Kraes I Stap Tijim Ol Disaepol blong Hem, i kam long Justin Kunz

18–24 Maj: “Hemia I Rod.”

2 Nifae 31–33

Long medel blong ol las toktok we Nifae i raetemdaon, yumi faenem toktok ia we hem i talemaot: “Lod i bin givim oda long mi, mo mi mas obei” (2 Nifae 33:15). Hemia wan sot toktok we i gud mo i tokbaot laef blong Nifae. Hem i bin traem blong andastanem tingting blong God, mo wetem strong paoa long tingting, i bin traehad blong obei long tingting ia—i nomata se hemia i minim blong putum laef blong hem long denja blong kasem ol buk we oli wokem long bras aot long Leban, blong bildim wan bot mo krosem solwota, o blong stap fetful blong stap tijim doktrin blong Kraes wetem fasin blong tok stret mo wetem paoa. Nifae i save toktok blong winim tingting blong yumi, abaot nid ia blong “wokbaot i go wetem strong bilif long Kraes,” blong folem “rod we i stret mo i no isi we i lid i go long laef we i no save finis” (2 Nifae 31:20,18), from se hemia nao rod we hem i bin folem. Hem i bin save, tru long eksperiens blong hem, se rod ia, i nomata se i strong samtaem, i wan rod we i karem glad i kam, mo “i no gat wan narafala rod o nem we oli givim andanit long heven, we tru long hem, God i sevem ol man insaed long kingdom blong hem” (2 Nifae 31:21).

Ol Tingting blong Stap Lan long Hom mo long Jos

2 Nifae 31

Jisas Kraes mo doktrin blong Hem i wan wei ia nomo i go long laef we i no save finis.

Sapos yu mas putum long sot toktok rod ia we i go long laef we i no save finis wetem sam toktok nomo, ?bae yu talem wanem? Tekem not long hao Nifae i tokbaot hemia long 2 Nifae 31. Tingting blong droem wan rod mo raetem sam prinsipol o japta we yu faenem long ol japta ia long saed blong rod ia. Yu save ademap i go long droing blong yu sot toktok blong yuwan abaot wanem Nifae i bin tijim long wanwan prinsipol.

Taem yu stap ridim 2 Nifae 31:18–20, skelem ol traehad blong yuwan blong “wokbaot i go” folem rod ia blong gospel.

Luk tu long “Press Forward, Saints,” Hymns, no. 81.

Blong stap folem ol tijing blong Jisas Kraes i lidim yumi i go long laef we i no save finis.

2 Nifae 31:4–13

Jisas Kraes i putum eksampol we i stret evriwan blong fasin blong stap obei taem Hem i bin kasem baptaes.

Sapos se baptaes blong yu i bin hapen yestedei o 80 yia i pas finis, hem i bin wan impoten taem. Yu bin go insaed long wan kavenan we i no save finis blong folem Jisas Kraes. Tingbaot baptaes blong yu taem yu stap ridim abaot baptaes blong Sevya long 2 Nifae 31:4–13. Givim ansa long ol kwestin olsem oli save help:

• ?From wanem Jisas i bin kasem baptaes? ?From wanem mi bin jusum blong kasem baptaes?

• ?Wanem ol promes mi bin mekem taem mi kasem baptaes? Wanem nao Lod i promes i kambak long yumi? (luk long ol ves 12–13; luk tu long Mosaea 18:10, 13).

• ?Hao nao mi save soem se mi mi strong oltaem blong folem Jisas Kraes?

2 Nifae 31:15–20

“Hem we i stap strong kasem en, semfala man ia bae hem i sevem.”

Taem yu stap ridim 2 Nifae 31:15–20, askem yuwan, “Hao nao bae mi save sapos mi stap strong go kasem en?” ?Wanem nao yu bin lanem long Nifae we i helpem ansarem kwestin ia?

Elda Dale G. Renlund i bin tijim: “Blong stap strong kasem en i no wan seperet step insaed long doktrin blong Kraes—olsem se yumi komplitim ol fas fo step afta slakem yumi go daon, kakae tut blong yumi, mo wet blong ded. No, stap strong kasem en i minim blong gohed mo wantem blong ripitim ol step ia” (“Lifelong Conversion” [Brigham Young University devotional, Sept. 14, 2021], 2, speeches.byu.edu). Olsem wanem nao yu save ripitim ol step long doktrin blong Kraes (fet, fasin blong sakem sin, baptaes, mo kasem Tabu Spirit)?

2 Nifae 32; 33:2

Tru long ol toktok blong Kraes mo Tabu Spirit, God bae i soem long mi wanem blong mekem.

?I gat wan taem long laef we yu no bin sua abaot nekis step we yu wantem tekem long laef blong yu? Ol pipol blong Nifae tu oli bin gat semmak wari ia (luk long 2 Nifae 32:1). Lukaotem ansa blong Nifae long 2 Nifae 32:2–9. ?Olsem wanem nao bae yu putum long toktok blong yuwan wanem we Nifae i bin tijim? ?Wanem nao ol eksperiens we i bin tijim yu se ol toktok blong Nifae oli tru?

