Vakatisaipeli Tudei
Eda na kune nuidei vakayalo kei na vakacegu ni da bucina tiko na itovo vakalou kei na ivakarau savasava koya na tauri keda ka vakaudreva tiko na noda vakabauta.
Ena vula i katakata se qai oti qo, e sivia e 200,000 na noda gone mai na veiyasa ivuravura era tubu ena vakabauta ena dua na koniferedi macawa dua ni Me iSakisaki ni Tabagone, se koniferedi ni MST (FSY). Se qai oti ga na tu duadua mai na matedewa raraba, e ivakaraitaki ni vakabauta na Turaga vei ira e vuqa me ra tiko ena soqoni oqo. E vuqa vei ira na gone era vakaitavi era muria e dua na sala tautauvata me vakadodonu cake ka mua ki na saumaki titobu. Ena mua ni macawa oya, au qai taroga, “E vakacava beka nodra koniferedi oya?”
E so era sauma vaka oqo: “Io, na Moniti au a cudruvi noqu Na baleta ni cakava meu lako mai. Kau sega ni kila e dua. Kau sega ni kila ni oqo sa baleti au. Ka na sega noqu itokani. Ia nikua sa Vakaraubuka, kau sa vinakata ga meu tiko eke. Au via vakila na Yalotabu ena noqu bula. Au via bula vaka oqo.”
E tiko nodra italanoa yadua ni gauna era kila matata kina kei na isolisoli vakayalo e savati ira ka tuberi ira ena sala e vakadodonu cake ni tubu. A veisautaki au talega na vulaikatakata oqo ni MST (FSY) niu raica na Yalo ni Kalou e sega ni guce ena Nona sauma yadua tiko na gagadre savasava nei ira na gone era kune veivakauqeti me ra vakararavi Vua ena macawa dua.
Me vakaga e dua na waqa levu kaukamea rarama ena wasaliwa, eda bula tu ena dua na vanua rawarawa ni rawai na noda kilaka rarama duadua kevaka e sega ni qarauni ena rawa ni ceuti, qai veveka ka yaco sara me vurumemea.
Na Cava Eso na ka e Rawa ni da Cavaka me da Maroroya tiko kina na Caudre ni Noda Kila Dina?
Na veika eda lako curuma ena koniferedi ni FSY, na keba, na soqoni ni sakaramede, kei na rara ni kaulotu e rawa ni caudre kina na noda vakadinadina, ka kauti keda ena dua na tubu vakayalo me da raica na vanua e kauta mai na vakacegu. A gadrevi tikoga me keimami dau vosota ka “toso ki liu ka tudei vei Karisito” (2 Nifai 31: 20) ka kakua ni lutu tale i muri? Taumada e dodonu me da cakava eso na ka ena kauti keda ikea, vakadromuci keda ena ivolanikalou, kei na veiqaravi ena yalo dina.
Eso vei keda, ena gadreva e dua na ivakarau ni vakararavi vua na Turaga me vaka na tiko ena soqoni ni Sakaramede. Na gauna o yaco kina ikea, na veivakayarayarataki veivakabulai ni sakaramede ni Turaga, ena curuma na noda vulica na kosipeli, kei na nodra veiqaravi na lewe ni Lotu ena kauti keda tiko ena vanua cere.
E Lako Mai Vei na Kaukauwa ni Sokomuni vata ena Matanavotu?
Ena MST (FSY) e sivia e drau na udolu vakacaca na itabagone era mai kila sara vakavinaka na iVakabula ena nodra vakayagataka e dua na ivakarau rawarawa ni soqoni vata, ni ra soqoni e rua se sivia ena Yacana (raica na Maciu 18:20), ena vulici ni kosipeli kei na ivolanikalou, lagasere vata, masu vata, ka kune vakacegu i Karisito. Oqo e dua na iwali kaukauwa ni veivakayadrataki vakayalo.
