na tamata” ena rawa ni liutaki keda meda biuta na noda itutu vakayalo ni sucu ena vuku ni rourou ka sa lailai sobu.26
Yalayala kei na iVakadinadina
Meu tokaruataka na kerekere ni Turaga vei ira na Nona tamata a solia mai o parofita Akeai ena Veiyalayalati Makawa: “Ia oqo sa kaya kina ko Jiova ni lewevuqa; Dou vakananuma mada ki na nomudou ivalavala.”27
Oi keda yadua meda dikeva na noda veika vakayago ka vakayalo me vakaliuci ena dina kei na masumasu meda kila kina na veika ni noda bula e rawa ni tarova na kalougta levu sa lomana na Tamada Vakalomalagi kei na noda iVakabula me solia vei keda. Sa vakaidina sara, na Yalo Tabu ena vukei keda meda raica na keda ituvaki dina sara.28
Ni da vakasaqara vakadodonu na isolisoli vakayalo ni mata me raica kei na daliga me rogoca,29 au yalataka ni da na kalougata ena igu kei na lewa me qaqaco noda isema ni veiyalayalati vua na Turaga. Eda na ciqoma talega na kaukauwa ni bula va-Kalou ena noda bula30—ka yaco meda kacivi ka digitaki talega ki na kana magiti ni Turaga.
“Mo yadra mai; mo yadra; vakaisulutaki iko ena nomu kaukauwa, Saioni.”31
“Ni sa dodonu me torocake tiko ga na totoka kei na savasava kei Saioni; io me vakalevutaki na kena iyalayala; me vakadeitaki na kena vei iteki; io, au sa kaya vakaidina vei kemudou, me tucake mai ko Saioni ka tokara na nona isulu vakaiukuuku.”32
Au cavuta ena reki na noqu ivakadinadina bula ena dina vakalou ka dina bula ni Tamada Tawamudu kei na Luvena Lomani, ko Jisu Karisito. Au sa vakadinadinataka ni o Jisu Karisito na noda iVakabula ka Dauveivueti, ka sa bula tiko o Koya. Kau sa vakadinadinataka talega ni Tamana kei na Luvena a rairai vei cauravou Josefa Simici, ka sa tekivu kina na Vakalesuimai ni kosipeli ni iVakabula edaidai. Meda sa qai dui vakasaqara ka vakalougatataki ena mata me raica kei na daliga me rogoca, sa noqu masu ena yaca tabu i Jisu Karisito, emeni.