aiga o loo suesue

4–10 Mati: “Ua Matou Olioli ia Keriso”

2 Nifae 20–25

O tusitusiga a Isaia e aofia ai lapataiga malolosi, ae o loo ofoina mai ai foi le faamoemoe ma le olioli. O se tasi lea o mafuaaga na faaaofia ai e Nifae i lana talafaamaumau: “Ou te tusia ni isi o upu a Isaia,” na ia saunoa ai, “o soo se tasi … e vaai i nei upu ona siitia ae o latou loto ma olioli” (2 Nifae 11:8). O se uiga, o le valaaulia e faitau tusitusiga a Isaia o se valaaulia ia olioli. E mafai ona e maua le fiafia, e pei o Nifae, i valoaga a Isaia e uiga i le faapotopotoina o Isaraelu, o le afio mai o le Mesia, ma le filemu i le meleniuma na folafola mai i e amiotonu. E mafai ona outou olioli e ola i le aso na valoiaina ina ua faia e le Alii e “faatu e ia se tagavai mo atunuu, ma faapotopoto mai e ua tulia o Isaraelu” (2 Nifae 21:12). A e fiainu i le amiotonu, e mafai ona e “utu vai ma le olioli mai vaipuna o le olataga” (2 Nifae 22:3). I se isi faaupuga, e mafai ona e “olioli ia Keriso” (2 Nifae 25:26).

Manatu mo le Aoaoina i le Aiga ma i le Lotu

2 Nifae 21–22

E mafai ona ou maua le filemu ia Iesu Keriso.

Sa i ai se faafitauli i fanau a Liae i finauga. Sa faateteleina faafitauli i augatupulaga i le lumanai, ma taitai atu ai i fevaevaeaiga, faatagataotauaina, faanoanoaga, ma le faatafunaga. Ma o loo faaauau pea ona avea finauga o se faafitauli i aso nei.

Faatasi ai ma na mea uma i le mafaufau, mafaufau i valoaga i le 2 Nifae 21–22. Mafaufau pe o faapefea ona faataunuu e le Faaola nei valoaga. O le a le uiga ia te oe o le valoaga o le a “nonofo faatasi foi le luko ma le tamai mamoe”? (2 Nifae 21:6). Mafaufau po o le a le mea e mafai ona e faia ia avea ai ma se e faatupuina le filemu.

Tagai Dale G. Renlund, “O Le Filemu o Keriso e Faaumatia ai le Feitaga’i,” Liahona, Nov. 2021, 83–85.

2 Nifae 21:9–12

O loo faapotopoto e le Alii Lona nuu.

O Nifae ma lona aiga o ni molimau i le faataapeapeina o Isaraelu (tagai 2 Nifae 25:10). Ua mafai nei ona e auai i le faapotopotoina o Isaraelu (tagai 2 Nifae 21:12). A o e faitau i le 2 Nifae 21:9–12, mafaufau pe mafai faapefea ona e fesoasoani e faataunuu ia valoaga o loo faamatala mai e nei fuaiupu.

Mo se faataitaiga, a o e faitau e uiga i le “tagavai” (tulaga po o le tagavai) o le a faatuina e faapotopoto ai le nuu o le Atua, mafaufau pe na faapefea ona e vaaia le faapotopotoina e le Atua o Lona nuu, faaletino ma le faaleagaga. O a mea e tosina ai tagata i le Alii ma Lana Ekalesia?

O le a se mea ua musuia oe e fai e fesoasoani ai i le faapotopotoina o le nuu o le Atua?

2 Nifae 23–24

O le faalelalolagi o Papelonia o le a pau.

O le malo o Papelonia o se faamatau malosi faaupufai ma faamiliteli ia Isaraelu anamua. Ae i le nuu o Nifae—ma ia i tatou i aso nei—o le taufaamatau sili atu o le mea lea ua faatusa i ai Papelonia: o le faalelalolagi ma le agasala. Mafaufau pe na faapefea e lapataiga i le 2 Nifae 23–24 ona aafia ai tagata o e sa fefefe pe faamemelo pe faatuatuaina le tamaoaiga ma le malosiaga o Papelonia (tagai, mo se faataitaiga 23:6–9, 11, 19–22; 24:10–19). O a nisi o mea faapena atonu tatou te fefefe pe faamemelo i ai pe faatuatuaina i aso nei? O le a sou lagona i le savali a le Alii ia te oe atonu o loo i ai i nei mataupu? Mafaufau loloto pe mafai faapefea ona e faaalia lou “olioli i [le] mamalu [o le Alii]” (2 Nifae 23:3).

aikona o le seminare

2 Nifae 25:19–29

“Ua matou tautalatala e uiga ia Keriso … ua matou olioli ia Keriso.”

Sa tautala sao Nifae e uiga i le faasoaina atu o ona talitonuga—aemaise lava lana molimau ia Iesu Keriso. I lau suesuega atoa o le 2 Nifae 25, mafaufau i le manao o Nifae e “faatauanau atu ai [i lana] fanau … ia talitonu ia Keriso, ma ia faalelei ma le Atua” (fuaiupu 23). O le a le mea na manao Nifae ia iloa e tagata e uiga i le Faaola? (tagai fuaiupu 12–13, 16). Na faapefea ona taumafai Nifae e faatauanau tagata ia talitonu ia te Ia? (tagai fuaiupu 19–29). Ia matau fuaitau i nei mataupu e faatauanau ai oe ia talitonu ma mulimuli ia Iesu Keriso.