Tingting blong mekem wan lis blong ol desisen o situesen (naoia mo long fiuja) we yu nidim givhan blong God. ?Wanem nao yu lanem aot long 2 Nifae 32 we bae i helpem yu kasem insperesen we i kam long Hem? ?Wanem nao i save lidim ol pipol blong “mekem hat blong olgeta i kam strong agensem Tabu Spirit”? (2 Nifae 33:2).

Taem yu tingting hevi long kaonsel blong Nifae, tingbaot hao yu stadi long ol toktok blong Sevya. ? Yu ting se bae yu tokaot olsem wan smol kakae, stap kakae, o kakae gud? ?Long tingting blong yu, wanem i mekem i defren? Tingting long hao yu save mekem eksperiens blong yu wetem ol toktok blong Sevya i kam moa olsem wan gudfala kakae. Ating yu save karem ol tingting long wan fren o famli memba.

Stap Kakae Gud long Ol Toktok blong Kraes I gat plante wei blong kakae gud long ol toktok blong Kraes, we insaed i gat stap prea blong kasem insperesen, stap askem ol kwestin bifo mo long taem blong stadi, faenem mining blong ol toktok, tingting hevi, mekem kros refrens, stap tekem ol not, lukaotem ol trutok blong gospel, mo stap yusum ol skripja long laef blong yu (luk long 1 Nifae 19:23).

Hao nao yu invaetem Tabu Spirit blong stap kompanion blong yu blong oltaem long laef blong yu, be i no wan visita blong sot taem nomo? Ridim tri tingting we David A. Bednar i serem blong mekem se yumi “gohed blong gat tru” kampani blong Tabu Spirit long “Receive the Holy Ghost” (Liahona, Nov. 2010, 94–97). ?Olsem wanem nao bae yu aplaem kaonsel ia?

Luk tu long Gospel Topics, “Revelation,” Gospel Library; “Daily Bread: Pattern” (video), Gospel Library.

2 Nifae 33

Buk blong Momon i winim tingting blong yumi blong mas biliv long Kraes.

Long 2 Nifae 33, taem Nifae i stap finisim ol raeting blong hem, hem i eksplenem ol risen from wanem hem i bin stap raet long fas ples. ?Wanem ol risen nao yu faenem insaed long japta ia? Lukluk i go bak long ol stori mo ol tijing we yu stap ridim i kam finis, long 1 Nifae mo 2 Nifae. Wijwan i givim paoa long yu mo long fet blong yu long Kraes moa?

Luk tu long “Nephi Sees a Vision of Future Events” (vidio), Gospel Library.

Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

2 Nifae 31:4–13

Taem mi kasem baptaes, mi stap folem Jisas Kraes.

• I gat wan pikja blong Jisas we i bin baptaes long en blong aotlaen ia. Ating ol pikinini blong yu oli save yusum blong talemaot wanem oli bin save abaot taem ia (luk tu long Matiu 3:13–17). ?From wanem Jisas i wantem yumi blong kasem baptaes olsem Hem? Ol pikinini blong yu oli save lisin blong kasem ol risen taem we yufala i rid tugeta ol pat blong 2 Nifae 31:4–13. Maet i save help sapos wan we i jes pabtaes i no longtaem i pas, blong save serem eksperiens blong hem.

2 Nifae 31

Jisas Kraes i bin tijim mi olsem wanem blong gobak long Papa long Heven.

• Blong helpem ol pikinini blong yu i gat klia pikja long ol tijing insaed 2 Nifae 31, oli save droem wan rod wetem wan pikja blong Kraes long en. Yu save helpem olgeta blong faenem o droem ol pikja we i ripresentem ol step long rod ia, olsem fet long Kraes, fasin blong sakem sin, baptaes, presen we i Tabu Spirit, mo stap strong kasem en. Oli save poenem ol pikja ia taem yu stap ridim 2 Nifae 31:17–20 tugeta.

2 Nifae 32:3–5

Mi save kakae gud long ol toktok blong Kraes.

• Blong tij abaot “kakae gud” long ol toktok blong Kraes, yu save askem ol pikinini blong yu blong aktemaot hao bae oli kakae gud kakae we oli laekem tumas. Long 2 Nifae 32:3, ?wanem nao Nifae i bin talem we yumi mas kakae gud long hem? ?Olsem wanem nao blong stap kakae gud long toktok blong God i defren long hemia blong stap ridim nomo? Ating ol pikinini blong yu i save aktemaot wanem i defren blong kakae gud mo blong ridim nomo. Serem wetem olgeta ol blesing we yu bin kasem taem yu stap kakae gud long ol skripja.

2 Nifae 32:8–9

Papa long Heven i wantem mi blong prea oltaem

• Afta ridim 2 Nifae 32:8–9, toktok wetem ol pikinini se from wanem Setan i no wantem yumi blong prea. ?From wanem God i wantem yumi blong “prea oltaem”? Ol pikinini i save mekem wan lis o droem ol pikja blong wan taem we oli save prea. Afta, yu save singsing wan singsing we i stap tij abaot prea, olsem “?Yu Bin Mekem Prea?” STSPnamba 48). Yu save riplesem ol toktok blong singsing ia wetem ol toktok blong lis blong olgeta. ?Olsem wanem nao Lod i stap blesem yumi taem yumi stap prea oltaem?

Blong moa tingting, luk long namba blong manis ia Fren magasin.

Blong Mekem Evri Stret mo Gud Fasin I Kamtru, i kam long Liz Lemon Swindle