Li Kristo nak’utuk chiruheb’ lix tzolom, xb’aan laj Justin Kunz

18–24 marzo: “A’in li b’e”

2 Nefi 31–33

Sa’eb’ li roso’jik aatin kixtz’iib’a laj Nefi, naqataw li ch’ol aatin a’in: “Jo’ka’in kinixtaqla li Qaawa’, ut tento tin’ab’inq chiru” (2 Nefi 33:15). A’in naxch’olob’ chi us chan ru kiwan laj Nefi sa’ xyu’am. A’an kixyal xtawb’al ru li rajom li Dios ut chi kaw xch’ool kixpaab’—maak’a’ naxye naq kiru chi kamsiik naq kixsik’ xk’ulb’aleb’ li perel ch’iich’ rik’in laj Laban, naq kixyiib’ jun jukub’ ut kixq’ax ru li nimla palaw, malaj naq chi tiik xch’ool kixk’ut lix tzol’leb’ li Kristo chi saqen ru ut rik’in wankilal. Laj Nefi kiru chi aatinak rik’in wankilal re q’unb’esink ch’oolej chirix lix aajelil ru “xtiikisinkil qib’ chi uub’ej chi xaqxooko junelik rik’in li Kristo,” chirix x’aajelil ru xtaaqenkil “li laatz’ ut ka’ch’in ruhil b’e li nak’amok sa’ li junelik yu’am” (2 Nefi 31:20, 18), xb’aan naq a’an ajwi’ li b’e kixtaaqe a’an. A’an kixnaw rik’in li k’a’ru kixk’ul naq li b’e a’in, us ta ch’a’aj jo’q’ehaq, naxk’e li sahil ch’oolejil, ut naq “maajun chik k’ab’a’ej wan chi k’eeb’il rub’el choxa li taaruuq taakole’q wi’ li winq sa’ li rawa’b’ejihom li Dios” (2 Nefi 31:21).

Li na’leb’ re tzolok sa’ li ochoch ut sa’ li iglees

2 Nefi 31

Li Jesukristo ut lix tzol’leb’ a’aneb’ li junaj chi b’e re xk’ulb’al li junelik yu’am.

Wi ta tento taach’olob’ k’a’ru li b’e li nak’amok sa’ li junelik yu’am rik’in yal wiib’ oxib’ li aatin, k’a’ raj ru taaye? K’e reetal chan ru naq laj Nefi kixch’olob’ a’an sa’ 2 Nefi 31. Naru nakayiib’ xjalam-uuch jun li b’e ut nakatz’iib’a chire, junjunq reheb’ li na’leb’ malaj yokb’ nakataw sa’eb’ li ch’ol a’in. Naru nakatz’iib’a chi k’osb’il ru chiru laa jalam-uuch li kixk’ut laj Nefi chirix li junjunq chi na’leb’.

Naq yooqat chirilb’al 2 Nefi 31:18–20, tz’il rix lix yalb’al aaq’e sa’ “xtiikisinkil aawib’ chi uub’ej” sa’ xb’ehil li evangelio.

Chiʼilmanq ajwiʼ “Ub’ej chexxik,” Ebʼ li Bʼich, 43.

Xtaaqenkil lix k’utum li Jesukristo naxk’am qab’e sa’ li junelik yu’am.

2 Nefi 31:4–13

Li Jesukristo kixk’ut chi tz’aqal re ru chan ru too’ab’inq chiru li Dios naq a’an kikub’e xha’.

Maak’a’ naxye ma xkub’e aaha’ ewer malaj 80 chihab’ chaq, a’an jun xnimal ru hoonal. Xat-ok sa’ jun junelikil sumwank re xtaaqenkil li Jesukristo. K’oxla lix kub’ik aaha’ laa’at naq nakawil resil lix kub’iha li Kolonel sa’ 2 Nefi 31:4–13. Xsumenkileb’ li patz’om a’in naru nakatxtenq’a:

• K’a’ut naq kikub’e xha’ li Kristo? K’a’ut naq kinsik’ ru xkub’sinkil inha’?

• K’a’ru kinye naq tinb’aanu naq xkub’e chaq inha’? K’a’ru naxyeechi’i li Qaawa’ jo’ reeqaj a’an? (che’ilmanq li raqal 12–13; chi’ilmanq ajwi’ Mosiah 18:10, 13).

• Chan ru naru nink’ut naq toj k’eek’o inch’ool chixtaaqenkil li Jesukristo?