O nisi o i tatou atonu e le lagonaina le lototoa e pei ona sa i ai Nifae i le talanoa atu e uiga ia Keriso. Ae atonu e mafai ona e maua se mea i aoaoga a Nifae i le 2 Nifae 25:23–26 lea e musuia ai oe e talanoa e uiga ia te Ia ma isi ma le faamaoni atili. Mo se faataitaiga, o le tautinoga a Nifae “Ua matou olioli ia Keriso” e ono uunaia ai oe e mafaufau pe faapefea ona aumaia e le Faaola ia te oe le olioli—ma pe mafai faapefea ona e faasoa atu lena olioli i isi.

I lana savali “Ua Matou Tautalatala e uiga ia Keriso” (Liahona, Nov. 2020, 88–91), ua fautuaina mai ai e Elder Neil L. Andersen le ala e mafai ai ona tatou talanoa faalauaitele atu ai e uiga ia Keriso i tulaga eseese. O fea o ana fautuaga e tulaga ese ia te oe? O a ni avanoa ua e maua e talanoa ai e uiga ia Keriso i isi?

O le a se mea ua musuia oe e ta’u atu i isi e uiga ia Iesu Keriso? Afai e te manaomia ni manatu, e mafai ona e sailiili i le “O Le Keriso Soifua: O Le Molimau a le Au Aposetolo” (Gospel Library). O se viiga e pei o le “Ou Te Talitonu ia Iesu” (Viiga, nu. 71) e mafai ona tuuina atu ia te oe nisi manatu.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

2 Nifae 21:1–5

O le a faamasino Iesu Keriso i le amiotonu.

• Ina ia fesoasoani i lau fanau e vaai faalemafaufau i nei fuaiupu, vaai pe mafai ona e maua se laau ua tipiina i lalo po o se lala ua ola mai se laau (pe faaaoga le ata lea). Afai o le “tatupu” i le 2 Nifae 21:1 e faatusa ia Iesu Keriso, o a mea ua aoao mai e fuaiupu 2–5 ia i tatou e uiga ia te Ia?

laau laitiiti o loo ola ae mai le pogati laau

2 Nifae 21:6–9

E aumaia e Iesu Keriso le filemu ma le olioli.

• O a mea o aoao mai e le 2 Nifae 21:6–9 e uiga i le mea e mafai ona tupu pe a mulimuli tagata uma i le Faaola? (tagai foi 4 Nifae 1:15–18). E mafai faapefea ona tatou faia o tatou aiga ia avea atili faapea? Atonu e fiafia lau fanau e tilotilo i ata o manu o loo ta’ua i fuaiupu 6–7—o manu e masani lava o fili ae o le a le faatiga le tasi i le isi pe a toe afio mai Iesu (tagai i le itulau o gaoioiga o lenei vaiaso). E mafai foi e lau fanau ona tusi ni ata o i latou lava ma nei manu o loo nonofo filemu faatasi ma Iesu.

2 Nifae 21:11–12; 22

O loo faapotopoto e le Alii Lona nuu.

• Fai mai Isaia o le a faatuina e le Alii se “tagavai mo atunuu” e fesoasoani ai i tagata e faapotopoto ia te Ia (tagai 2 Nifae 21:11–12). Fesoasoani i lau fanau ia malamalama o se tagavai e pei o se fu’a. Atonu o le a latou fiafia e tusi se ata o la latou lava fu’a. E mafai ona aofia ai ata po o upu e faatusa i mafuaaga latou te o mai ai ia Iesu Keriso ma Lana Ekalesia. Tuu atu ia i latou e talanoa e uiga i a latou fu’a, ma fesoasoani ia i latou e mafaufau pe mafai faapefea ona latou fesoasoani i isi e “faapotopoto” ia Iesu Keriso.

• A uma ona faitau faatasi le 2 Nifae 22:4–5 e mafai ona outou talanoa ma lau fanau e uiga i nisi o “mea e silisili ona lelei” ua faia e le Alii. O a nisi o “galuega [a le Alii] i totonu [o i tatou]” e mafai ona tatou folafola atu? Ina ia fesoasoani i lau fanau e mafaufau i le fesili lenei, atonu tou te usuina faatasi se pese e uiga i le Faaola, e pei o le “Ou Te Talitonu ia Iesu” (Viiga, nu. 71). E mafai ona outou feauauai i le faamaeaina o se fuaiupu faapenei: “Ou te talitonu ia Keriso; O Ia .” E mafai faapefea ona tatou fesoasoani i isi tagata ia iloa e uiga i mea na faia e le Faaola mo i tatou?

2 Nifae 25:26

“Ua Matou Olioli ia Keriso.”

• E mafai faapefea ona e fesoasoani i lau fanau ia “olioli ia Keriso”? Atonu e te faamatala atu se tala e uiga ia Iesu Keriso o aumaia le olioli i isi, pe faaali se vitio e pei o le “Jesus Heals a Man Born Blind” po o le “Suffer the Little Children to Come unto Me” ( Gospel Library). E mafai e lau fanau ona faailoa taimi fiafia i le tala po o le vitio. Ma, a o outou faitau faatasi le 2 Nifae 25:26, e mafai ona latou talanoa e uiga i le mafuaaga latou te “olioli [ai] ia Keriso.”

Molimau atu ia Keriso. Aua e te manatu e iloa e lou aiga ou lagona e uiga i le Faaola. Tau atu ia i latou, ma tuu atu ou lagona e uiga i le Faaola e tosina ai le ala e te fegalegaleai ai ma i latou.

Mo nisi manatu, tagai i le lomiga o lenei masina o le mekasini o le Uo .

faifeautalai o loo aoaoina se aiga

Ou te Alu i Mea E te Tofia, na saunia e Ramon Ely Garcia Rivas

itulau o gaoioiga: E aumaia e Iesu Keriso le filemu ma le olioli