Toro Voleka Yani Vua na iVakabula

Mai vei Elder Neil L. Andersen

Ena Kuoramu ni Apositolo Le Tinikarua

Na vakasaqarai meda kila ka lomana na iVakabula, eda tawasei keda mai vuravura ena veiyalayalati kei na Kalou, ena ituvaki duatani, tawamatau, ka vakasakiti ni da dokai Koya kei na Nona vakavuvuli, ka sega ni yawaki keda mai vei ira na tani ka duidui na nodra nanuma.

Kemuni na taciqu kei na ganequ lomani, au vosa tu ena bogi nikua vei ira na imuri yalomalua ka tudei i Jisu Karisito. Niu raica na vinaka ni nomuni bula kei na nomuni vakabauta na noda iVakabula ena vanua oqo kei na veimatanitu e vuravura, au sa taleitaki kemuni saraga.

Ena icava ni Nona ilesilesi, era tarogi Jisu na Nona tisaipeli me tukuna vei ira “na ivakatakilakila ni [Karua ni Nona] Lesu mai, kei na vakataotioti kei vuravura.”¹

A tukuna vei ira o Jisu na veika taumada ena vakatakila na Nona lesu mai ka tinia ni kaya, “Ni dou sa raica na ka kecega oqo, [dou na] kila ni sa voleka [na gauna].”²

Ena koniferedi raraba sa oti, au a vakarogoca voleka na vosa i Peresitedi Henry B. Eyring: “O keda yadua,” a kaya, “na vanua cava ga eda tiko kina, sa kilai ni da bula tu oqo ena dua na gauna dredre sara. … Dua ga e vakamatana me raica na ivakatakilakila ni gauna kei na daliga me rogoca na nodra vosa na parofita sa kila ni dina tu.”³

A vakacaucautaki ira na Nona tisaipeli qaqa na iVakabula: “Sa kalougata na matamudou , ni dou sa raica: kei na daligamudou , ni dou sa rogoca.”⁴ Me sa noda tu na veivakalougatataki oqo ni da rogoca vakavinaka na vosa ni Turaga mai vei ira na Nona parofita kei ira tale eso ena koniferedi oqo.

Sila kei na Sila ca

A vakamacalataka na Turaga ena iotioti ni gauna oqo ni bera ni lesu mai, na “sila,” ka a vakamacalataka me “ra gone ni matanitu,”⁵ ena tubu tikivi ira na “sila ca,” se o ira ka sega ni lomana na Kalou ka sega ni muria na Nona vunau. Era na “tubu veitikivi vata ga,”⁶ e veigauna.

Oqo e noda vuravura me yacova ni lesu mai na iVakabula, ena levu na ka vinaka kei na levu na ka ca ena yasana kecega.⁷

Ena so na gauna ko na vakila ni sega soti ni ko vaka na ivesu ni witi matua. Mo dau vosoti iko vakai iko! Ea kaya na Turaga ni so na witi ena buroro ka kadre cake mai.⁸ Eda sa Nona Yalododonu Edaidai kece, dina ga nida se sega ni taucoko sara, sa noda gagadre bibi tu meda Nona tisaipeli dina.

Vakaqaqacotaka Noda Vakabauti Jisu Karisito

Eda vakila ni toso cake na veika ca e vuravura, na noda tiko vinaka vakayalo kei ira eda lomana, ena gadreva tu meda bucina, qarauna, ka vaqaqacotaka vakaoti sara na waka ni noda vakabauti Jisu Karisito. Sa vakasalataki keda na Apositolo o Paula meda sa vakataudeitaki,⁹ vakaukauwataki, ka sega ni vuki tani¹⁰ ni lomana tu na iVakabula kei na noda sasaga ni muri Koya. Sa gadrevi nikua kei na veisiga nimataka na raitayaloyalo kei na sasaga matau, ena tataqomaki mai na duidui eso kei na vakawelewele.¹¹