O ira na veitacini tu veiyawaki era sa dui lako i vale me ra bulataka na ibalebale ni “vakararavi vei Jiova” (Vosa Vakaibalebale 3:5; itoko ni itabagone) ni ra coriti ena veimataqali rorogo e vuravura sega ni tarovi rawa. E dua na ka me da “rogoci Koya” (Josefa Simici —Ai Tukutuku 1:17) ena dua na vanua vakanomodi kei na dolavi ni ivolanikalou. Ia e dua tale na ivakatagedegede me tuberi tiko na bula vakatisaipeli ena vuravura sosa ka me da sasaga kaukauwa me da “rogoci Koya” kevaka madaga e tiko na nuiqawaqawa kei na ririko ni nuidei. Me kua na vakatitiqa: era momoqaqa na itabagone ni vakatabakidua na yalodra kei nodra vakasama me tucake vakadodonu mai na veiveisau ni bula veimuayaki ni vakavuvuli.
Na Cava E Rawa ni Cakava na Vuvale me Tomana Tikoga na iTagede e Tauyavutaka na iTaviqaravi ni Lotu?
Au a veiqaravi vaka turaga watini peresitedi ni Goneyalewa. Dua na bogi a noqu itavi meu tuva na kuki ena foya, na watiqu a veiliutaki ena dua na soqoni ni tubutubu kei ira na luvedra yalewa era vakavakarau me ra lako ki na keba ni Goneyalewa ena macawa tarava. Ni oti na ivakamacala ni vanua mera tu kina kei na cava me ra kauta mai, tukuna o koya, “Na mataka ni Tusiti ni ra sa sobu na luvemuni yalewa me ra vodo ki na basi, ni mokoti ira. Kisivi ira, ni bera na vaka moce—baleta ni ra na sega ni lesu mai.”
Au a rogoca ni dua e cegucegu waruta ena kidroa, qai liaca ni o au ga. “Sega ni lesu mai?”
Sa qai tomana o koya: “Ni o sa vakasoburi ira na yalewa ena mataka ni Tusiti, era na biuta tu mai na kosakosa ni veika lalai ka vakayagataka e dua na macawa ena vuli vata ka tubu kei na vakararavi vua na Turaga. Keimami na masu vata, lagasere vata ka vakasaqa vata ka veiqaravi vata ka veiwasei ni vakadinadina vata ka cakava na ka e vakatara meda vakila na Yalo ni Tamada Vakalomalagi, ena macawa taucoko, me yacova e curuma na nodra sui. Ena Vakarauwai, o ira na goneyalewa era na sobu mai na basi ena sega ni tautauvata kei ira na goneyalewa o a vakasobura ena Tusiti. Era sa ibulibuli vou. Kevaka o vukea me ra tomana tiko na ivakatagede oya, era na vakurabuitaki iko. Ena tomani tikoga na nodra veisau kei na tubu. Vakatalega kina na nomu vuvale.”
Ena Vakarauwai o ya, na veika a nanumi a qai yaco. Noqu vakavodoka tiko na vale laca, au rogoca na domoi watiqu ena woodsy amphitheater na vanua era a soqoni kina na yalewa ni bera nodra lesu i vale. Au rogoca koya sara ni sa kaya mai, “Oi, oqo o iko. Keimami saravi kemuni toka na macawa taucoko. Neitou goneyalewa ni Vakarauwai.”
O ira na itabagone qaqa e saioni era sokota tiko edua na gauna veidreti. Na kune marau ena vuravura e parofisaitaki kina na veivakarusai kevaka o sega ni tiki ni vuravura oya, ka vakabuwawataka na veika vakalou, sa ikoya veika era sasagataka. Rauta ni dua na drau na yabaki sa oti, e tukuna o G K. Chesterton me vaka ga a raica o koya na gagadre ni usutu na vuvale ka tokona na lotu ni tukuna o koya, “Me da vakila na vuravura levu me vaka na vale ni tui levu ni ogre, me ravuti ena cagilaba, kei na noda dui vale , na vanua eda rawa ni lesuva ena yakavi” (Orthodoxy [1909], 130).