2 Nefi 31:15–20

“Ani nakuyuk toj saʼ rosoʼjik, aʼan li taakoleʼq.”

Naq nakawil 2 Nefi 31:15–20, patz’ aawib’, “Chan ru ninnaw ma yookin chi kuyuk toj sa’ roso’jik?” K’a’ru nakatzol rik’in laj Nefi li nakatxtenq’a chixsumenkil li patz’om a’in?

Li Elder Dale G. Renlund kixye: “Li kuyuk toj sa’ roso’jik moko xjunes ta na’ux jo’ xcha’al lix tzol’leb’ li Kristo—ink’a’ naqab’aanu li kaahib’ chi na’leb’ xb’een wa toj reetal naq naqak’achab’ qib’, naqak’uxuxi ruuch qe, ut naqoyb’eni li qakamik. Ink’a’, li kuyuk toj sa’ roso’jik a’an b’an xk’iilasutinkil lix komoneb’ li na’leb’ a’an chi rajlal ut chi anchal qach’ool” (“Lifelong Conversion” [devocional de la Universidad Brigham Young, 14 septiembre, 2021], 2, speeches.byu.edu). Chan ru naru nakak’iilasutiheb’ li na’leb’ re lix tzol’leb’ li Kristo (li paab’aal, li jalb’a-k’a’uxlej, li kub’iha’, ut xk’ulb’al li Santil Musiq’ej)?

2 Nefi 32; 33:2

Rik’in li raatin li Kristo ut li Santil Musiq’ej, li Dios tixk’ut chiwu li tento tinb’aanu.

Ma aaweek’ahom jun sutaq naq ink’a’ nakanaw k’a’ru taab’aanu sa’ laa yu’am? Ke’wan ajwi’ xk’a’uxl lix tenamit laj Nefi chirix a’an (chi’ilmanq 2 Nefi 32:1). Sik’ li kixye laj Nefi sa’ 2 Nefi 32:2–9. Chan raj ru taaye rik’in tz’aqal aawaatin li k’a’ru kixk’ut laj Nefi? K’a’ru aak’ulum li xk’ut chawu naq yaal li raatin laj Nefi?

Naru nakatz’iib’a junjunq li na’leb’ (re anajwan ut re kutan chalel) b’ar wi’ taawaj ru xb’eresihom li Dios. K’a’ru naru nakatzol sa’ 2 Nefi 32 li tatxtenq’a chixk’ulb’al li musiq’anb’il na’leb’ naxk’e a’an? K’a’ru naru nak’amok reheb’ li kristiaan “chixkawob’resinkil li raameb’ chiru li Loq’laj Musiq’ej”? (2 Nefi 33:2).

Naq nakatz’il rix sa’ aach’ool lix na’leb’ laj Nefi, k’oxla chan ru nakatzol li raatin li Kolonel. Ma a’an chanchan yal xyalb’al b’ayaq, xyalb’al chi us, malaj xyalb’al re xtzekankil tz’aqal xsahil? Chan ru naq jalaneb’ a’an, jo’ nakak’oxla? K’oxla chan ru naru nakatzeka xsahil li raatin li Kolonel? Maare wan jun aawamiiw malaj aakomon li naru tixk’e aana’leb’.

Tzeka xsahil li raatin li Kristo. Naab’al paay ru xtzekankil xsahil li raatin li Kristo, jo’ li tijok re xk’ulb’al musiq’anb’il na’leb’, li patz’ok rub’elaj ut naq yookat chi tzolok, xtawb’al xyaalalileb’ li aatin, li tz’ilok-ix sa’ k’a’uxlej, rilb’al xkomoneb’ chik li raqal, xtz’iib’ankil laa na’leb’, xsik’b’aleb’ li na’leb’ re li evangelio, ut xyu’aminkileb’ li loq’laj hu (chi’ilmanq 1 Nefi 19:23).

Chan ru nakab’oq li Musiq’ej jo’ aawochb’een rajlal sa’ laa yu’am, ut ink’a’ yal jo’q’ehaq? Ileb’ li oxib’ chi na’leb’ kixye li Elder David A. Bednar re naq “rajlal” tatrochb’eeni li Santil Musiq’ej sa’ “Recibe el Espíritu Santo” (Liahona, noviembre 2010, 94–97). Chan ru naq taayu’ami li kixye?

Chi’ilmanq ajwi’ Temas del Evangelio, “Revelación,” Biblioteca del Evangelio; “El pan de cada día: Modelo” (video), Biblioteca del Evangelio.

