26 febrero–3 marzo: “Aʼinaq lix kʼabʼaʼ … Li Awaʼbʼej re Tuqtuukilal”

2 Nefi 11–19

Ch’a’aj li tz’iib’ak chiru perel ch’iich’, ut ka’ch’in ajwi’ li na’ajej re tz’iib’ak chiru lix perel ch’iich’ laj Nefi li kok’ ru. Jo’kan ut, k’a’ut naq laj Nefi kixyal xq’e chiroksinkil naab’aleb’ reheb’ lix tz’iib’ahom li profeet aj Isaias sa’ li esil yoo chixtz’iib’ankil? Kixb’aanu xb’aan naq kiraj naq taqapaab’ li Jesukristo. “Nasahoʼ li waam,” kixtzʼiibʼa, “rikʼin xkʼutbʼal xyaalal chiru lin tenamit naq yaal naq taakʼulunq li Kristo” (2 Nefi 11:4). Laj Nefi ak kiril li taak’ulmanq rik’in lix tenamit sa’ junaq kutan. A’an kiril naq, us ta lix ninqi osob’tesink, te’q’etq’eto’q, te’xwech’ rib’, ut te’xra li ruchich’och’ (chi’ilmanq 1 Nefi 12; 15:4–6). A’an kirileb’ ajwi’ li ch’a’ajkilal a’an sa’ li qakutankil (chi’ilmanq 1 Nefi 14). Eb’ lix tz’iib’ahom laj Isaias nokohe’xtij chirix li maa’usilal a’an. A’b’an ke’xk’e ajwi’ laj Nefi chiroyb’eni li kutan chalel—lix raqik li maa’usilal, lix ch’utub’ankileb’ li tiikeb’ chi paab’ank, ut “nimla saqen” choq’ reheb’ li “keʼbʼeek chaq saʼ qʼojyin” (2 Nefi 19:2). Chixjunil a’in taak’ulmanq xb’aan naq “xyo’la jun li k’uula’al” li tixk’e xraqik chixjunil li wech’ij-ib’—“Li Awa’b’ej re Tuqtuukilal” (2 Nefi 19:6).

Li na’leb’ re tzolok sa’ li ochoch ut sa’ li iglees

Chan ru naru tintaweb’ ru chi mas wi’chik lix k’utum laj Isaias?

Laj Nefi kixk’e reetal naq “moko saqen ta ru li raatin laj Isaias” (2 Nefi 25:4). A’b’an kixk’e ajwi’ li na’leb’ re qatenq’ankil chixtawb’al xyaalalil lix tz’iib’ahom laj Isaias:

• “Juntaq’eeta li raatin” aawik’in laa’at (2 Nefi 11:2). Naab’al reheb’ lix k’utum laj Isaias wan wiib’ oxib’ lix yaalalil ut lix k’anjelankil. Qayehaq, naq nakawil resileb’ li ochoch sa’ 2 Nefi 14:5–6, k’oxla k’a’ru xyaalalileb’ li raqal a’in sa’ laa wochoch. Patz’ aawib’, “K’a’ru naraj li qaChoxahil Yuwa’ naq tintzol?”

• Sik’eb’ reetalil li Jesukristo (chi’ilmanq 2 Nefi 11:4). Naab’aleb’ reheb’ lix profeetil aatin laj Isaias chirix li Kolonel neke’roksi li eetalil. Chan ru na’eetaliman li Kolonel sa’ 2 Nefi 19:2? K’a’ru naxk’ut li eetalil a’in chawu chirix a’an?

• Sik’ naq tatnujaq “rik’in li musiq’ej re profeetil aatin” (2 Nefi 25:4). Naq yooqat chi tzolok, tijon re xk’ulb’al aab’eresinkil sa’ musiq’ej. Maare ink’a’ taataw ru chixjunil sa’ xtiklajik, a’b’an li Musiq’ej naru tatxtenq’a chixtzolb’al li k’a’ru aajel ru choq’ aawe.

Maare chaab’ilaq ajwi’ xsik’b’al aana’leb’ rik’ineb’ li tenq’ re tzolok neke’tawman sa’eb’ li loq’laj hu, jo’ li kok’ tz’iib’ahom sa’eb’ li perel, lix tiklajikeb’ li ch’ol, ut li K’utul Raqal reheb’ li Loq’laj Hu. Sa’eb’ li manual re instituto re lix Hu laj Mormon ut li Najter Chaq’rab’ wan xkomon chik li na’leb’ li naru nakatxtenq’a chi tzolok chirix lix kutankil laj Isaias ut eb’ lix k’utum.

2 Nefi 11–19

Laj Isaias kixch’olob’ xyaalal li Jesukristo.

