“25–31 Maj: ‘Bae Hem I Girap … wetem Paoa blong Hiling long Ol Wing blong Hem.’ Ista,” Kam Folem Mi—Blong Hom mo Jos: Buk blong Momon 2024 (2024)
“25–31 Maj. Ista,” Kam Folem Mi—Blong Hom mo Jos: 2024 (2024)
Kraes mo Olgeta Aposol, i kam long Del Parson
25–31 Maj: “Bae Hem I Girap … wetem Paoa blong Hiling long Ol Wing blong Hem”
Ista
Ol Aposol blong bifo, oli bin tok stret long testemoni blong olgeta abaot Jisas Kraes mo Laef Bakegen long Ded blong Hem (luk long Ol Wok 4:33). Plante milian pipol oli biliv long Jisas Kraes, mo oli traehad blong folem Hem from ol toktok blong olgeta we oli raetemdaon insaed long Baebol. Yet sam pipol oli maet askem olgetawan: Sapos Jisas Kraes i Sevya blong ful wol, afta, ?from wanem ol witnes blong Hem, oli smol nomo inaf long wan grup blong ol pipol insaed long wan smol relijin?
Buk blong Momon i stap olsem wan nara witnes we i save winim tingting blong ol man se Jisas Kraes, Hem i Sevya blong wol, “we Hem i bin soemaot Hemwan long evri kantri” (taetol pej blong Buk blong Momon) mo i stap givim wan fasin blong sevem man long evriwan we bae oli kam long Hem. Antap long hemia, seken witnes ia i mekem i klia se fasin blong sevem man i minim wanem. Hemia nao from wanem Nifae, Jekob, Momon, mo evri profet oli bin wok “strong wetem strong tingting blong raetem ol toktok ia long ol buk”—blong talem long ol fiuja jeneresen se, olgeta tu, “oli bin save long Kraes, mo … bin gat wan hop blong glori blong hem” (Jekob 4:3–4). Long Ista taem ia, tingtingbak long ol testemoni insaed long Buk blong Momon, se paoa blong Kraes i blong tugeta ful yunives, mo i blong yuwan—i pemaot ful wol, mo i pemaot yu.
Ol Tingting blong Stap Lan long Hom mo long Jos
From Jisas Kraes, bambae mi laef bakegen long ded.
Hem i wan tradisen, long Ista, blong tingting hevi long Laef Bakegen long Ded blong Jisas Kraes; ?be hem i minim wanem stret blong laef bakegen long ded? ?Wanem niu lukluk nao Buk blong Momon i givim abaot laef bakegen long ded? Maet long Ista sisen ia, yu save raetemdaon ol trutok abaot laef bakegen long ded, we yu save faenem long 2 Nifae 9:6–15, 22; Alma 11:42–45; 40:21–25; 3 Nifae 26:4–5.
Yu save rekodem tu hao ol trutok ia abaot laef bakegen long ded i afektem ol aksen mo ol wei we yu laef long hem. Eksampol, tingting long hao bae yu komplitim ol sentens ia: Sapos mi no bin save olgeta samting ia … mo From mi save olgeta samting ia …
Wan hym olsem “Mi Save Ridima Hem I Laef” (STSP, pej 38-39) i save helpem yu tingbaot from wanem Laef Bakegen long Ded blong Sevya i impoten tumas long yu. Taem yu stap singsing, lisin long, o ridim hym ia, maet yu askem yuwan, “Hao nao laef blong mi i defren from laef bakegen long ded blong Jisas Kraes?”
Blong pat blong stadi blong yu, Gospel Library i gat lis blong ol Ista vidio we i save givim mining long stadi blong yu. Ating yu save wajem wan o moa long ol vidio ia wetem klas, mo tingting hevi long hamas moa yu andastanem o talem tangkyu from Laef Bakegen long ded blong Sevya.
Luk tu long Luk 24:36–43; Ol Wok 24:15; 1 Korin 15:12–23; Reyna I. Aburto, “Gref I No Save Win,” Liahona, Mei 2021, 85–86; Gospel Topics, “Resurrection,” Gospel Library; “Death, Grieving, and Loss” insaed long “Life Help” koleksen long/ Gospel Library.
Jisas Kraes i tekem long Hemwan ol sin blong mi, ol sobodi blong mi, mo ol samting we mi slak long olgeta.
Baebol i tijim klia se Jisas Kraes i bin pem praes from ol sin blong yumi. Buk blong Momon, i talem moa mekem se yumi andastanem moa abaot sakrifaes blong Kraes mo ol safaring blong Hem, long ol wei we i moa impoten. Yu save faenem sam long ol tijing ia long Mosaea 3:7; 15:5–9; Alma 7:11–13. Afta we yu ridim ol skripja ia, tingting blong raetemdaon wanem yu bin faenem, i go long wan jat olsem hemia:
|
?Sevya i bin safa long wanem? |
?From wanem Hem i bin safa? |
?Hemia i minim wanem long mi? |
|---|---|---|
Hemia wan nara wei blong stadi ol skripja: Lukaotem ol hym we yu filim se i majem ol mesej we yu stap tijim. Ol “Skripja” indeks biaen long hym buk i save help. ?Wanem ol sentens long ol hym ia mo ol skripja ia i helpem yu blong talem tangkyu moa from sakrifaes blong Sevya?
Luk tu long Aesea 53; Hibrus 4:14–16; Gérald Caussé, “Wan Witnes We I Stap Laef Abaot Kraes We I Laef,” Liahona, Mei 2020, 38–40.
