Bae I Tekem Han blong Yu, I Lidim Yu,, i kam long Sandra Rast

11–17 Maj: “Wan Gudfala Wok mo wan Sapraes.”

2 Nifae 26–30

“Mi talemaot profesi long yufala long saed blong ol las dei,” Nifae i bin raetem (2 Nifae 26:14). Long nara toktok, hem i bin stap raet abaot taem blong yumi tedei. Mo i gat risen blong wari abaot wanem we hem i bin luk: pipol oli no bilivim paoa mo ol merikel blong God; i gat plante fasin blong jalus, mo ol smol rao. Bae antap long ol “wok blong tudak” blong ol las dei ia (2 Nifae 26:10,22) we enemi i stap lidim, Nifae i bin tokbaot tu “wan gudfala wok mo wan sapraes” we Lod Hemwan i stap lidim (2 Nifae 27:26). Long medel blong wok ia, bae i gat wan buk—wan buk we i putumaot ol giaman blong Setan mo karem ol stret mo gud fasin tugeta. Buk ia, hem i Buk blong Momon, gudfala wok ia i wok blong Jos blong Lod long ol las dei ia, mo sapraes ia, i—we long wan pat—Hem i stap invaetem yumi evriwan, i nomata wiknes blong yumi, blong yumi tekpat long wok ia.

Ol Tingting blong Stap Lan long Hom mo long Jos

2 Nifae 26–27; 29–30

God i bin mekem rere Buk blong Momon blong taem blong yumi tedei.

Long 2 Nifae 26–27, Nifae i bin kwotem aot long wan profesi blong bifo blong Aesea (luk long Aesea 29) mo i yusum long ol pipol blong hem mo long rekod blong olgeta—Buk blong Momon. Nifae i bin save, tru long revelesen, iven bifo we oli bin raetem fulwan Buk blong Momon se, wan dei, bae buk ia “bae i gat bigfala yus long ol pikinini blong ol man” (2 Nifae 28:2). ?From wanem Buk blong Momon i gat bigfala yus long yu? Tingbaot kwestin ia taem yu stap ridim 2 Nifae 29–30. Wanem “gudfala wok ia” (2 Nifae 27:26) we God i finisim long wol mo long laef blong yu tru long Buk blong Momon?

Luk tu long Josef Smit—Histri 1:62–65.

2 Nifae 26:20–21

Jisas Kraes i stap invaetem yumi evriwan blong kam long Hem.

I gat plante gudfala trutok blong tingting long hem long 2 Nifae 26:23–24. Eksampol, yu save tingbaot wanem we Jisas Kraes i bin mekem “blong gud blong wol ia”—mo blong yu. ?Olsem wanem nao Hem i stap “pulum evriman”—mo yu—i kam long Hem”? ?Wanem nao yu filim wetem insperesen blong mekem blong ansa long wei we Hem i stap soem lav blong Hem long yumi?

Gohed blong stap rid mo stap lukaotem ol trutok abaot Sevya long ol ves 25–33. Tekem not speseli long ol invitesen blong Hem. ?Olsem wanem yu save mekem i sot mesej blong Jisas Kraes long wan sentens i go long yu? Wan hym olsem “Come unto Jesus” (Hymns, no. 117) i save openem tingting blong yu blong kasem moa filing.

Tingbaot olsem wanem ol ves ia i jenisim wei we yu mitim ol nara man mo invaetem olgeta blong kam long Kraes. Maet yu faenem sam tingting long mesej blong EldaD. Todd Christofferson “Doktrin blong Stap Pat” (Liahona, Nov. 2022, 53–56).

Luk tu long 3 Nifae 18:30–32; Dallin H. Oaks, “Wanem Nao Sevya I Bin Mekem blong Yumi?,” Liahona, Mei 2021, 75–77; Gospel Topics, “Belonging in the Church of Jesus Christ,” Gospel Library.

No fraet long kwaet we i no gat wan i toktok. I tekem taem blong ansarem ol gudfala kwestin. Oli nidim blong lukaotem, tingting, mo kasem insperesen. Taem ia we yu spendem blong stap wet blong kasem ol ansa long wan kwestin, i save kam wan tabu taem blong stap tingting hevi. Stap longwe long temtesen ia blong katem taem ia eli tumas taem yuwan bakegen i givim ansa o yu muv i go long wan nara poen

2 Nifae 28

Setan i wantem blong giaman long man.

Plante long ol giaman mo ol trik blong Setan, yu save faenem long 2 Nifae 28. Lukaotem olgeta long ol ves 6, 8, 21–23, 29. ?From wanem nao yu nid blong save abaot ol giaman blong Setan?” ?Wanem nao bae yu mekem taem enemi bae i traem blong giaman long yu?

