Vosoti, mai vei Greg Olsen. Vakayagataki ena veivakadonui. www.GregOlsen.com

1–7 ni Epereli: “Dou Veivakaduavatataki Mada Kei na Kalou ena Vuku ni Veisorovaki i Karisito”

Jekope 1–4

Era vakatokai Nifai o ira na Nifaiti me nodra “dauniveitaqomaki levu” (raica na Jekope 1:10). A taqomaki ira talega mai na veika rerevaki vakayalo, ka vakasalataki ira mai na ivalavala ca ka vakauqeti ira me ra lako mai vei Karisito. Ia na itavi oqori sa vakataqari vei Jekope, ka a vakatabuya ko Nifai me bete ka ivakavuvuli (raica na Jekope 1:18). Sa mai vakila o Jekope na ilesilesi me vakaroti ira vakadoudou era sa “tekivu cakava tiko na ivalavala ca” ka veivakacegui vei ira “na yalo sa mavoa” era sa vakararawataki ena nodra ivalavala ca eso tale (raica na Jekope 2:5–9). Me na cakava ruarua vakacava o koya? Ena dusimaki ira vei Jisu Karisito—baleta na ilawalawa ruarua oqo e gadreva na veivakabulai ni iVakabula (raica na Jekope 4). Me vakataka ga na itukutuku i Nifai sa tu e matana, na ivakadinadina i Jekope sa veikacivi mo “dou veivakaduavatataki mada kei na [Kalou] ena Vuku ni Veisorovaki i Karisito” (Jekope 4:11

Vakasama ni Vuli ena iTikotiko kei na Lotu

Jekope 1:6–8, 15–19; 2:1–11

Sa tiko “na noqu ilesilesi mai vua na Turaga.”

Kivei Jekope, na vakavulici ni vosa ni Kalou sa dua na “ilesilesi mai vua na Turaga,” ka sa cakacaka vagumatua kina me “vakalevulevuya na [nona] itavi” (Jekope 1:17,19 Na cava na ibalebale ni veimalanivosa oqo vei iko a vakayagataka o Jekope? Vakasamataka mada na cava e cakava e dua na matailoilo ni wilivola. E solia beka vei iko e dua na vakasama? Ni o vakasamataka vakatitobu na Jekope 1:6–8, 15–19 kei na 2:1–11, vakasamataka na veitalai e tu vua na Turaga me nomu. Na cava o sa vakauqeti kina mo na “vakalevulevui” ira kina?

Raica talega na “Whom the Lord Calls, the Lord Qualifies,” ena Nodra iVakavuvuli na Peresitedi ni Lotu: Thomas S. Monson (2022), 209–20; “Rise to Your Call” (vidio), Gospel Library.

Jekope 2:12–21

“Kakua ni vakalaiva na viavialevu ni lomamudou oqo me vakarusa na yalomudou!”

E dua na leqa vei ira na Nifaiti ena nodra dokadoka kei na vakanamata ki na iyau (raica na Jekope 2:13), ka sega ni duatani vei ira na leqa oya se na nodra siga. E vakacerecereya vakacava o vunimeca na lomana na iyau ena gauna nikua? Ni o wiliki oti na Jekope 2:12–21, vakamacalataka ena nomu vosa ga na sala e vinakata na Kalou mo raica kina na iyau vakavuravura. Na serenilotu me vaka na “Because I Have Been Given Much” (Serenilotu, naba 219) e rawa ni vakarautaka na ikuri ni rai titobu. Na cava o vakauqeti kina mo cakava ena veika o sa vulica tiko?

Jekope 2:22–35; 3:10–12

Sa marautaka na Turaga na tiko savasava.

Ni o wilika na Jekope 2:22–35; 3:10–12, na cava o sa raica e vukei iko mo kila vakavinaka na vuna sa rui bibi kina vua na Kalou na tiko savasava? Na cava eso na revurevu ca ni bula tawasavasava—ena gauna nei Jekope kei na noda gauna nikua? Na cava soti na veivakalougatataki ni bula savasava?

