E Rawarawa na Nona iVua ka Mamada na Nona iColacola.
Me da nanuma tiko ni tamata yadua e vuravura qo e luvena na Kalou ka lomani ira yadua o Koya.
A tukuni e dua na italanoa me baleta e dua na turaga na yacana o Jack ka dua tiko nona koli lomani ni vakasasa manumanu vuka na yacana o Cassie. E dau cibitaki Cassie sara o Jack ka dau sakitaka vakalevu na nona koli vuku. Me vakadinadinataka, a sureta o Jack eso nona itokani me ra sarava ni vakatasuasua o Cassie. Ni rau yaco yani ki na isoqosoqo ni vakasasa, a laivi Cassie o Jack me cici wavoki ni lako i loma o koya me lai saini ni yaco mai.
Ni sa gauna ni tekivu, sa nanamaki o Jack me raqataka na veimaqosa vakasakiti nei Cassie. Ia, e duatani na ivukivuki nei Cassie. E sega ni via muria na ivakaro nei Jack me vaka e dau vakayacora ena lomasoli e liu. Na ka ga e vinakata me cakava sai koya me toka ga e yasana.
A rarawa ka madua ka cudruvi Cassie o Jack; sega ni dede sa nanuma me rau sa lako. E sega mada ga ni via rika yani ki na mauimuri ni lori o Cassie, a mani laveti koya o Jack ena cudru ka curumaki koya ki na nona bai. A cudruvaka ni ra veiwalitaka na itovo ni nona koli o ira era tiko vata kaya me yaco sara ki vale. E sega ni kila rawa o Jack na vuna e vaka kina oya na itovo nei Cassie. Sa vakavulici vakavinaka, ka dau nona gagadre ena veigauna e liu sai koya me vakamarautaki koya ka cakava na lomana.
Ni rau yaco yani ki vale, sa tekivu me vakadikevi Cassie o Jack me raica de dua na mavoa, sore ni co, se kutu ni koli, me vaka e dau vakayacora. Ni tara yani na serena, a vakila ni suasua ka raica ni sa tauvi dra na ligana. Ena nona madua kei na rere, a raica ni dua na mavoa levu e tu vei Cassie me yacova sara yani na sui na serena. A raica tale e dua ena yavana imatau e liu.
A roqoti Cassie e ligana o Jack ka tekivu tagica. E sega ni tukuni rawa na nona madualaka na cala ni nona nanuma baleti koya kei na nona raici koya. A duatani tiko na ivukivuki nei Cassie ena siga oya baleta ni mavoa tiko. Na nona itovo a vu mai na mosi, na rarawa, kei na mavoa e tu vua. E sega ni baleta ni sega ni gadreva me talairawarawa vei Jack se nona sega ni lomani koya.1
Au a rogoca na italanoa oqo ena vica vata na yabaki sa oti kau sega sara ni guilecava. E vica beka na tamata e mavoa tu era maliwai keda tu? Sa vakavica beka na noda dau lewai ira na tani mai na kedra irairai e taudaku kei na nodra ivalavala, se nodra sega ni cakacaka, ia, kevaka eda kila vakavinaka sara, eda na raici ira ena yalololoma kei na yalo ni veivuke ka sega ni vakaikuritaka na nodra icolacola ena noda vakalelewa?
Au dau vakayacora oqo ena vuqa na gauna ni noqu bula, ia sa dau vakavulici au na Turaga mai na veika au sotava vakataki au kei na noqu dau vakarorogo ena veika era sotava e vuqa tale. Sa yaco meu marautaka vakalevu cake na ivakaraitaki ni noda iVakabula lomani ena Nona vakayagataka e levu na gauna me veiqaravi vei ira na tani ena loloma.
Na veika a sotava na luvequ yalewa gone duadua ena nona bula e tu kina na bolebole ni lomana mai na gauna se goneyalewa lailai sara kina. Sa vuqa na gauna ena nona bula taucoko sa vakila ni sa sega ni rawa ni toso tale. Keitou na vakavinavinaka tu ga vei ira na agilosi ni vuravura era a tu e yasana ena gauna oya: era dabe vata, rogoci koya, tagi vata kaya, ka wasea vata na iloloma talei eso, veiciqomi vakayalo, kei na isema dei ni loloma. Ena veituvaki ni loloma vakaoya, sa dau laveti na icolacola ena yasa ruarua .