Rik’in naq laj Isaias kiroksiheb’ jaljookil ru eetalil, wan naq ink’a’ nak’eeman reetal naq kixch’olob’ xyaalal li Jesukristo rik’in nimla wankilal. K’e reetal li Kolonel sa’ 2 Nefi 13:13; 14:4–6; 15:1–7; 16:1–7; 17:14; 18:14–15; 22:2. K’a’ru neke’xk’ut li raqal a’in chawu chirix a’an?

Sa’ li profeetil aatin sa’ 2 Nefi 19:6 tz’iib’anb’il junjunq lix k’ab’a’ li Jesukristo. Chan ru naq a’an xb’aanuheb’ li k’anjel a’an sa’ laa yu’am?

Chi’ilmanq ajwi’ Ulisses Soares, “Li Jesukristo: Laj ilol re li qach’ool,” Jolomil ch’utub’aj-ib’ re abril 2021.

2 Nefi 12–13; 15

Te’tuulanob’resiiq laj q’etq’et ut eb’ laj rahol re li ruchich’och’.

Laj Nefi kiril chi rub’elaj naq li q’etq’etil tixk’e chi sache’k lix tenamit (chi’ilmanq 1 Nefi 12:19). Jo’kan ut naq ink’a’ nasach qach’ool naq laj Nefi kixwotz rik’in lix tenamit lix tijom laj Isaias chirix li q’etq’etil. Sa’eb’ li ch’ol 12 ut 13, sik’eb’ li aatin kiroksi laj Isaias re xch’olob’ankil li q’etq’etil, jo’ taqenaqil ilob’aal ut laj q’etq’et. Sa’ 2 Nefi 15:1–24, k’e reetal li utz’u’ujinb’il aatin li naxch’olob’ xq’ajkamunkil li q’etq’etil. Chirix a’an naru nakayal xk’osb’al ru li xawil rik’in tz’aqal laa waatin laa’at. K’oxla chan ru naq taasik’ ru li tuulanil.

Chi’ilmanq ajwi’ “Capítulo 18: Cuidaos del orgullo,” Enseñanzas de los Presidentes de la Iglesia: Ezra Taft Benson (2014), 251–264.

2 Nefi 12:2–3

Li santil ochoch, a’an rochoch li Qaawa’.

Laj Isaias kixk’ab’a’in li santil ochoch “li tzuul re li rochoch li Qaawa’” (2 Nefi 12:2). K’a’ut naq li tzuul a’an jun chaab’il eetalil choq’ re li santil ochoch?

Chan raj ru taach’olob’ k’a’ut naq aajeleb’ ru li santil ochoch choq’ qe? Naru nakataw aana’leb’ chirix a’an sa’ 2 Nefi 12:2–3 ut li raatin li Awa’b’ej Russell M. Nelson, “Li santil ochoch ut laa musiq’ejil k’ojleb’aal” (Jolomil ch’utub’aj-ib’ re octubre 2021). A’ yaal li xawil, k’a’ru naraj li Qaawa’ naq taatzol ut taak’ul sa’ lix santil ochoch? K’a’ru aanumsihom laa’at aran?

Naru nakataweb’ li patz’om re li tz’ilok-ix choq’ re li recomendacion re ok sa’ li santil ochoch sa’eb’ li perel 36–37 re Choq’ re Xkawilaleb’ li Saaj: Jun tenq’ re xsik’b’al ru laa b’e. Naru nakawil li junjunq ut taapatz’ aawib’, k’a’ru naxk’ut li patz’om a’in chiwu chirix lix b’e li Qaawa’? Chan ru nikinixtenq’a “chi b’eek sa’ xb’e”?

Chi’ilmanq ajwi’ Temas del Evangelio, “Templos,” Biblioteca del Evangelio; “Taqe’q sa’ xb’een li tzuul,” Eb’ li B’ich, 4.

2 Nefi 12–19

Li Jesukristo tixtoj rix lix tenamit.

Us ta li maa’usilal kiril, laj Isaias kiwan ajwi’ royb’enihom chirixeb’ li kutan chalel. K’oxla xtz’ilb’al rixeb’ li raqal a’in. Tz’iib’a jun malaj wiib’ oxib’ chik li na’leb’ naxye li junjunq chi raqal chirix li qakutankil: 2 Nefi 12:1–5; 14:2–6; 15:20–26; 19:2–8. Jo’ nakaweek’a laa’at, k’a’ut naq aajel ru naq taqataw ruheb’ li raqal a’in?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Sik’ li k’a’ru nak’utun k’iila sut. Sa’eb’ li loq’laj hu naru naqataweb’ li eetalil li neke’xk’ut chiqu chan ru naq nak’anjelak li Qaawa’. Sa’ 2 Nefi 11–19, naru nakataweb’ li eetalil li neke’xk’ut chan ru naq li Qaawa’ naq’usuk chirix li maak ut chan ru naq naxkuyeb’ xmaak li ani neke’xjal xk’a’uxl.