Ia, ena toso cake ni veivakayarayarataki vakavuravura ka wavoliti keda, e sega ni dodonu meda rere. Na Turaga ena segi ni vakawaleni ira na Nona tamata veiyalayalati. E tiko e dua na kaukauwa sausaumi ni solisoli vakayalo kei na veidusimaki tabu vei ira na yalodina.¹² Ia, na ikuri ni veivakalougatataki ni kaukauwa vakayalo oqo e sega ni tiko vata kei keda baleta ga ni da sa tiki ni kawa oqo. E yaco tu ni da sa vaqaqacotaka na noda vakabauta na Turaga o Jisu Karisito ka muria na Nona vunau, ni da sa kilai Koya tu ka lomani Koya. “Ia sai koya oqo na bula tawamudu,” ni masu o Jisu, “me ra kilai kemuni na Kalou dina duadua ga, kei Jisu Karisito ko koya ko ni a tala mai.”¹³

Ni da kila vinaka tu, nida vakabauti Jisu Karisito ka da tisaipeli dina, esa levu cake mai na vakatulewa ni dua ga na gauna—levu cake mai na ka ni dua ga na gauna. E sa dua na ivakarau tabu e tubu ka kadre tu ena veigauna ni noda bula, ka tomani me yacova ni da sa tekiduru e Yavana.

Ni tubu vata tu na sila ca na sila vinaka e vuravura, e rawa vakacava ni da vakabibitaka ka vaqaqacotaka na noda qaravitavi vua na iVakabula ena veisiga eliu?

Oqo e tolu na vakasama:

Meda akasinaiti ena Bula i Jisu

Matai, rawa ni da vakaogai keda vakataucoko sara ki na bula i Jisu, Nona vakavuvuli, Nona dokai, Nona kaukauwa, kei na Nona solibula sorovaki. A kaya na iVakabula, “Mo drau vakaliuci au ena nomudrau nanuma kecega.”¹⁴ Sa vakananumi keda na iApositolo o Joni, “Eda sa lomani koya ena vuku ni sa taumada na nona loloma vei keda.”¹⁵ Ni da vakila vinaka tu na Nona loloma, eda sa lomani Koya vakalevu cake ka, ka muria vinaka sara na ivakaraitaki i Karisito ena nodra lomani ka vukei na vakaleqai. Ena veiwalewale dodonu kece kivei Koya, eda raici Koya vakavinaka sara.¹⁶ Eda dokai Koya, ka tovolea ena sala lalai eso meda vakataki Koya.¹⁷

Meda Veiyalayalati kei na Turaga

Tarava, ni da sa kila ka lomana vinaka cake na iVakabula, eda sa gadreva vakalevu cake ni yalataka Vua na noda veitokoni kei na vakanuinui. Eda caka veiyalayalati kei Koya. Eda tekivu ena noda yalayala ni papitaiso, ka vakadeitaka na veiyalayala oqo kei na so tale ni da veivutuni e veisiga, kere veivosoti, ka nanamaki tu ni ciqoma na sakaramede ena veimacawa. Eda yalataka ni da na “dau nanumi Koya ka muria na nona vunau.”¹⁸

Ni da sa vakarau tu, eda taura matua na cakacaka vakalotu kei na veiyalayalati ni valetabu. Ni vakilai na veivakayarayarataki tawamudu ni noda gauna tabu ka malua ena vale ni Turaga, eda marau ni caka veiyalayalati vata kei na Kalou ka vaqaqacotaka na noda sasaga ni muria.

Na caka kei na muri ni veiyalayalati sa vakatara na loloma ni iVakabula me lutu vakatitobu sara ki na lomada. Ena Liaona, ni vula oqo a kaya o Peresitedi Nelson: “Na [noda] veiyalayalati ena muataki keda vakavoleka sara ki vei Koya. Na Kalou ena sega ni vakawalena na Nona veiwekani kei ira ka sa vakayaco yalayala vakaoqo vata kei Koya.”¹⁹ Me vaka e kaya o Peresitedi Nelson ena mataka oqo, Ena vakatabui ni valetabu vou yadua, na ikuri ni kaukawau vakalou sa soli mai ki vuravura me vaqaqacotaki keda ka me valuta na sasaga kaukauwa ni meca .”²⁰

Rawa ni da raica li na vuna e dusimaki ira kina na Nona parofita na Turaga mera kauta vakavoleka mai vei keda na valetabu ka vakatarai keda ni tiko wasoma tu ena Nona vale?