E kaya o Elder Joseph B. Wirthlin, ni cavuta tiko na vosa ena 1 ni Korinica,“Ia kevaka kau sa vosataka na nodra dui vosavosa na tamata kei na vosa ni agilosi, ka sega vei au na loloma, au sa vaka walega na kaukamea sa rorogo, se na lali sa tataqiriqiri.2
E tomana:
“Na itukutuku nei Paula vei ira na Yalododonu vou oqo e rawarawa ka vakadodonu: E sega ni dua na ka o cakava ena vakayaco duidui kevaka e sega na loloma cecere. E rawa ni o vosataka na duivosavosa, tu vei iko na isolisoli ni parofisai, kila na veika vuni kecega, tu vei iko na kilaka kecega; kevaka sara mada ga e tu vei iko na vakabauta mo tosoya na veiulunivanua, ke sega vei iko na loloma cecere e sega na kena yaga vei iko.
Sa dina sara, ni loloma uasivi sai koya na “loloma taucoko i Karisito” [Moronai 7:47]. A vakaraitaka na iVakabula na loloma oya.”3
Eda wilika ena Joni, “A ka oqo era na kila kina na tamata kecega ni dou sa noqu tisaipeli, kevaka dou sa veilomani.” 4
E vuqa na ka era sa tukuna na iliuliu ena Lotu baleta na loloma cecere, duavata, veilomani, yalovinaka, yalololoma, veivosoti, kei na loloma uasivi. Au vakabauta ni sureti keda tiko na iVakabula me da bula ena ivakarau cecere ka vakalou cake5—Nona ivakarau ni loloma era vakila kina na tamata kecega ni ra okati ka gadrevi kina.
Eda sa vakaroti me da lomani ira na tani,6 sega ni vakalewai ira.7 Tauca i ra na icolacola bibi oqori; e sega ni noda me da colata tu.8 Ia e rawa ni da tomika cake na nona ivua na iVakabula ni loloma kei na yalololoma.
“Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au;
“Ni sa rawarawa na noqu ivua, ka mamada na noqu icolacola.”9
E sega ni vakadonuya na iVakabula na ivalavala ca ia e solia tu vei keda na Nona loloma ka dodoka tu mai na veivosotini da sa veivutuni. Vua na marama a tobo ni dautagane, a kaya o Koya, “Au sa sega talega ni lewai iko mo cudruvi: mo lako, ka mo kakua ni ivalavala ca tale.” 10 O ira e tara o Koya era vakila, na Nona loloma, ka vakabulai ira ka veisautaki ira na loloma oya. Na Nona loloma e vakauqeti ira me ra vinakata me ra veisautaka na nodra bula. Na bula ena Nona ivakarau e kauta mai na reki kei na sautu, ka suretiira na tani o Koya ki na ivakarau ni bula oya ena ivalavala malua, na yalovinaka, kei na loloma.
E kaya o Elder Gary E. Stevenson, “Ni da sotava na cagi kei na ucatataba, tauvimate kei na mavoa ni bula eso, na Turaga—na noda iVakatawa, noda Dauveiqaravi—ena karoni keda ena loloma kei na yalovinaka. O Koya ena vakabula na yaloda ka vakalesuya mai na yaloda kei na yagoda.”11 Ni da imuri i Jisu Karisito, sega beka ni dodonu me da kitaka vakakina?