2 Nefi 33

Lix Hu laj Mormon naxq’unb’esi qach’ool re taqapaab’ li Kristo.

Sa’ 2 Nefi 33, naq laj Nefi yoo chixraqb’al lix tz’iib’ahom, a’an kixch’olob’ k’a’ut naq yoo chi tz’iib’ak. K’a’ru nakataw chirix a’an sa’ li ch’ol a’in? Tz’il rix sa’ aak’a’uxl eb’ li seraq’ ut k’utum ak aawilom sa’ 1 Nefi ut 2 Nefi. B’arwan reheb’ li mas kixtoch’ aach’ool ut laa paab’aal chirix li Jesukristo?

Chi’ilmanq ajwi’ “Nefi registra su testimonio final” (video), Biblioteca del Evangelio.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

2 Nefi 31:4–13

Naq nakub’e inha’, yookin chixtaaqenkil li Jesukristo.

• Wan jun xjalam-uuch lix kub’iha’ li Jesus sa’ xraqik li tusleb’ aatin a’in. Laa kok’al naru neke’roksi re xyeeb’al aawe k’a’ru neke’xnaw chirix lix kub’iha’ (chi’ilmanq ajwi’ Mateo 3:13–17). K’a’ut naq li Jesus naraj naq taakub’eeq qaha’ jo’ kikub’e xha’? Laa kok’al naru neke’xk’e reetal xsumenkil a’an naq yooqex chirilb’al junjunq xcha’al 2 Nefi 31:4–13. Chaab’il raj wi wan jun komon toje’ xkub’e xha’ naru tixwotz lix numsihom.

2 Nefi 31

Li Jesukristo kixk’ut chiwu chan ru tinq’ajq rik’in lin Choxahil Yuwa’.

• Re xtenq’ankileb’ laa kok’al chixtawb’al ru li nak’utman sa’ 2 Nefi 31, naru neke’xyiib’ xjalam-uuch jun li b’e rik’in jun xjalam-uuch li Kristo sa’ xraqik. Naru nakatenq’aheb’ chixyiib’ankil jalam-uuch li neke’reetaliheb’ li yokb’ sa’ li b’e a’an, jo’ li paab’aal chirix li Kristo, li jalb’a-k’a’uxlej, li kub’iha’, li maatan re li Santil Musiq’ej, ut li kuyuk toj sa’ roso’jik. Naru neke’xk’uteb’ chi ru’uj ruq’ li jalam-uuch naq yooqex chirilb’al 2 Nefi 31:17–20.

2 Nefi 32:3–5

Naru nintzeka xsahil li raatin li Kristo.

• Re k’utuk chirix “xtzekankil xsahil” li raatin li Kristo, naru nakapatz’ reheb’ laa kok’al naq te’xk’utb’esi chan raj ru te’xtzeka xsahil li tzakemq jwal nawulak chiruheb’. Sa’ 2 Nefi 32:3, k’a’ru li tento taqatzeka xsahil, jo’ kixye laj Nefi? K’a’ru xjalanil xtzekankil xsahil li raatin li Dios rik’in yal rilb’al? Laa kok’al naru neke’xk’utb’esi lix jalanileb’. Wotz rik’ineb’ li osob’tesink ak xak’ul laa’at rik’in xtzekankil xsahileb’ li loq’laj hu.

2 Nefi 32:8–9

Li qaChoxahil Yuwa’ naraj naq tintijoq junelik.

• Chirix rilb’al 2 Nefi 32:8–9, ye reheb’ laa kok’al k’a’ut naq laj Satanas ink’a’ naraj naq tootijoq. K’a’ut naq li Dios naraj naq “junelik tootijoq”? Laa kok’al naru neke’xtz’iib’a malaj neke’xyiib’ xjalam-uuch hoonal naru neke’tijok wi’. Chirix a’an naru nekeb’icha jun li b’ich li nak’utuk chirix li tijok, maare “Ma tijok xayal?” (Eb’ li B’ich, 81). Naru nakawoksiheb’ li aatin xe’xtz’iib’a sa’ xna’aj junjunqeb’ li aatin sa’ li b’ich. Chan ru naq nokorosob’tesi li Dios naq junelik nokotijok?

Re xtawb’al xkomon chik li na’leb’, chi’ilmanq li hu Amigos re li po a’in.

Re xtz’aqob’resinkil ru chixjunil li tiikilal, xb’aan li xLiz Lemon Swindle