O Le A Ia Taitai Oe i le Lima, saunia e Sandra Rast

11–17 Mati: “O se Galuega Ofoofogia ma leMea e Ofo Ai.”

2 Nifae 26–30

“Ou te vavalo atu ia te outou e uiga i aso e gata ai,” na tusia ai e Nifae (2 Nifae 26:14). I se isi faaupuga, sa tusi o ia e uiga i o tatou aso. Ma e i ai le pogai e popole ai i mea sa ia vaai i ai: ua faafitia e tagata le mana ma vavega a le Atua; faateleina le lotoleaga ma feteenaiga. Ae e faaopoopo i “galuega o le pouliuli” i nei aso e gata ai (2 Nifae 26:10, 22) na taitaia e le fili, sa tautala foi Nifae e uiga i “se galuega ofoofogia ma le mea e ofo ai” e taitaia e le Alii lava Ia (2 Nifae 27:26). E totonugalemu i lena galuega o se tusi—o se tusi e faailoa ai pepelo a Satani ma faapotopoto ai e amiotonu. O lena tusi o le Tusi a Mamona, o le galuega ofoofogia o le galuega a le Ekalesia a le Alii i aso e gata ai, ma o le mea e ofo ai o le—o se vaega—e valaaulia e le Atua i tatou uma, e ui i o tatou vaivaiga, ina ia auai i le faapotopotoina.

Manatu mo le Aoaoina i le Aiga ma i le Lotu

2 Nifae 26–27; 29–30

Sa saunia e le Atua le Tusi a Mamona mo o tatou taimi.

I le 2 Nifae 26–27, na sii mai e Nifae se valoaga muamua atu a Isaia, (tagai Isaia 29) ma faatatau i lona nuu ma a latou talafaamaumau—o le Tusi a Mamona. Sa ia iloa e ala i faaaliga, a o lei mae’a ona tusia atoatoa le Tusi a Mamona, e faapea o le a i ai se aso o le a “taua tele i le fanauga a tagata” (2 Nifae 28:2). Aisea e taua tele ai ia te oe le Tusi a Mamona? Mafaufau i le fesili lea a o e faitauina le 2 Nifae 29–30. O le a le “galuega ofoofogia” (2 Nifae 27:26) ua faataunuuina e le Atua i le lalolagi ma i lou olaga e ala i le Tusi a Mamona?

Tagai foi i le Iosefa Samita—Talafaasolopito 1:62–65.

2 Nifae 26:23–33

Ua valaaulia i tatou uma e Iesu Keriso e o mai ia te Ia.

E tele upumoni matagofie e mafaufau i ai i le 2 Nifae 26:23–24. Mo se faataitaiga, e mafai ona e mafaufau e uiga i mea na faia e Iesu Keriso “mo le manuia o le lalolagi”—ma mo oe. E faapefea ona Ia “aumaia tagata uma”—ma oe—“ia te ia”? O le a se mea ua musuia oe e fai e tali atu ai i Ana faailoaga o le alofa?

Faitau pea ma vaavaai mo upumoni e uiga i le Faaola i fuaiupu 25–33. Ia matau faapitoa Ana valaaulia. E faapefea ona e aoteleina le savali a Iesu Keriso ia te oe i se fuaiupu se tasi? O se viiga e pei o le “O Mai ia Iesu” (Viiga, nu. 65) e mafai ona tatalaina lou mafaufau i uunaiga faaopoopo.

Mafaufau pe mafai faapefea e nei fuaiupu ona faatosinaina le ala e te fegalegaleai ai ma isi ma valaaulia i latou e o mai ia Keriso. Atonu e te maua ni manatu i le savali a Elder D. Todd Christofferson “O Le Aoaoga Faavae o le Auai” (Liahona, Nov. 2022, 53–56).

Tagai foi 3 Nifae 18:30–32; Dallin H. Oaks, “O Le A Le Mea Ua Faia e lo Tatou Faaola mo i Tatou?,” Liahona, Me 2021, 75–77; Autu o le Talalelei, “Belonging in the Church of Jesus Christ,” Gospel Library.

Aua le fefe i le leai o se tali. O fesili lelei e alu ai se taimi e tali ai. E manaomia ai suesuega, mafaufau, ma musumusuga. O le taimi e te faaaluina e faatalitali ai mo ni tali i se fesili e mafai ona avea ma se taimi paia o le mafaufau loloto. Aloese mai le faaosoosoga e vave faamaea lenei taimi e ala i le see atu i se isi mataupu.

2 Nifae 28

E saili Satani e faasese.

O le tele o pepelo ma auala a Satani o loo maua i le 2 Nifae 28. Vaavaai mo i latou i fuaiupu 6, 8, 21–23, 29. Aisea e manaomia ai ona e iloa e uiga i pepelo a Satani? O le a se mea e te faia pe a taumafai le fili e faasese oe?

O loo lisi atu i lalo nisi o mau e teena ai pepelo a Satani. Vaai pe mafai ona e faafetauia le aoaoga faavae moni i nei fuaiupu ma le aoaoga faavae sese ua lapataia ai i tatou e Nifae i le 2 Nifae 28:

• 2 Nifae 2:17: e i ai se tiapolo (2 Nifae 28:22: “E le o au o se tiapolo, ona e leai lea”)

• Moronae 7:35–37

• Mataupu Faavae ma Feagaiga 1:31

• Mataupu Faavae ma Feagaiga 68:31; 82:14

• Mataupu Faavae o le Faatuatua 1:9

Tagai foi Gary E. Stevenson, “Aua E Te Taufaasese Mai Ia Te Aʼu,” Liahona, Nov. 2019, 93–96.

