A’an tatxk’am chawuq’, xb’aan li xSandra Rast

11–17 marzo: “Jun li sachb’a-ch’oolejil k’anjel ut jun li eetalil”

2 Nefi 26–30

“Nekexwaatina jo’ profeet chirix li roso’jikeb’ li kutan,” kixtz’iib’a laj Nefi (2 Nefi 26:14). Sa’ jalan chik aatin, a’an kitz’iib’ak chirix li qakutankil laa’o. Ut tento naq yooq li qak’a’uxl chirix li kiril: li kristiaan li neke’xtz’eqtaana lix wankil ut lix sachb’a-ch’oolej li Dios; li kaqalink ut li wech’ink chi numtajenaq. A’b’an rochb’eeneb’ li “k’anjel re q’ojyin” sa’ roso’jikeb’ li kutan a’in (2 Nefi 26:10, 22) li b’eresinb’il xb’aan laj tza, laj Nefi ki’aatinak ajwi’ chirix “jun sachb’a-ch’oolejil k’anjel ut jun li eetalil” li b’eresinb’il xb’aan li Dios (2 Nefi 27:26). Tz’aqal sa’ xyi li k’anjel a’an taawanq jun li hu—jun li hu li naxk’ut chi kutankil lix tik’ti’ laj Satanas ut li naxch’utub’eb’ li tiikeb’ xch’ool. Li hu a’in, a’an lix Hu laj Mormon, lix sachb’a-ch’oolejil k’anjel a’an lix Iglees li Qaawa’ sa’ roso’jikeb’ li kutan, ut li sachb’a-ch’oolej—malaj jun raqal re—a’an naq li Qaawa’ nokoxb’oq chiqajunil, maak’a’ naxye xq’unal li qametz’ew, re tootz’aqonq sa’ li ch’utub’ank.

Li na’leb’ re tzolok sa’ li ochoch ut sa’ li iglees

2 Nefi 26–27; 29–30

Li Dios kixkawresi lix Hu laj Mormon choq’ re li qakutankil.

Sa’ 2 Nefi 26–27, laj Nefi kiroksi lix profeetil aatin laj Isaias (chi’ilmanq Isaias 29) ut kixjuntaq’eeta rik’in lix tenamit ut li tz’iib’anb’il esil wan reheb’—lix Hu laj Mormon. A’an kixnaw chi k’utb’esinb’il, us ta maji’ choyb’il lix tz’iib’ankil chixjunil lix Hu laj Mormon, naq sa’ junaq kutan a’an “nimaq xloq’al choq’ reheb’ li ralal xk’ajoleb’ li winq” (2 Nefi 28:2). K’a’ut naq nim xloq’al lix Hu laj Mormon choq’ aawe laa’at? K’oxla li patz’om a’in naq nakawil 2 Nefi 29–30. K’a’ru li “sachb’a-ch’oolejil k’anjel” (2 Nefi 27:26) li yoo chixtz’aqob’resinkil ru li Dios sa’ li ruchich’och’ ut sa’ laa yu’am rik’in lix Hu laj Mormon?

Chi’ilmanq ajwi’ Jose Smith—Resilal 1:62–65.

2 Nefi 26:23–33

Li Jesukristo nokoxb’oq chiqajunilo chi chalk rik’in.

Wankeb’ naab’aleb’ xchaq’al ruhil na’leb’ neke’tawman sa’ 2 Nefi 26:23–24. Qayehaq, naru nakatk’oxlak chirix li xb’aanuhom li Jesukristo “choqʼ re lix chaabʼilal li ruchichʼochʼ”—ut choqʼ aawe laaʼat. Chan ru naq a’an “naxjilosi chaq chixjunileb’ li winq”—ut laa’at—“rik’in”? K’a’ru nakaweek’a naq eek’asinb’ilat chixb’aanunkil re xsumenkil lix rahom?

Ileb’ li raqal 25–33 ut k’e reetaleb’ li na’leb’ chirix li Kolonel. K’e reetaleb’ lix b’oqom chi us. Chan raj ru taaye li naxye li Jesukristo aawe sa’ jun ajwi’ li ch’ol aatin? Jun b’ich jo’ “Chalqex rikʼin li Kolonel” (Ebʼ li Bʼich, 68) naru naxte aak’a’uxl re taak’ul xkomoneb’ chik laa na’leb’.