Ni da curuma na valetabu, eda sa vagalalataki mai na veivakayarayarataki vakavuravura e saqati keda tu, ni da vulica na inaki ni noda bula kei na isolisoli tawamudu eso e solia vei keda na noda iVakabula, o Jisu Karisito.

Taqomaka Na iSolisoli ni Yalo Tabu

iOtioti, na katolu ni noqu vakasama: ena sasaga tabu oqo, eda karona, qarauna, taqomaka, ka maroroya vinaka na isolisoli ni Yalo Tabu. Erau vosa ena mataka oqo o Peresitedi M. Russell Ballard eliu kei Elder Kevin W. Pearson ena nona ivakaro vakaparofita o Peresitedi Nelson kau na tokaruataka tale: “Ena sega ni rawa ni da bula tu vakayalo ke sega na veituberi, veidusimaki, veivakacegui, kei na veivakayarayarataki tudei ni Yalo Tabu.”²¹ E sa isolisoli tawasaumi rawa. Eda cakava na noda vinaka taucoko me taqomaka na veika e sotavi e veisiga, me tiko vata kei keda na veivakayarayarataki ni Yalo Tabu. Eda sa rarama ki na vuravura, ke mani ganita, eda sa digitaka tu meda duatani mai vei ira tale eso. Ea tarogi ira wale toka ga oqo na itabagone qasecake o Peresitedi Dallin H. Oaks: “O ni bolea tu mo ni duatani?’ … Sa bibi [sara] na digidigi eso o sa cakava tiko ena nomu bula vakai iko. O sa toso tiko li ki liu mai na veisaqasaqa ni vuravura?”²²

Digia Mo Duatani Mai vei Vuravura

Ena dua na itukutuku vakau ni veimaliwai, au a kerea ira na tisaipeli veitokani mera wasea na digidigi eso era sa cakava ka vakavuna tu mera duatani mai na vuravura. Au a ciqoma e drau na kena isau.²³ Oqo e vica ga:

Amanda: O au e dua na nasi ka cakacaka tiko ena valeniveivesu. Au dau vukei ira na kaivesu me vakataki Karisito ga.

Rachel: O au e dua na daulagasere vakatasuasua, ka sa dau matau tu niu na daramaka na isulu cavaga e soli vei au, veitalia na vakatakilai ni yago. [Baleta niu sa vakaedaumeni] au tukuna vei ira [na vakayacosoqo] ni sa dodonu me [rakorako] tu na isulusulu. Era sa marau … ia a sega ni vakayacori na veisau. Au sega ni rawa ni vakatanitaka na vakacegu e yaco tu ena vakadinadinataki ni Karisito ena gauna kecega.

Chriss: O au e dua na daugunu yaqona ni vavalagi (veisau tiko), bula kilikili kaya na valetabu, lewe ni Lotu. Au sega ni galuvaka na veika au sotava ena veivakatotogani kei na rawati ni vakadinadina ni Veisorovaki [i Jisu Karisito].

Lauren: Au vola tiko e dua na vakatasuasua kei ira na lewe ni noqu kalasi ena koronivuli. Era a vinakata na noqu ivakarau ni tuvaki ni bula malua me vosa vakacaca tu vakasauri. Era a sagai au vakaukauwa, au a bese ga ka vakadeitaki au.

Adam: E sega ni vakabauti au e levu na tamata niu kaya niu muria tu na lawa ni tiko savasava ka tarovi au mai na yaloyalo vakasisila. Era sega ni kila vinaka na yaga ni reki kei na vakacegu ni vakasama e solia vei au.

Ella: O tamaqu e lewe tu ni soqosoqo ni vakasalewalewa. Au dau saga meu doka na nodra nanuma na tamata tale eso niu vakadinadinataki Karisito tu ka dina vakaoti ki na ka au vakabauta.