Vinaka ga, ni ra na sega ni valu duadua. Era tiko vata ga. Ka o ni tiko talega. Era muria na parofita bula, Peresitedi Russell M. Nelson, koya e veiliutaki ena kilaka kei na rai ki liu ni dua na daurairai ka vunautaka na veika eda na sagata tiko ena gauna oqo—vakasokomuni kei Isireli—ena vakaitamera ka lagilagi (raica na “Nuinui kei Isireli” [worldwide youth devotional, June 3, 2018], HopeofIsrael.ChurchofJesusChrist.org).
Na vula ikatakata seqai oti qo, keirau kei na watiqu o Kalleen, a veisau waqavuka e Amsterdam, na vanua au a kaulotu kina e vuqa na yabaki sa oti. Oti e vica na vula noqu saga tiko meu vulica na vosa vaka Dutch, na waqavuka KLM keirau a vodo tiko kina sa sasaga tiko me ro, ka sa kacivaka sara o Kavetani ena PA e dua na itukutuku au sega ni kila vinaka sara. Ni oti neirau vakanomodi, sa tukuna sara mai noqu itokani, “Au kila oya na vosa vaka Dutch.” Keirau rai cake, sota na ka keirau vakanananutaka: Sa yali kece.
Ia e sega ni yali kece. Au kurabui ena neirau ikalawa levu ni vakabauta ena neirau taubaletaka na rara ni waqavuka ki na cakamana e sovaraki vei keirau vaka daukaulotu, e kauti au vakasauri mai ki na gauna oqo vua e dua na daukaulotu bula ka cegu tiko ka vodoka tiko na vaqavuka ena lesulesu ki vale. A vakatakilai koya ka taroga, “Peresitedi, na cava meu cakava ena gauna oqo?” Na cava me‘u cakava me‘u kaukauwa tikoga?
Oqo na taro vata ga e tiko ena nodra vakasama na itabagone ni ra biubiu yani ena koniferedi ni MST (FSY), keba ni tabagone, lako ena valetabu, kei na veigauna era vakila kina na kaukauwa mai lomalagi: “Ena rawa ni vuki vakacava na noda lomana na Kalou meda na tisaipeli tudei?”
Au vakila ni tubu na noqu loloma vua na daukaulotu mata-serau oqo ena iotioti ni vica na auwa ni nona kaulotu, ka ena gauna oya ni vakanomodi ni Yalo, au rogoca ni sa luluvu na domoqu kau kaya, “E sega ni tukuni mo daramaka na beji mo tubera kina na Yacana.”
Au via biuta na ligaqu ena tabana ka kaya, “Oqo na veika mo cakava. Mo lako ivale ka va saraga oqo. O sa rui vinaka ka vaka mo sa cina caudre tu ena butobuto. Na nomu lewa vinaka kei na nomu solibula esa cakava mo luvena tagane na Kalou vakasakiti. Cakava tikoga na veika o cakava tu vakaukauwa ike ni o sa yaco i vale. O sa vulica mo masu kei o Koya o dau masu kina, kei na ituvatuva ni nomu masu. O sa vulica na Nona vosa ka o sa mai lomana na iVakabula ena nomu sagata mo vakataki Koya. O sa lomana na Tamamu me vaka e lomana o Koya, veiqaravi me vakai Koya, ka bulataka na ivakaro me vaka e bulataka o Koya—ena gauna o leqa kina, o kere veivosoti. Na nomu bula vakatisaipeli e sega ni dua na ka e volai waletuga ena dua na siqeleti—e sa tiki ni nomu bula ni veiqaravi vakaibalebale vei ira na tani. Mo lako ivale, ka vakayacora vakakina. Mo vakakina. Laveta tiko na tagede vakayalo oqo ena vo ni nomu bula.”
Au kila ni noda vakararavi tiko vua na Turaga o Jisu Karisito kei na Nona sala ni veiyalayalati, eda na kune nuidei vakayalo kei na vakacegu ni da bucina tiko na itovo vakalou kei na ivakarau savasava koya na tauri keda ka vakaudreva tiko na noda vakabauta. Me da toso volekata tikoga na katakata ni buka, ka vakacava na veika e yaco, me da dei tiko. Ena yacai Jisu Karisito, emeni.