E kerei keda na iVakabula me da vuli mai Vua12 ka cakava na veika eda raica ni cakava o Koya.12 Sai Koya na waqawaqa ni loloma cecere, na loloma savasava sara. Ni da vulica vakalalai me da cakava na veika e kerea vei keda o Koya—sega ni baleta ni noda itavi se baleta sara mada ga na veivakalougatataki eda rawa ni rawata kina ia baleta ni da lomani Koya kei na Tamada Vakalomalagi14—Ena drodro yani mai vei keda na Nona loloma ka sega walega ni na rawa kina na na veika kece e kerea o Koya ia ena yaco me rawarawa cake ka mamada15 ka rekitaki vakalevu cake. Ena rawa ena vakatovotovo, e rawa ni taura e vica vata na yabaki, me vaka a yaco vei au, ia ni da sa gadreva me noda ivakaukauwa na loloma, e rawa Vua me vukica na gagadre oya,16 na sorenitei oya, me dua na vunikau totoka, ka sinai ena vuana kamikamica sara.17
Eda lagata vata na serenilotu lomani, “Tabu niu vakalelelwa ni tu noqu lecaika? Na lomaqu sa tu kina veika e tawakilai.”18 O cei vei keda e tu nona rarawa vuni? Na itabagone talaidredre, na gone ni veisere, na tina se tama lewe dua ga, o ira e bolei tu nodra bula vakayago se vakasama, o ira era lomatarotaro ena nodra vakabauta, o ira na itabaqase, na duikaikai, o ira na galili, o ira era vinakata me ra vakawati, o ira e tu vei ira na itovonibula veivakabobulataki era sega ni taleitaka, kei na vuqa tale era sotava tiko na veimataqali bolebole ni bula—vakavuqa o ira sara mada ga e rairai daumaka tu nodra bula e tautuba.
E sega vei keda sa taucoko tu na vinaka ni nona bula se nona matavuvale; e sega dina o au. Ni da segata me da rarawa vata kei ira na tani era sotava tale tu ga na bolebole kei na malumalumu, e rawa ni vukea nodra vakila ni ra sega ni tu duadua ena nodra sagabula. Na tamata taucoko e gadreva me vakila ni ra itaukei dina ka era sa gadrevi ena yago i Karisito.18 Na gagadre levu nei Setani me wasei ira na luve ni Kalou, sa rawata tiko vakavinaka sara, ia na kaukauwa levu e tiko ena duavata.20 Ka eda gadreva vakalevu me da veitauriliga ena ilakolako veibolei ni bula oqo!
E kaya na noda parofita o Peresitedi Russell M. Nelson, “Na veivakalolomataki se nanuma cala vua e dua ena vuku ni nona vanua, matatamata, tagane se yalewa, koroi ni vuli, itovo vakavanua, se so tale na ivakatakilakila bibi e veisaqasaqa kei na noda Dauveibuli! Na itovo ca oqori e vakavuna noda sega ni yacova na noda itutu vaka-Luvena tagane kei na yalewa ni veiyalayalati!”21
Ni sa sureti keda kece o Peresitedi Nelson me da butuka ka tikodei ena salatu ni veiyalayalati ka na kauti keda lesu vua na noda iVakabula kei na Tamada Vakalomalagi, sa vakarautaka talega o Koya na ivakasala oqo: “Kevaka era sa lako tani mai na Lotu o ira na nomu itokani kei na matavuvale, lomani ira tikoga. E sega ni nomu itavi mo vakalewa na nona digidigi e dua tale me vaka ni sega ni dodonu me dua e vakacacani iko ni o yalodina tikoga.”22
Kemuni na itokani, me da nanuma tiko ni tamata yadua ena vuravura oqo e luve ni Kalou23 ka lomani keda yadua o Koya.24 E tu beka eso na tamata ena nomu sala o a nanuma mo vakalewa? Ke vakakina, nanuma tiko ni oqori na madigi vakasakiti vei keda me da vakatovotovotaka kina na loloma me vaka na loloma ni iVakabula.25 Ni da muria na Nona ivakaraitaki, sa rawa ni da vakaivuataki vata kei Koya ka veivuke me da solia na loloma kei na vakaitaukeitaki e yalodra kece na luvena na Tamada Vakalomalagi.
“Eda sa lomani koya ena vuku ni sa lomani keda taumada ko koya.”26 Ni da vakasinaiti tu ena nona loloma na iVakabula, na Nona ivua ena rawa ni rawarawa, kei na Nona icolacola e rawa ni mamada.27 Au vakadinadinataka oqo ena yaca i Jisu Karisito, emeni.