Kʼoxla chan ru naq eb’ li raqal a’in naru te’xjal chan ru naq nakawaatinahebʼ ut nakab’oqeb’ laa was wiitz’in chi chalk rik’in li Kristo. Naru nakataw xkomon chik laa na’leb’ saʼ li raatin li Elder D. Todd Christofferson, “Li tzol’leb’ re wank sa’ komonil” (Jolomil ch’utub’aj-ib’ re octubre 2022).

Chi’ilmanq ajwi’ 3 Nefi 18:30–32; Dallin H. Oaks, “K’a’ru xb’aanuhom li qaKolonel choq’ qe?,” Jolomil ch’utub’aj-ib’ re abril 2021; Temas del Evangelio, “Pertenecer a la Iglesia del Señor,” Biblioteca del Evangelio.

Matk’oxlak naq maa’ani na’aatinak. Eb’ li chaab’il patz’om hoonal neke’raj re xsumenkil. Neke’raj li li sik’ok, li tz’ilok-ix sa’ ch’oolej, ut li musiq’anb’il na’leb’. Li hoonal na’oyb‘eniik wi’ xsumenkil jun li patz’om naru taa’ok choq’ jun loq’laj hoonal re tz’ilok-ix sa’ ch’oolej. Mat-aaleek chixraqb’al li hoonal a’in sa’ junpaat rik’in xtikib’ankil jalan chik li na’leb’.

2 Nefi 28

Laj Satanas naxsik’ b’alaq’ink.

Naab’al reheb’ lix tik’ti’ ut lix ra’al laj Satanas k’utb’esinb’ileb’ sa’ 2 Nefi 28. Sik’eb’ sa’eb’ li raqal 6, 8, 21–23, 29. K’a’ut naq tento taanaw chirixeb’ lix tik’ti’ laj Satanas? K’a’ru taab’aanu naq laj tza naxsik’ aab’alaq’inkil?

Tz’iib’anb’ileb’ rub’el a’in junjunqeb’ li raqal re li loq’laj hu li neke’xtz’eqtaana lix tik’ti’ laj Satanas. Yal xk’eeb’al reetal b’arwan li yaalil tzol’leb’ sa’eb’ li raqal a’in li naxk’am rib’ rik’ineb’ li b’alaq’il na’leb’ ki’aatinak wi’ laj Nefi sa’ 2 Nefi 28:

• 2 Nefi 2:17: wan jun aj tza (2 Nefi 28:22: “Maawaʼin aj tza, xbʼaan naq maakʼaʼ junaq”)

• Moroni 7:35–37

• Tzol’leb’ ut Sumwank 1:31

• Tzol’leb’ ut Sumwank 68:31; 82:14

• Eb’ lix Raqalil li Paab’aal 1:9

Chi’ilmanq ajwi’ Gary E. Stevenson, “Minaab’alaq’i,” Jolomil ch’utub’aj-ib’ re octubre 2019.

2 Nefi 28:27–31; 29

Li Dios ink’a’ naxkanab’ xk’eeb’al li k’utb’esinb’il na’leb’ re xb’eresinkileb’ li ralal xk’ajol.

Jo’ aj Santil Paab’anel sa’ Roso’jikeb’ li Kutan, osob’tesinb’ilo rik’in xnaab’alil li raatin li Dios. A’ut, jo’ kixye laj Nefi, miqak’oxla naq “ak tzʼaqal qe!” Naq nakawileb’ li tijom sa’ 2 Nefi 28:27–31 ut 2 Nefi 29, k’oxlaheb’ li patz’om jo’eb’ a’in:

• K’a’ru naraj li Dios naq tinweek’a chirix li raatin ut chan ru naraj naq tinsume?

• K’a’ut naq wan naq “neke’josq’o’” li kristiaan rik’in xk’ulb’al xkomon chik li yaal rik’in li Dios? (2 Nefi 28:28). Ma wan naq naweek’a chi jo’kan? Wi jo’kan, chan ru naq tinjalaaq?

• K’a’ru naraj naxye xk’ulb’al li raatin li Dios? Chan ru naru nink’ut chiru a’an naq nawaj xk’ulb’al xkomon chik li raatin?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

2 Nefi 26:23–28, 33

Li Jesukristo naraj naq chixjunileb’ te’chalq rik’in a’an.