E vakavulica o Elder David A. Bednar ni da bula tiko “ena dua na vuravura sa dau torocake tikoga na nona vakalialia ni sa vakalou na vakatubukawa” (“Eda Vakabauta na Tiko Savasava,” Liaona, Me 2013, 41–44). O na vukei ira vakacava na tani me ra kila na vuna o talairawarawa kina ki na lawa ni tiko savasava? E dua na vanua vinaka me tekivu kina sai koya na ivakamacala ni ivakatagedegede ni Kalou me baleta na yalo ni veiyacovi kei na veimaliwai ena “Sa ka tabu na yagomu” ena Me iSakisaki ni iTabagone: Na iDusidusi ni Digidigi (tabana e 22–29). Na cava tale o kunea ena ivurevure oya ena vukei iko mo vakamacalataka na vuna o bulataka kina na lawa ni tiko savasava?

Sa rawa mo raica na ikuri ni isaunitaro ena itukutuku nei Elder Bednar ka tukuni tiko e cake se ena vidio “I Choose to Be Pure” (Gospel Library).

E duidui vakacava na ivakatagedegede ni bula veiyacovi savasava ni Kalou mai na veitukutuku tale eso o na rawa ni sotava? Na cava soti na veivakalougatataki ni tiko savasava?

Raica talega na Ulutaga ni Kosipeli, “Dodonu,” Gospel Library; “Veivinakati Vaka-Mataqali Vata” ena “Veivuke ni Bula” vasokumuni ena Gospel Library.

Jekope 4

Sa rawa niu veivakaduavatataki vata kei na Kalou ena Veisorovaki i Jisu Karisito.

E vakamasuti ira na nona tamata o Jekope me ra “veivakaduavatataki ira [vua na Kalou] ena veisorovaki i Karisito” (Jekope 4:11). E dua na ivakamacala ni veivakaduavatataki sai koya me vakalesui ki na veitokani se duavata. Ni o vakasamataka vakatitobu na nomu bula, vakasamataka e dua na gauna o a vakila beka ni o yawa mai vua na Tamada Vakalomalagi. E vukei keda vakacava na iVakabula me vakalesuimai na veimaliwai oqo? Na ivakasala cava o rawa ni kunea ena wase oqo e vukei iko mo veivakaduavatataki vata kei na Kalou? (raica na tikina e 4–14).

Na ikuri ni veivakararamataki cava o na rawata mai na Maciu 5:23-24? Ena vukei iko vakacava na iVakabula mo veivakaduavatataki tale kei na Kalou—kei ira na tani?

Raica talega na 2 Nifai 10:24.

Jekope 4:8–18

Au sa rawa ni lako tani mai na mataboko vakayalo niu raimatua vua na iVakabula.

Ni segata tiko o Jekope me ra vuki vakataucoko na nona tamata vua na Turaga, e vakaroti ira o koya me ra kakua ni vakamatabokotaki vakayalo ka kakua ni cakitaka na “veivosa matata” ni kosipeli (raica na Jekope 4:13–14 Mai na Jekope 4:8–18, na cava eda rawa ni cakava meda levea na mataboko vakayalo?

Raica talega na Quentin L. Cook, “Looking beyond the Mark,” Ensign, Mar. 2003, 40–44.

Ni veivakavulici o Koya, a vakayagataka na iVakabula na veivakatauvatani ki na bula e veisiga. Na vosa vakatautauvata i Jisu a vukei ira na tamata mera kunea na dina vakayalo ena veika era dau sotava. Tovolea mo cakava vakakina ni o veivakavulici. Me vakataka, ni vakavulici na Jekope 4:8–18, sa rawa mo tarogi ira na vuli kevaka era sa bau dikevi beka vakavuniwai na matadra. A vakadikeva beka vakacava o vuniwai na rai ni matadra vakayago? Eda na dikeva beka vakacava na noda rai vakayalo?

Me ikuri ni vakasama, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

Jekope 2:8

Na Kalou e vakabula na yalo sa mavoa.