Long lis andanit ia, i gat ol skripja we oli sakemaot ol giaman blong Setan. Luk sapos yu save majem tru doktrin long ol ves ia wetem rong doktrin we Nifae i wonem yumi from long 2 Nifae 28:

• 2 Nifae 2:17: i gat wan devel (2 Nifae 28:22: “Mi mi no wan devel, from i no gat wan”)

• Moronae 7:35–37

• Doktrin mo Ol Kavenan 1:31

• Doktrin mo Ol Kavenan 68:31; 82:14

• Ol Toktok blong Bilif 1:9

Luk tu long Gary E. Stevenson, “Yu No Trikim Mi,” Liahona,, Nov 2019, 93–96

2 Nifae 28:27–31; 29

God i stap gohed blong givim revelesen blong lidim ol pikinini blong Hem.

Olsem ol Lata-dei sent, yumi kasem blesing wetem plante toktok blong God. Mo yet, olsem Nifae i bin givim woning, yumi mas neva filim se “yumi gat inaf!” Taem yu stap ridim ol woning insaed long 2 Nifae 28:27–31 mo 2 Nifae 29, tingting long ol kwestin olsem ia:

• ?Olsem wanem nao Lod i wantem mi filim abaot toktok blong Hem mo save ansa long Hem?

• ?From wanem nao, samtaem, ol pipol oli “kros” blong stap kasem moa trutok we i kam long God? (2 Nifae 28:28). ?Mi mi filim olsem ia samtaem? ?Sapos i olsem, olsem wanem nao mi save jenis?

• ?Hem i minim wanem blong kasem toktok blong God? ?Olsem wanem nao mi soem se mi wantem kasem moa toktok blong Hem?

Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

2 Nifae 26:23–28, 33

Jisas i wantem evriwan blong kam long Hem.

• Blong tijim ol pikinini blong yu abaot invitesen blong Sevya long ol ves ia, maet bae yu save toktok wetem olgeta abaot ol taem we oli invaetem ol pipol i go logn wan spesel taem, olsem wan betdei pati. Afta yu save rid long 2 Nifae 26:23–28 tugeta mo faenemaot wanem nao Jisas i stap invaetem yumi blong mekem. Ol pikinini i maet wantem blong mekem wan kad blong invaetem wan blong kam long Jisas Kraes. Leftemap tingting blong olgeta blong yusum wan sentens long wan long ol ves ia insaed long invitesen blong olgeta.

• Pikja we oli pentem ia we i stap long en blong aotlaen ia, i soem pipol we oli kam long defren ples. Ating ol pikinini blong yu i save lukluk long pikja ia taem yu stap ridim 2 Nifae 26:33. Yu save ripitim ol sentens ia “Jisas i invaetem evriwan blong kam long Hem” olsem ol pikinini blong yu i poenem i go long wanwan man long pikja—mo afta long olgetawan. ?Olsem wanem yumi kam long Jisas?

• Wan singsing abaot lavem evri man, olsem “I’ll Walk with You” (Children’s Songbook, 140–41), i save helpem yu tijim mesej blong 2 Nifae 26:33.

2 Nifae 28:2; 29:7–11; 30:3–6

Buk blong Momon i wan blesing.

• Blong helpem ol pikinini blong yu i filim se Buk blong Momon “i gat bigfala yus” (2 Nifae 28:2), yu save kavremap wan kopi olsem wan presen mo mekem oli traem talem wanem i stap insaed. Oli save lukaotem ol tingting we i lid i go long ansa long 2 Nifae 30:3–6. Talem long ol pikinini blong yu from wanem Buk blong Momon i gat bigfala yus long yu, mo lego olgeta i serem ol filing blong olgeta tu.

• Tingting blong askem ol pikinini blong tingbaot se wan fren i talem se, “Mi no nid blong ridim Buk blong Momon. Mi ridim Baebol finis.” ?Wanem nao yumi save talem long fren blong yumi ia? Rid tugeta 2 Nifae 29:7–11 blong lanem se from wanem God i wantem yumi blong gat tugeta buk.

2 Nifae 28:30–31

Papa long Heven i tijim mi smol, afta smol bakegen.

• Maet yu save tingbaot wan lesen tul we bae i helpem ol pikinini blong andastanem wanem i minim blong lanem “tijing folem tijing.” Eksampol, oli save putum tugeta wan pasel o bildim wan samting wetem ol blok, wan pis long wan taem. O yu save tijim olgeta blong mekem wan samting folem ol step, olsem blong fasem wan rop o dro wan pikja. Afta yu save ridim 2 Nifae 28:30 mo toktokraon long hao Papa long Heven i tijim yumi wan trutok long wan taem.

• Wan nara tingting i blong jusum wan sentens long 2 Nifae 28:30 mo wanwan i tekem taem blong raetem, wan toktok long wan taem. ?Olsem wanem nao aktiviti ia i semmak long wei we God i stap givim trutok long yumi? ?From wanem God i soemaot trutok long yumi, “tijing folem tijing, rul folem rul smol long ples ia mo smol longwe,” be i no evriwan long wan taem nomo? ?Olsem wanem nao yumi soem long God se yumi wantem blong kasem moa trutok long Hem?

Blong moa tingting, lukaotem namba blong manis ia blong Fren magasin.

Kraes long Medel, i kam long Judith A. Mehr