• Re xk’eeb’al xna’leb’eb’ laa kok’al chirix lix b’oqom li Kolonel sa’eb’ li raqal a’in, naru nakat-aatinak rik’ineb’ chirixeb’ li hoonal naq ke’xb’oqeb’ li kristiaan sa’ jun ch’ina k’anjel, maare jun ninq’e. Chirix a’an naru nekeril 2 Nefi 26:23–28 re xk’eeb’al reetal k’a’ru naxpatz’ li Jesukristo naq taqab’aanu. Maare taawulaq chiruheb’ laa kok’al xyiib’ankil jun hu re xb’oqb’al jun kristiaan chi chalk rik’in li Jesukristo. Waklesi xch’ooleb’ chiroksinkileb’ li ch’ol aatin wankeb’ sa’eb’ li raqal a’in sa’ xb’oqomeb’.

• Li jalam-uuch li wan sa’ xraqik li tusleb’ aatin a’in naxk’uteb’ li kristiaan jalan jalanqeb’. Laa kok’al naru neke’ril li jalam-uuch a’in naq yooqat chixyaab’asinkil 2 Nefi 26:33. Naru nakayaab’asi li ch’ol aatin “Li Jesus naxb’oq chixjunileb’ chi chalk rik’in” naq laa kok’al yooqeb’ chixk’utb’al chi ru’uj ruq’ li junjunq chi kristiaan sa’ li jalam-uuch—toja’ naq te’xk’ut rib’ chi ruq’. Chan ru naq nokochal rik’in li Jesus?

• Jun li b’ich chirix xraab’aleb’ li qas qiitz’in, maare “Aawikʼin tinbʼeeq laaʼin” (B’ichleb’aal choq’ reheb’ li Kok’al, 78–79), naru nakatxtenq’a chixk’utb’al li na’leb’ wan sa’ 2 Nefi 26:33.

2 Nefi 28:2; 29:7–11; 30:3–6

Lix Hu laj Mormon a’an jun li osob’tesink.

• Re xtenq’ankileb’ laa kok’al chireek’ankil naq “nim xloq’al” lix Hu laj Mormon (2 Nefi 28:2), naru nakalan rix lix Hu laj Mormon jo’ maatan, ut nakakanab’eb’ chixq’ehinkil k’a’ru wan chi sa’. Naru neke’xsik’ li na’leb’ sa’ 2 Nefi 30:3–6. Ye reheb’ laa kok’al k’a’ut naq lix Hu laj Mormon jwal nim xloq’al choq’ aawe, ut kanab’eb’ a’an chixwotzb’al ajwi’ li reek’ahomeb’.

• Naru nakapatz’ reheb’ laa kok’al naq te’xk’oxla naq jun li ramiiweb’ naxye reheb’, “Moko aajel ta ru lix Hu laj Mormon choq’ we. Ak xwil ru li Santil Hu.” K’a’ raj ru taqaye re li qamiiw? Ilomaq 2 Nefi 29:7–11 re xnawb’al k’a’ut naq li Dios naraj naq wanqeb’ xkab’ichaleb’ li hu qik’in.

2 Nefi 28:30–31

Lin Choxahil Yuwa’ nikinixtzol chi b’ayatq.

• Naru nakak’oxla jun ch’ina k’utb’esink li tixtenq’aheb’ li kok’al chixtawb’al ru li naraj naxye tzolok “chi junjunqil li raqal.” Qayehaq, naru neke’xyiib’ jun li rompecabezas malaj neke’xyiib’ k’a’ruhaq rik’ineb’ kok’ kaaxukuut, chi junjunqil. Malaj naru nakak’ut chiruheb’ jun li seeb’al chi timil timil, jo’ chanru xyiib’ankil jun utz’u’uj malaj jun jalam-uuch. Chirix a’an naru nekeril 2 Nefi 28:30 ut neketz’il rix chan ru naq li qaChoxahil Yuwa’ naxk’ut li yaal chiqu chi junjunqil.

• Naru ajwi’ nakasik’ ru jun ch’ol aatin sa’ 2 Nefi 28:30 ut teek’e eehoonal cherib’il eerib’ chixtz’iib’ankil, chi junjunqil li aatin. Chan ru naq li Dios naxk’e qe li yaal? K’a’ut naq li Dios naxk’utb’esi li yaal chiqu “chi junjunqil li raqal, chi junjunqil li na’leb’, b’ab’ay arin ut b’ab’ay aran” ut ink’a’ chixjunil chi jun waakaj? Chan ru naru naqak’ut chiru li Dios naq naqaj xk’ulb’al xkomon chik li yaal rik’in?

Re xtawb’al xkomon chik li na’leb’, chi’ilmanq li hu Amigos re li po a’in.

Li Jesus sa’ xyanqeb’, xb’aan li xJudith A. Mehr