Andrade: Au a navuca ni tomana na laki lotu ni navuca tu na noqu matavuvale mera kakua tale ni lako.

Kena iotioti, mai vei Sherry: Keimami a tiko ena dua na soqo ena vale ni kovana. Era sa tekivu veisoliyaka na champagne me “vakananumi”. Au a kerea na wai, dina ga ni kaya na vakalesilesi ni na ka beci tu. Keimami a vakananuma na kovana, kau taura cake na noqu bilo wai! A sega ni beci tu na kovana.

A kaya o Peresitedi Nelson, “Io, o sa bula tiko ena vuravura, ia sa duidui sara na nomu itagede mai na vuravura me vukei iko ni tarova na duka ni vuravura.”²⁴

O Anastasia, e dua na tina gone e Ukraine, a tiko e valenibula ni se qai vakasucuma ga na luvena tagane ni sa tekivu bololaki o Kyiv ena Feperueri sa oti. A dolava na katuba ni rumu ni valenibula na nasi ka kailavaki yani, “Taura na luvemu, ologi koya ena tutuvi, ka gole ki na olo—oqo saraga”

A tukuna emuri o Anastasia:

“Au sega ni raitayaloyalotaka ni na dredre tu na matai ni siga ni noqu bula vakatina, ia au sa vakanamata ga ki na veivakalougatataki kei na cakamana au sa raica.

“Na gauna oqo, ena rairai sega tu ni rawa ni vosoti o ira ka vakavuna na veivakarusai kei na leqa levu oqo, ia, me vaka nida tisaipeli i Karisito, au vakabauta ni na rawa ni [veivosoti].

“Au sega ni kila na ka taucoko ena yaco emuri, ia au kila na maroroi ni noda veiyalayalati ena vakatara na Yalotabu me tiko vata ga kei keda, vakatarai keda tu ni kune reki kei na nuinui, ena veigauna drakidrakita sara madaga.”²⁵

Na Yalayala ni Bula Tawamudu kei na Lagilagi Vakaselesitieli

Kemuni na taciqu kei na ganequ, au kalougata niu ciqoma vakawasoma na loloma ni noda iVakabula, o Jisu Karisito. Au kila ni bula tiko o Koya ka dusimaka tiko na Nona cakacaka tabu. E sega vei au na maqosa ni vosa meu vakamacalataka na taucoko ni noqu loloma baleti Koya.

Eda sa “luve ni veiyalayalati” teteva tu na vuravura ena veimatanitu kei na itovo ena vanua levu kecega, milioni na kedra iwiliwili, ni da waraka tu na lesu lagilagi mai ni noda Turaga ka iVakabula. Ni caudre tu vaka na rarama vei ira na wavoliti keda, eda sa moica donu na noda gagadre, vakasama, digidigi, kei na itavi eso. Na qarai taucoko ena vu ni yaloda ni kila ka lomana na iVakabula, sa tawasei keda mai na vuravura ena veiyalayalati kei na Kalou, ena noda duatani tu, tawamatau, ka vakasakiti ni da dokai Koya kei na Nona vakavuvuli, ka sega ni yawaki keda mai vei ira na tani ka duidui na nodra nanuma.

E sa ka totoka meda sila vinaka tu vata kei ira na sila ca, e vakamosiyalo ena so na gauna, ia sa vakamalumutaki tu ena matua kei na vakadeitaki ni noda vakabauta. Ni o vakatara tu ni lomana na iVakabula kei na Nona loloma vei iko me lutu dromu ki na lomamu, au yalataka vei iko na ikuri ni nuidei, vakacegu, kei na reki ena sotavi ni bolebole eso ni nomu bula. Ka yalataka vei keda na iVakabula: “Au [na] vakasoqoni ira vata na noqu tamata, me vaka na vosa vakatautauvata ni sila vinaka kei na sila ca, raica na sila vinaka sa biu ki na lololo me rawata na bula tawamudu, ka vakaisalataki ena lagilagi vakasilesitieli.”²⁶ Ena yacai Jisu Karisito, emeni.