Jisas Kraes i save klinim mi mo helpem mi blong kam stret gud evriwan.
Oli save talem se Buk blong Momon i wan bigfala stori blong ol pipol we oli bin jenis from Atonmen blong Jisas Kraes. Yu save ridim sam long ol eksperiens ia long Mosaea 5:1–2; 27:8–28; Alma 15:3–12; 24:7–19. Maet yu save tingbaot sam nara eksampol blong stadi long hem tu. ?Wanem nao yu luk se ol eksperiens ia oli gat we oli semsemmak? ?Wanem ol samting we i defren we yu bin luksave? ?Wanem nao ol stori ia oli stap tijim yu abaot long hao Sevya i save jenisim yu?
Luk tu long Alma 5:6–14; 13:11–12; 19:1–16; 22:1–26; 36:16–21; Ita 12:27; Moronae 10:32–33.
Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
From se Hem i bin girap bakegen long ded, mi tu, mi save girap bakegen long ded.
-
Yu save yusum “Japta 53: Jisas I Bin Krusifae” mo “Japta 54: Jisas I Bin Girap Bakegen” (long Ol NiuTesteman Stori, 136–38, 139–44) blong talem long ol pikinini blong abaot Laef Bakegen long Ded blong Jisas Kraes. O letem ol pikinini i talem stori long yu taem oli stap yusum ol pikja long ol japta ia.
-
Visit i go long Amerika blong Sevya we i Girap Bakegen, i wan strong witnes blong Laef Bakegen long Ded blong Hem. Tingting blong serem hemia wetem ol pikinini blong yu, taem yu stap yusum 3 Nifae 11; 17; singsing ia “Easter Hosanna”; o las ves blong “Book of Mormon Stories” (Children’s Songbook, 68–69, 118–19). Leftemap tingting blong ol pikinini blong yu blong traem tingbaot se bae i olsem wanem blong save filim ol kil blong bodi blong Hem (luk long 3 Nifae 11:14–15) o blong stap wan long ol pikinini ia we Hem i bin blesem (luk long 3 Nifae 17:21). Serem wetem wanwan long yufala ol filing abaot Jisas Kraes mo abaot Laef Bakegen long Ded blong Hem.
-
Blong helpem ol pikinini blong yu i faenemaot wanem Buk blong Momon i stap tijim abaot laef bakegen long ded, yu save invaetem olgeta blong priten se yu no save wan samting nating mo askem olgeta blong eksplenem long yu. Helpem olgeta blong lukluk long 2 Nifae 9:10–15; Alma 11:41–45; mo Alma 40:21–23 blong ansarem ol kwestin olsem olgeta ia: I minim wanem blong kasem laef bakegen long ded? Huia nao bae i laef bakegen long ded? Invaetem olgeta tu blong serem testemoni blong olgeta abaot Laef Bakegen long Ded blong Sevya olsem pat blong ansa blong olgeta.
Jisas Kraes i save olsem wanem blong givim kamfot long mi.
-
Mosaea 3:7 mo Alma 7:11 i tokbaot sam long wanem Sevya i bin go tru long hem olsem pat blong Atonmen blong Hem. Maet yu ridim wan long ol ves ia long ol pikinini blong yu mo askem olgeta blong lisin long ol toktok we i talem long olgeta wanem we Jisas i bin safa blong yumi. Afta yu save ridim Alma 7:12 blong faenemaot from wanem hem i bin safa. Testifae se Jisas Kraes i bin filim evri harem nogud mo sik blong bae hem i save givim kamfot long yumi.
-
?Ol pikinini blong yu oli gat wan hym o singsing we oli laekem tumas abaot Jisas Kraes mo Atonmen blong Hem? Yufala i save singsing tugeta—o lanem wan niu wan. Tokbaot ol toktok o sentens long singsing ia we i tijim yu abaot kamfot mo pis we Sevya i givim long yumi.
Getsemane, i kam long Michael T. Malm
Jisas Kraes i save givim klinim mi mo helpem mi jenis.
-
Buk blong Momon i givim plante eksampol blong ol man we oli bin jenis from Atonmen blong Sevya. Ating ol pikinini blong yu i save jusum wan jusum wan long ol pipol ia blong lan abaot hem, olsem Inos (luk long Inos 1:2–8), Yangfala Alma (luk long Mosaea 27:8–24), o Ol Antae-Nifae-Lihae (ol man we oli agensem Nifae o Lihae) (luk long Alma 24:7–19). Olsem wanem nao man ia o grup ia oli jenis from Atonmen blong Jisas Kraes? ?Olsem wanem nao yumi save folem ol eksampol blong olgeta?
-
Yu mo ol pikinini blong yu i save komperem wan klin samting mo wan doti samting mo tokbaot hao oli save klinim doti samting i kam klin. Ridim tugeta Alma 13:11–13. ?Wanem nao Jisas i bin mekem blong yumi save kam klin aot long ol sin blong yumi? ?Hemia i mekem yumi filim olsem wanem abaot sin? ?Olsem wanem nao olgeta we yu stap tijim oli filim abaot Sevya?
Blong moa tingting, luk long namba blong manis ia blong Fren magasin.
Laef long wan laef we i klin inaf blong Spirit i save lidim yumi. Spirit i wan tru tija. Taem yu stap lukaotem blong Hem i lidim yu mo laef klin inaf, bae Hem i givim ol tingting mo ol filing blong olsem wanem blong ansa long ol nid blong olgeta we yu stap tijim.
Pikja blong Kraes wetem Ol Man blong Nifae, i kam long Ben Sowards