Li na’leb’ re xtzolb’aleb’ li kok’al

2 Nefi 12:2–3

Li santil ochoch, a’an rochoch li Qaawa’.

• Laj Isaias kixk’ab’a’in li santil ochoch “li tzuul re li rochoch li Qaawa’.” Maare taawulaq chiruheb’ laa kok’al reek’asinkil rib’ jo’ chanru naq yookeb’ chi taqe’k chi tzuul naq yooqat chirilb’al 2 Nefi 12:2–3. Tenq’aheb’ chixtawb’aleb’ li ch’ol aatin sa’eb’ li raqal a’in li neke’xye k’a’ut naq wankeb’ li santil ochoch.

• Re xk’utb’esinkil xyaalalil li ch’ol aatin “laaʼo toobʼeeq chiru li ruqʼ xbʼe” li wan sa’ 2 Nefi 12:3, naru nakayiib’ jun ruq’ b’e chiru li ch’och’, li nak’amok sa’ xjalam-uuch jun li santil ochoch. Naq eb’ laa kok’al te’b’eeq chiru li b’e, naru te’xye k’a’ru naru neke’xb’aanu re b’eek sa’ xb’e li Qaawa’.

• Laa kok’al naru neke’xyiib’ xjalam-uucheb’ naq yookeb’ chi xik sa’ li santil ochoch. Naru ajwi’ neke’xb’icha jun li b’ich chirix li santil ochoch, maare “Sa’ li santil ochoch” (B’ichleb’aal choq’ reheb’ li Kok’al, 99). Tenq’aheb’ chixtawb’aleb’ ch’ol aatin sa’ li b’ich li neke’xk’ut k’a’ru li santil ochoch ut k’a’ru nab’aanuman aran.

2 Nefi 11:4–7; 17:14; 19:6

Li Jesukristo a’an lin Kolonel.

• Neke’tawman junjunq reheb’ lix k’ab’a’ li Jesukristo sa’ 2 Nefi 11:4–7; 17:14; 19:6. Tenq’aheb’ laa kok’al chixtawb’aleb’, ut tz’ilomaq rix k’a’ru xyaalalil li junjunq. Jo’ eetalil, “Kristo” naraj naxye “li yulb’il” ut “Emmanuel” naraj naxye “li Dios qik’in.” K’a’ru neke’xk’ut li k’ab’a’ej a’in chiqu chirix li Jesus?

• K’ut junjunq xcha’al li video “El Niño Jesús” (Biblioteca del Evangelio) b’ar wi’ neke’k’utman li kristiaan naq ke’ril li Jesus xb’een wa. Xaqab’ li video naq nak’ulman a’an, ut patz’ reheb’ laa kok’al k’a’ ta wi’ ru ke’reek’a li kristiaan sa’ li hoonal a’an. K’a’ raj ru taqeek’a wi ta toowanq raj chaq aran? K’a’ru taqeek’a naq taqil a’an wi’chik?

2 Nefi 15:20

Laj Satanas naxyal xsachb’al inna’leb’ chirix li k’a’ru us ut li k’a’ru ink’a’ us.

• K’ut chiruheb’ laa kok’al k’a’ruhaq k’a malaj ra re, jo’ jun lamuux, ramb’il rix rik’in xramb’al li kab’. Ilomaq 2 Nefi 15:20. Chan ru naxyal laj Satanas xk’eeb’al chi ilmank li maa’usilal choq’ chaab’ilal? Naru ajwi’ nakak’ut jun k’asal rik’in meer re lix tiklajik li video “Serán libres” (Biblioteca del Evangelio). K’a’ut naq laj kar naxjal rilb’al li chapleb’ kar? K’a’ut naq laj Satanas naxjal rilb’al li maak? Chan ru nokoxtenq’a li Jesukristo re naq ink’a’ toob’alaq’iiq xb’aan laj Satanas?

Serán libres

Tex’ach’ab’aaq

Re xtawb’al xkomon chik li na’leb’, chi’ilmanq li hu Amigos re li po a’in.

Li santil ochoch re li Ciudad de Panama. “Taaxaqab’aaq li tzuul re li rochoch li Qaawa’ sa’ xb’eeneb’ chaq li ninqi tzuul, … ut chixjunileb’ li tenamit te’xik rik’in” (2 Nefi 12:2).