2 Nifae 28:27–31; 29

O loo faaauau pea ona tuuina mai e le Atua faaaliga e taiala ai Ana fanau.

I le avea ai ma Au Paia o Aso e Gata Ai ua faamanuiaina i tatou i le anoanoai o afioga a le Atua. Ae peitai, e pei ona sa lapatai mai Nifae, e le tatau lava ona tatou lagonaina “ua lava mea ua matou maua!” A o e faitauina lapataiga i le 2 Nifae 28:27–31 ma le 2 Nifae 29, mafaufau i fesili e pei o nei:

• E faapefea ona finagalo le Alii ia ou lagaona ma tali atu i Ana afioga?

• Aisea e “feita” ai tagata i nisi taimi i le mauaina o nisi mau upumoni mai le Atua? (2 Nifae 28:28). Pe ua i ai ea se taimi e faapea ai ni o’u lagona? Afai o lea, e mafai faapefea ona ou sui?

• O le a le uiga o le mauaina o le afioga a le Atua? E mafai faapefea ona ou faaali atu ia te Ia ou te manao e maua atili Lana afioga?

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Manatu mo le Aoaoina o Tamaiti

2 Nifae 26:23–28, 33

E finagalo Iesu Keriso i tagata uma e o mai ia te Ia.

• Ina ia aoao lau fanau e uiga i valaaulia a le Faaola i nei fuaiupu, atonu e te talanoa ma i latou e uiga i taimi na latou valaaulia ai tagata i se gaoioiga faapitoa, e pei o se pati o le aso fanau. Ona mafai lea ona outou faitau faatasi le 2 Nifae 26:23–28 ma saili po o le a le mea o loo valaaulia i tatou e Iesu e fai. Atonu e mananao lau fanau e fatu se kata e valaaulia ai se tasi e sau ia Iesu Keriso. Uunaia i latou e faaaoga se fasifuaitau mai nei fuaiupu i la latou valaaulia.

• O le atavali o loo i le faaiuga o lenei otootoga o loo faaalia ai tagata mai le tele o ituaiga. Atonu e mafai e lau fanau ona vaai i lenei ata a o outou faitauina le 2 Nifae 26:33. E mafai ona outou toe faitau le fasifuaitau “Ua valaaulia e Iesu tagata uma ia o mai ia te Ia” a o faasino atu lau fanau i tagata taitoatasi i le ata—ona faasino lea ia i latou lava. E faapefea ona tatou o mai ia Iesu?

• O se pese e faatatau i le alofa i tagata uma, e pei o le “Ou te Savali ma Oe” (Tusipese a Tamaiti, 78), e mafai ona fesoasoani ia te oe e aoao atu ai le savali o le 2 Nifae 26:33.

2 Nifae 28:2; 29:7–11; 30:3–6

O le Tusi a Mamona o se faamanuiaga.

• Ina ia fesoasoani i lau fanau ia lagona o le Tusi a Mamona e “taua tele” (2 Nifae 28:2), e mafai ona e afifiina se kopi o se meaalofa ma tuu atu ia i latou e mate mai le mea o i totonu. E mafai ona latou vaavaai mo ni faaataataga i le 2 Nifae 30:3–6. Tau atu i lau fanau pe aisea e taua tele ai le Tusi a Mamona ia te oe, ma tuu atu ia i latou e faasoa mai foi o latou lagona.

• Mafaufau e fai atu i lau fanau e vaai faalemafaufau faapea ua fai mai se uo, “E le manaomia ona ou faitau i le Tusi a Mamona. Ua uma ona ou faitauina le Tusi Paia.” O le a se tatou tala e fai atu i la tatou uo? Faitau faatasi le 2 Nifae 29:7–11 e aoao ai pe aisea e finagalo ai le Atua ia i tatou ia i ai uma tusi e lua.

2 Nifae 28:30–31

E aoao mai le Tama Faalelagi ia te a’u i sina mea itiiti i i ma sina mea itiiti i o.

• Masalo e mafai ona e mafaufau i se lesona faitino lea o le a fesoasoani i lau fanau e iloa ai le uiga o le aoaoina i “lea fuaitau i luga o lea fuaitau.” Mo se faataitaiga, e mafai ona latou tuufaatasia se paso pe fausia se mea i poloka, tasi le poloka i le taimi. Pe mafai foi ona e aoao atu i latou i se tomai i lea laasaga ma lea laasaga, e pei o le nonoa o se lipine po o le tusiina o se ata. Ona mafai lea ona outou faitauina le 2 Nifae 28:30 ma talanoaina pe faapefea ona aoao mai e le Tama Faalelagi ia i tatou le upumoni e tasi i le taimi.

• O le isi manatu o le filifili lea o se fasifuaitau mai le 2 Nifae 28:30 ma feauauai i le tusiaina, tasi le upu i le taimi. E faapefea ona tutusa le gaoioiga lea i le auala e tuu mai ai e le Atua ia i tatou le upumoni? Aisea e faaalia mai ai e le Atua upumoni ia i tatou o “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” nai lo le aumai uma i le taimi e tasi? E mafai faapefea ona tatou faaali atu i le Atua tatou te mananao ia maua nisi upumoni mai ia te Ia?

Mo nisi manatu, tagai i le lomiga o lenei masina o le mekasini o le Uo .

Keriso i le Lotolotoi, saunia e Judith A. Mehr