• Me vukei ira na luvemu me ra kila na sala e rawa ni vakabulai kina e dua na “yalo mavoa” e rawa ni o veivosakitaka vata na sala e mavoa kina na yagoda kei na cava e vukei ira me ra vakabulai. Sa rawa vei ira na luvemuni mera veivosakitaka na gauna era a mavoa kina kei na cava a vukei ira mera vakabulai. E rawa sara mada ga ni o vakaraitaka vei ira na ivadreti kei na wainimate me tiki ni veivosaki oqo. Sa rawa mo wasea vei ira na sala sa vukei iko kina na iVakabula ni sa gadreva na yalomu me vakabulai.

Jekope 2:17–19

Au sa rawa ni vukei ira era vakaleqai tu ena noqu veiwasei vei ira.

• Eso na tamata ena gauna nei Jekope era a vutuniyau vakalevu, ia era a sega ni via wasea vei ira na dravudravua na veika e tu vei ira. Ni o wilika na ivakavuvuli nei Jekope vei ira oqo ena Jekope 2:17–19, sa rawa ni o solia vei ira na luvemu na iyaloyalo se iyaya me ra taura tu na vosa se malanivosa ena veitikina oqo. Sa rawa mo vakamacalataka ni ko sa wasea tiko vei ira na veika oqo; sa rawa mo qai sureti ira me ra wasea vata kei iko se veiwasei vataki ira na iyaya eso oqori. Veivosakitaka na veika o vakila ni o wasea. Na cava tale e rawa ni da wasea vei ira na tani me vukei ira me ra vakila na marau?

• Ni oti nomuni wilika vata na Jekope 2:17, sa rawa vei ira na luvemuni me ra cavuta eso na veivakalougatataki e wasea vei ira na Tamada Vakalomalagi. Na cava na vuna e vinakata kina o Koya me da dau veiwasei vakataki keda?

Jekope 4:6, 10–11

Sa rawa niu vaqaqacotaka na noqu vakabauti Jisu Karisito.

• Na nona vakabauti Karisito o Jekope a kaukauwa sara ka sega ni rawa me yavalati. Mo vakavulica vei ira na luvemu mera tara cake vakaoqo na nodra vakabauta, ka rawa ni o tarogi ira me baleta na veika eda cakava me qaqaco cake kina na yagoda. Na cava eda rawa ni cakava me da vakaukauwataka cake kina noda vakabauti Jisu Karisito? Wilika vata na Jekope 4:6 mera vukei na gone me ra kila na veika era a cakava o Jekope kei na nona tamata me kakua kina ni “yavalati” nodra vakabauta.

• E dua na sala e rawa ni vukei ira na luvemu mera kila vinaka na ibalebale ni “tawayavalati rawa” na nodra vakabauta sai koya me laurai e dua na vunikau levu ka kerei ira me ra kurea na tabana yadua. Me ra qai tovolea me ra kurea na toloni vunikau. Na cava e dredre kina na kurei ni toloni vunikau? Na malanivosa cava ena Jekope 4:6, 10–11 e vakamacalataka na veika e rawa ni da cakava me kua kina ni yavalati rawa noda vakabauti Jisu Karisito?

  

  Me vaka na tolo ni vunikau, na noda vakabauti Karisito ena rawa ni “tawayavalati rawa.”

• Na ikuri ni vakatautauvata mera vakavulici kina na luvemu me baleta na vakabauti Jisu Karisito tawayavalati rawa, raica na Neil L. Andersen, “Covulaca Vakayalo” (Liaona, Me 2014, 18–21; kei na vidio “Spiritual Whirlwinds“) se “The Wise Man and the Foolish Man” (Nodra Sere na Lalai, 281; raica talega na Maciu 7:24–27).

Covulaca Vakayalo

Me kua ni dreti iko sobu na covulaca. Oqo na nomu gauna—tudei tiko me vaka na tisaipeli ni Turaga o Jisu Karisito.

Me ikuri ni vakasama, raica na ilavelave ni vula oqo ena iTokani ena kena mekasini.

Au na vakauta na Nodra Vosa ki Liu (Jekope na Qasenivuli), mai vei Elspeth Caitlin Young